Isaias
16 Magpadala kamo sing karnero sa manuggahom sang duta,
Halin sa Sela patabok sa kamingawan
Pakadto sa bukid sang siudad sang Sion.
2 Kaangay sang pispis nga gintabog sa pugad,+
Ang mga pumuluyo sang Moab sa pangpang sang suba sa Arnon.+
3 “Laygayi ninyo sila nga magpamat-od na.
Sa udtong-adlaw, amligi sila paagi sa landong nga kaangay sang kagab-ihon.
Tagua ang mga ginpanabog kag indi pagluibi ang mga nagapalagyo.
4 Kabay nga mag-istar sa imo, O Moab, ang akon katawhan nga gintabog.
Mangin duog nga palanaguan ka para sa ila bangod sa manuglaglag.+
Ang manugpigos madula na,
Ang kalaglagan matapos na,
Kag ang mga nagapangtasak sa iban madula na sa duta.
5 Dayon paagi sa mainunungon nga gugma tukuron ang trono.
Ang isa nga magapungko sa trono sa tolda ni David mangin matutom;+
Magahukom sia nga wala sing pinasulabi kag ipatuman niya gilayon ang katarungan.”+
6 Nabatian namon ang pagkabugalon sang Moab—tuman sa iya ka bugalon+—
Ang iya pagkamatinaastaason kag ang iya bugal kag ang iya kaakig;+
Apang ang iya pagtinikal mangin wala sing pulos.
Ang mga nalutos magabakho tungod sa tinapay nga pasas sang Kir-hareset.+
8 Kay ang mga ulubasan sang Hesbon+ nagkalalaya,
Ang ulubasan sang Sibma,+
Gintasak sang mga manuggahom sang mga pungsod ang iya pula nga mga sanga;*
Nakalambot sila sa Jazer;+
Tubtob sa kamingawan.
Ang iya mga tugdo nagpangalapkap tubtob sa dagat.
9 Amo nga hibian ko ang ulubasan sang Sibma subong sang paghibi ko sa Jazer.
Bas-on ko kamo sang akon luha, O Hesbon kag Eleale,+
Bangod ang hinugyaw sa inyo mga prutas sa tingadlaw kag mga alanyon nag-untat na.*
10 Ang kalipay kag kasadya ginkuha sa katamnan sang mga kahoy nga nagapamunga,
Kag wala na sing ambahanon sa kalipay ukon hinugyaw sa mga ulubasan.+
Ang mga manuglinas wala na nagalinas sang ubas sa mga linasan,
Kay ginpauntat ko ang hinugyaw.+
11 Amo kon ngaa ang akon kasudlan nagakurog tungod sa Moab,+
Kaangay sang mga kuerdas sang arpa,
Amo man ang akon tiyan tungod sa Kir-hareset.+
12 Bisan pa ang Moab kapuyon sa pagkadto sa mataas nga duog kag sa santuaryo sa pagpangamuyo, wala gihapon ini sing pulos.+
13 Amo ini anay ang ginsiling ni Jehova tuhoy sa Moab. 14 Kag karon si Jehova nagasiling: “Sa sulod sang tatlo ka tuig, kaangay sang tinuig sang ginasuhulan nga manugpangabudlay,* ang kadungganan sang Moab madula kag magaantos sia sang tanan nga sahi sang kagamo. Diutay lang ang mabilin sa iya kag mga maluya pa.”+