SOMO LYA 40
Gurhe Rhwakayorha Rhuchere omu Masu ma Mungu?
Ba nka wawaza ok’omuzere w’obuzigire akaba ali arheganya omwana wage w’oburhabana embere aje oku masomo. Anachihangana omwana ayoge, ayambale ebintu bikwirire binachere. Echola chanarhuma agenderera kugwarha amagala makwirire n’abandi banabona oku abazere bage banamushishikala bwinja. Konakuguma, Darha w’obuzigire, Yehova, alonzeze rhube eyi rhuchere—embuga aliko kandi n’omu mawazo, omu luderho n’omu bijiro. Amango rhuchere rhunachilerhera enyungu rhwewe rhwenyine, n’okumulerhera olukengo.
1. Gurhe rhwakaba bantu bachere embuga?
Yehova arhubwirire: “Mukwanene mube bachesibwa.” (1 Petro 1:16) Obuchesi buyerekene omuntu ochere embuga, omu mawazo, omu luderho n’omu bijiro. Rhwakaba bantu bachere embuga omu kuyoga oku kahunda, omukujira omu kuntu emishangi yerhu, enju, n’omutugari byoshi biyorhe bichere binapangirwe bwinja. Rhwakashuba rhabala kujira obusafi bw’Echumbi lyerhu ly’Obwami. Omu kuyorha rhuchere embuga, rhwalerhera Yehova olukengo.—2 Wakorinto 6:3, 4.
2. Ngeso zihe rhukwanene kuyaka yi rhuba bantu bachere?
Ebiblia erhuhirire omurhima “rhuchichese rhwewe rhwenyine ku buli zinga ly’omubiri n’eroho.” (2 Wakorinto 7:1) Che chirhumire rhunachiyasya buli choshi chakabihya omubiri gwerhu n’obwenge bwerhu. Enkengero zerhu zikwanene zisimise Yehova, che chirhumire rhukwanene rhujire okwerhu koshi, rhukabulire buli nkengero zibi zoshi. (Zaburi 104:34) Kandi rhwanachihangana rhukolese oluderho luchere.—Osome Wakolosai 3:8.
Bichi bindi byakarhuchesa embuga, omu bwenge, omu luderho n’omu bijiro? Hali bintu biguma byakazingisa omubiri gwerhu. Bobuno, rhunachiyasa ebintu bibi; nk’okunywa erhabi, erumba, okukanja ebirenga, n’amafumu m’okurhamiiza marhayemererwe chiro n’esheriya. Okuchiyasya ebyola byoshi kunarhuma rhwagwarha amagala menja, n’okuyerekana oku rhukengere oluhembo lw’akalamo rhwahaabirwe. Rhunashuba kulwisa rhuyorhe rhuchere omu bwenge, omu luderho n’omu bijiro, omu kukabulira ebijiro bibi; nk’okuchisula omu kulonza kumala enyorha y’echijiro ch’obuhya, n’okulola epornorgafi. (Zaburi 119:37; Waefeso 5:5) Byakakomera okugala kuchuba ezo ngeso, aliko Yehova akarhurhabala.—Osome Isaya 41:13.
HUMBA BWENENE
Lola gurhe okuba muntu ochere embuga kunaha Yehova olukengo, na gurhe omuntu akachuba ebijiro birhachere.
3. Obusafi bw’embuga bunakengesa Yehova
Rhwakayunva amawazo ma Yehova oku bilolere obusafi, omu kusuzuma amarhegeko ahaga Abaizraeli ba mira. Osome Kutoka 19:10 na 30:17-19, muje mwaganira kw’ebila bibazo:
Bichi olula lwandiko lurhuyerekere oku bilolere okuntu Yehova anabona obusafi b’omubiri?
Ngeso zihe zinja zakakurhabala obe muntu ochere?
Y’omuntu aba musafi byakahema ebisanzi n’obushiru. Aliko byakashobokana na chiro rhwaba rhulamire ngahe, rhube bakene, changwa bachire. Ziha EVIDEO, muje mwaganira kw’echila chibazo.
Bulagurhe okujira ebintu byerhu byoshi biyorhe bichere binapangirwe bwinja, kunakengesa akasi kerhu k’amahubiri?
4. Ochube engeso zibi
Yehova akarhurhabala rhuhime engeso mbi
Akaba onanywa erhabi awo onarhamiira, wakaba ey’omenyere kangana gurhe okuchuba engeso zibi kuba kukomere. Bichi byakakurhabala? Lola eby’ezola ngeso zinakukolako. Osome Matayo 22:37-39, muje mwaganira nka gurhe okunywa erhabi, okukolesa kubi amafumu m’okulalusya, kwakahuma oku . . .
bwira b’omuntu haguma na Yehova.
oku bantu b’omulala n’abaturanyi.
Ojire omupango g’okukurhabala kuchuba engeso mbi.a Ziha EVIDEO.
Osome Wafilipi 4:13, muje mwaganira kw’echila chibazo:
Nka gurhe okukoomera kujira ebinja nk’okuyiga Ebiblia, okusalira, okuhika oku mbuganano z’echibaga, kunarhabala omuntu ahime engeso zibi?
5. Ohige amawazo mabi n’ebijiro bibi
Osome Wakolosai 3:5, muje mwaganira kw’ebila bibazo:
Bichi birhuyerekere k’okulola epornografi, okurhumirana emesaje awo amafoto m’eby’obubaraga, n’okuchisula omu kuchimalira enyorha y’echijiro ch’obuhya bili bintu birhachere omu masu ma Yehova?
Owazize oku biyunvikene okubona Yehova akanihira oku rhwaba bantu bachere omu bwenge, omu luderho n’omu bijiro si? Bulagurhe?
Lola gurhe wakalwisa amawazo marhachere. Ziha EVIDEO.
Yesu alihaanire omufano guyerekene oku rhukwanene kurhola esimikiro n’okunajira echi rhukwanene kujira aho han’aho yi rhuyorha rhuchere omu bwenge, omu mawazo, n’omu luderho. Osome Matayo 5:29, 30, muje mwaganira kw’echila chibazo:
Chiro akaba oku ahala Yesu arhaliri alonza kuderha oku rhukwanene rhuchibabaze, aliyerekene oku rhukwanene kujira echi rhwajira han’aho. Bichi omuntu akajira aho han’aho yagala kulekana n’amawazo mabi?b
Akaba oli walwisa y’ohima amawazo mabi, Yehova abwene byoshi oli wajira oku biherhe akachiro. Osome Zaburi 103:13, 14, muje mwaganira kw’echila chibazo:
Akaba oli walwisa y’ohima engeso mbi, nka gurhe olula lwandiko lukuhirire omurhima ogenderere kulwisa?
Okuhopa, arhali k’okugambwa!
Byakayoroha omuntu okuwaza mpu, ‘nagambirwe, bobuno nava naleker’aho.’ Aliko obe nka wawaza: Omuntu onajira esporo y’okulibirha omulindi, arhali mpu bulala anyerere amachikuba, eyi honahosh’aho amahimwa, awo mpu anali nk’orhaza rhondera. Konakuguma, okuhopa arhali k’okuderha oku hosh’aho wamagambwa mu byoshi oli wajira y’ochuba engeso mbi. Arhanali k’okuderha oku hosh’aho ebiwajirire byoshi omu kulwisa-lwisa byamashanduka. Okuhopa chili chintu chibaho, byakahika aliko eyi kunali nka kunyerera omu njira omuntu alimo eganire ewa kuchuba. Orhavunikaga omurhima! Kugerera oburhabale bwa Yehova, wakagala kuchuba engeso zibi.
HALI ABANTU BANADERHA: “Byansharhangenemo, ntakachigala kuleka.”
Lwandiko luhe wakakolesa omu kuyereka omuntu oku akagala kuchuba engeso zibi kugerera oburhabale bwa Yehova?
OKU BUGEKE
Rhunasimisa Yehova amango omubiri, obwenge, n’olugenzi lwerhu byamayorha bichere.
Rhuchiyibusye
Bulagurhe bili by’akamaro okuba bantu bachere?
Gurhe wakayorha ey’ochere embuga?
Gurhe wakajira y’amawazo mawe, n’olugenzi lwawe biyorha bichere?
EYINDI MYAZI
Bintu bihe birhakomere wakajira y’oyorha ochere embuga, chiro akaba orhali muchire?
Lola ebintu wakayinja wajira byakakurhabala oleke kunywa erhabi.
Suzuma bwinja obone obubi bw’epornografi.
“Epornografi—Eherhe Engaruka Awo Nta Bubi?” (Omunara g’Omulanzi, Lusiku 1, Mwezi gwa 8, 2013)
Lola gurhe mulume muguma ahimaga engeso y’okulola epornografi nobo yali yamusharhangenemo.
“Naliri Nahopa Kanene Kanene, Aliko Buzinda Nagala” (Omunara g’Omulanzi Ni. 4, 2016)
a “Omwazi “Ebi Wakajira y’Ogala Kuleka Kunywa Erhabi” guyerekenwe omu chigabi Eyindi Myazi mu linola somo, gwakuyereka ebi wakajira byanakurhabala ogale kuleka okunywa erhabi.
b Y’obona ebyakakurhabala kuchuba engeso y’okuchisula omu kuchimalira enyorha y’echijiro ch’obuhya, olole omwazi “Gurhe Nakachuba Engeso y’Okuchisula omu Kuchimalira Enyorha y’Echijiro ch’Obuhya?” omu chitabu Ebibazo Emisole Enabaza—Ebishubizo Binarhabala, Volume 1, sura 25.