Salmo
Salmo ni Asaf.+
79 O Dios ko, ginsalakay sang mga pungsod ang imo palanublion;+
Gindagtaan nila ang imo balaan nga templo;+
Ginhimo nila ang Jerusalem nga tinumpok sang kagulub-an.+
2 Ginpakaon nila ang mga bangkay sang imo mga alagad sa mga pispis,
Ginpakaon nila ang unod sang mga mainunungon sa imo sa mabangis nga mga sapat sang duta.+
3 Ginpaagay nila ang ila dugo kaangay sang tubig sa bug-os nga Jerusalem,
Kag wala sing nabilin agod maglubong sa ila.+
4 Nangin kahuluy-an kami sa amon mga kaingod;+
Ginayaguta kag ginatamay kami sang tanan sa palibot namon.
5 O Jehova, tubtob bala san-o nga maakig ka? Tubtob bala sa wala sing katubtuban?+
Tubtob bala san-o magadabdab nga daw kalayo ang imo kaakig?+
6 Ipakita ang imo kaakig sa mga pungsod nga wala makakilala sa imo
Kag sa mga ginharian nga wala nagapanawag sa imo ngalan.+
7 Kay ginpamatay nila ang mga kaliwat ni Jacob
Kag ginlaglag ang lugar nga iya ginaistaran.+
8 Indi kami pagsiluti bangod sang mga kasaypanan sang amon mga katigulangan.+
Kaluy-i kami sa gilayon,+
Kay nagapalangluya na kami.
9 Buligi kami, O Dios sang amon kaluwasan,+
Tungod sa imo mahimayaon nga ngalan;
Luwasa kami kag patawara* ang amon mga sala tungod sa imo ngalan.+
10 Ngaa bala magsiling ang kapungsuran: “Diin ang ila Dios?”+
Samtang nagatulok kami, kabay nga makita sang mga pungsod
Nga gintimalos ang ginpaagay nga dugo sang imo mga alagad.+
11 Kabay nga pamatian mo ang pagpanghayhay sang mga bilanggo.+
Gamita ang imo daku nga gahom* agod luwason* ang mga ginpamatbatan sing kamatayon.*+