SOMO LYA 38
Okenge Oluhembo lw’Akalamo
Hali bintu binene binja rhwakakola n’okubisiimira, bulala rhulamire. Na chiro rhwaba rhuli omu bibazo, rhwakanachisiimira bintu biguma-biguma omu kalamo. Gurhe rhwakayereka Yehova eshukrani oku luhembo lw’akalamo arhuhere? Na bulagurhe bili by’akamaro bwenene rhuyerekane eshukrani?
1. Bulagurhe rhukwanene rhukenge akalamo?
Rhukwanene rhukenge akalamo bulala luli luhembo lurhengere emwa Darha w’obuzigire, Yehova. Yewe ye “shoko y’akalamo”—yewalemaga buli choshi chilamire. (Zaburi 36:9) “Yewe yenyine yenaha abantu boshi akalamo n’omuka n’ebintu byoshi.” (Matendo 17:25, 28) Yehova anarhuha byoshi rhukeneere yi rhugenderera kulama. Aliko olekere n’echo, ajirire okuntu rhuyinje rhwasiimira akalamo.—Osome Matendo 14:17.
2. Gurhe rhwakayereka Yehova eshukrani oku luhembo lw’akalamo arhuhere?
Kurhenga nyoko aheka obukule bwawe, eyi Yehova anakulagako. Kugerera oburongozi bw’eroho lya Mungu, muguma omu bakozi bage oyirikirwe Daudi, abwira Mungu ntya: “Amasu mawe malimbwene chiro na kurhenga inchili chibumburugu.” (Zaburi 139:16) Akalamo kawe kaherhe akachiro bwenene embere za Yehova. (Osome Matayo 10:29-31.) Anayunva kubi bwenene nka hali omuntu wamaniga owindi changwa achinige oku bulonza.a (Kutoka 20:13) Kandi byakaluma Yehova bwenene nk’abwene yi rhwahanyagaza akalamo kerhu, changwa rhurhalagire n’okurhola emipango y’okulanga bwinja akalamo kerhu n’akabandi. Amango rhwamashishikala akalamo kerhu bwinja n’okukenga ak’abandi, eyi rhwamayerekana ku rhuherhe eshukrani k’olula luhembo lwinja bwenene.
HUMBA BWENENE
Lola biguma omu biwakajira omu kuyerekana eshukrani oku luhembo lw’akalamo.
3. Oshishikale amagala mawe
Abakristu bachihaanire emwa Yehova banakolesa buli chigabi ch’akalamo kabo omu kukolera Yehova. Bali nk’abahaanire emibiri yabo nka nterekero emwa Mungu. Osome Waroma 12:1, 2, muje mwaganira kw’ebila bibazo:
Bichi bikwanene bikushunike oshishikale amagala mawe?
Njira zihe ziguma wakakolesa omu kujira ntyo?
4. Ochilange n’ebyakakukoromesa changwa byakakuyirha
Ebiblia erhuhirire omurhima rhurhajiraga ebintu byakaba m’obuhanya. Ziha EVIDEO oyunve bintu biguma-biguma wakajira y’oyorha omu bulanzi.
Osome Mezali 22:3, muje mwaganira gurhe woyo n’abandi mwakaba omu bulanzi . . .
omu nju yenyu.
ah’onakolera.
amango muli oku karasisi (esporo).
amango oli watembeza changwa yibakutembeza.
5. Okenge akalamo k’omwana orhaza kuburhwa
Daudi aliyerekene oku Yehova analaga ku byoshi byakahikira omwana ochili wakula omu nda ya nyina. Osome Zaburi 139:13-17, muje mwaganira kw’echila chibazo:
Omu masu ma Yehova, akalamo kanarhondera, ey’omukazi aheka obukule, changwa si ey’aburha?
Amarhegeko Yehova ahaga Abaizraeli ba mira, malilangire abakazi bali bukule n’abana babo barhaza kuburhwa. ’Osome Kutoka 21:22, 23, muje mwaganira kw’ebila bibazo:
Gurhe Yehova aliri abona omuntu wajirire agisida amayirha omwana ochili omu nda?
Gurhe akajire achiyunva oku wamuyirhaga n’obulonza?b
Gurhe woyo obwene amala mawazo ma Mungu?
Haba n’omukazi oyinji akachiro k’akalamo, akabona nka ntakwindi ajage ajira olekere okukula obukule. Osome Isaya 41:10, muje mwaganira kw’ebila bibazo:
Akaba omukazi ali ahidikwa mpu akule obukule, inde akwanene kuhema oburhabale? Bulagurhe?
HALI ABANTU BANADERHA: “Omukazi aherhe ehaki y’okuchishoga akaba akula obukule changwa nanga—si mubiri gwage.”
Bichi bikuyemezeze oku Yehova anakenga akalamo k’omuzere oli bukule, n’ak’omwana wage orhaza kuburhwa?
OKU BUGEKE
Ebiblia erhuyigirize ku rhusime, rhukenge, rhunalange oluhembo lw’akalamo Yehova arhuhere. Biheberwe mw’akalamo kerhu n’ak’abandi.
Rhuchiyibusye
Bulagurhe akalamo k’omuntu kaherhe akachiro emwa Yehova?
Gurhe Yehova anachiyunva ey’omuntu achiniga awo ayirhe owindi oku bulonza?
Bulagurhe oherhe eshukrani oku luhembo lw’akalamo?
EYINDI MYAZI
Gurhe rhwakasingiza Yehova oku luhembo lw’akalamo arhuhere?
Mungu akababalira omukazi walikulire obukule si? Yunva echishubizo ch’echola chibazo,
“Bichi Ebiblia Ederhere oku Bilolere Okukula Obukule?” (Mwazi guli oku jw.org)
Lola nka gurhe okuntu Mungu anabona akalamo, kukwanene kurhuyerekeze amango rhwamachishoga ebintu rhwachisimisa nabyo.
Gurhe omuntu akajira nk’aherhe amawazo m’okuchiniga? Lola gurhe Ebiblia yakarhabala.
“Yinachifija Olufu—Ebiblia Yakantabala Nkamperhe Amawazo m’Okuchiniga Si?” (Mwazi guli oku jw.org)
a Yehova analaga bwenene ku bala boshi bavunikire omurhima. (Zaburi 34:18) Anabona amalumwa yibayunva makarhuma bawaza ku bachinige, analonzeze abarhabale. Y’obona ebyakarhabala omuntu akabulire amawazo m’okuchiniga, osome omwazi “Yinachifija Olufu—Ebiblia Yakantabala Nkamperhe Amawazo m’Okuchiniga Si?” guyerekenwe omu chigabi Eyindi Myazi mw’elila somo.
b Balala bachigerere kukula obukule, barhakwanene kuva bachiyunva banyamagosa kuchubusya olugero; bulala Yehova akababalirabo. Y’obona amandi mafasiriyo, olole omwazi “Bichi Ebiblia Ederhere oku Bilolere Okukula Obukule?” guyerekenwe omu chigabi Eyindi Myazi mu linola somo.