ʼƗKITƗARIKA 12
¿Tita metiupareewiwe Bibliatsíe pemɨtiyuʼɨkitɨaka?
Bibliatsíe tiyuʼɨkitɨatɨ, xaɨtsíe meuyaní hepaɨ witsipɨtiyukuhekɨkɨare. Mɨɨtá heiwa mɨpaɨ pɨkatikuyɨne. Xɨari heiwa pepɨtiuyuʼiwawiyawe xɨka ʼaixɨ ʼaneni pemiyeweiyani petiyuʼɨkitɨatɨ. ¿Titayari petiyutɨrɨkariyani petiyuʼɨkitɨatɨ? ¿Tita metiupareewiwe pemiyeweiyani tseepá kepemɨranuyemié?
1. ¿Titayari waɨkawa reuyewetsé Bibliatsíe mɨtiyuʼɨkitɨaka?
«Yuútsi nukieya mayenierekɨ metá mɨtikemakɨ» (Hebreos 4:12). Biblia xapa pɨhɨɨkɨ kwinié mɨrayeʼaxé Yuútsi kemɨtiyukuhɨawe mayeʼuxekɨ metá ʼaheetsíe mɨyuhɨawekɨ. Metá mɨkɨtsíe waɨkawa xeikɨ́a pepɨkaretimaní, tsiere metsipareewieni ʼaixɨ tiʼaneneeme pemɨranuyewawanikɨ metá tita temɨtetakwewie pemɨranunakekɨ. Matsitá tita kwinié mɨrayeʼaxé pɨhɨɨkɨ tita Bibliatsíe pemɨretimaní Jehová hamikuya pemayaanikɨ. Kepauka ʼekɨ niukieyatsíe pemɨtiuyutiʼɨkitɨwa, pepɨtikuhayeikawa tɨrɨkariyaya ʼatuukaaritsíe ʼaixɨ metikupareewiwanikɨ.
2. ¿Titayari kwinié rayeʼaxé temɨtehamaiká tita mɨtiyuri Bibliatsíe timieme?
Mɨtiyuri Bibliatsíe mɨtiʼɨkita yeme kwinié pɨrayeʼaxé, ʼayumieme mɨkɨtsíe ʼipaɨ pɨtatikuʼiniwa: «Tita mɨtiyuri tineunanai metá pepɨkaʼikutuayani» (Proverbios 23:23). Xɨka tetehamaiká kemɨrayeʼaxé tita mɨtiyuri Bibliatsíe, tepɨyuwaɨriya teteyuʼɨkitɨatɨ tseepá ketemɨteʼanuyehú (nakaterɨwa Proverbios 2:4, 5).
3. ¿Jehová ʼakɨmana ketiyurieni pemɨtiyuʼɨkitɨakakɨ?
Jehová Tiwewiekame metá Naime mɨtikema mɨhɨɨkɨkɨ pɨʼahamiku, ʼaixɨ merakumaté metá metsiheupareewimɨkɨ waɨkawa heetsiena pemɨrakumaikakɨ. Yuútsi niukieya kanaineni: «Pɨxetsiʼayeitɨwa xemɨtehauyehɨakakɨ metá xehautɨrɨkawitɨ yexemɨtehauyuriekunikɨ» (nakaterɨwa Filipenses 2:13). ʼAyumieme, xɨka ʼekɨ pareewiya peheuyehɨaká pemɨtiyuʼɨkitɨakakɨ nutsɨ yapemɨtikuyuruwanikɨ tita pemɨretimamateke, mɨkɨ metsiupareewiwe. Metá tsiere, xɨka tɨrɨkariya peheuyehɨaká kepauka haxa tiʼanemetsíe pemɨtiuyemieni nutsɨ xɨka hiipatɨ memetsiʼinɨatatɨweni, mɨkɨ tɨrɨkariya metsiyetuirieni. Jehová pareewiya kenewawirieka Bibliatsíe petiyuʼɨkitɨatɨ pemɨkatikuhayeikawanikɨ (1 Tesalonicenses [1 Tetsarunikatari] 5:17).
MATSI WAƗKÁ TINETIMAʼÍ
Paatsɨ́ temɨtexeiya kepemɨtiuyuriwe Bibliatsíe petiyuʼɨkitɨatɨ pemɨkatikuhayeikawanikɨ, tseepá hiipatɨ kememutiyuane yakatixaɨ tuukaari pemɨkarexeiya. Metá ʼariké tepɨtexeiya Jehová kemɨʼatiupareewiwe pemɨkatikuhayeikawanikɨ.
4. ʼAʼɨkitɨarika Bibliatsíe kwinié pɨrayeʼakaní
Heiwa waɨkawa piinite tepɨteʼayexeiya, ʼayumieme tuukaari tepɨkaʼukaxexeiyá Bibliatsíe temɨteyuʼɨkitɨakakɨ. ¿Mɨɨtá keteteʼuyuriwawe? Xenakaterɨwa Filipenses 1:10 metá eteneutixaata ʼikɨtsíe:
Kepeʼutayɨwe, ¿«tita kwinié mɨrayeʼaxé» tihɨɨkɨ?
¿Kepetiuyuriwe ʼaʼɨkitɨarika Bibliatsíe pemanuyehaitɨakakɨ?
Xɨka xaritá xiekari peukayeme ʼariketá tetexi peʼukayatsá, tetexi pɨkatinakiré.
Xɨkatá, meri tetexi peʼukayatsá, rixɨ́a naitɨ xiekari pɨtiunakiriwe. Yaxeikɨ́a tsiere, xɨka ʼatuukaaritsíe meri peranuyehaitɨaka «tita kwinié mɨrayeʼaxé», mɨkɨtsíe pepɨrayeʼatɨani metá kuxi tuukaari pepɨhɨni tixaɨtɨtsíe timieme.
Teuteri meputiwewiya Yuútsi memakumaikakɨ metá memeyexeiyanikɨ, Bibliatsíe teteyuʼɨkitɨatɨ pɨtatsikupareewiwa mɨpaɨ temɨtekuyuruwani. Xenakaterɨwa Mateo 5:3 metá xeteneutixaata ʼikɨtsíe:
Xɨka taʼɨkitɨarika Bibliatsíe tehanuyehaitɨatsitɨaka, ¿ketatiupareewiwe?
5. Pepɨkatikuhayeikawani petiyuʼɨkitɨatɨ tseepá hiipatɨ yamemɨkatenakiʼerie
Hiipatɨ mematsiʼutiʼimaiyawe Bibliatsíe pemɨkatiyuʼɨkitɨakakɨ. Paatsɨ́ tinetimaʼí Francesco heetsíe. VIDEO xeneuxeiya metá xeteneutixaata ʼikɨtsíe:
¿Kemeʼutiyua Francesco nuiwarimama metá hamikumama, mɨtiwarutahɨawixɨtsíe tita mɨtiyuʼɨkitɨakai?
¿Títakɨ ʼaixɨ tiuyɨ́ mɨkatiuhayewaxɨkɨ?
Xenakaterɨwa 2 Timoteo 2:24, 25 metá xeteneutixaata ʼikɨtsíe:
¿ʼAnuiwarima metá ʼahamikuma kemeʼutiyuane pemɨtiyuʼɨkitɨakɨ?
Maine hepaɨ temɨteʼakaterɨwaxɨtsíe, ¿kepeʼutayɨwe xɨka xewitɨ merahɨaweni kenaame Bibliatsíe pekatiyuʼɨkitɨaka? ¿Titayari?
6. Jehová heetsíe kenekawieka metsipareewienikɨ
Xɨka matsi teyutɨrɨkariyani Yuútsi ketemɨteʼayexeiya, matsi waɨkawa tepeitemawieritɨakuni. Tseepá yatemɨtekuyuruwa yapauka tepɨkayɨwawe mɨtínake hepaɨ temɨyupata. Xɨkatá heiwa mɨpaɨ metiyurieka, pepɨkaʼukawautseni, Jehová metsipareewieni. VIDEO xeneuxeiya metá xeteneutixaata ʼikɨtsíe:
Video temuxeitsíe, ¿Jim ketiuyuri mɨyupatakɨ tita Jehová mɨtiwawatsíe?
¿Tita yeme waɨká metiunakixɨ mɨkɨ heetsíe?
Xenakaterɨwa Hebreos 11:6 metá xeteneutixaata ʼikɨtsíe:
¿Jehová ketiyurieni wakɨmana «keane yeme memiwautɨwe», tatsɨrí, keane memɨyutɨrɨkariya memekumaikakɨ metá memitemawieritɨa?
¿Jehová kerekaʼerietɨyeika waɨká pemɨyutɨrɨkariyakɨ Bibliatsíe petiyuʼɨkitɨatɨ?
HIIPATƗ KEMEMƗTEKUʼIWAWA: «¿Titayari ʼekɨ Bibliatsíe petiyuʼɨkitɨa?».
¿Kepetiʼeiyawe?
TITA PEMƗRETIMÁ
Tseepá Bibliatsíe petiyuʼɨkitɨatɨ ʼaixɨ mɨkatikuyɨne, metsipareewieni heyeme tuukaari pehexeiyatɨ pepayaaní. Xɨka Jehová heetsíe pekawieka, mɨkɨ metiyetuirieni.
Mɨrayeʼerieni
¿Titayari ʼaheetsíe kwinié rayeʼaxé mɨtiyuri Biblia kemɨtikuʼɨkita?
Peretimakarí «tita kwinié mɨrayeʼaxé», ¿ʼekɨ kepetiuyuriwe?
¿Titayari Jehová petiwawirieka Bibliatsíe petiyuʼɨkitɨatɨ pemɨkatikuhayeikawanikɨ?
MATSI WAƗKÁ TINEUKAXEIYA
Tinaukame tineukaxeiya hiipatɨ teuteri ʼaixɨ kememɨtekuyuruwa yutuukaaritsíe.
«Tuukaari kehepaɨ ʼaixɨ mɨranuyewauní»(¡Despertad!, febrero de 2014)
Xewitɨ ʼuká Yuútsi peutemawieritɨamɨkɨkai, mɨɨtá kɨnaya pɨkaheitiʼenietɨyeiyakai ketɨtɨ naime mɨkɨ mɨtiyurienekai. Paatsɨ́ keneuxeiya Jehová kemɨtipareewi.
Jehová tɨrɨkariya pɨtatsipitɨ́a temɨteneewiekakɨ ketemɨteʼanuyehutsíe (5:05)
Ketineuxeiya kehepaɨ xewitɨ ʼuká yukɨna mɨtiupareewi mɨkatiuhayewaxɨkɨ Bibliatsíe tiyuʼɨkitɨatɨ.
Heiwa Jehová memayexeiya mepɨteʼumamatiwa kenaame yunuiwarite mekawanɨʼɨ́. ¿Mɨkɨtá tiyuri?