DEUTERONOMIO

1 Amo ini ang ginsiling ni Moises sa bug-os nga Israel sa rehiyon sang Jordan sa kamingawan, sa desyerto nga kapatagan sa atubangan sang Suf, sa ulot sang Paran, sang Tofel, sang Laban, sang Hazerot, kag sang Dizahab. 2 (Onse ka adlaw ang pagpanglakaton halin sa Horeb pakadto sa Kades-barnea+ kon mag-agi sa dalan nga pakadto sa Bukid Seir.) 3 Sang ika-40 nga tuig,+ sa nahauna nga adlaw sang ika-11 nga bulan, ginsugid ni Moises sa mga Israelinhon* ang tanan nga ginsiling sa iya ni Jehova para sa ila. 4 Ginsugid niya ini pagkatapos niya mapierde si Sihon+ nga hari sang mga Amornon, nga nagaistar sa Hesbon, kag sa tapos niya mapierde sa Edrei si Og+ nga hari sang Basan, nga nagaistar sa Astarot.*+ 5 Ginpaathag ni Moises ang Kasuguan+ didto sa rehiyon sang Jordan sa duta sang Moab, kag nagsiling sia:

6 “Si Jehova nga aton Dios nagsiling sa aton sa Horeb, ‘Madugay na kamo nga nagaistar sa sining kabukiran.+ 7 Magkadto kamo sa kabukiran sang mga Amornon+ kag sa tanan nila nga kaingod nga rehiyon sa Araba,+ sa kabukiran, sa Sepela, sa Negeb, sa rehiyon malapit sa baybayon.+ Magkadto kamo sa sini nga mga duta sang mga Canaanhon kag tubtob sa Lebanon*+ kag sa daku nga suba sang Eufrates.+ 8 Tan-awa ninyo ang duta nga ginahatag ko sa inyo. Magsulod kamo kag panag-iyahi ninyo ang duta nga ginpanumpa ni Jehova sa inyo mga amay, kay Abraham, kay Isaac,+ kag kay Jacob,+ nga ihatag sa ila kag sa ila mga kaliwat.’*+

9 “Ginsilingan ko kamo sadto, ‘Indi ko masarangan ang pagdala sa inyo kon ako lang.+ 10 Ginpadamo kamo ni Jehova nga inyo Dios, kag karon pareho na kamo kadamo sang mga bituon sa langit.+ 11 Kabay pa nga si Jehova nga Dios sang inyo mga katigulangan magpadamo pa sa inyo+ sing isa ka libo ka pilo, kag kabay pa nga pakamaayuhon niya kamo suno sa ginsaad niya sa inyo.+ 12 Kon ako lang, paano ko masarangan ang katungdanan sa pagdala sa inyo kag paghusay sa inyo mga problema kag pagreklamo?+ 13 Magpili kamo sa inyo mga tribo sing maalam, mainandamon, kag may ikasarang nga mga lalaki, kag himuon ko sila nga mga pangulo ninyo.’+ 14 Nagsabat kamo sa akon, ‘Maayo ang ginsiling mo nga himuon namon.’ 15 Gani ginpili ko ang mga lalaki nga maalam kag may ikasarang nga mga pangulo sa inyo mga tribo, kag ginhimo ko sila nga mga pangulo sang kada 1,000, mga pangulo sang kada 100, mga pangulo sang kada 50, mga pangulo sang kada 10, kag mga manugdumala sang inyo mga tribo.+

16 “Ginsugo ko ang inyo mga hukom sadto nga tion, ‘Kon may ginahusay kamo nga kaso sa tunga sang inyo mga utod, dapat nga matarong ang inyo paghukom+ sa ulot sang isa ka tawo kag sang iya utod ukon sang dumuluong nga pumuluyo.+ 17 Indi kamo magpasulabi sa inyo paghukom.+ Pamatian ninyo ang gamhanan kag ang kubos man.+ Indi kamo mahadlok sa tawo,+ kay ang inyo paghukom halin sa Dios.+ Kag kon mabudlay para sa inyo ang isa ka kaso, dalhon ninyo ini sa akon, kag pamatian ko ini.’+ 18 Ginsugid ko sa inyo sadto nga tion ang tanan nga butang nga dapat ninyo himuon.

19 “Dayon naghalin kita sa Horeb kag nagpanglakaton sa kabug-usan sang malapad kag makahaladlok nga kamingawan+ nga nakita ninyo samtang nagaagi kamo sa dalan nga pakadto sa kabukiran sang mga Amornon,+ suno sa ginsugo ni Jehova nga aton Dios, kag sang ulihi nakalab-ot kita sa Kades-barnea.+ 20 Dayon nagsiling ako sa inyo, ‘Nag-abot na kamo sa kabukiran sang mga Amornon, nga ginahatag sa aton ni Jehova nga aton Dios. 21 Tan-awa ang duta nga ginahatag sa inyo ni Jehova nga inyo Dios. Magtaklad kamo kag panag-iyahi ini, suno sa ginsiling sa inyo ni Jehova nga Dios sang inyo mga katigulangan.+ Indi kamo mahadlok.’

22 “Apang, nagpalapit kamo tanan sa akon kag nagsiling kamo, ‘Magpadala kita anay sing mga lalaki agod tan-awon ang duta. Dayon isugid nila sa aton kon diin nga dalan kita maagi kag kon ano nga mga siudad ang kadtuan naton.’+ 23 Maayo man ang inyo panugda, gani nagpili ako sing 12 ka lalaki, isa sa kada tribo.+ 24 Nagtaklad sila sa kabukiran+ kag nakalab-ot sila sa Nalupyakan* sang Escol kag nagpangespiya sila didto. 25 Nagkuha sila sing pila ka patubas sang duta kag gindala ini sa aton. Pagbalik nila, nagsiling sila sa aton, ‘Maayo ang duta nga ginahatag sa aton ni Jehova nga aton Dios.’+ 26 Apang indi ninyo luyag magtaklad, kag nagrebelde kamo sa sugo ni Jehova nga inyo Dios.+ 27 Nagkumod kamo sa inyo mga tolda kag nagsiling kamo, ‘Naakig sa aton si Jehova amo nga ginpagua niya kita sa duta sang Egipto agod laglagon kita sang mga Amornon. 28 Ano nga sahi sang lugar ang kadtuan naton? Ginpaluya sang aton mga kauturan ang aton buot,*+ kay nagsiling sila, “Ang mga tawo didto mas dalagku kag mas mataas sangsa aton, kag ang ila mga siudad mas dalagku kag may pader tubtob sa langit,*+ kag nakita namon didto ang mga kaliwat sang mga Anakim.” ’+

29 “Gani nagsiling ako sa inyo, ‘Indi kamo mahadlok sa ila.+ 30 Si Jehova nga inyo Dios magauna sa inyo kag magapakig-away sia para sa inyo,+ pareho sang nakita ninyo nga ginhimo niya sa Egipto.+ 31 Nakita man ninyo sa kamingawan kon paano kamo gindala ni Jehova nga inyo Dios pareho sang pagkugos sang isa ka tawo sa iya anak, sa tanan nga lugar nga ginkadtuan ninyo tubtob nag-abot kamo sa sini nga lugar.’ 32 Apang, wala sapayan sini tanan, wala kamo magtuo kay Jehova nga inyo Dios,+ 33 nga nag-una sa inyo sa pagpangita sing lugar nga makampuhan ninyo. Nagapakita sia sa inyo paagi sa kalayo kon gab-i kag paagi sa panganod kon adlaw agod ipakita sa inyo ang dalan nga dapat ninyo laktan.+

34 “Nabatian ni Jehova ang inyo ginsiling. Gani naakig sia kag nagpanumpa,+ 35 ‘Wala sing bisan isa sa sining malaut nga kaliwatan ang makakita sa maayo nga duta nga ginpanumpa ko nga ihatag sa inyo mga amay,+ 36 luwas kay Caleb nga anak ni Jefone. Makita niya ini, kag ihatag ko sa iya kag sa iya mga anak ang duta nga iya ginkadtuan, bangod bug-os tagipusuon nga nagsunod sia kay Jehova.+ 37 (Naakig man gani si Jehova sa akon tungod sa inyo, kag nagsiling sia sa akon, “Indi ka man makasulod didto.+ 38 Si Josue nga anak ni Nun, nga nagabulig sa imo,+ amo ang magasulod didto.+ Pabakura sia,*+ bangod sia ang magapanguna sa Israel sa pagsulod sa duta agod panublion ini.”) 39 Ang inyo mga kabataan nga siling ninyo mangin bihag+ kag ang inyo mga anak nga karon wala makahibalo kon ano ang maayo ukon malain magasulod didto. Ihatag ko ini sa ila agod panag-iyahan nila.+ 40 Apang kamo, magbalik kamo kag magkadto kamo sa kamingawan paagi sa dalan nga pakadto sa Pula nga Dagat.’+

41 “Dayon nagsiling kamo sa akon, ‘Nakasala kami kay Jehova. Mataklad kami kag magapakig-away, suno sa ginsugo sa amon ni Jehova nga amon Dios!’ Gani gintaklus ninyo ang inyo mga hinganiban sa inaway, kag pagdumdom ninyo mahapos lang ang pagtaklad sa bukid.+ 42 Apang nagsiling si Jehova sa akon, ‘Silinga sila: “Indi kamo magtaklad kag magpakig-away, kay mapierde kamo sang inyo mga kaaway bangod indi ako mag-upod sa inyo.” ’+ 43 Ginsiling ko ini sa inyo, apang wala kamo magpamati. Nagrebelde kamo sa sugo ni Jehova kag matinaastaason nga nagtaklad kamo sa bukid. 44 Dayon ginsugata kamo sang mga Amornon nga nagaistar sa amo nga bukid kag ginlagas nila kamo pareho sang paglagas sang mga putyukan, kag nag-alaplaag kamo sa Seir tubtob sa Horma. 45 Gani nagbalik kamo kag naghibi sa atubangan ni Jehova, apang wala kamo ginpamatian ni Jehova kag wala sia magsapak sa inyo. 46 Amo kon ngaa nagpabilin kamo sa Kades sing malawig nga tion.

2 “Dayon nagbalik kita kag nagkadto sa kamingawan paagi sa dalan padulong sa Pula nga Dagat, suno sa ginsiling ni Jehova sa akon,+ kag naglibotlibot kita sa Bukid Seir sa sulod sang madamo nga adlaw. 2 Sang ulihi, nagsiling si Jehova sa akon, 3 ‘Madugay na kamo nga nagalibotlibot sa sini nga bukid. Magpaaminhan na kamo. 4 Sugua ang katawhan: “Magaagi kamo sa dulunan sang inyo mga utod, ang mga kaliwat ni Esau,+ nga nagaistar sa Seir.+ Mahadlok sila sa inyo,+ kag maghalong gid kamo. 5 Indi kamo magpakig-away sa ila, kay indi ko pag-ihatag sa inyo ang bisan isa lang ka tapak sang ila duta, bangod ginhatag ko ang Bukid Seir kay Esau agod panag-iyahan niya.+ 6 Bayaran ninyo sing kuarta ang pagkaon nga inyo kaunon, kag ang tubig nga inyo imnon.+ 7 Kay ginpakamaayo kamo ni Jehova nga inyo Dios sa tanan nga ginhimo ninyo. Nahibaluan gid niya ang inyo paglakat sa sining malapad nga kamingawan. Kaupod ninyo si Jehova nga inyo Dios sa sulod sining 40 ka tuig, kag wala sing bisan isa ka butang nga nakulang sa inyo.” ’+ 8 Gani nag-agi lang kita sa aton mga utod, ang mga kaliwat ni Esau,+ nga nagaistar sa Seir, kag ginlikawan naton ang dalan sang Araba, sang Elat, kag sang Ezion-geber.+

“Dayon nagliko kita kag nag-agi sa dalan padulong sa kamingawan sang Moab.+ 9 Dayon nagsiling si Jehova sa akon, ‘Indi kamo magpakig-away sa Moab, kay indi ko pag-ihatag sa inyo ang bisan ano nga parte sang iya duta agod panag-iyahan ninyo, bangod ginhatag ko ang Ar sa mga kaliwat ni Lot agod panag-iyahan nila.+ 10 (Ang mga Emim+ nagaistar anay diri, ang katawhan nga makusog, madamo, kag mataas pareho sang mga Anakim. 11 Ang mga Refaim+ ginkabig man nga pareho sang mga Anakim,+ kag ginatawag sila sang mga Moabnon nga Emim. 12 Sang una, mga Horhanon+ ang nagaistar sa Seir, apang ginsakop sila kag ginpamatay sang mga kaliwat ni Esau kag sila na ang nag-istar sa sini nga lugar,+ pareho sang himuon sang Israel sa duta nga ihatag sa ila ni Jehova agod panag-iyahan nila.) 13 Karon magtabok kamo sa Nalupyakan* sang Zered.’ Gani nagtabok kita sa Nalupyakan* sang Zered.+ 14 Naglakat kita halin sa Kades-barnea tubtob nakatabok kita sa Nalupyakan* sang Zered sa sulod sang 38 ka tuig, tubtob nagkalamatay ang tanan nga kaliwatan sang mga soldado sa tunga sang katawhan, suno sa ginpanumpa ni Jehova sa ila.+ 15 Ang kamot ni Jehova nangin batok sa ila agod pamatyon sila sa tunga sang katawhan tubtob napatay sila tanan.+

16 “Sang napatay na sa tunga sang katawhan ang tanan nga soldado,+ 17 nagsiling liwat si Jehova sa akon, 18 ‘Magaagi kamo subong nga adlaw sa teritoryo sang Moab, malapit sa Ar. 19 Kon malapit na kamo sa mga Ammonhon, indi sila paggamuha ukon indi sila pagpaakiga, kay indi ko pag-ihatag sa inyo ang bisan ano nga duta sang mga Ammonhon agod panag-iyahan ninyo, bangod ginhatag ko ini sa mga kaliwat ni Lot agod panag-iyahan nila.+ 20 Ginkabig man ini anay nga duta sang mga Refaim.+ (Nagaistar diri anay ang mga Refaim, kag gintawag sila nga Zamzummim sang mga Ammonhon. 21 Makusog sila, madamo, kag mataas nga mga tawo pareho sang mga Anakim;+ apang ginlaglag sila ni Jehova sa atubangan sang mga Ammonhon, nga nagtabog sa ila kag amo ang nag-istar sa ila lugar. 22 Amo sina ang ginhimo niya para sa mga kaliwat ni Esau, nga nagaistar sa Seir,+ sang ginlaglag niya ang mga Horhanon+ sa ila atubangan, kag gintabog nila sila kag sila na ang nag-istar sa ila lugar tubtob sini nga adlaw. 23 Ang mga Avim nag-istar sa mga baryo sa rehiyon sang Gaza,+ tubtob ginlaglag sila sang mga Caftorim+ halin sa Caftor,* kag sila na ang nag-istar sa ila lugar.)

24 “ ‘Lakat kamo kag magtabok kamo sa Nalupyakan* sang Arnon.+ Ginatugyan ko sa inyo si Sihon+ nga Amornon, ang hari sang Hesbon. Salakaya ninyo sia, kag panag-iyahi ninyo ang iya duta. 25 Subong nga adlaw pahanabuon ko nga makugmat kag mahadlok sa inyo ang tanan nga katawhan sa idalom sang langit nga makabati sang balita tuhoy sa inyo. Matublag sila kag magakurog sa kahadlok* tungod sa inyo.’+

26 “Dayon halin sa kamingawan sang Kedemot+ nagpadala ako sing mga mensahero kay Hari Sihon sang Hesbon, nga dala ining mensahe para sa paghidait,+ 27 ‘Paagiha ako sa inyo duta. Maagi ako sa mayor nga dalan lamang. Indi ako magliko sa tuo ukon sa wala.+ 28 Ang kaunon namon kag imnon amo lamang ang pagkaon kag tubig nga ibaligya ninyo sa amon. Paagiha lang kami, 29 pareho sang ginhimo sa amon sang mga kaliwat ni Esau nga nagaistar sa Seir kag sang mga Moabnon nga nagaistar sa Ar, tubtob makatabok ako sa Jordan pakadto sa duta nga ginahatag sa amon ni Jehova nga amon Dios.’ 30 Apang wala kita ginpaagi ni Hari Sihon sang Hesbon sa iya duta, bangod gintugutan ni Jehova nga inyo Dios nga magpakatig-a sia+ kag magtig-a ang iya tagipusuon, agod itugyan sia sa inyo kamot pareho sang natabo sini nga adlaw.+

31 “Dayon nagsiling si Jehova sa akon, ‘Ginatugyan ko sa imo si Sihon kag ang iya duta. Sugdi na ang pagsakop sa iya duta agod mapanag-iyahan ninyo ini.’+ 32 Sang maggua si Sihon kag ang tanan niya nga katawhan agod magpakig-away sa aton sa Jahaz,+ 33 gintugyan sia sa aton ni Jehova nga aton Dios, amo nga napierde naton sia, ang iya mga anak, kag ang tanan niya nga katawhan. 34 Ginsakop naton ang tanan niya nga siudad sadto nga tion kag ginlaglag naton ang tanan niya nga siudad, lakip ang mga lalaki, ang mga babayi, kag ang mga kabataan. Wala kita sing ginbilin nga buhi.+ 35 Ang mga sapat lamang kag ang mga inagaw sa mga siudad nga ginsakop naton ang ginkuha naton. 36 Halin sa Aroer,+ nga yara sa pangpang sang Nalupyakan* sang Arnon (lakip ang siudad nga yara sa nalupyakan), tubtob sa Gilead, wala sing banwa nga tuman kabakod para sa aton. Gintugyan sila tanan sa aton ni Jehova nga aton Dios.+ 37 Apang wala kamo magpalapit sa duta sang mga Ammonhon,+ nga amo ang bug-os nga pangpang sang Nalupyakan* sang Jabok+ kag ang mga siudad sa kabukiran, ukon sa bisan diin nga lugar nga wala gintugot sa aton ni Jehova nga aton Dios.

3 “Dayon nagkadto kita sa Dalan sang Basan. Ginsugata kita ni Og nga hari sang Basan upod ang tanan niya nga katawhan agod magpakig-away sa aton sa Edrei.+ 2 Gani nagsiling si Jehova sa akon, ‘Indi ka mahadlok sa iya, kay itugyan ko sia sa imo kamot kag ang tanan niya nga katawhan kag ang iya duta. Himuon mo man sa iya ang ginhimo mo kay Sihon nga hari sang mga Amornon, nga nag-istar sa Hesbon.’ 3 Gani gintugyan ni Jehova nga aton Dios sa aton kamot si Hari Og sang Basan kag ang tanan niya nga katawhan, kag ginpamatay naton sila tubtob wala na sing nabilin nga buhi sa iya katawhan. 4 Dayon ginsakop naton ang tanan niya nga siudad. Wala sing banwa nga wala naton maagaw sa ila, ang 60 ka siudad, ang bug-os nga rehiyon sang Argob, ang ginharian ni Og sa Basan.+ 5 Ining tanan nga siudad may mataas nga pader, mga gawang, kag mga trangka. Ginsakop man naton ang madamo nga banwa nga wala sing pader. 6 Apang ginlaglag naton sila,+ pareho sang ginhimo naton kay Hari Sihon sang Hesbon. Ginlaglag naton ang tanan nga siudad, pati ang mga lalaki, ang mga babayi, kag ang kabataan.+ 7 Gindala man naton ang tanan nga sapat kag ang mga inagaw naton halin sa mga siudad.

8 “Gin-agaw naton sadto ang duta sang duha ka hari sang mga Amornon+ sa rehiyon sang Jordan, halin sa Nalupyakan* sang Arnon tubtob sa Bukid Hermon+ 9 (ang bukid nga gintawag anay sang mga Sidonhon nga Sirion kag gintawag sang mga Amornon nga Senir), 10 ang tanan nga siudad sa mataas nga patag, ang bug-os nga Gilead, kag ang bug-os nga Basan tubtob sa Saleca kag sa Edrei,+ ang mga siudad sang ginharian ni Og sa Basan. 11 Kay si Hari Og sang Basan amo ang katapusan nga nabilin sa mga Refaim. Ang iya halamyangan* human sa salsalon; kag yara ini gihapon sa Raba sang mga Ammonhon. Ang kalabaon sini siam ka maniko,* kag ang kasangkaron sini apat ka maniko, suno sa kinaandan nga talaksan. 12 Ginpanag-iyahan naton ini nga duta: ang Aroer+ sa Nalupyakan* sang Arnon, kag ang katunga sang kabukiran sang Gilead, kag ginhatag ko ang mga siudad sini sa mga Rubenhon kag sa mga Gadhanon.+ 13 Ang nabilin nga bahin sang Gilead kag ang bug-os nga Basan nga ginharian ni Og ginhatag ko sa katunga sang tribo ni Manases.+ Ang bug-os nga rehiyon sang Argob nga sakop sang Basan, gintawag sadto nga duta sang mga Refaim.

14 “Ginpanag-iyahan ni Jair+ nga anak ni Manases ang bug-os nga rehiyon sang Argob+ tubtob sa dulunan sang mga Gesurnon kag mga Maacatnon.+ Gintawag niya ini nga gamay nga mga banwa sang Basan nga Havot-jair*+ suno sa iya ngalan, tubtob sini nga adlaw. 15 Ginhatag ko ang Gilead kay Maquir.+ 16 Ginhatag ko sa mga Rubenhon kag sa mga Gadhanon+ ang halin sa Gilead tubtob sa Nalupyakan* sang Arnon. Ang tunga sang nalupyakan amo ang dulunan sini. Ginhatag ko man ang tubtob sa nalupyakan sang Jabok nga amo ang dulunan sang mga Ammonhon, 17 kag ang Araba pati ang Suba Jordan kag ang pangpang sini, halin sa Cineret* tubtob sa Dagat sang Araba, nga amo ang Dagat Asin,* sa tiilan sang banglid sang Pisga sa sidlangan.+

18 “Dayon ginsugo ko kamo: ‘Ginhatag sa inyo ni Jehova nga inyo Dios ining duta agod panag-iyahan ninyo. Ang tanan ninyo nga isganan nga lalaki magdala sing armas kag magtabok sing una sa inyo kauturan nga mga Israelinhon.+ 19 Ang inyo lamang mga asawa, mga kabataan, kag mga kasapatan (nahibaluan ko nga madamo ang inyo kasapatan) ang magpabilin sa mga siudad nga ginhatag ko sa inyo, 20 tubtob mahatagan ni Jehova sing kalinong ang inyo kauturan pareho sang ginahimo niya sa inyo, kag mapanag-iyahan man nila ang duta sa tabok sang Jordan nga ginahatag sa ila ni Jehova nga inyo Dios. Dayon magabalik kamo sa duta nga ginhatag ko sa inyo.’+

21 “Ginsilingan ko si Josue+ sadto: ‘Nakita mo mismo ang ginhimo ni Jehova nga inyo Dios sa sining duha ka hari. Amo man sini ang himuon ni Jehova sa tanan nga ginharian nga kadtuan ninyo.+ 22 Indi kamo mahadlok sa ila, kay si Jehova nga inyo Dios amo ang magapakig-away para sa inyo.’+

23 “Dayon nagpakiluoy ako kay Jehova, 24 ‘O Soberanong Ginuong Jehova, ginpakita mo sa imo alagad ang imo pagkahalangdon kag ang imo makusog nga butkon,+ kay sin-o nga dios sa langit ukon sa duta ang nagahimo sining gamhanan nga mga buhat pareho sa imo?+ 25 Palihug, patabuka ako agod makita ko ang maayo nga duta sa tabok sang Jordan, ining maayo nga kabukiran kag ang Lebanon.’+ 26 Apang akig gihapon si Jehova sa akon tungod sa inyo+ kag wala sia magpamati sa akon. Sa baylo, nagsiling si Jehova sa akon, ‘Tama na ina! Indi ka na maghambal sa akon tuhoy sini nga butang. 27 Magtaklad ka sa putukputukan sang Pisga,+ kag tan-awa ang duta sa katundan, sa aminhan, sa bagatnan kag sa sidlangan, kay indi ka makatabok sa sining Jordan.+ 28 Itangdo mo si Josue+ bilang lider kag palig-una sia kag pabakura, bangod sia ang manguna sa sini nga katawhan sa pagtabok+ agod panublion ang duta nga makita mo.’ 29 Natabo ini tanan samtang didto kita sa nalupyakan sa atubangan sang Bet-peor.+

4 “O Israel, pamatii karon ang mga pagsulundan kag ang mga kasuguan nga ginapatuman ko sa inyo, agod mabuhi kamo+ kag makasulod sa duta nga ginahatag sa inyo ni Jehova nga Dios sang inyo mga katigulangan kag mapanag-iyahan ninyo ini. 2 Indi ninyo pagdugangan ukon pagbuhinan ang ginasugo ko sa inyo,+ agod matuman ninyo ang mga sugo ni Jehova nga inyo Dios nga ginahatag ko sa inyo.

3 “Nakita ninyo mismo ang ginhimo ni Jehova may kaangtanan kay Baal sang Peor. Ginlaglag ni Jehova nga inyo Dios ang tanan nga tawo sa tunga ninyo nga nagsunod kay Baal sang Peor.+ 4 Apang kamo tanan nga nagpabilin kay Jehova nga inyo Dios buhi tubtob subong. 5 Gintudlo ko sa inyo ang mga pagsulundan kag mga kasuguan,+ suno sa ginsugo sa akon ni Jehova nga akon Dios, agod himuon ninyo ini sa kadutaan nga panag-iyahan ninyo. 6 Dapat ninyo ini tumanon,+ agod makita sang mga katawhan nga makabati sining tanan nga pagsulundan ang inyo kaalam+ kag paghangop,+ kag magasiling sila, ‘Ining daku nga pungsod maalam gid kag may paghangop nga katawhan.’+ 7 Kay may daku bala nga pungsod nga ang ila mga dios malapit sa ila pareho ni Jehova nga aton Dios nga malapit sa aton kon magpanawag kita sa iya?+ 8 Kag may daku bala nga pungsod nga may matarong nga mga pagsulundan kag mga sugo pareho sining bug-os nga Kasuguan nga ginabutang ko sa inyo atubangan subong nga adlaw?+

9 “Apang maghalong kamo kag mag-andam,* agod indi ninyo malipatan ang mga butang nga nakita ninyo kag agod indi ini madula sa inyo tagipusuon sa bug-os ninyo nga kabuhi. Dapat man ninyo ipahibalo ini sa inyo mga anak kag sa inyo mga apo.+ 10 Sang adlaw nga nagtindog kamo sa atubangan ni Jehova nga inyo Dios sa Horeb, nagsiling si Jehova sa akon, ‘Tipuna ang katawhan sa akon agod mapabati ko sa ila ang akon mga pulong,+ agod matun-an nila ang pagkahadlok sa akon+ sa tanan nga adlaw nga nagakabuhi sila sa duta kag agod matudluan nila ang ila mga anak.’+

11 “Gani nagpalapit kamo kag nagtindog sa tiilan sang bukid, kag ang bukid nagdabdab nga ang kalayo sini nakalambot sa langit;* kag may kadulom, panganod, kag madamol nga gal-um.+ 12 Dayon nagpakighambal si Jehova sa inyo halin sa tunga sang kalayo.+ May nabatian kamo nga tingog,+ apang wala kamo sing nakita.+ 13 Kag ginsiling niya ang iya katipan sa inyo,+ ang Napulo ka Sugo,*+ nga ginsugo niya nga tumanon ninyo. Dayon ginsulat niya ini sa duha ka tapitapi nga bato.+ 14 Ginsugo ako sadto ni Jehova nga itudlo sa inyo ang mga pagsulundan kag mga kasuguan nga dapat ninyo tumanon sa duta nga kadtuan ninyo agod panag-iyahan ninyo.

15 “Gani, mag-andam kamo,* kay sang adlaw nga nagpakighambal si Jehova sa inyo halin sa tunga sang kalayo sa Horeb wala kamo sing nakita nga bisan ano, 16 agod indi kamo maggawi sing malaut kag maghimo kamo sing tinigib nga imahen, nga pareho sang bisan ano nga dagway, ang dagway sang lalaki ukon babayi,+ 17 ang dagway sang bisan ano nga sapat sa duta ukon ang dagway sang bisan ano nga pispis,+ 18 ang dagway sang bisan ano nga nagakamang sa duta ukon ang dagway sang bisan ano nga isda sa tubig.+ 19 Kag kon magtulok kamo sa langit kag makita ninyo ang adlaw kag ang bulan kag ang mga bituon, ang tanan nga butang sa langit, indi kamo maganyat nga magyaub kag mag-alagad sa sini.+ Ginhatag sila ni Jehova nga inyo Dios para sa tanan nga katawhan sa idalom sang bug-os nga langit. 20 Apang ginkuha kamo kag ginpagua ni Jehova sa hurnuhan sang salsalon, halin sa Egipto, agod mangin iya katawhan,*+ kag amo kamo sina subong.

21 “Naakig si Jehova sa akon tungod sa inyo,+ kag nagpanumpa sia nga indi ako makatabok sa Jordan ukon makasulod sa maayo nga duta nga ginahatag sa inyo ni Jehova nga inyo Dios bilang palanublion ninyo.+ 22 Diri ako mapatay. Indi ako makatabok sa Jordan,+ apang magatabok kamo kag panag-iyahan ninyo ining maayo nga duta. 23 Maghalong kamo nga indi ninyo malipatan ang katipan nga ginhimo ni Jehova nga inyo Dios sa inyo,+ kag indi kamo maghimo sing tinigib nga imahen, nga may dagway sang bisan ano nga butang nga wala ginatugot sa inyo ni Jehova nga inyo Dios.+ 24 Kay si Jehova nga inyo Dios isa ka kalayo nga nagapang-upos,+ isa ka Dios nga nagapatuman nga sia lang ang dapat simbahon.+

25 “Kon may mga anak na kamo kag mga apo kag malawig na nga tion nga nagaistar kamo sa duta kag maghimo kamo sing butang nga makalaglag sa inyo bangod sa paghimo sing tinigib nga imahen+ nga pareho sang bisan ano nga dagway kag maghimo kamo sing malaut sa panulok ni Jehova nga inyo Dios nga makapaakig sa iya,+ 26 saksi ko batok sa inyo subong nga adlaw ang langit kag ang duta, nga malaglag gid kamo dayon sa duta sa tabok sang Jordan nga inyo kadtuan agod panag-iyahan ninyo. Indi kamo magdugay didto, bangod malaglag gid kamo.+ 27 Paalaplaagon kamo ni Jehova sa tunga sang mga katawhan,+ kag diutay lang ang mabilin sa inyo+ sa mga pungsod nga dalhan ni Jehova sa inyo. 28 Magaalagad kamo didto sa mga dios nga ginhimo sang tawo halin sa kahoy kag bato,+ nga indi makakita ukon makabati ukon makakaon ukon makapanimaho.

29 “Apang kon pangitaon ninyo didto si Jehova nga inyo Dios, kag kon pangitaon ninyo sia sa bug-os ninyo nga tagipusuon kag sa bug-os ninyo nga kalag,*+ makita gid ninyo sia.+ 30 Kon nabudlayan gid kamo kag ining tanan nga butang matabo sa inyo sa ulihi, magabalik kamo kay Jehova nga inyo Dios kag magapamati kamo sa iya tingog.+ 31 Kay si Jehova nga inyo Dios isa ka maluluy-on nga Dios.+ Indi niya kamo pagbayaan ukon paglaglagon kag indi niya pagkalimtan ang katipan nga ginpanumpa niya sa inyo mga katigulangan.+

32 “Dumduma ang mga adlaw sang una nga wala pa kamo, sugod sang adlaw nga gintuga sang Dios ang tawo sa duta. Magpangusisa kamo sa bug-os nga duta. May natabo na bala sang una nga subong sini ka makatilingala? May nabatian na bala kamo nga pareho sini?+ 33 May nahibaluan bala kamo nga mga tawo nga nabuhi pa pagkatapos nga makabati sang tingog sang Dios halin sa kalayo pareho sang inyo nabatian?+ 34 May iban pa bala nga pungsod nga ginkuha ang Dios halin sa isa ka pungsod paagi sa mga pagtilaw,* paagi sa mga tanda, paagi sa mga milagro,+ paagi sa inaway,+ paagi sa makusog nga kamot,+ paagi sa gamhanan nga butkon, kag paagi sa makahaladlok nga mga buhat+ pareho sang tanan nga nakita ninyo nga ginhimo para sa inyo ni Jehova nga inyo Dios sa Egipto? 35 Ginpakita ini sa inyo, agod mahibaluan ninyo nga si Jehova amo ang matuod nga Dios.+ Wala na sing iban pa luwas sa iya.+ 36 Ginpabati niya sa inyo ang iya tingog halin sa langit agod tadlungon kamo, kag ginpakita niya sa inyo sa duta ang iya daku nga kalayo, kag nabatian ninyo ang iya ginsiling halin sa kalayo.+

37 “Bangod ginhigugma niya ang inyo mga katigulangan kag ginpili niya ang ila mga kaliwat* nga mangin iya katawhan,+ ginbantayan niya kamo samtang ginapagua niya kamo sa Egipto paagi sa iya daku nga gahom. 38 Gintabog niya sa inyo atubangan ang mga pungsod nga mas daku kag mas gamhanan sangsa inyo, agod dalhon kamo sa ila duta kag ihatag ini sa inyo bilang inyo palanublion, nga amo ang nagakatabo subong.+ 39 Gani, hibalua sa sini nga adlaw, kag hupti ini sa inyo tagipusuon nga si Jehova amo ang matuod nga Dios sa langit kag sa duta.+ Wala na sing iban pa.+ 40 Tumanon ninyo ang iya mga pagsulundan kag ang iya mga sugo nga ginahatag ko sa inyo subong, agod mangin maayo ang inyo kahimtangan kag sang inyo mga anak kag mangin malawig ang inyo kabuhi sa duta nga ginahatag sa inyo ni Jehova nga inyo Dios.”+

41 Dayon nagpain si Moises sing tatlo ka siudad sa sidlangan nga bahin sang Jordan.+ 42 Kon indi hungod nga napatay sang isa ka tawo ang iya isigkatawo kag wala sia sing dumot sa iya,+ dapat sia magdangop sa isa sini nga mga siudad kag mabuhi sia.+ 43 Ang mga siudad amo ang Bezer+ sa mataas nga patag sa kamingawan para sa mga Rubenhon, ang Ramot+ sa Gilead para sa mga Gadhanon, kag ang Golan+ sa Basan para sa mga Manasinhon.+

44 Amo ini ang Kasuguan+ nga ginhatag ni Moises sa katawhan sang Israel. 45 Amo ini ang mga pahanumdom, mga pagsulundan, kag mga kasuguan nga ginhatag ni Moises sa mga Israelinhon sang makagua na sila sa Egipto,+ 46 sa rehiyon sang Jordan, sa nalupyakan sa atubangan sang Bet-peor,+ sa duta ni Hari Sihon sang mga Amornon, nga nagaistar sa Hesbon,+ nga ginpierde ni Moises kag sang mga Israelinhon sang makagua na sila sa Egipto.+ 47 Ginpanag-iyahan nila ang iya duta kag ang duta ni Hari Og+ sang Basan. Ang duta sining duha ka hari sang mga Amornon yara sa sidlangan sang Jordan, 48 halin sa Aroer+ nga yara sa pangpang sang Nalupyakan* sang Arnon tubtob sa Bukid Sion, nga amo ang Hermon,+ 49 kag ang bug-os nga Araba sa sidlangan sang Jordan, kag tubtob sa Dagat sang Araba,* sa tiilan sang banglid sang Pisga.+

5 Ginpatipon ni Moises ang bug-os nga Israel kag nagsiling sia sa ila: “Pamatii, O Israel, ang mga pagsulundan kag ang mga kasuguan nga ginahambal ko sa inyo subong nga adlaw. Dapat ninyo tun-an kag tumanon gid ini. 2 Si Jehova nga aton Dios nagpakigkatipan sa aton sa Horeb.+ 3 Wala ginhimo ni Jehova ini nga katipan sa aton mga katigulangan, kundi sa aton tanan nga buhi diri subong nga adlaw. 4 Nagpakighambal si Jehova sing direkta* sa inyo halin sa kalayo sa bukid.+ 5 Nagatindog ako sa tunga ninyo kag ni Jehova sadto nga tion+ agod ihambal sa inyo ang ginsiling ni Jehova, kay nahadlok kamo bangod sang kalayo kag wala kamo magtaklad sa bukid.+ Nagsiling sia:

6 “ ‘Ako si Jehova nga inyo Dios, nga nagpagua sa inyo halin sa duta sang Egipto, diin gin-ulipon kamo.*+ 7 Indi kamo magsimba sa iban nga mga dios luwas sa akon.*+

8 “ ‘Indi kamo maghimo sing tinigib nga imahen+ ukon sing bisan ano nga nagarepresentar* sang butang nga yara sa langit ukon sa duta ukon sa tubig. 9 Indi kamo magyaub sa ila ukon mag-alagad sa ila,+ bangod ako si Jehova nga inyo Dios isa ka Dios nga nagapatuman nga ako lang ang dapat simbahon,+ nga nagasilot sa mga anak tungod sa sala sang mga amay, tubtob sa ikatlo kag sa ikap-at nga kaliwatan sang mga nagadumot sa akon,+ 10 apang nagapakita ako sing mainunungon nga gugma* tubtob sa linibo ka kaliwatan sang mga nagahigugma sa akon kag nagatuman sang akon mga sugo.

11 “ ‘Indi ninyo paggamiton ang ngalan ni Jehova nga inyo Dios sa wala sing pulos,+ kay silutan ni Jehova ang nagagamit sang iya ngalan sa wala sing pulos.+

12 “ ‘Sauluga ang Adlaw nga Inugpahuway kag kabiga ini nga sagrado, suno sa ginsugo sa inyo ni Jehova nga inyo Dios.+ 13 Himuon ninyo ang tanan ninyo nga obra sa sulod sang anom ka adlaw,+ 14 apang ang ikapito nga adlaw isa ka adlaw nga inugpahuway para kay Jehova nga inyo Dios.+ Indi kamo maghimo sing bisan ano nga obra,+ kamo ukon ang inyo anak nga lalaki ukon ang inyo anak nga babayi ukon ang inyo ulipon nga lalaki ukon ang inyo ulipon nga babayi ukon ang inyo toro nga baka ukon ang inyo asno ukon ang inyo bisan ano nga sapat ukon ang dumuluong nga pumuluyo nga yara sa sulod sang inyo mga siudad,*+ agod ang inyo ulipon nga lalaki kag ang inyo ulipon nga babayi magpahuway man pareho sa inyo.+ 15 Dumduma nga nangin ulipon kamo sa duta sang Egipto kag ginpagua kamo halin didto ni Jehova nga inyo Dios paagi sa iya makusog nga kamot kag gamhanan nga butkon.+ Amo kon ngaa ginsugo kamo ni Jehova nga inyo Dios nga saulugon ang Adlaw nga Inugpahuway.

16 “ ‘Padunggi ang inyo amay kag ang inyo iloy,+ suno sa ginsugo sa inyo ni Jehova nga inyo Dios, agod magkabuhi kamo sing malawig kag mag-uswag kamo* sa duta nga ihatag sa inyo ni Jehova nga inyo Dios.+

17 “ ‘Indi kamo magpatay.+

18 “ ‘Indi kamo magpanghilahi.+

19 “ ‘Indi kamo magpangawat.+

20 “ ‘Indi kamo magsaksi sing butig batok sa inyo isigkatawo.+

21 “ ‘Indi kamo magkaibog sa asawa sang inyo isigkatawo.+ Indi kamo magkaibog sa balay sang inyo isigkatawo ukon sa iya uma ukon sa iya ulipon nga lalaki ukon sa iya ulipon nga babayi ukon sa iya toro nga baka ukon sa iya asno ukon sa bisan ano nga ginapanag-iyahan sang inyo isigkatawo.’+

22 “Amo ini ang mga sugo* nga ginhambal ni Jehova sa inyo bug-os nga katilingban sa bukid halin sa kalayo, sa panganod, kag sa madamol nga gal-um,+ paagi sa mabaskog nga tingog, kag wala na sia sing gindugang pa. Dayon ginsulat niya ini sa duha ka tapitapi nga bato kag ginhatag ini sa akon.+

23 “Apang pagkabati ninyo sang tingog halin sa kadudulman, samtang nagadabadaba ang bukid,+ nagpalapit sa akon ang tanan nga nagapanguna sa inyo mga tribo kag ang inyo mga gulang. 24 Dayon nagsiling kamo, ‘Ginpakita sa amon ni Jehova nga aton Dios ang iya himaya kag ang iya pagkagamhanan, kag nabatian namon ang iya tingog halin sa kalayo.+ Nakita namon sini nga adlaw nga ang tawo mahimo mabuhi bisan sa tapos makapakighambal ang Dios sa iya.+ 25 Indi namon luyag mapatay, kay basi masunog kami sa sining daku nga kalayo. Kon mabatian pa namon ang tingog ni Jehova nga aton Dios, mapatay gid kami. 26 Kay may mga tawo bala nga nakabati sang tingog sang buhi nga Dios halin sa kalayo pareho sang nabatian namon kag nabuhi pa? 27 Ikaw na lang ang magpalapit kag magpamati sa tanan nga ihambal ni Jehova nga aton Dios, dayon isugid mo sa amon ang tanan nga ihambal sa imo ni Jehova nga aton Dios. Pamatian namon ini kag tumanon.’+

28 “Gani nabatian ni Jehova ang inyo ginsiling sa akon, kag nagsiling si Jehova sa akon, ‘Nabatian ko ang ginsiling sang katawhan sa imo. Maayo ang tanan nila nga ginhambal.+ 29 Kon may tagipusuon lang sila kuntani nga pirme nagakahadlok sa akon+ kag ginatuman nila ang tanan ko nga sugo;+ mangin maayo ang ila kahimtangan kag sang ila mga anak sing dayon!+ 30 Isiling mo sa ila: “Magpauli kamo sa inyo mga tolda.” 31 Apang magpabilin ka diri upod sa akon, kag isugid ko sa imo ang tanan nga sugo, ang mga pagsulundan, kag ang mga kasuguan nga itudlo mo sa ila kag dapat nila tumanon sa duta nga ihatag ko sa ila agod panag-iyahan nila.’ 32 Gani tumana gid ninyo ang ginsugo sa inyo ni Jehova nga inyo Dios.+ Indi kamo magliso sa tuo ukon sa wala.+ 33 Maglakat kamo sa tanan nga dalanon nga ginsugo sa inyo ni Jehova nga inyo Dios,+ agod mabuhi kamo kag mag-uswag kag mangin malawig ang inyo kabuhi sa duta nga panag-iyahan ninyo.+

6 “Amo ini ang mga sugo, mga pagsulundan, kag mga kasuguan nga ginhatag ni Jehova nga inyo Dios nga itudlo sa inyo, kag tumanon ninyo ini kon magkadto na kamo sa duta nga panag-iyahan ninyo, 2 agod magkahadlok kamo kay Jehova nga inyo Dios kag tumanon ninyo kag sang inyo anak kag sang inyo apo ang tanan niya nga pagsulundan kag mga sugo nga ginahatag ko sa inyo,+ sa bug-os ninyo nga kabuhi, kag agod magkabuhi kamo sing malawig.+ 3 Pamatii, O Israel, kag tumana gid ini, agod mag-uswag kamo kag magdamo gid kamo sa duta diin nagailig ang gatas kag dugos, suno sa ginsaad sa inyo ni Jehova nga Dios sang inyo mga katigulangan.

4 “Pamatii, O Israel: Si Jehova nga aton Dios isa gid lang nga Jehova.+ 5 Higugmaa si Jehova nga inyo Dios sa bug-os ninyo nga tagipusuon kag sa bug-os ninyo nga kalag*+ kag sa bug-os ninyo nga kusog.*+ 6 Ining mga sugo nga ginahatag ko sa inyo subong dapat huptan ninyo sa inyo tagipusuon, 7 kag ipatudok* ninyo ini sa inyo anak+ kag ihambal ninyo ini kon nagapungko kamo sa inyo balay kag kon nagalakat kamo sa dalan kag kon nagahigda kamo kag kon magbangon kamo.+ 8 Magapahanumdom ini sa inyo nga daw nahigot ini sa inyo kamot kag daw nabugkos ini sa inyo agtang.*+ 9 Isulat ini sa mga bakalan sang inyo balay kag sa inyo mga gawang.

10 “Kon dalhon na kamo ni Jehova nga inyo Dios sa duta nga ginpanumpa niya sa inyo katigulangan nga si Abraham, si Isaac, kag si Jacob nga ihatag sa inyo,+ sa duta nga may dalagku kag matahom nga mga siudad nga indi kamo ang nagtukod,+ 11 mga balay nga puno sing tanan nga sahi sang maayo nga butang nga wala ninyo ginpangabudlayan, mga bubon nga indi kamo ang nagkutkot, kag mga ulubasan kag mga kahoy nga olibo nga indi kamo ang nagtanom, kag kon magkaon kamo didto kag mabusog,+ 12 mag-andam kamo nga indi ninyo pagkalimtan si Jehova+ nga nagpagua sa inyo sa duta sang Egipto, sa balay sang mga ulipon. 13 Magkahadlok kamo kay Jehova nga inyo Dios,+ kag mag-alagad kamo sa iya,+ kag magpanumpa kamo paagi sa iya ngalan.+ 14 Indi kamo magsunod sa iban nga mga dios, sa bisan ano nga mga dios sang katawhan sa inyo palibot,+ 15 kay si Jehova nga inyo Dios nga nagaupod sa inyo, isa ka Dios nga nagapatuman nga sia lang ang dapat simbahon.+ Kon magsunod kamo sa iban nga dios, magadabdab sa inyo ang kaakig ni Jehova nga inyo Dios+ kag laglagon niya kamo sa duta.+

16 “Indi ninyo pag-ibutang sa pagtilaw si Jehova nga inyo Dios+ pareho sang ginhimo ninyo sa iya sa Masa.*+ 17 Tumana gid ninyo ang mga sugo ni Jehova nga inyo Dios kag ang iya mga pahanumdom kag ang iya mga pagsulundan nga ginasugo niya sa inyo. 18 Himua kon ano ang matarong kag maayo sa panulok ni Jehova, agod mag-uswag kamo kag makasulod kag panag-iyahan ang maayo nga duta nga ginpanumpa ni Jehova sa inyo mga katigulangan,+ 19 paagi sa pagtabog sa tanan ninyo nga kaaway, suno sa ginsaad ni Jehova.+

20 “Kon pamangkuton kamo sang inyo anak sa ulihi, ‘Ano ang kahulugan sang mga pahanumdom, mga pagsulundan, kag mga kasuguan nga ginsugo ni Jehova nga aton Dios sa inyo?’ 21 isiling ninyo sa inyo anak, ‘Nangin mga ulipon kami sang Paraon sa Egipto, apang ginpagua kami ni Jehova sa Egipto paagi sa iya gamhanan nga kamot. 22 Gani nakita namon ang dalagku kag malaglagon nga mga tanda kag mga milagro nga ginhimo ni Jehova sa Egipto,+ sa Paraon kag sa bug-os niya nga panimalay.+ 23 Kag ginpagua niya kami didto agod madala niya kami diri kag ihatag sa amon ang duta nga ginpanumpa niya sa amon mga katigulangan.+ 24 Dayon ginsugo kami ni Jehova nga tumanon ini tanan nga pagsulundan kag magkahadlok kay Jehova nga aton Dios para sa aton kaayuhan pirme,+ agod padayon kita nga mabuhi,+ pareho subong. 25 Kag mangin matarong kita kon tumanon gid naton ining tanan nga sugo sa atubangan ni Jehova nga aton Dios, suno sa ginsugo niya sa aton.’+

7 “Kon dalhon na kamo ni Jehova nga inyo Dios sa duta nga kadtuan ninyo agod panag-iyahan ninyo,+ tabugon man niya ang madamo sing tawo nga mga pungsod,+ ang mga Hethanon, ang mga Girgasnon, ang mga Amornon,+ ang mga Canaanhon, ang mga Pereznon, ang mga Hevhanon, kag ang mga Jebusnon,+ ang pito ka pungsod nga mas madamo sing tawo kag mas gamhanan sangsa inyo.+ 2 Itugyan sila sa inyo ni Jehova nga inyo Dios, kag pierdihon ninyo sila.+ Laglagon gid ninyo sila.+ Indi kamo magpakigkatipan sa ila kag indi kamo maluoy sa ila.+ 3 Indi kamo magpamana ukon magpangasawa sa ila.* Indi ninyo pag-ihatag ang inyo anak nga babayi sa ila anak nga lalaki. Indi ninyo pagkuhaon ang ila anak nga babayi para sa inyo anak nga lalaki.+ 4 Kay patalikdon nila ang inyo anak sa pagsunod sa akon agod mag-alagad sa iban nga mga dios;+ dayon magadabdab ang kaakig ni Jehova batok sa inyo, kag laglagon niya kamo dayon.+

5 “Sa baylo, amo ini ang dapat ninyo himuon sa ila: Gub-on ninyo ang ila mga halaran, dugmukon ninyo ang ila sagrado nga mga haligi,+ utdon ninyo ang ila sagrado nga mga poste,*+ kag sunugon ninyo ang ila tinigib nga mga imahen.+ 6 Kay balaan kamo nga katawhan para kay Jehova nga inyo Dios, kag ginpili kamo ni Jehova nga inyo Dios agod mangin iya katawhan, isa ka hamili nga katawhan,* halin sa tanan nga katawhan sa duta.+

7 “Ginpalangga kamo ni Jehova kag ginpili niya kamo indi bangod kamo ang pinakadamo sa tanan nga katawhan,+ kay kamo ang pinakadiutay sa tanan nga katawhan.+ 8 Kundi bangod ginahigugma kamo ni Jehova, kag bangod gintuman niya ang iya ginpanumpa sa inyo mga katigulangan,+ gintubos kamo ni Jehova paagi sa iya makusog nga kamot, kag ginpagua halin sa balay sang mga ulipon,+ sa gahom* sang Paraon nga hari sang Egipto. 9 Nahibaluan gid ninyo nga si Jehova nga inyo Dios amo ang matuod nga Dios, ang matutom nga Dios, nga nagatuman sang iya katipan kag nagapakita sing mainunungon nga gugma tubtob sa linibo ka kaliwatan sang mga nagahigugma sa iya kag sang mga nagatuman sang iya mga sugo.+ 10 Apang sia mismo ang magabalos sa nagadumot sa iya paagi sa paglaglag sa iya.+ Indi sia magpadugay sa pagbalos sa mga nagadumot sa iya. 11 Gani tumana gid ninyo ang sugo, ang mga pagsulundan, kag ang mga kasuguan nga ginasugo ko sa inyo sa sini nga adlaw.

12 “Kon padayon kamo nga nagapamati sa sining mga kasuguan kag ginatuman ini, tumanon ni Jehova nga inyo Dios ang katipan sa inyo kag pakitaan niya kamo sing mainunungon nga gugma nga ginpanumpa niya sa inyo mga katigulangan. 13 Higugmaon niya kamo kag pakamaayuhon kag padamuon. Hatagan niya kamo sing madamo nga anak*+ kag pakamaayuhon niya ang inyo patubas, ang inyo uyas, ang inyo bag-o nga alak, ang inyo lana,+ ang mga tinday sang inyo mga baka kag ang mga tinday sang inyo mga karnero, sa duta nga ginpanumpa niya sa inyo mga katigulangan nga ihatag sa inyo.+ 14 Pakamaayuhon kamo sing labi sangsa tanan nga katawhan.+ Wala sing lalaki ukon babayi sa inyo nga wala sing anak, amo man ang inyo kasapatan.+ 15 Kuhaon ni Jehova sa inyo ang tanan nga masakit, kag indi niya pagtugutan nga mahanabo sa inyo ang tanan nga balatian nga nakita ninyo sa Egipto.+ Sa baylo, pahanabuon niya ini sa tanan nga nagadumot sa inyo. 16 Laglagon* ninyo ang tanan nga katawhan nga ginatugyan sa inyo ni Jehova nga inyo Dios.+ Indi kamo maluoy* sa ila,+ kag indi kamo mag-alagad sa ila mga dios,+ bangod mangin siod ini sa inyo.+

17 “Kon magsiling kamo sa inyo tagipusuon, ‘Ini nga mga pungsod mas madamo sing tawo sangsa amon. Paano namon sila matabog?’+ 18 indi kamo mahadlok sa ila.+ Dumdumon ninyo ang ginhimo ni Jehova nga inyo Dios sa Paraon kag sa bug-os nga Egipto,+ 19 ang daku nga mga pagtilaw* nga nakita ninyo, ang mga tanda, ang mga milagro,+ ang makusog nga kamot, kag ang gamhanan nga butkon nga gingamit ni Jehova nga inyo Dios sa pagpagua sa inyo.+ Amo man sini ang himuon ni Jehova nga inyo Dios sa tanan nga katawhan nga ginakahadlukan ninyo.+ 20 Pahanabuon ni Jehova nga inyo Dios nga mahadlukan sila, tubtob malaglag ang mga nagkalabilin+ kag ang mga nagapanago sa inyo. 21 Indi kamo mahadlok sa ila, kay kaupod ninyo si Jehova nga inyo Dios,+ nga isa ka gamhanan kag makahalawhaw nga Dios.+

22 “Amat-amat nga tabugon ni Jehova nga inyo Dios ini nga mga pungsod.+ Indi kamo pagtugutan nga laglagon sila dayon, agod indi magdamo ang mabangis nga mga sapat sa latagon batok sa inyo. 23 Itugyan sila sa inyo ni Jehova nga inyo Dios kag pierdihon ninyo sila tubtob malaglag sila.+ 24 Itugyan niya ang ila mga hari sa inyo kamot,+ kag panason ninyo ang ila mga ngalan sa idalom sang langit.+ Wala sing magatindog batok sa inyo,+ tubtob malaglag ninyo sila.+ 25 Sunugon ninyo ang ila mga dios nga tinigib nga mga imahen.+ Indi ninyo paghandumon ang pilak kag bulawan sa sini, kag indi ninyo ini pagkuhaon,+ kay basi masiod kamo sini, kay makangilil-ad ini nga butang kay Jehova nga inyo Dios.+ 26 Indi kamo magdala sing makangilil-ad nga butang sa inyo balay kag mangin pareho kamo sini nga dapat laglagon. Kaugtan gid ninyo ini kag kangil-aran, bangod butang ini nga dapat laglagon.

8 “Tumanon gid ninyo ang tanan nga sugo nga ginasugo ko sa inyo subong nga adlaw, agod padayon kamo nga mabuhi+ kag magdamo kag makasulod kamo sa duta nga ginpanumpa ni Jehova sa inyo mga katigulangan agod panag-iyahan ninyo.+ 2 Dumduma ang madugay nga pagpanglakaton ninyo sa dalanon nga ginpalaktan sa inyo ni Jehova nga inyo Dios sa sulod sining 40 ka tuig sa kamingawan,+ agod magpaubos kamo kag ibutang kamo sa pagtilaw+ agod mahibaluan kon ano ang yara sa inyo tagipusuon,+ kon bala tumanon ninyo ang iya mga sugo ukon indi. 3 Gani ginpaubos niya kamo kag gintugutan kamo nga magutom+ kag ginpakaon kamo sing manna,+ nga wala pa ninyo makilala bisan sang inyo mga amay, agod mahibaluan ninyo nga indi sa tinapay lamang mabuhi ang tawo kundi sa tagsa ka pulong nga nagagua sa baba ni Jehova.+ 4 Wala magdaan ang inyo mga bayo, kag wala magbanog ang inyo mga tiil sa sulod sining 40 ka tuig.+ 5 Nahibaluan gid ninyo sa inyo tagipusuon nga subong nga ginatadlong sang isa ka tawo ang iya anak, ginatadlong kamo ni Jehova nga inyo Dios.+

6 “Gani tumana ninyo ang mga sugo ni Jehova nga inyo Dios paagi sa paglakat sa iya mga dalanon kag paagi sa pagkahadlok sa iya. 7 Kay dalhon kamo ni Jehova nga inyo Dios sa maayo nga duta,+ isa ka duta nga may mga sapa,* mga tuburan kag tubig* nga nagailig sa mga patag kag sa mga bukid, 8 isa ka duta nga may mga trigo kag mga sebada, mga ulubasan, mga kahoy nga higuera, kag mga kahoy nga granada,+ isa ka duta nga may mga lana sang olibo kag may mga dugos,+ 9 isa ka duta diin indi maiwat ang kalan-on kag indi kamo pagkulangon sing bisan ano, isa ka duta diin ang mga bato may salsalon kag magamina kamo sing saway sa kabukiran sini.

10 “Kon makakaon na kamo kag mabusog, dayawon ninyo si Jehova nga inyo Dios tungod sa maayo nga duta nga ginhatag niya sa inyo.+ 11 Mag-andam kamo nga indi ninyo pagkalimtan si Jehova nga inyo Dios kag indi ninyo matuman ang iya mga sugo, ang iya mga kasuguan, kag ang iya mga pagsulundan nga ginasugo ko sa inyo subong nga adlaw. 12 Kon magkaon kamo kag mabusog kag magpatindog kamo sing maayo nga mga balay kag mag-istar sa sini,+ 13 kon magdamo ang inyo mga baka, kag iban pa nga kasapatan, ang inyo pilak kag bulawan, kag madamo kamo sing tanan nga butang, 14 mag-andam kamo nga indi magpabugal ang inyo tagipusuon+ kag malimtan ninyo si Jehova nga inyo Dios, nga nagpagua sa inyo halin sa duta sang Egipto, diin gin-ulipon kamo,*+ 15 nga nagpalakat sa inyo sa malapad kag makahaladlok nga kamingawan+ nga may dalitan nga mga man-ug kag mga iwiiwi kag mamala nga duta nga wala sing tubig. Nagpagua sia sing tubig para sa inyo halin sa bato-bantiling+ 16 kag ginpakaon niya kamo sa kamingawan sing manna,+ nga indi kilala sang inyo mga amay, agod magpaubos kamo+ kag ibutang sa pagtilaw agod mangin maayo ang inyo palaabuton.+ 17 Kon magsiling kamo sa inyo tagipusuon, ‘Naangkon namon ini nga manggad tungod sa amon gahom kag sa kusog sang amon kamot,’+ 18 dumduma nga si Jehova nga inyo Dios amo ang nagahatag sa inyo sing gahom sa pagtipon sing manggad,+ agod matuman niya ang iya katipan nga ginpanumpa niya sa inyo mga katigulangan, nga amo ang nagakatabo subong.+

19 “Kon kalimtan ninyo si Jehova nga inyo Dios kag magsunod kamo sa iban nga mga dios kag mag-alagad sa ila kag magyaub sa ila, nagasaksi ako batok sa inyo subong nga adlaw nga malaglag gid kamo.+ 20 Malaglag kamo pareho sang paglaglag ni Jehova sang mga pungsod sa inyo atubangan, bangod wala kamo magpamati kay Jehova nga inyo Dios.+

9 “Pamatii, O Israel, matabok kamo subong sa Jordan+ agod sakupon ang mga pungsod nga mas daku kag mas gamhanan sangsa inyo.+ May mga siudad ini nga dalagku kag may pader tubtob sa langit,*+ 2 may mga tawo ini nga dalagku kag mataas nga mga anak sang mga Anakim.+ Nahibaluan ninyo ang tuhoy sa ila kag nabatian ninyo ang ginsiling, ‘Sin-o ang makabato sa mga anak ni Anak?’ 3 Gani, dapat mahibaluan ninyo sini nga adlaw nga si Jehova nga inyo Dios magauna sa inyo sa pagtabok.+ Isa sia ka kalayo nga nagapang-upos+ kag laglagon niya sila. Sakupon niya sila sa inyo atubangan agod matabog ninyo sila gilayon kag malaglag, suno sa ginsaad ni Jehova sa inyo.+

4 “Kon tabugon na sila ni Jehova nga inyo Dios, indi kamo magsiling sa inyo tagipusuon, ‘Gindala kita ni Jehova sa sini nga duta agod panag-iyahan ini bangod sang aton pagkamatarong.’+ Sa baylo, gintabog ni Jehova ini nga mga pungsod+ sa inyo atubangan bangod sang ila kalautan. 5 Indi bangod sang inyo pagkamatarong ukon pagkatadlong sang inyo tagipusuon nga makasulod kamo agod panag-iyahan ang ila duta. Kundi, bangod malaut ini nga mga pungsod amo nga tabugon sila ni Jehova nga inyo Dios sa inyo atubangan+ kag agod matuman ang ginpanumpa ni Jehova sa inyo mga katigulangan, kay Abraham,+ kay Isaac,+ kag kay Jacob.+ 6 Gani, dapat mahibaluan ninyo nga indi bangod sang inyo pagkamatarong nga ginahatag sa inyo ni Jehova nga inyo Dios ining maayo nga duta agod panag-iyahan ninyo; bangod batinggilan* kamo nga katawhan.+

7 “Dumduma ninyo, kag indi gid ninyo pagkalimti kon paano ninyo ginpaakig si Jehova nga inyo Dios sa kamingawan.+ Sugod sang adlaw nga naghalin kamo sa duta sang Egipto tubtob nag-abot kamo sa sini nga lugar, nagrebelde kamo kay Jehova.+ 8 Bisan sa Horeb ginpaakig ninyo si Jehova, kag naakig gid si Jehova sa inyo amo nga laglagon na niya kamo.+ 9 Sang nagtaklad ako sa bukid agod kuhaon ang mga tapitapi nga bato,+ ang mga tapitapi sang katipan nga ginhimo ni Jehova sa inyo,+ nagtener ako sa bukid sa sulod sang 40 ka adlaw kag 40 ka gab-i+ nga wala makakaon kag wala makainom sing tubig. 10 Dayon ginhatag sa akon ni Jehova ang duha ka tapitapi nga bato nga ginsulatan sang tudlo sang Dios, kag nasulat sa sini ang tanan nga ginsiling ni Jehova sa inyo halin sa kalayo didto sa bukid, sang adlaw nga nagtipon kamo didto.+ 11 Sa katapusan sang 40 ka adlaw kag 40 ka gab-i, ginhatag sa akon ni Jehova ang duha ka tapitapi nga bato, ang mga tapitapi sang katipan, 12 kag nagsiling si Jehova sa akon, ‘Magdulhog ka gilayon, bangod ang imo katawhan nga ginpagua mo sa Egipto naghimo sing malain.+ Kadali lang sa ila magsipak sa dalanon nga ginsugo ko nga laktan nila. Naghimo sila para sa ila kaugalingon sing metal nga imahen.’*+ 13 Dayon nagsiling si Jehova sa akon, ‘Nakita ko nga batinggilan* ini nga katawhan.+ 14 Pabay-i ako, kag laglagon ko sila kag panason ang ila ngalan sa idalom sang langit, kag himuon ko ikaw nga isa ka pungsod nga mas gamhanan kag mas madamo sing tawo sangsa ila.’+

15 “Dayon nagdulhog ako sa bukid samtang ang bukid nagadabdab,+ kag dala ko ang duha ka tapitapi sang katipan.+ 16 Dayon nakita ko nga nagpakasala kamo kay Jehova nga inyo Dios! Naghimo kamo para sa inyo kaugalingon sing metal* nga tinday nga baka. Kadali lang sa inyo magsipak sa dalanon nga ginsugo ni Jehova nga laktan ninyo.+ 17 Gani ginlampos ko ang ginauyatan ko nga duha ka tapitapi kag nakita ninyo nga nabuka ini.+ 18 Dayon, pareho sang una, nagyaub ako sa atubangan ni Jehova sa sulod sang 40 ka adlaw kag 40 ka gab-i. Wala ako magkaon ukon mag-inom sing tubig,+ bangod sang tanan nga sala nga ginhimo ninyo. Ginhimo ninyo ang malain sa atubangan ni Jehova kag ginpaakig ninyo sia. 19 Kay hinadlukan gid ako bangod sang daku nga kaakig ni Jehova sa inyo,+ amo nga laglagon na niya kamo. Apang, ginpamatian man ako ni Jehova sadto nga tion.+

20 “Naakig gid si Jehova kay Aaron amo nga laglagon na niya sia,+ apang nagpangamuyo man ako para kay Aaron sadto nga tion. 21 Dayon ginkuha ko ang tinday nga baka nga ginhimo ninyo,+ nga tungod sini nakasala kamo, kag ginsunog ko ini. Gindugmok ko ini kag ginbukbok tubtob nagpino ini pareho sang yab-ok, kag ginsabwag ko ini sa tubig nga nagailig halin sa bukid.+

22 “Ginpaakig man ninyo si Jehova sa Tabera,+ sa Masa,+ kag sa Kibrot-hataava.+ 23 Sang ginpalakat kamo ni Jehova halin sa Kades-barnea+ kag nagsiling, ‘Magtaklad kamo kag panag-iyahi ninyo ang duta nga ihatag ko sa inyo!’ nagrebelde kamo liwat sa sugo ni Jehova nga inyo Dios,+ kag wala kamo magtuo+ sa iya kag wala ninyo sia gintuman. 24 Nagrebelde kamo kay Jehova sugod pa sang nakilala ko kamo.

25 “Gani nagyaub ako sa atubangan ni Jehova sa sulod sang 40 ka adlaw kag 40 ka gab-i,+ nagyaub ako sa sining paagi bangod nagsiling si Jehova nga laglagon niya kamo. 26 Nagpangamuyo ako sing hanuot kay Jehova kag nagsiling, ‘O Soberanong Ginuong Jehova, indi paglaglaga ang imo katawhan. Ginapanag-iyahan* mo sila,+ kag gintubos mo sila paagi sa imo daku nga gahom kag ginpagua mo sila sa Egipto paagi sa gamhanan nga kamot.+ 27 Dumduma ang imo mga alagad nga si Abraham, si Isaac, kag si Jacob.+ Indi pagtalupangda ang pagkabatinggilan sini nga katawhan, ang ila kalautan, kag ang ila sala.+ 28 Kon himuon mo ini, ang katawhan sang duta diin ginpagua mo kami masiling: “Indi makasarang si Jehova sa pagdala sa ila sa duta nga ginsaad niya sa ila, kag bangod naakig sia sa ila, ginpagua niya sila agod patyon sa kamingawan.”+ 29 Kay katawhan mo sila kag ginapanag-iyahan* mo sila,+ kag ginpagua mo sila paagi sa imo daku nga gahom kag sa imo gamhanan nga butkon.’+

10 “Sadto nga tion nagsiling si Jehova sa akon, ‘Magbasbas ka sing duha ka tapitapi nga bato pareho sang nauna,+ kag magtaklad ka sa akon sa bukid. Maghimo ka man sing kaban* nga kahoy. 2 Kag isulat ko sa mga tapitapi ang mga pulong nga yara sa nauna nga mga tapitapi nga ginbuka mo, dayon ibutang mo ini sa kaban.’ 3 Gani naghimo ako sing kaban nga akasya nga kahoy kag nagbasbas sing duha ka tapitapi nga bato pareho sang nauna kag nagtaklad ako sa bukid nga dala ang duha ka tapitapi.+ 4 Dayon ginsulat niya sa mga tapitapi ang ginsulat man niya sa nauna,+ ang Napulo ka Sugo,*+ nga ginsiling ni Jehova sa inyo halin sa kalayo sa bukid+ sang adlaw nga nagtipon kamo didto,+ kag ginhatag ini ni Jehova sa akon. 5 Dayon nagdulhog ako sa bukid+ kag ginbutang ang mga tapitapi sa kaban nga ginhimo ko, suno sa ginsugo ni Jehova sa akon. Yara ini sa kaban tubtob subong.

6 “Dayon halin sa Beerot Bene-jaakan nagkadto ang mga Israelinhon sa Mosera. Didto napatay si Aaron, kag didto man sia ginlubong.+ Si Eleazar nga iya anak amo ang nagbulos sa iya bilang saserdote.+ 7 Halin didto nagkadto sila sa Gudgoda, kag halin sa Gudgoda nagkadto sila sa Jotbata,+ isa ka duta nga may mga sapa.*

8 “Sadto nga tion ginpili ni Jehova ang tribo ni Levi+ agod magdala sang kaban sang katipan ni Jehova,+ agod magtindog sa atubangan ni Jehova sa pag-alagad sa iya, kag agod magpakamaayo sa mga tawo sa iya ngalan,+ nga ginahimo nila tubtob sini nga adlaw. 9 Amo kon ngaa wala ginhatagan sing parte ukon palanublion si Levi sa tunga sang iya mga utod. Si Jehova amo ang iya palanublion, suno sa ginsiling sa iya ni Jehova nga inyo Dios.+ 10 Nagtener ako sa bukid sa sulod sang 40 ka adlaw kag 40 ka gab-i+ pareho sang una, kag ginpamatian liwat ako ni Jehova.+ Indi luyag ni Jehova nga laglagon kamo. 11 Dayon nagsiling si Jehova sa akon, ‘Pangunahan mo ang katawhan kag maglakat kamo, agod makasulod sila sa duta nga ginpanumpa ko sa ila mga katigulangan nga ihatag sa ila kag panag-iyahan nila ini.’+

12 “Kag karon, O Israel, ano bala ang ginapangayo ni Jehova nga inyo Dios sa inyo?+ Amo lamang ini: ang pagkahadlok kay Jehova nga inyo Dios,+ ang paglakat sa tanan niya nga dalanon,+ ang paghigugma sa iya, ang pag-alagad kay Jehova nga inyo Dios sa bug-os ninyo nga tagipusuon kag sa bug-os ninyo nga kalag,*+ 13 kag ang pagtuman sa mga sugo kag mga pagsulundan ni Jehova nga ginasugo ko sa inyo subong nga adlaw para sa inyo kaayuhan.+ 14 Iya ni Jehova nga inyo Dios ang mga langit, bisan ang pinakamataas nga langit,* kag ang duta kag ang tanan nga yara sa sini.+ 15 Apang ang inyo mga katigulangan lamang ang ginhigugma ni Jehova, gani ginpili niya kamo nga ila kaliwat+ halin sa tanan nga katawhan, pareho sang ginhimo niya sini nga adlaw. 16 Tinlui* ninyo ang inyo tagipusuon+ kag indi na kamo mangin batinggilan.*+ 17 Kay si Jehova nga inyo Dios amo ang Dios sang mga dios+ kag ang Ginuo sang mga ginuo, ang Dios nga halangdon, gamhanan, kag makahalawhaw, nga wala sing ginapasulabi+ kag wala nagabaton sing hamham. 18 Nagapakita sia sing hustisya sa ilo* kag sa balo nga babayi+ kag ginahigugma niya ang dumuluong nga pumuluyo+ kag ginahatagan sila sing pagkaon kag bayo. 19 Higugmaon man ninyo ang dumuluong nga pumuluyo, kay nangin dumuluong nga pumuluyo kamo sa duta sang Egipto.+

20 “Magkahadlok kamo kay Jehova nga inyo Dios, mag-alagad kamo sa iya,+ magpabilin kamo sa iya, kag magpanumpa kamo paagi sa iya ngalan. 21 Sia ang Isa nga dapat ninyo dayawon.+ Sia ang inyo Dios, nga naghimo para sa inyo sining tanan nga daku kag makahalawhaw nga mga butang nga nakita ninyo.+ 22 Sang nagdulhog ang inyo mga katigulangan sa Egipto,+ 70 lang sila tanan,* kag karon ginpadamo kamo ni Jehova nga inyo Dios pareho sang mga bituon sa langit.+

11 “Higugmaon ninyo si Jehova nga inyo Dios+ kag tumanon ninyo pirme ang inyo obligasyon sa iya kag ang iya mga pagsulundan, ang iya mga kasuguan, kag ang iya mga sugo. 2 Nahibaluan ninyo subong nga adlaw nga sa inyo ako nagapakighambal, kag indi sa inyo mga anak nga wala makahibalo kag wala makakita sang pagdisiplina ni Jehova nga inyo Dios,+ sang iya pagkahalangdon,+ sang iya makusog nga kamot+ kag sang iya gamhanan nga butkon. 3 Wala nila makita ang mga tanda kag ang mga binuhatan nga ginhimo niya sa Egipto, sa Paraon nga hari sang Egipto, kag sa bug-os niya nga duta;+ 4 ukon ang ginhimo niya sa mga soldado sang Egipto, sa mga kabayo sang Paraon kag sa iya mga kangga sa inaway nga gintabunan sang tubig sang Pula nga Dagat sang ginlagas nila sila, kag ginlaglag sila ni Jehova sing bug-os.*+ 5 Wala nila makita ang iya ginhimo sa inyo sa kamingawan tubtob nakaabot kamo sa sini nga lugar, 6 ukon ang ginhimo niya kay Datan kag kay Abiram nga mga anak ni Eliab nga anak ni Ruben, sang nagnganga ang duta kag ginlamon sila, upod ang ila mga panimalay kag ang ila mga tolda kag ang tanan nga nagsunod sa ila, nga nakita sang bug-os nga Israel.+ 7 Nakita gid ninyo ang tanan nga daku nga buhat nga ginhimo ni Jehova.

8 “Gani tumana ninyo ang tanan nga sugo nga ginahatag ko sa inyo subong nga adlaw, agod mangin makusog kamo kag makasulod sa duta nga panag-iyahan ninyo, 9 kag agod maglawig ang inyo kabuhi+ sa duta nga ginpanumpa ni Jehova sa inyo mga katigulangan nga ihatag sa ila kag sa ila kaliwat,*+ isa ka duta diin nagailig ang gatas kag dugos.+

10 “Ang duta nga panag-iyahan ninyo indi pareho sa duta sang Egipto nga inyo ginhalinan, diin nagasab-ug kamo anay sang inyo binhi kag nagapatubig sini paagi sa inyo tiil,* pareho sa talamnan sang mga utan. 11 Apang ang duta nga kadtuan ninyo agod panag-iyahan ninyo isa ka duta nga may mga bukid kag mga patag.+ Ginasuyop sini ang ulan halin sa langit;+ 12 isa ini ka duta nga ginaatipan ni Jehova nga inyo Dios. Ang mga mata ni Jehova nga inyo Dios pirme nagabantay sa sini, halin sa umpisa sang tuig tubtob sa katapusan sang tuig.

13 “Gani kon tumanon gid ninyo ang akon mga sugo nga ginasugo ko sa inyo subong nga adlaw kag higugmaon ninyo si Jehova nga inyo Dios kag mag-alagad kamo sa iya sa bug-os ninyo nga tagipusuon kag sa bug-os ninyo nga kalag,*+ 14 magahatag man ako sing ulan para sa inyo duta sa nagakaigo nga tion, ang ulan sa tigragas kag sa tigpamulak, kag magaani kamo sang inyo uyas, bag-o nga alak, kag lana.+ 15 Magahatag ako sing mga tanom sa latagon para sa inyo mga sapat, kag magakaon kamo kag mabusog.+ 16 Mag-andam kamo nga indi mahaylo ang inyo tagipusuon sa pagsimba sa iban nga mga dios kag sa pagyaub sa ila.+ 17 Kay kon matabo ini, magadabdab batok sa inyo ang kaakig ni Jehova, kag takpan niya ang langit agod indi na mag-ulan+ kag indi na magpatubas ang duta kag malaglag kamo gilayon sa maayo nga duta nga ginahatag sa inyo ni Jehova.+

18 “Ipatudok ninyo ining akon mga pulong sa inyo tagipusuon kag sa inyo kalag,* kag magapahanumdom ini sa inyo nga daw nahigot ini sa inyo kamot kag nabugkos sa inyo agtang.*+ 19 Itudlo ninyo ini sa inyo mga anak, kag ihambal ini sa ila kon nagapungko kamo sa inyo balay, kag kon nagalakat kamo sa dalan, kag kon nagahigda kamo, kag kon magbangon kamo.+ 20 Isulat ninyo ini sa mga bakalan sang inyo balay kag sa inyo mga gawang, 21 agod ang kabuhi ninyo kag sang inyo mga anak magalawig+ sa duta nga ginpanumpa ni Jehova nga ihatag sa inyo mga katigulangan,+ tubtob nga ang langit yara sa ibabaw sang duta.

22 “Kon tumanon gid ninyo ining tanan nga sugo nga ginahatag ko sa inyo, nga higugmaon ninyo si Jehova nga inyo Dios,+ kag maglakat kamo sa tanan niya nga dalanon kag magpabilin sa iya,+ 23 tabugon ni Jehova ining tanan nga pungsod,+ kag sakupon ninyo ang mga pungsod nga mas daku kag mas madamo sing tawo sangsa inyo.+ 24 Mangin inyo ang tanan nga lugar nga tapakan sang inyo tiil.+ Ang inyo dulunan mangin halin sa kamingawan tubtob sa Lebanon, halin sa Suba Eufrates, tubtob sa nakatundan nga dagat.*+ 25 Wala sing magatindog batok sa inyo.+ Pahanabuon ni Jehova nga inyo Dios nga makugmat kag mahadlok sa inyo ang katawhan sang duta nga kadtuan ninyo,+ suno sa ginsaad niya sa inyo.

26 “Ginabutang ko sa inyo atubangan subong nga adlaw ang pagpakamaayo kag ang pagpakamalaut:+ 27 ang pagpakamaayo, kon tumanon ninyo ang mga sugo ni Jehova nga inyo Dios nga ginasugo ko sa inyo subong nga adlaw,+ 28 kag ang pagpakamalaut, kon indi ninyo pagtumanon ang mga sugo ni Jehova nga inyo Dios+ kag magsipak kamo sa dalanon nga ginasugo ko sa inyo subong nga adlaw, kag magsunod kamo sa iban nga mga dios nga wala ninyo makilala.

29 “Kon dalhon na kamo ni Jehova nga inyo Dios sa duta nga panag-iyahan ninyo, ipahayag* ninyo ang pagpakamaayo sa Bukid Gerizim kag ang pagpakamalaut sa Bukid Ebal.+ 30 Indi bala yara ini sa pihak nga bahin sang Jordan sa katundan,* sa duta sang mga Canaanhon nga nagaistar sa Araba, sa atubangan sang Gilgal, malapit sa dalagku nga mga kahoy ni More?+ 31 Kay magatabok kamo sa Jordan kag magasulod kamo sa duta nga ginahatag sa inyo ni Jehova nga inyo Dios kag panag-iyahan ninyo ini.+ Kon panag-iyahan na ninyo ini kag mag-istar kamo sa sini, 32 tumana gid ninyo ang tanan nga pagsulundan kag mga kasuguan nga ginahatag ko sa inyo subong nga adlaw.+

12 “Amo ini ang mga pagsulundan kag ang mga kasuguan nga dapat gid ninyo tumanon sa tanan nga adlaw nga nagakabuhi kamo sa duta nga ginahatag ni Jehova nga Dios sang inyo mga katigulangan nga panag-iyahan ninyo. 2 Laglagon gid ninyo ang tanan nga lugar diin ang mga pungsod nga sakupon ninyo nagaalagad sa ila mga dios,+ sa mataas nga mga bukid ukon sa mga bakulod ukon sa idalom sang madabong nga kahoy. 3 Gub-on ninyo ang ila mga halaran, pang-utdon ang ila sagrado nga mga haligi,+ sunugon ang ila sagrado nga mga poste,* dugmukon ang tinigib nga mga imahen sang ila mga dios,+ kag panason ninyo ang ila mga ngalan sa sina nga lugar.+

4 “Indi ninyo pagsimbahon si Jehova nga inyo Dios sa sina nga paagi.+ 5 Sa baylo, pangitaa ninyo si Jehova nga inyo Dios sa bisan diin nga lugar sa tunga sang tanan ninyo nga tribo nga pilion niya nga ibutang ang iya ngalan kag ang iya puluy-an, kag magkadto kamo didto.+ 6 Dalhon ninyo didto ang inyo mga dulot nga sinunog,+ ang inyo mga halad, ang inyo mga ikanapulo,+ ang inyo amot,+ ang inyo mga dulot tungod sa panaad, ang inyo kinabubut-on nga mga dulot,+ kag ang panganay sang inyo mga karnero kag sang iban pa ninyo nga kasapatan.+ 7 Didto kamo kag ang inyo mga panimalay magkaon sa atubangan ni Jehova nga inyo Dios+ kag magkalipay kamo sa tanan ninyo nga buluhaton,+ bangod ginpakamaayo kamo ni Jehova nga inyo Dios.

8 “Indi ninyo paghimuon ang tanan nga ginahimo naton diri subong nga adlaw, nga ang kada isa nagahimo kon ano sa banta niya ang husto,* 9 bangod wala pa kamo mag-abot sa lugar nga palahuwayan+ kag sa palanublion nga ginahatag sa inyo ni Jehova nga inyo Dios. 10 Kon magtabok na kamo sa Jordan+ kag mag-istar sa duta nga ginahatag sa inyo ni Jehova nga inyo Dios agod panag-iyahan ninyo, hatagan niya kamo sing kalinong batok sa tanan ninyo nga kaaway sa palibot, kag magakabuhi kamo nga wala sing katalagman.+ 11 Dalhon ninyo ang tanan nga ginasugo ko sa inyo sa lugar nga pilion ni Jehova nga inyo Dios nga ibutang ang iya ngalan.+ Dalhon ninyo didto ang inyo mga dulot nga sinunog, ang inyo mga halad, ang inyo mga ikanapulo,+ ang inyo amot, kag ang tanan nga dulot nga ginpanaad ninyo kay Jehova. 12 Magakasadya kamo sa atubangan ni Jehova nga inyo Dios,+ kamo kag ang inyo mga anak nga lalaki, ang inyo mga anak nga babayi, ang inyo mga ulipon nga lalaki kag babayi, kag ang mga Levinhon nga yara sa sulod sang inyo mga siudad,* kay wala sila ginhatagan sing parte ukon palanublion sa tunga ninyo.+ 13 Mag-andam kamo nga indi ninyo pag-ihalad ang inyo mga dulot nga sinunog sa iban nga lugar nga inyo makita.+ 14 Dapat ninyo ihalad ang inyo mga dulot nga sinunog sa lugar nga pilion ni Jehova sa isa sang mga teritoryo sang inyo tribo, kag didto ninyo himuon ang tanan nga ginasugo ko sa inyo.+

15 “Apang kon luyag ninyo* magkaon sing karne, mahimo kamo mag-ihaw kag magkaon sing karne+ sa tanan ninyo nga siudad* suno sa pagpakamaayo nga ginahatag sa inyo ni Jehova nga inyo Dios. Ang tawo nga indi matinlo kag ang tawo nga matinlo makakaon sini, pareho sang pagkaon nila sang gasela kag sang usa. 16 Apang indi ninyo pagkaunon ang dugo;+ iula ninyo ini sa duta pareho sang tubig.+ 17 Wala kamo ginatugutan nga kaunon sa sulod sang inyo mga siudad* ang ikanapulo nga bahin sang inyo uyas, sang inyo bag-o nga alak, kag sang inyo lana. Indi man ninyo pagkaunon sa sulod sang inyo siudad ang panganay sang inyo mga karnero kag sang inyo iban pa nga kasapatan,+ ang inyo dulot tungod sa panaad, ang inyo kinabubut-on nga mga dulot, ukon ang inyo amot. 18 Magkaon kamo sini sa atubangan ni Jehova nga inyo Dios sa lugar nga pilion ni Jehova nga inyo Dios,+ kamo kag ang inyo anak nga lalaki, ang inyo anak nga babayi, ang inyo alagad nga lalaki kag babayi, kag ang Levinhon nga yara sa sulod sang inyo mga siudad;* kag magkasadya kamo sa atubangan ni Jehova nga inyo Dios sa tanan ninyo nga buluhaton. 19 Mag-andam kamo nga indi ninyo pagpabay-an ang Levinhon+ samtang nagakabuhi kamo sa inyo duta.

20 “Kon palaparon na ni Jehova nga inyo Dios ang inyo teritoryo+ suno sa ginsaad niya sa inyo,+ kag masiling kamo, ‘Gusto namon magkaon sing karne,’ bangod luyag ninyo* magkaon sing karne, mahimo kamo makakaon sing karne kon luyag ninyo himuon ini.*+ 21 Kon malayo sa inyo ang lugar nga pilion ni Jehova nga inyo Dios nga ibutang ang iya ngalan,+ ihawon ninyo ang pila sang inyo mga karnero ukon ang pila sang iban ninyo nga kasapatan nga ginhatag ni Jehova sa inyo, suno sa ginsugo ko sa inyo, kag dapat ninyo kaunon ang karne sa sulod sang inyo mga siudad* kon luyag ninyo* magkaon sini. 22 Kaunon ninyo ini pareho sang pagkaon ninyo sang gasela kag sang usa;+ ang tawo nga indi matinlo kag ang tawo nga matinlo makakaon sini. 23 Apang manindugan gid kamo nga indi ninyo pagkaunon ang dugo,+ bangod ang dugo amo ang kabuhi*+ kag indi ninyo pagkaunon ang kabuhi* upod sa unod. 24 Indi ninyo pagkaunon ini. Iula ninyo ini sa duta pareho sang tubig.+ 25 Indi ninyo pagkaunon ini, agod mangin maayo ang kahimtangan ninyo kag sang inyo mga anak, bangod ginahimo ninyo ang matarong sa panulok ni Jehova. 26 Ang inyo balaan nga mga butang kag ang inyo mga dulot tungod sa panaad amo lang ang dalhon ninyo kon magkadto kamo sa lugar nga pilion ni Jehova. 27 Ihalad ninyo didto ang inyo mga dulot nga sinunog, ang unod kag ang dugo,+ sa halaran ni Jehova nga inyo Dios, kag ang dugo sang inyo mga halad dapat iula sa halaran+ ni Jehova nga inyo Dios, apang ang unod mahimo ninyo kaunon.

28 “Mag-andam kamo nga tumanon ninyo ining tanan nga ginasugo ko sa inyo, agod mangin maayo pirme ang kahimtangan ninyo kag sang inyo mga anak, bangod ginahimo ninyo ang maayo kag matarong sa panulok ni Jehova nga inyo Dios.

29 “Kon laglagon na ni Jehova nga inyo Dios ang mga pungsod nga sakupon ninyo,+ kag nagaistar na kamo sa ila duta, 30 mag-andam kamo nga indi kamo masiod pagkatapos sila malaglag. Indi kamo magpamangkot tuhoy sa ila mga dios, ‘Paano sadto ginaalagad sini nga mga pungsod ang ila mga dios? Amo man sini ang himuon naton.’+ 31 Indi ninyo paghimuon ini kay Jehova nga inyo Dios, kay ginhimo nila sa ila mga dios ang tanan nga makangilil-ad nga butang nga ginakaugtan ni Jehova, kay bisan ang ila mga anak nga lalaki kag ang ila mga anak nga babayi ginsunog nila para sa ila mga dios.+ 32 Ang tanan nga ginasugo ko sa inyo amo lang ang sundon ninyo.+ Indi ninyo ini pagdugangan ukon pagbuhinan.+

13 “Kon may isa ka manalagna ukon isa nga nagasugid sang palaabuton paagi sa damgo halin sa tunga ninyo nga maghatag sa inyo sing isa ka tanda ukon palatandaan, 2 kag ang tanda ukon ang palatandaan nangin matuod, kag magsiling sia sa inyo, ‘Magsunod kita sa iban nga mga dios,’ nga wala ninyo makilala, ‘kag mag-alagad kita sa ila,’ 3 indi kamo magpamati sa ginasiling sina nga manalagna ukon sa sina nga nagasugid sang palaabuton paagi sa damgo,+ bangod ginatilawan kamo ni Jehova nga inyo Dios+ agod mahibaluan niya kon bala ginahigugma ninyo si Jehova nga inyo Dios sa bug-os ninyo nga tagipusuon kag sa bug-os ninyo nga kalag.*+ 4 Dapat kamo magsunod kay Jehova nga inyo Dios, dapat kamo magkahadlok sa iya, dapat ninyo tumanon ang iya mga sugo, dapat ninyo pamatian ang iya tingog; dapat ninyo sia alagdon, kag dapat kamo magpabilin sa iya.+ 5 Apang dapat patyon ina nga manalagna ukon ina nga nagasugid sang palaabuton paagi sa damgo+ bangod ginahaylo niya kamo nga magrebelde kay Jehova nga inyo Dios, nga nagpagua sa inyo sa duta sang Egipto kag nagtubos sa inyo sa balay sang mga ulipon, agod magsipak kamo sa dalan nga ginasugo ni Jehova nga inyo Dios nga laktan ninyo. Dapat ninyo dulaon ang malaut sa tunga ninyo.+

6 “Kon ang imo utod sa iloy, ukon ang imo anak nga lalaki ukon anak nga babayi ukon ang imo pinalangga nga asawa ukon ang imo pinakasuod nga kaupod* magganyat sa imo sing tago, ‘Maglakat kita kag mag-alagad sa iban nga mga dios,’+ nga wala mo makilala kag wala makilala sang imo mga katigulangan, 7 sa mga dios sang mga katawhan sa inyo palibot, malapit man ukon malayo sa inyo, sa bug-os nga duta, 8 indi ka magpasugot sa luyag niya ukon magpamati sa iya,+ indi ka maluoy sa iya kag indi mo sia pag-amligan; 9 kundi patyon mo sia.+ Ikaw ang una nga magbato sa iya agod patyon sia, kag dayon batuhon man sia sang tanan nga tawo.+ 10 Batuhon mo sia tubtob mapatay sia,+ bangod nagtinguha sia nga patalikuron kamo kay Jehova nga inyo Dios, nga nagpagua sa inyo sa duta sang Egipto diin gin-ulipon kamo. 11 Dayon mabatian ini sang bug-os nga Israel kag mahadlok sila, kag indi na sila maghimo liwat sa inyo sing malain nga butang nga pareho sini.+

12 “Kon may mabatian kamo nga magsiling sa isa sang inyo mga siudad nga ginahatag sa inyo ni Jehova nga inyo Dios nga istaran ninyo, 13 ‘May mga tawo nga wala sing pulos halin sa inyo nga nagatinguha nga patalikuron ang mga pumuluyo sang ila siudad, kag nagasiling sila: “Maglakat kita kag mag-alagad sa iban nga mga dios,” nga wala ninyo makilala,’ 14 usisaa ninyo ini sing maayo.+ Kon mapamatud-an nga matuod nga ginhimo ining makangilil-ad nga butang sa tunga ninyo, 15 patyon ninyo paagi sa espada ang mga pumuluyo sina nga siudad.+ Laglagon+ ninyo ini kag ang tanan nga yara sa sini paagi sa espada, pati ang mga sapat. 16 Dayon tipunon ninyo sa tunga sang plasa ang tanan nga inagaw kag sunugon ninyo ang siudad, kag ang tanan nga inagaw sa sini mangin bug-os nga dulot para kay Jehova nga inyo Dios. Mangin tinumpok ini nga kagulub-an tubtob san-o. Indi na gid ini pagtukuron liwat. 17 Indi kamo magkuha sing bisan ano nga dapat laglagon,*+ agod madula ang kaakig ni Jehova kag pakitaan niya kamo sing kaluoy kag padamuon kamo, suno sa ginpanumpa niya sa inyo mga katigulangan.+ 18 Dapat ninyo tumanon si* Jehova nga inyo Dios paagi sa pagsunod sa tanan niya nga sugo nga ginasugo ko sa inyo subong nga adlaw, kag himuon ninyo ang matarong sa panulok ni Jehova nga inyo Dios.+

14 “Mga anak kamo ni Jehova nga inyo Dios. Indi ninyo pagpilasan ang inyo kaugalingon+ ukon pagkiskisan ang inyo kilay* tungod sa isa ka patay nga tawo.+ 2 Kay balaan kamo nga katawhan+ para kay Jehova nga inyo Dios, kag ginpili kamo ni Jehova agod mangin iya katawhan, isa ka hamili nga katawhan,* halin sa tanan nga katawhan sa duta.+

3 “Indi kamo magkaon sing bisan ano nga makangilil-ad nga butang.+ 4 Amo ini ang mga sapat nga mahimo ninyo kaunon:+ ang baka, ang karnero, ang kanding, 5 ang usa, ang gasela kag ang iban pa nga sahi sang usa, ang kanding nga ilahas, ang antelope, ang karnero nga ilahas, kag ang karnero sa bukid. 6 Mahimo ninyo kaunon ang bisan ano nga sapat nga nagapihak sing bug-os ang kuko kag nagausang liwat sang ila kinaon. 7 Apang indi ninyo pagkaunon ini nga sahi sang mga sapat nga nagausang liwat sang ila kinaon ukon nagapihak ang kuko: ang kamelyo, ang kuneho, ang tulad-kuneho sa kabatuhan,* bangod nagapangusang ini apang wala nagapihak ang kuko. Indi ini matinlo para sa inyo.+ 8 Amo man ang baboy, bangod nagapihak ang kuko sini apang wala nagapangusang. Indi ini matinlo para sa inyo. Indi ninyo pagkaunon ang unod sini kag indi ninyo pagtandugon ang patay nga lawas sini.

9 “Mahimo ninyo kaunon ang tanan nga sapat sa tubig nga may mga sirik kag mga himbis.+ 10 Apang indi ninyo pagkaunon ang wala sing sirik kag himbis. Indi ini matinlo para sa inyo.

11 “Mahimo ninyo kaunon ang bisan ano nga matinlo nga pispis. 12 Apang indi ninyo pagkaunon ini: ang agila, ang dapay sa dagat, ang itom nga buwitre,+ 13 ang pula nga dapay, ang itom nga dapay kag ang tanan nga sahi sang iban pa nga mga dapay, 14 ang tanan nga sahi sang uwak, 15 ang ostrits, ang bukaw, ang pispis sa dagat,* ang tanan nga sahi sang falcon, 16 ang gamay nga bukaw, ang bukaw nga may malaba nga dulunggan, ang gansa, 17 ang pelikano, ang buwitre, ang somorguho,* 18 ang dugwak, ang tanan nga sahi sang tulabong, ang abubilya, kag ang kabog. 19 Indi man matinlo para sa inyo ang tanan nga insekto* nga may pakpak. Indi ini pagkaunon. 20 Mahimo ninyo kaunon ang bisan ano nga matinlo nga nagalupad nga sapat.

21 “Indi ninyo pagkaunon ang bisan ano nga sapat nga patay na.+ Mahimo ninyo ini ihatag sa dumuluong nga pumuluyo nga yara sa sulod sang inyo mga siudad,* kag mahimo niya ini kaunon, ukon mahimo ini ibaligya sa isa ka dumuluong, bangod balaan kamo nga katawhan para kay Jehova nga inyo Dios.

“Indi ninyo paglagaon ang tinday nga kanding sa gatas sang iya inang.+

22 “Ihatag gid ninyo kada tuig ang ikanapulo* sang tanan nga patubas sang inyo binhi sa uma.+ 23 Kaunon ninyo ang ikanapulo nga bahin sang inyo uyas, sang inyo bag-o nga alak, sang inyo lana, kag ang mga panganay sang inyo mga karnero kag sang inyo iban pa nga kasapatan sa atubangan ni Jehova nga inyo Dios sa lugar nga pilion niya nga ibutang ang iya ngalan,+ agod matun-an ninyo nga magkahadlok pirme kay Jehova nga inyo Dios.+

24 “Apang kon tuman kalayo sang inyo lakbayon kag indi ninyo ini madala sa lugar nga pilion ni Jehova nga inyo Dios para sa iya ngalan+ tungod tuman sini kalayo (bangod pakamaayuhon kamo ni Jehova nga inyo Dios), 25 mahimo ninyo ini bayluhan sing kuarta, kag dala ang inyo kuarta, magkadto kamo sa lugar nga pilion ni Jehova nga inyo Dios. 26 Mahimo ninyo ibakal ang kuarta sang bisan ano nga luyag ninyo,* mga baka, mga karnero, mga kanding, alak, kag iban pa nga makahulubog nga ilimnon, kag sang bisan ano nga maluyagan ninyo;* kag magkaon kamo kag ang inyo panimalay didto sa atubangan ni Jehova nga inyo Dios kag magkasadya kamo.+ 27 Indi ninyo pagpabay-an ang Levinhon nga yara sa sulod sang inyo mga siudad,+ kay wala sia ginhatagan sing parte ukon palanublion sa tunga ninyo.+

28 “Sa katapusan sang kada tatlo ka tuig, dalhon ninyo ang bug-os nga ikanapulo nga bahin sang inyo patubas sa sina nga tuig kag ibutang ini sa sulod sang inyo mga siudad.+ 29 Dayon magakadto diri ang Levinhon, bangod wala sia ginhatagan sing parte ukon palanublion sa tunga ninyo, ang dumuluong nga pumuluyo, ang ilo,* kag ang balo nga babayi, nga yara sa sulod sang inyo mga siudad, kag magakaon sila tubtob mabusog sila,+ agod pakamaayuhon kamo ni Jehova nga inyo Dios sa tanan nga ginahimo ninyo.+

15 “Sa katapusan sang kada pito ka tuig kanselahon ninyo ang mga utang.+ 2 Amo ini ang paagi sang pagkansela: Kanselahon sang tanan nga nagpautang ang utang sang iya isigkatawo. Indi niya pagsukton ang iya isigkatawo ukon ang iya utod, bangod kanselahon na ang mga utang bilang pagpadungog kay Jehova.+ 3 Mahimo ninyo sukton ang dumuluong,+ apang kanselahon ninyo ang bisan ano nga utang sang inyo utod. 4 Apang wala sing isa sa inyo nga mangin imol, kay pakamaayuhon kamo ni Jehova+ sa duta nga ginahatag sa inyo ni Jehova nga inyo Dios bilang palanublion, 5 kon mamati lang kamo kay Jehova nga inyo Dios kag tumanon gid ninyo ining tanan nga ginasugo ko sa inyo subong nga adlaw.+ 6 Kay pakamaayuhon kamo ni Jehova nga inyo Dios suno sa ginsaad niya sa inyo, kag magapahulam kamo sa madamo nga pungsod, apang indi kamo magpanghulam;+ kag gamhan ninyo ang madamo nga pungsod, apang indi sila maggahom sa inyo.+

7 “Kon mag-imol ang isa sang inyo mga utod sa isa sang inyo mga siudad sa duta nga ginahatag sa inyo ni Jehova nga inyo Dios, indi ninyo pagpatig-ahon ang inyo tagipusuon kag indi kamo mangin kuom sa inyo imol nga utod.+ 8 Kundi mangin maalwan kamo sa iya+ kag pahulamon ninyo sia sang iya mga kinahanglanon ukon sang kulang sa iya. 9 Mag-andam kamo nga indi ninyo paghuptan sa inyo tagipusuon ining malain nga ideya, ‘Malapit na ang ikapito nga tuig, ang tuig sang pagkansela sa utang,’+ kag indi na kamo magmaalwan sa inyo imol nga utod kag wala kamo sing ihatag sa iya. Kon magpanawag sia kay Jehova kag magreklamo batok sa inyo, nakasala kamo bangod sini.+ 10 Dapat mangin maalwan kamo+ kag indi kamo* magpaganot sa paghatag sa iya, kay tungod sini pakamaayuhon ni Jehova nga inyo Dios ang tanan ninyo nga buluhaton kag ginahimo.+ 11 Kay pirme may imol nga mga tawo sa duta.+ Gani ginasugo ko kamo, ‘Mangin maalwan kamo* sa inyo utod nga nagaantos kag imol sa inyo duta.’+

12 “Kon ginbaligya sa imo ang isa sang imo utod, nga isa ka Hebreo nga lalaki ukon babayi, kag nag-alagad sia sa imo sing anom ka tuig, dapat hilwayon mo sia sa ikapito nga tuig.+ 13 Kag kon hilwayon mo na sia, indi mo sia pagpalakton nga wala sing dala. 14 Maalwan mo sia nga hatagan sing bisan ano nga halin sa imo kasapatan, sa imo linasan, sa imo linasan para sa lana kag alak. Hatagan mo sia suno sa pagpakamaayo sa imo ni Jehova nga imo Dios. 15 Dumduma nga nangin ulipon ka sa duta sang Egipto kag gintubos ka ni Jehova nga imo Dios. Amo kon ngaa ginasugo ko ini sa imo subong nga adlaw.

16 “Apang kon magsiling sia, ‘Indi ako maghalin sa imo!’ bangod ginahigugma ka niya kag ang imo panimalay, kay malipayon sia nga nagaalagad sa imo,+ 17 dalhon mo sia sa puertahan, dayon magkuha ka sing inugtuhog kag tuhugan mo ang iya dulunggan, kag mangin ulipon mo na sia samtang buhi sia. Amo man sini ang himuon mo sa imo ulipon nga babayi. 18 Indi pagkabiga nga kabudlayan kon hilwayon mo na sia kag bayaan ka niya, bangod ang balor sang pag-alagad niya sa imo sa sulod sang anom ka tuig doble pa sa suhol sang isa ka trabahador, kag ginpakamaayo ka ni Jehova nga imo Dios sa tanan niya nga ginhimo.

19 “Pakabalaanon ninyo ang tagsa ka panganay nga lalaki sang inyo mga karnero kag iban pa nga kasapatan para kay Jehova nga inyo Dios.+ Indi ninyo paggamiton sa pag-obra ang panganay sang inyo mga baka,* kag indi ninyo pag-alotan* ang panganay sang inyo mga karnero. 20 Kada tuig kaunon ninyo ini kag sang inyo panimalay sa atubangan ni Jehova nga inyo Dios sa lugar nga pilion ni Jehova.+ 21 Apang kon may diperensia ini, piang, bulag, ukon iban pa nga diperensia, indi ninyo ini pag-ihalad kay Jehova nga inyo Dios.+ 22 Kaunon ninyo ini sa sulod sang inyo mga siudad.* Ang tawo nga indi matinlo kag ang tawo nga matinlo mahimo makakaon sini, pareho sang pagkaon nila sang gasela kag sang usa.+ 23 Apang indi gid ninyo pagkaunon ang dugo sini;+ iula ninyo ini sa duta pareho sang tubig.+

16 “Saulugon ninyo ang Paskua* para kay Jehova nga inyo Dios+ sa bulan sang Abib,* kay sa bulan sang Abib ginpagua kamo ni Jehova nga inyo Dios sa Egipto sa kagab-ihon.+ 2 Ihalad ninyo kay Jehova nga inyo Dios ang dulot para sa Paskua,+ halin sa inyo mga karnero kag iban pa nga kasapatan,+ sa lugar nga pilion ni Jehova nga inyo Dios nga ibutang ang iya ngalan.+ 3 Pagkatapos sini, kaunon ninyo upod sa halad ang mga tinapay nga wala sing lebadura.+ Indi kamo magkaon sing bisan ano nga may lebadura sa sulod sang pito ka adlaw. Ang tinapay nga wala sing lebadura amo lang ang kaunon ninyo, pareho sang ginhimo ninyo sang naghalin kamo sing dalidali sa Egipto.+ Samtang ginahimo ninyo ini, madumduman ninyo ang kabudlayan nga inyo gin-antos. Kag indi gid ninyo malipatan ang adlaw nga naggua kamo sa Egipto.+ 4 Dapat nga wala sing bisan ano nga may lebadura nga makita sa inyo bug-os nga teritoryo sa sulod sang pito ka adlaw,+ kag dapat nga wala sing mabilin nga karne sa aga nga ihalad ninyo sa gab-i sang nahauna nga adlaw.+ 5 Wala kamo ginatugutan nga maghalad sing dulot para sa Paskua sa bisan diin lang nga siudad nga ginahatag sa inyo ni Jehova nga inyo Dios. 6 Dapat ninyo ini himuon sa lugar nga pilion ni Jehova nga inyo Dios nga ibutang ang iya ngalan. Dapat ninyo ihalad ang dulot para sa Paskua sa gab-i pagtunod sang adlaw,+ nga amo man ang oras nga naggua kamo sa Egipto. 7 Lutuon ninyo ini kag kaunon+ sa lugar nga pilion ni Jehova nga inyo Dios,+ kag pagkaaga magbalik kamo sa inyo mga tolda. 8 Magkaon kamo sing tinapay nga wala sing lebadura sa sulod sang anom ka adlaw, kag sa ikapito nga adlaw maghiwat kamo sing sagrado nga pagtilipon para kay Jehova nga inyo Dios. Indi kamo maghimo sing bisan ano nga obra sa sini nga adlaw.+

9 “Mag-isip kamo sing pito ka semana. Sugdan ninyo ang pag-isip sing pito ka semana halin sa inyo una nga paggarab sa uyas sa uma.+ 10 Dayon saulugon ninyo ang Kapiestahan sang mga Semana para kay Jehova nga inyo Dios,+ paagi sa inyo kinabubut-on nga dulot nga ihatag ninyo suno sa pagpakamaayo sa inyo ni Jehova nga inyo Dios.+ 11 Magkasadya kamo sa atubangan ni Jehova nga inyo Dios, kamo kag ang inyo anak nga lalaki, ang inyo anak nga babayi, ang inyo ulipon nga lalaki, ang inyo ulipon nga babayi, ang Levinhon nga yara sa inyo mga siudad,* ang dumuluong nga pumuluyo, ang ilo,* kag ang balo nga babayi nga yara sa tunga ninyo, sa lugar nga pilion ni Jehova nga inyo Dios nga ibutang ang iya ngalan.+ 12 Dumdumon ninyo nga nangin ulipon kamo sa Egipto,+ kag tumanon ninyo kag sundon ini nga mga pagsulundan.

13 “Saulugon ninyo ang Kapiestahan sang mga Payagpayag*+ sa sulod sang pito ka adlaw kon ginatipon na ninyo ang inyo mga uyas halin sa inyo linasan kag ang inyo mga lana kag alak halin sa inyo linasan. 14 Magkasadya kamo sa tion sang inyo kapiestahan,+ kamo kag ang inyo anak nga lalaki, ang inyo anak nga babayi, ang inyo ulipon nga lalaki, ang inyo ulipon nga babayi, ang Levinhon, ang dumuluong nga pumuluyo, ang ilo, kag ang balo nga babayi nga yara sa inyo mga siudad. 15 Saulugon ninyo ang kapiestahan para kay Jehova nga inyo Dios sa sulod sang pito ka adlaw+ sa lugar nga pilion ni Jehova, bangod pakamaayuhon ni Jehova nga inyo Dios ang tanan ninyo nga patubas kag ang tanan nga ginahimo ninyo,+ kag magakalipay gid kamo sing bug-os.+

16 “Tatlo ka beses kada tuig, ang tanan ninyo nga lalaki dapat mag-atubang kay Jehova nga inyo Dios sa lugar nga pilion niya: sa Kapiestahan sang Tinapay nga Wala sing Lebadura,+ sa Kapiestahan sang mga Semana,+ kag sa Kapiestahan sang mga Payagpayag,*+ kag wala sing mag-atubang kay Jehova nga wala sing dala. 17 Ang dulot sang kada isa dapat mangin suno sa pagpakamaayo sa inyo ni Jehova nga inyo Dios.+

18 “Magpili kamo sing mga hukom+ kag mga manugdumala para sa kada tribo sa tanan nga siudad* nga ginahatag sa inyo ni Jehova, kag hukman nila sing matarong ang katawhan. 19 Indi ninyo pagpatikuon ang hustisya,+ indi kamo magpasulabi,+ indi kamo magbaton sing hamham, kay ginabulag sang hamham ang mga mata sang mga maalam+ kag ginapatiko sini ang mga pulong sang mga matarong. 20 Magpakita gid kamo sing hustisya+ agod padayon kamo nga mabuhi kag magpanag-iya sang duta nga ginahatag sa inyo ni Jehova nga inyo Dios.

21 “Indi kamo magtanom sing bisan ano nga kahoy bilang sagrado nga poste*+ malapit sa halaran nga himuon ninyo para kay Jehova nga inyo Dios.

22 “Indi kamo magpatindog sing sagrado nga haligi,+ kay ginadumtan gid ini ni Jehova nga inyo Dios.

17 “Indi kamo maghalad kay Jehova nga inyo Dios sing baka ukon karnero nga may diperensia, bangod makangilil-ad ini kay Jehova nga inyo Dios.+

2 “Kon ang isa ka lalaki ukon babayi nga nagaistar sa isa sang inyo mga siudad nga ginahatag sa inyo ni Jehova nga inyo Dios nasapwan nga nagahimo sing malain sa panulok ni Jehova nga inyo Dios kag ginalapas niya ang iya katipan,+ 3 kag magsipak sia kag magsimba sa iban nga mga dios kag magyaub sa ila ukon sa adlaw ukon sa bulan ukon sa tanan nga butang sa langit,+ nga wala ko gid ginsugo,+ 4 kag isugid ini sa inyo ukon nabalitaan ninyo ini, dapat ninyo usisaon ini dayon sing maayo. Kon mapamatud-an nga matuod+ nga ginhimo ining makangilil-ad nga butang sa Israel, 5 dapat ninyo dalhon sa gawang sang siudad ang lalaki ukon ang babayi nga naghimo sining malain nga butang, kag batuhon ninyo sia tubtob mapatay sia.+ 6 Sa pagpamatuod* sang duha ukon tatlo ka saksi,+ patyon ang isa nga takus sa kamatayon. Indi sia pagpatyon kon isa lang ka saksi ang magpamatuod.+ 7 Ang mga saksi ang una nga magbato sa iya sa pagpatay sa iya, dayon batuhon man sia sang tanan nga tawo. Dapat ninyo dulaon ang malain sa tunga ninyo.+

8 “Kon may kaso sa inyo siudad nga nabudlayan kamo magdesisyon, ayhan tuhoy sa pagpaagay sing dugo,+ ukon legal nga panumbungon, ukon masingki nga buhat, ukon kasuayon, magkadto kamo sa lugar nga pilion ni Jehova nga inyo Dios.+ 9 Magkadto kamo sa mga saserdote nga Levinhon kag sa hukom+ nga nagaalagad sa sina nga tion, kag magpamangkot kamo sa ila. Ihatag nila sa inyo ang desisyon.+ 10 Dayon sundon gid ninyo ang desisyon nga ihatag nila sa inyo sa lugar nga pilion ni Jehova. Dapat gid ninyo sundon ang tanan nga isiling nila sa inyo. 11 Sundon ninyo ang kasuguan nga itudlo nila sa inyo kag ang desisyon nga isiling nila sa inyo.+ Indi kamo magsipak sa desisyon nga ihatag nila sa inyo, sa tuo man ukon sa wala.+ 12 Patyon ang tawo nga bangod sang iya pagkamatinaastaason wala sia nagapamati sa saserdote nga nagaalagad kay Jehova nga inyo Dios ukon sa hukom.+ Dapat ninyo dulaon ang malain sa Israel.+ 13 Mabatian ini sang tanan nga katawhan kag mahadlok sila, kag indi na sila mangin matinaastaason.+

14 “Kon makasulod na kamo sa duta nga ginahatag sa inyo ni Jehova nga inyo Dios kag napanag-iyahan na ninyo ini kag nagaistar kamo sa sini, kag magsiling kamo, ‘Mapili kita sing hari pareho sa tanan nga pungsod sa palibot naton,’+ 15 himuon ninyo nga hari ang pilion ni Jehova nga inyo Dios.+ Magpili kamo sing hari halin sa inyo mga utod. Wala kamo ginatugutan nga magpili sing dumuluong nga indi ninyo utod. 16 Apang, indi sia dapat magpadamo sing mga kabayo,+ ukon pabalikon niya ang katawhan sa Egipto sa pagkuha sing dugang pa nga mga kabayo,+ kay si Jehova nagsiling sa inyo, ‘Indi gid kamo magbalik liwat sa sini nga dalan.’ 17 Indi man sia magpangasawa sing madamo, agod indi magtalang ang iya tagipusuon;+ kag indi sia magpadamo gid sing pilak kag bulawan.+ 18 Kon magpungko na sia sa trono sang iya ginharian, isulat niya sa libro* para sa iya kaugalingon ang kopya sang Kasuguan nga yara sa mga saserdote nga Levinhon.+

19 “Dapat niya ini tipigan, kag basahon niya ini sa tanan nga adlaw sang iya kabuhi,+ agod matun-an niya nga magkahadlok kay Jehova nga iya Dios kag tumanon niya ang tanan nga pulong sini nga Kasuguan kag ini nga mga pagsulundan.+ 20 Gani indi mangin matinaastaason ang iya tagipusuon sa iya mga utod, kag indi sia magsipak sa sugo sa tuo man ukon sa wala, agod magpabilin sia sing malawig sa iya ginharian, sia kag ang iya mga anak sa tunga sang Israel.

18 “Ang mga saserdote nga Levinhon kag ang bug-os nga tribo ni Levi indi paghatagan sing parte ukon palanublion sa Israel. Kaunon nila ang mga dulot nga sinunog sa kalayo para kay Jehova, nga amo ang iya palanublion.+ 2 Gani wala sila sing palanublion sa tunga sang ila mga utod. Si Jehova amo ang ila palanublion, suno sa ginsiling niya sa ila.

3 “Amo ini ang mangin kinamatarong sang mga saserdote halin sa katawhan: Ihatag sa saserdote sang bisan sin-o nga nagahalad sing baka ukon karnero ang abaga, ang mga apipingig, kag ang tiyan. 4 Ihatag ninyo sa iya ang una nga patubas sa inyo uyas, sa inyo bag-o nga alak, sa inyo lana, kag ang una nga inalot* nga balahibo sang inyo mga karnero.+ 5 Sia kag ang iya mga anak amo ang ginpili ni Jehova nga inyo Dios halin sa tanan ninyo nga tribo agod mag-alagad pirme sa ngalan ni Jehova.+

6 “Apang, kon ang isa ka Levinhon maggua sa isa sang inyo mga siudad sa Israel nga iya ginaistaran,+ kag luyag niya* magkadto sa lugar nga ginpili ni Jehova,*+ 7 mahimo sia mag-alagad didto sa ngalan ni Jehova nga iya Dios, pareho sa tanan niya nga utod nga mga Levinhon nga nagaalagad didto sa atubangan ni Jehova.+ 8 Magabaton sia sing pareho man kadamo nga parte sang pagkaon upod sa ila,+ dugang pa sa mabaton niya halin sa binaligya nga pagkabutang sang iya pamilya.

9 “Kon makasulod na kamo sa duta nga ginahatag sa inyo ni Jehova nga inyo Dios, indi ninyo pag-ilugon ang makangilil-ad nga ginahimo sang mga pungsod.+ 10 Wala sing bisan sin-o sa inyo nga nagasunog sang* iya anak nga lalaki ukon anak nga babayi,+ nagapamakot,+ nagahimo sing madyik,+ nagapamakot pasad sa mga panimad-on,+ babaylan,+ 11 nagapanglumay, nagadangop sa espiritista+ ukon sa manugpakot sing mga hitabo,+ ukon bisan sin-o nga nagapamangkot sa patay.+ 12 Kay ang nagahimo sini nga mga butang makangilil-ad kay Jehova, kag bangod sining makangilil-ad nga mga buhat, ginatabog sila ni Jehova nga inyo Dios. 13 Dapat wala kamo sing kasawayan sa atubangan ni Jehova nga inyo Dios.+

14 “Kay ining mga pungsod nga sakupon ninyo nagpamati anay sa mga nagahimo sing madyik+ kag nagapamakot,+ apang wala kamo ginatugutan ni Jehova nga inyo Dios nga himuon man ini. 15 Magapadala sa inyo si Jehova nga inyo Dios sing isa ka manalagna pareho sa akon halin sa inyo kauturan. Dapat kamo magpamati sa iya.+ 16 Padalhan kamo sing manalagna bangod ginpangayo ninyo ini kay Jehova nga inyo Dios sa Horeb sang adlaw nga nagtipon kamo didto.+ Nagsiling kamo, ‘Indi na pag-ipabati sa amon ang tingog ni Jehova nga amon Dios kag indi na pag-ipakita sa amon ining daku nga kalayo, agod indi kami mapatay.’+ 17 Dayon nagsiling si Jehova sa akon, ‘Maayo ang ila ginsiling. 18 Magapadala ako sa ila sing isa ka manalagna nga pareho sa imo halin sa ila kauturan,+ kag isiling ko sa iya kon ano ang ihambal niya,+ kag isugid niya sa ila ang tanan nga ginasugo ko sa iya.+ 19 Manabat sa akon ang tawo nga indi magpamati sa akon mga pulong nga ihambal niya sa akon ngalan.+

20 “ ‘Kon ang bisan sin-o nga manalagna mangahas sa paghambal sa akon ngalan sing pulong nga wala ko ginsugo sa iya nga ihambal niya, ukon maghambal sia sa ngalan sang iban nga mga dios, dapat patyon ina nga manalagna.+ 21 Apang, mahimo masiling kamo sa inyo kaugalingon: “Paano namon mahibaluan nga ang pulong wala ginhambal ni Jehova?” 22 Kon ang manalagna maghambal sa ngalan ni Jehova kag ang iya ginhambal wala matuman ukon wala matabo, wala ginhambal ni Jehova ina nga pulong. Makahas ini nga ginhambal sang manalagna. Indi kamo mahadlok sa iya.’

19 “Kon laglagon na ni Jehova nga inyo Dios ang mga pungsod nga ang ila duta ginahatag sa inyo ni Jehova nga inyo Dios kag natabog na ninyo sila kag nagaistar na kamo sa ila mga siudad kag sa ila mga balay,+ 2 magpain kamo sing tatlo ka siudad sa duta nga ginahatag sa inyo ni Jehova nga inyo Dios agod panag-iyahan ninyo.+ 3 Tungaon ninyo sa tatlo ka bahin ang duta nga ginhatag sa inyo ni Jehova nga inyo Dios, kag maghimo kamo sing mga dalan agod ang bisan sin-o nga makapatay sing tawo makadangop sa isa sini nga mga siudad.

4 “Amo ini ang dapat himuon agod mabuhi ang nakapatay sing tawo nga magdangop didto: Kon mapatay niya ang iya isigkatawo sing indi hungod kag wala sia sing dumot sa iya;+ 5 ukon kon nag-upod sia sa iya isigkatawo sa kakahuyan agod magpangahoy, kag ginwasay niya ang kahoy apang nahukas ang ulo sang wasay, kag naigo sini ang iya isigkatawo kag napatay sia, ang nakapatay sing tawo dapat magdangop sa isa sini nga mga siudad agod mabuhi sia.+ 6 Kay kon indi magdangop didto ang nakapatay sing tawo, mahimo sia lagson sang manugtimalos sang dugo+ bangod sa iya kaakig.* Kon maabtan niya sia bangod malayo ang siudad, patyon niya sia. Apang indi sia dapat mapatay bangod wala sia sing dumot sa iya napatay.+ 7 Amo kon ngaa ginasugo ko kamo: ‘Magpain kamo sing tatlo ka siudad.’

8 “Kon palaparon ni Jehova nga inyo Dios ang inyo teritoryo subong sang ginpanumpa niya sa inyo mga katigulangan+ kag nahatag na niya sa inyo ang bug-os nga duta nga ginsaad niya nga ihatag sa inyo mga katigulangan,+ 9 basta tumanon lang ninyo ining tanan nga sugo nga ginahatag ko sa inyo subong nga adlaw, nga higugmaon si Jehova nga inyo Dios kag maglakat pirme sa iya dalanon,+ dugangan ninyo sing tatlo pa ka siudad ining tatlo ka siudad.+ 10 Kon himuon ninyo ini, wala sing mapaagay nga dugo nga wala sing sala+ sa duta nga ginahatag sa inyo ni Jehova nga inyo Dios bilang palanublion ninyo, kag wala kamo sing kasal-anan sa dugo.+

11 “Apang kon ginadumtan sang isa ka tawo ang iya isigkatawo+ kag ginlambatan niya sia kag ginbunal kag napatay sia,* kag nagdangop ini nga tawo sa isa sini nga mga siudad, 12 ipakuha sia didto sang mga gulang sang ila siudad kag itugyan nila sia sa kamot sang manugtimalos sang dugo, kag dapat sia patyon.+ 13 Indi kamo maluoy* sa iya, kag dapat ninyo dulaon sa Israel ang kasal-anan sa pagpatay sa tawo nga wala sing sala,+ agod mangin maayo ang inyo kahimtangan.

14 “Kon mabaton na ninyo ang inyo palanublion sa duta nga ginahatag sa inyo ni Jehova nga inyo Dios, indi ninyo paghalinon ang muhon sang inyo isigkatawo+ nga ginpahamtang sang inyo mga katigulangan.

15 “Indi mahimo nga isa lang ka saksi ang magpamatuod* batok sa bisan ano nga sayop ukon sala nga nahimo sang isa ka tawo.+ Dapat pamatud-an ini sa pagpamatuod* sang duha ukon tatlo ka saksi.+ 16 Kon ang isa ka saksi may malain nga tuyo kag nagtestigo sia nga nakahimo sing sala ang isa ka tawo,+ 17 sila nga duha nga may kasuayon magtindog sa atubangan ni Jehova, sa atubangan sang mga saserdote kag mga hukom nga nagaalagad sa sina nga tion.+ 18 Dapat usisaon ini sing maayo sang mga hukom,+ kag kon ang tawo nga nagtestigo isa ka butig nga saksi kag indi matuod ang iya panumbungon batok sa iya utod, 19 himuon ninyo sa iya ang iya malain nga tuyo sa iya utod.+ Dapat ninyo dulaon ang malain sa tunga ninyo.+ 20 Mabatian ini sang iban kag mahadlok sila, kag indi na gid sila maghimo liwat sing malain nga butang nga pareho sini.+ 21 Indi kamo maluoy* sa iya:+ Kabuhi* sa kabuhi,* mata sa mata, ngipon sa ngipon, kamot sa kamot, tiil sa tiil.+

20 “Kon magpakig-away kamo sa inyo mga kaaway kag makita ninyo nga mas madamo ang ila mga kabayo, ang ila mga kangga, kag ang ila mga soldado, indi kamo mahadlok sa ila, kay kaupod ninyo si Jehova nga inyo Dios nga nagpagua sa inyo sa duta sang Egipto.+ 2 Antes kamo magpakig-away, dapat anay hambalon sang saserdote ang katawhan.+ 3 Magasiling sia sa ila, ‘O Israel, magpamati kamo. Sa indi madugay, magapakig-away na kamo sa inyo mga kaaway. Indi kamo mahadlok. Indi kamo magpakulba ukon makugmat ukon magkurog sa kahadlok bangod sa ila, 4 kay si Jehova nga inyo Dios nagaupod sa inyo sa pagpakig-away para sa inyo batok sa inyo mga kaaway kag luwason niya kamo.’+

5 “Ang mga opisyal magasiling man sa katawhan, ‘Sin-o sa inyo ang nagtukod sing bag-o nga balay kag wala pa niya ini mainagurahan? Magpauli sia, kay basi mapatay sia sa inaway kag inagurahan ini sang iban nga tawo. 6 Sin-o sa inyo ang nagtanom sing mga ubas kag wala pa makapulos sang bunga sini? Magpauli sia, kay basi mapatay sia sa inaway kag iban nga tawo ang makapulos sini. 7 Sin-o sa inyo ang kalaslon? Magpauli sia,+ kay basi mapatay sia sa inaway kag pangasaw-on sang iban nga lalaki ang iya palangasaw-on.’ 8 Pamangkuton man sang mga opisyal ang katawhan, ‘Sin-o sa inyo ang maluya ang buot kag nahadlok?+ Magpauli sia, agod indi man magluya ang buot sang iya kauturan.’*+ 9 Kon makatapos na ang mga opisyal sa pagpakighambal sa katawhan, magpili man sila sing mga pangulo sa mga soldado nga manguna sa katawhan.

10 “Kon salakayon na ninyo ang isa ka siudad, ipahibalo anay ninyo kon ano ang inyo mga kondisyon para sa paghidait.+ 11 Kon batunon nila ang inyo mga kondisyon kag buksan nila ang ila mga gawang, mangin ulipon ninyo ang tanan nga tawo sa sini kag magaalagad sila sa inyo.+ 12 Apang kon indi sila magpakighidait sa inyo kag magpakig-away sila sa inyo, likupan ninyo ang siudad. 13 Itugyan ini sa inyo ni Jehova nga inyo Dios, kag pamatyon ninyo ang tanan nila nga lalaki paagi sa espada. 14 Apang bihagon ninyo ang mga babayi kag ang mga kabataan kag kuhaon ninyo ang kasapatan kag ang tanan nga yara sa siudad,+ kag kaunon ninyo ang maagaw ninyo sa inyo mga kaaway nga gintugyan sa inyo ni Jehova nga inyo Dios.+

15 “Amo ina ang himuon ninyo sa tanan nga siudad nga malayo sa inyo kag indi sakop nga mga siudad sining malapit nga mga pungsod. 16 Apang sa mga siudad sini nga mga katawhan nga ginahatag sa inyo ni Jehova nga inyo Dios bilang palanublion ninyo, wala kamo sing ibilin nga buhi.+ 17 Laglagon ninyo sila tanan, ang mga Hethanon, ang mga Amornon, ang mga Canaanhon, ang mga Pereznon, ang mga Hevhanon, kag ang mga Jebusnon,+ suno sa ginsugo sa inyo ni Jehova nga inyo Dios; 18 agod indi nila kamo pagtudluan sang tanan nga makangilil-ad nga butang nga ginahimo nila sa ila mga dios, kag makasala kamo kay Jehova nga inyo Dios.+

19 “Kon likupan ninyo ang isa ka siudad para sakupon ini kag nagapakig-away kamo sa sini sa sulod sang madamo nga adlaw, indi ninyo pagpanapson paagi sa wasay ang mga kahoy sa sini. Mahimo ninyo kaunon ang mga bunga sini, apang indi ninyo pagpanapson ang mga kahoy.+ Kay salakayon bala ninyo ang kahoy sa latagon pareho sang pagsalakay ninyo sa tawo? 20 Ang tapson lang ninyo amo ang kahoy nga indi makaon ang bunga. Mahimo ninyo tapson ini kag gamiton ini sa paglikop sa siudad nga nagapakig-away sa inyo, tubtob mapukan ini.

21 “Kon may makita nga patay nga tawo sa latagon sang duta nga ginahatag sa inyo ni Jehova nga inyo Dios agod panag-iyahan ninyo, kag wala mahibaluan kon sin-o ang nagpatay sa iya, 2 dapat takson sang inyo mga gulang kag mga hukom+ ang distansia sang bangkay sa mga siudad sa palibot sini. 3 Dayon ang mga gulang sang siudad nga pinakamalapit sa bangkay magkuha sing torite nga baka nga wala pa magamit sa pag-obra, kag wala pa gid matakdan sing gota. 4 Dalhon sang mga gulang sina nga siudad ang torite nga baka sa nalupyakan* diin may nagailig nga tubig kag wala pa gid maarado ukon masab-ugan sing binhi. Lampusan nila ang liog sang torite nga baka agod mapatay ini didto sa nalupyakan.+

5 “Magkadto didto ang mga saserdote nga Levinhon, bangod ginpili sila ni Jehova nga inyo Dios nga mag-alagad sa iya+ kag maghatag sing mga pagpakamaayo sa ngalan ni Jehova.+ Sila ang magadesisyon kon paano husayon ang mga kasuayon may kaangtanan sa masingki nga buhat.+ 6 Dayon ang tanan nga gulang sang siudad nga pinakamalapit sa bangkay manghinaw sang ila kamot+ sa ibabaw sang torite nga baka nga ginlampusan ang liog sa nalupyakan, 7 kag masiling sila, ‘Indi kami ang nagpaagay sini nga dugo, kag wala man namon makita sang ginpaagay ini. 8 Indi pagsukta sa sini ang imo katawhan nga Israel nga imo gintubos,+ O Jehova, kag indi pagtuguti nga magpabilin sa imo katawhan nga Israel ang kasal-anan sa pagpatay sa tawo nga wala sing sala.’+ Gani indi sila manabat sa kasal-anan sa dugo. 9 Sa sini nga paagi dulaon ninyo ang kasal-anan sa pagpatay sa tawo nga wala sing sala sa tunga ninyo paagi sa paghimo sing matarong sa panulok ni Jehova.

10 “Kon magpakig-away kamo sa inyo mga kaaway kag ginpierde sila ni Jehova nga inyo Dios para sa inyo kag ginbihag ninyo sila,+ 11 kag may makita ka nga matahom nga babayi sa mga bihag kag naluyag ka sa iya kag gusto mo sia pangasaw-on, 12 dalhon mo sia sa imo balay. Dayon kiskisan sang babayi ang iya ulo kag utdan ang iya mga kuko, 13 kag ubahon niya ang iya bayo nga ginasuksok sang ginbihag sia, kag magaistar ang babayi sa imo balay. Magalalaw ang babayi tungod sa iya amay kag sa iya iloy sa sulod sang isa ka bulan.+ Pagkatapos sini, mahimo ka na maghulid sa babayi; kag mangin mag-asawa na kamo. 14 Apang kon wala ka na naluyag sa babayi, dapat mo sia palakton+ bisan diin nga gusto niya.* Apang indi mo sia mahimo ibaligya ukon pintasan, kay ginpilit mo sia nga pangasaw-on.

15 “Kon ang isa ka lalaki may duha ka asawa kag ang isa mas labi nga ginahigugma niya sangsa isa* kag may anak sia nga lalaki sa ila nga duha kag ang panganay amo ang anak sang wala ginahigugma nga asawa,+ 16 sa adlaw nga ihatag na niya ang palanublion sang iya mga anak, wala sia ginatugutan nga ihatag ang kinamatarong bilang panganay sa anak sang iya ginahigugma nga asawa sa baylo nga sa anak sang iya wala ginahigugma nga asawa nga amo ang panganay. 17 Kilalahon niya nga panganay ang anak sang wala ginahigugma nga asawa paagi sa paghatag sa iya sing doble nga parte sang tanan niya nga ginapanag-iyahan, kay sia ang una nga bunga sang iya pagkalalaki.* Sia ang may kinamatarong bilang panganay.+

18 “Kon ang isa ka tawo may anak nga batinggilan kag rebelyuso kag wala niya ginatuman ang iya amay ukon iloy,+ kag ginadisiplina nila sia apang wala sia nagapamati sa ila,+ 19 dalhon sia sang iya amay kag sang iya iloy sa mga gulang sa gawang sang siudad nga iya ginaistaran 20 kag isiling nila sa mga gulang sang siudad, ‘Ining amon anak batinggilan kag rebelyuso. Wala sia nagatuman sa amon. Sobra sia ka palakaon*+ kag palahubog.’+ 21 Dayon batuhon sia sang tanan nga lalaki sang siudad tubtob mapatay sia. Gani dulaon ninyo ang malain sa tunga ninyo, kag mabatian ini sang bug-os nga Israel kag mahadlok sila.+

22 “Kon ang isa ka tawo makasala kag takus sa silot nga kamatayon kag ginpatay sia+ kag ginbitay sa usok,+ 23 indi pag-ibilin ang iya bangkay sa usok sa bug-os nga gab-i.+ Kundi ilubong ninyo sia sa sina nga adlaw, bangod ginpakamalaut sang Dios ang isa nga ginbitay sa usok,+ kag indi ninyo pagdagtaan ang duta nga ginahatag sa inyo ni Jehova nga inyo Dios bilang palanublion.+

22 “Kon makita ninyo ang nagtalang nga baka ukon karnero sang inyo utod, indi ninyo ini pagpabay-an.+ Dapat dalhon ninyo ini sa inyo utod. 2 Apang kon malayo ang inyo utod ukon indi ninyo sia kilala, dalhon ninyo ang sapat sa inyo balay, kag magapabilin ini sa inyo tubtob pangitaon ini sang inyo utod. Dayon iuli ninyo ini sa iya.+ 3 Amo man sini ang himuon ninyo sa asno, sa bayo, kag sa bisan ano nga nadula sang inyo utod nga nakita ninyo. Indi ninyo ini pagpabay-an.

4 “Kon makita ninyo nga nalup-og sa dalan ang asno ukon ang baka sang inyo utod, indi ninyo ini pagpabay-an. Dapat buligan ninyo sia nga patindugon ang sapat.+

5 “Indi dapat magsuksok ang babayi sing bayo sang lalaki, kag indi dapat magsuksok ang lalaki sing bayo sang babayi. Kay ginakangil-aran ni Jehova nga inyo Dios ang nagahimo sini.

6 “Kon may malabayan kamo nga pugad sang pispis, sa kahoy man ukon sa duta, nga may mga boto ukon mga itlog, kag ang inang nagaloob sa mga boto ukon sa mga itlog, indi ninyo pagkuhaon ang inang upod sa mga boto.+ 7 Mahimo ninyo kuhaon ang mga boto, apang pabay-an lang ninyo ang inang, agod mangin maayo ang inyo kahimtangan kag maglawig ang inyo kabuhi.

8 “Kon magpatindog kamo sing bag-o nga balay, himuan ninyo sing barandilya ang inyo atop+ agod wala sing mahulog kag indi makasala sa dugo ang inyo panimalay.

9 “Indi kamo magsab-ug sa inyo ulubasan sing duha ka sahi sang binhi.+ Kay kon himuon ninyo ini, ang tanan nga patubas sang inyo binhi kag sang inyo ulubasan dapat ihatag tanan sa santuaryo.

10 “Indi ninyo pagparison ang baka kag ang asno sa pag-arado.+

11 “Indi kamo magsuksok sing bayo nga human sa tela nga ginsamo nga de-lana kag linen.+

12 “Butangan ninyo sing mga gawaygaway ang apat ka pamusod sang inyo kunop.+

13 “Kon magpangasawa ang isa ka lalaki apang pagkatapos nila hulid ginkaugtan niya ang iya asawa,* 14 kag ginsumbong niya sia nga nakahimo sing malain kag ginpakalain ang iya ngalan kag nagsiling sia: ‘Ginpangasawa ko ini nga babayi, apang natukiban ko nga indi na sia birhen sang maghulid kami,’ 15 dalhon sang amay kag sang iloy sang babayi ang pamatuod sang pagkabirhen sang babayi sa mga gulang sa gawang sang siudad. 16 Isiling sang amay sang babayi sa mga gulang, ‘Ginpaasawa ko sa sini nga lalaki ang akon anak, apang ginkaugtan* niya sia 17 kag ginasumbong niya sia nga nakahimo sing malain, kag nagsiling sia: “Natukiban ko nga indi na birhen ang imo anak.” Amo ini ang pamatuod sang pagkabirhen sang akon anak.’ Dayon humlaron nila ang hapin sang hiligdaan sa atubangan sang mga gulang sang siudad. 18 Dakpon sang mga gulang sang siudad+ ang lalaki kag disiplinahon sia.+ 19 Multahan nila sia sing mga 100 ka siklo* nga pilak kag ihatag ini sa amay sang babayi, bangod ginpakalain niya ang ngalan sang isa ka birhen sa Israel.+ Padayon nga mangin asawa niya ang babayi kag indi mahimo nga diborsiohan niya sia tubtob buhi sia.

20 “Apang, kon matuod ang panumbungon, kag wala sing pamatuod nga birhen ang babayi, 21 dalhon nila ang babayi sa gua sang puertahan sang balay sang iya amay, kag batuhon sia sang mga lalaki sang siudad tubtob mapatay sia, bangod naghimo sia sing makahuluya nga buhat+ sa Israel paagi sa pagpakighilawas* sa balay sang iya amay.+ Gani dapat ninyo dulaon ang malain sa tunga ninyo.+

22 “Kon ang isa ka lalaki madakpan nga naghulid sa isa ka babayi nga may bana, dapat sila patyon, ang lalaki kag ang babayi.+ Gani dapat ninyo dulaon ang malain sa Israel.

23 “Kon ang isa ka birhen nga babayi kalaslon na, kag nakita sia sang isa ka lalaki sa siudad kag naghulid sa iya, 24 dalhon ninyo sila nga duha sa gawang sang siudad kag batuhon sila tubtob mapatay sila, ang babayi bangod wala sia magsinggit sa siudad kag ang lalaki bangod ginpakahuy-an niya ang asawa sang iya isigkatawo.+ Gani dapat ninyo dulaon ang malaut sa tunga ninyo.

25 “Apang, kon nakita sang lalaki ang babayi sa latagon, kag ginpuersa niya ang babayi kag naghulid sia sa iya, dapat patyon ang lalaki, 26 apang indi ninyo pag-anhon ang babayi. Ang babayi wala makahimo sing sala nga takus sa kamatayon. Pareho ini sa kaso sang isa ka tawo nga nagpatay sa iya isigkatawo.*+ 27 Kay nakita niya ang babayi nga kalaslon sa latagon, kag nagsinggit sia, apang wala sing makatabang sa iya.

28 “Kon ang isa ka lalaki may nakita nga birhen nga babayi nga indi kalaslon kag ginpuersa niya ang babayi kag naghulid sia sa iya kag nadakpan sila,+ 29 dapat maghatag ang lalaki sing 50 ka siklo nga pilak sa amay sang babayi, kag mangin asawa niya sia.+ Bangod ginpakahuy-an niya ang babayi, indi mahimo nga diborsiohan niya sia tubtob buhi sia.

30 “Indi dapat maghulid ang lalaki sa asawa sang iya amay, agod indi niya mapakahuy-an ang iya amay.*+

23 “Wala sing tawo nga ginkapon paagi sa paghalit sa iya itlog ukon nag-utod sang iya kinatawo ang makasulod sa katilingban ni Jehova.+

2 “Ang anak sang wala makasal nga lalaki kag babayi indi makasulod sa katilingban ni Jehova.+ Bisan ang iya kaliwat tubtob sa ikanapulo nga kaliwatan indi makasulod sa katilingban ni Jehova.

3 “Ang mga Ammonhon ukon Moabnon indi makasulod sa katilingban ni Jehova.+ Bisan ang ila kaliwat tubtob sa ikanapulo nga kaliwatan indi makasulod sa katilingban ni Jehova, 4 bangod wala nila kamo ginhatagan sing pagkaon kag tubig sa dalanon sang naggua kamo sa Egipto,+ kag bangod ginbayaran nila si Balaam nga anak ni Beor halin sa Petor sang Mesopotamia agod pakamalauton kamo.+ 5 Apang wala magpamati si Jehova nga inyo Dios kay Balaam.+ Sa baylo, ginhimo ni Jehova nga inyo Dios ang pagpakamalaut nga mangin pagpakamaayo sa inyo,+ bangod ginahigugma kamo ni Jehova nga inyo Dios.+ 6 Indi gid ninyo sila pagbuligan nga mag-ayuhan sila kag magbugana tubtob buhi kamo.+

7 “Indi ninyo pagkaugtan ang isa ka Edominhon, kay utod ninyo sia.+

“Indi ninyo pagkaugtan ang isa ka Egiptohanon, kay nangin dumuluong nga pumuluyo kamo sa ila pungsod.+ 8 Ang ila mga anak sa ikatlo nga kaliwatan mahimo makasulod sa katilingban ni Jehova.

9 “Kon magkampo kamo batok sa inyo mga kaaway, likawan gid ninyo ang bisan ano nga malain* nga butang.+ 10 Kon ang isa ka lalaki nangin indi matinlo bangod ginguaan sia sing semilya sang gab-i,+ dapat sia maggua sa kampo kag indi sia magsulod liwat sa kampo. 11 Kon manugsirom na, dapat sia magpaligo, kag pagtunod sang adlaw makabalik na sia sa kampo.+ 12 Dapat may palamus-unan kamo nga lugar sa gua sang kampo, kag didto kamo magkadto. 13 Dapat may pala kamo sa inyo mga gamit. Kon magkatinkatin kamo sa gua, gamiton ninyo ini sa pagkutkot kag tabunan ninyo dayon ang inyo higko. 14 Kay si Jehova nga inyo Dios nagalakat sa tunga sang inyo kampo+ agod luwason kamo kag agod itugyan sa inyo ang inyo mga kaaway, kag dapat mangin balaan ang inyo kampo,+ agod wala sia sing makita sa inyo nga indi maayo kag agod indi niya kamo pagbayaan.

15 “Kon magpalagyo ang isa ka ulipon sa iya agalon kag magdangop sa inyo, indi ninyo sia pag-itugyan sa iya agalon. 16 Mahimo ninyo sia paistaron sa bisan diin nga lugar sa isa sang inyo mga siudad nga pilion niya kag maluyagan niya. Indi ninyo sia pagmaltratuhon.+

17 “Indi dapat mangin makihilawason sa templo ang bisan sin-o sa mga anak nga babayi+ ukon mga anak nga lalaki ni Israel. 18 Indi ninyo pagdalhon sa balay ni Jehova nga inyo Dios ang bayad sa isa ka makihilawason nga babayi ukon ang bayad sa* isa ka makihilawason nga lalaki* agod gamiton sa pagtuman sa isa ka panaad, bangod makangilil-ad ini kay Jehova nga inyo Dios.

19 “Kon magpahulam kamo sa inyo utod, indi ninyo ini pagpasakaan,+ kuarta man ini ukon pagkaon, ukon bisan ano nga mahimo pasakaan. 20 Mahimo ninyo pabayaron sing saka ang dumuluong,+ apang indi ninyo dapat pagpabayaron sing saka ang inyo utod,+ agod pakamaayuhon ni Jehova nga inyo Dios ang tanan nga ginahimo ninyo sa duta nga kadtuan ninyo agod panag-iyahan ninyo.+

21 “Kon maghimo kamo sing panaad kay Jehova nga inyo Dios,+ indi kamo magpabuyanbuyan sa pagtuman sini.+ Kay sukton ini sa inyo ni Jehova nga inyo Dios; kag makasala kamo kon indi ninyo pagtumanon ini.+ 22 Apang kon indi kamo magpanaad, indi kamo makasala.+ 23 Dapat ninyo tumanon ang inyo ginhambal,+ kag dapat ninyo himuon ang ginpanaad ninyo bilang kinabubut-on nga dulot para kay Jehova nga inyo Dios.+

24 “Kon magkadto kamo sa ulubasan sang inyo isigkatawo, mahimo kamo magkaon sing ubas tubtob maayawan kamo,* apang indi kamo magbutang sini sa inyo suludlan.+

25 “Kon magkadto kamo sa talamnan sang uyas sang inyo isigkatawo, mahimo kamo makapangutol sing uhay, apang indi ninyo ini paggarabon.+

24 “Kon ang isa ka lalaki magpangasawa, apang wala na sia maluyag sa iya asawa bangod may natukiban sia nga indi maayo sa iya, maghimo sia sing papeles sa diborsio+ kag ihatag ini sa iya, kag pahalinon niya sia sa iya balay.+ 2 Kon makahalin na ang babayi sa balay sang lalaki, mahimo na sia pangasaw-on sang iban.+ 3 Kon kaugtan* sia sang iya ikaduha nga bana kag maghimo sia sing papeles sa diborsio kag ihatag ini sa iya, kag pahalinon niya sia sa iya balay, ukon kon mapatay ang iya ikaduha nga bana, 4 indi na sia mapangasawa liwat sang iya una nga bana bangod indi na sia matinlo para sa iya, kay makangilil-ad ini kay Jehova. Indi kamo magdala sing sala sa duta nga ginahatag sa inyo ni Jehova nga inyo Dios bilang palanublion.

5 “Kon ang isa ka lalaki bag-o lang makapangasawa, indi sia magkadto sa inaway, kag indi sia paghatagan sing iban nga katungdanan. Magpabilin sia sa iya balay nga wala sing iban nga katungdanan sa sulod sang isa ka tuig, kag pahalipayon niya ang iya asawa.+

6 “Wala sing bisan sin-o nga magkuha sing galingan ukon sing pangligis nga bato sini bilang garantiya sa utang,*+ kay palangabuhian sang tawo* ang ginakuha niya nga garantiya.

7 “Kon madakpan ang isa ka tawo nga nagkidnap sa isa* sang iya mga utod nga Israelinhon, kag ginmaltrato niya sia kag ginbaligya,+ dapat patyon ang nagkidnap sa iya.+ Dapat ninyo dulaon ang malain sa tunga ninyo.+

8 “Kon may magbalatian sing aro,* sunda gid ninyo ang tanan nga isiling sa inyo sang mga saserdote nga Levinhon.+ Tumana gid ninyo ang ginsugo ko sa ila. 9 Dumduma ninyo ang ginhimo ni Jehova nga inyo Dios kay Miriam sa dalanon sang naggua kamo sa Egipto.+

10 “Kon magpahulam kamo sing bisan ano sa inyo utod,+ indi kamo magsulod sa iya balay agod kuhaon ang ihatag niya nga garantiya. 11 Maghulat lang kamo sa gua, kag dalhon sang naghulam sa inyo ang iya garantiya. 12 Kon nagapamigado ang tawo, indi kamo magtulog nga yara pa sa inyo ang iya ginhatag nga garantiya.+ 13 Ibalik ninyo sa iya ang garantiya nga ginhatag niya pagtunod sang adlaw, kay gamiton niya ini sa iya pagtulog,+ kag pangabayon niya ang Dios nga pakamaayuhon kamo. Tungod sini, mangin matarong kamo sa atubangan ni Jehova nga inyo Dios.

14 “Indi ninyo pagdayaan ang ginasuhulan nga trabahador nga pigado kag imol sa inyo mga siudad,* utod man ninyo sia ukon dumuluong nga pumuluyo sa inyo duta.+ 15 Ihatag ninyo sa iya ang iya suhol sa sina mismo nga adlaw+ antes magtunod ang adlaw, bangod pigado sia kag ang suhol sa iya amo lang ang ginasaligan sang iya kabuhi.* Kon indi ninyo paghimuon ini, magapanawag sia kay Jehova batok sa inyo, kag makasala kamo.+

16 “Indi pagpatyon ang mga amay tungod sa ginahimo sang ila mga anak, kag indi pagpatyon ang mga anak tungod sa ginahimo sang ila amay.+ Ang isa ka tawo dapat patyon tungod sa iya kaugalingon nga sala.+

17 “Indi ninyo pagpatikuon ang paghukom sa dumuluong nga pumuluyo ukon sa ilo,*+ kag indi ninyo pagkuhaon bilang garantiya sa utang* ang kunop sang balo nga babayi.+ 18 Dumduma ninyo nga nangin ulipon kamo sa Egipto, kag gintubos kamo didto ni Jehova nga inyo Dios.+ Amo kon ngaa ginasugo ko kamo nga himuon ini.

19 “Kon mag-ani kamo sa inyo uma, kag may nalipatan kamo nga linaylay, indi na ninyo ini pagbalikan agod kuhaon ini. Ibilin ninyo ini para sa dumuluong nga pumuluyo, sa ilo, kag sa balo nga babayi,+ agod pakamaayuhon kamo ni Jehova nga inyo Dios sa tanan nga ginahimo ninyo.+

20 “Kon magdugos kamo sang inyo olibo, indi ninyo pagbalikan ang mga sanga sini. Ibilin ninyo ini para sa dumuluong nga pumuluyo, sa ilo, kag sa balo nga babayi.+

21 “Kon magdugos kamo sang inyo ulubasan, indi ninyo pagbalikan kag kuhaon ang nabilin nga ubas. Ibilin ninyo ini para sa dumuluong nga pumuluyo, sa ilo, kag sa balo nga babayi. 22 Dumduma ninyo nga nangin ulipon kamo sa duta sang Egipto. Amo kon ngaa ginasugo ko kamo nga himuon ini.

25 “Kon may kasuayon sa tunga sang mga tawo, mahimo sila magkadto sa hukmanan.+ Ang mga hukom ang magadesisyon kag ideklarar nila ang wala sing sala nga matarong kag ang may sala nga malaut.+ 2 Kon ang malaut takus nga hanuton,+ pahapaon sia sang hukom, kag sa atubangan niya hanuton sia. Ang kadamuon sang mga hanot dapat suno sa iya ginhimo nga malaut. 3 Indi dapat magsobra sa 40 ka hanot ang paghanot sa iya.+ Kay kon magsobra pa sa sini, mahuy-an ang inyo utod sa inyo atubangan.

4 “Indi ninyo pagbusalan ang baka samtang nagalinas ini sang uyas.+

5 “Kon isa lang ang ginaistaran* sang mag-ulutod nga lalaki kag ang isa sa ila napatay nga wala sing anak, ang asawa sang napatay indi dapat magpamana sing indi nila pamilya. Dapat pangasaw-on sia sang iya bayaw kag tumanon niya ang katungdanan sang isa ka bayaw.+ 6 Ang ila panganay magadala sang ngalan sang iya napatay nga utod,+ agod indi madula ang iya ngalan sa Israel.+

7 “Kon indi luyag sang lalaki nga pangasaw-on ang balo sang iya utod, magkadto ang balo sa mga gulang sa gawang sang siudad kag magsiling sia, ‘Nangindi ang utod sang akon bana nga tipigan ang ngalan sang iya utod sa Israel. Indi sia magpasugot nga pangasaw-on ako kag tumanon sa akon ang katungdanan sang isa ka bayaw.’ 8 Ipatawag sang mga gulang sang siudad ang lalaki kag makighambal sila sa iya. Kon mag-insister sia, ‘Indi ko luyag nga pangasaw-on sia,’ 9 palapitan sia sang balo sang iya utod sa atubangan sang mga gulang. Hukson sang balo ang iya sandalyas+ kag duplaan sia sa guya kag magsiling sia, ‘Amo sina ang himuon sa tawo nga indi magtipig sang kaliwat sa iya utod.’ 10 Pagkatapos sini, ang ngalan sang iya pamilya* makilala sa Israel subong, ‘Ang panimalay sang isa nga ginhuksan sing sandalyas.’

11 “Kon nag-away ang duha ka lalaki kag nagpalapit ang asawa sang isa agod buligan ang iya bana kag gin-uyatan niya kag ginpisga ang kinatawo sang lalaki, 12 utdon ninyo ang kamot sang babayi. Indi kamo maluoy* sa iya.

13 “Indi kamo magbutang sa inyo suludlan sing duha ka sahi sang bato nga pamug-at,+ ang isa daku kag ang isa gamay. 14 Indi kamo magbutang sa inyo balay sing duha ka sahi sang sulukban,*+ ang isa daku kag ang isa gamay. 15 Dapat husto kag eksakto ang inyo timbangan kag sulukban, agod maglawig ang inyo kabuhi sa duta nga ginahatag sa inyo ni Jehova nga inyo Dios.+ 16 Kay ginakangil-aran ni Jehova nga inyo Dios ang tanan nga madaya nga tawo nga nagahimo sini.+

17 “Dumduma ninyo ang ginhimo ni Amalek sa inyo sa dalanon sang naggua kamo sa Egipto,+ 18 sang masugata niya kamo sa dalanon kag ginsalakay niya ang tanan nga yara sa ulihi ninyo sang kapoy na kamo kag maluya. Wala sia sing kahadlok sa Dios. 19 Kon hatagan na kamo ni Jehova nga inyo Dios sing kalinong batok sa tanan ninyo nga kaaway sa palibot sang duta nga ginahatag sa inyo ni Jehova nga inyo Dios bilang palanublion ninyo,+ panason ninyo ang handumanan ni Amalek sa idalom sang langit.+ Indi ninyo ini pagkalimtan.

26 “Kon mapanag-iyahan na ninyo ang duta nga ginahatag sa inyo ni Jehova nga inyo Dios bilang palanublion ninyo kag didto na kamo nagaistar, 2 magkuha kamo sa nahauna nga mga bunga sang tanan nga patubas* sang duta nga ginahatag sa inyo ni Jehova nga inyo Dios. Isulod ninyo ini sa alat kag magkadto kamo sa lugar nga pilion ni Jehova nga inyo Dios nga butangan niya sang iya ngalan.+ 3 Magkadto kamo sa saserdote nga nagaalagad sa sina nga tion kag magsiling kamo sa iya, ‘Isiling namon subong kay Jehova nga imo Dios nga nakasulod na kami sa duta nga ginpanumpa ni Jehova sa amon mga katigulangan nga ihatag sa amon.’+

4 “Dayon kuhaon sa inyo sang saserdote ang alat kag ibutang ini sa atubangan sang halaran ni Jehova nga inyo Dios. 5 Dayon isiling ninyo ini sa atubangan ni Jehova nga inyo Dios, ‘Ang akon amay isa ka manlulugayaw* nga Arameanhon.+ Nagkadto sia sa Egipto+ kag nag-istar didto bilang dumuluong kag diutay lang sila sadto sa iya panimalay.+ Apang sang ulihi, nagdamo sila kag nangin daku kag gamhanan nga pungsod.+ 6 Ginmaltrato kami kag ginpigos sang mga Egiptohanon. Mapintas nga gin-ulipon nila kami.+ 7 Gani nagpanawag kami kay Jehova nga Dios sang amon mga katigulangan, kag ginpamatian kami ni Jehova. Nakita niya ang amon pag-antos, ang amon kabudlayan kag ang pagpigos sa amon.+ 8 Sang ulihi, ginpagua kami ni Jehova sa Egipto paagi sa iya makusog nga kamot kag gamhanan nga butkon,+ kag paagi sa makahaladlok nga mga buhat kag mga tanda kag mga milagro.+ 9 Kag gindala niya kami sa sini nga lugar kag ginhatag niya sa amon ini nga duta diin nagailig ang gatas kag dugos.+ 10 Gindala namon subong ang nahauna nga mga bunga sang mga patubas sang duta nga ginhatag sa amon ni Jehova.’+

“Ibutang ninyo ini sa atubangan ni Jehova nga inyo Dios kag magyaub kamo sa atubangan ni Jehova nga inyo Dios. 11 Dayon magkasadya kamo tungod sa tanan nga maayong butang nga ginhatag ni Jehova nga inyo Dios sa inyo kag sa inyo panimalay, kamo kag ang mga Levinhon kag ang dumuluong nga mga pumuluyo nga nagaistar upod sa inyo.+

12 “Kon matipon na ninyo ang bug-os nga ikanapulo sang inyo mga patubas+ sa ikatlo nga tuig, nga amo ang tuig sang ikanapulo, ihatag ninyo ini sa mga Levinhon, sa dumuluong nga mga pumuluyo, sa mga ilo,* kag sa mga balo nga babayi, kag kaunon nila ini sa sulod sang inyo mga siudad* kag magpakabusog sila.+ 13 Dayon isiling ninyo ini sa atubangan ni Jehova nga inyo Dios, ‘Ginkuha na namon sa amon balay ining balaan nga mga butang kag ginhatag namon ini sa mga Levinhon, sa dumuluong nga mga pumuluyo, sa mga ilo, kag sa mga balo nga babayi,+ suno sa ginsugo mo sa amon. Wala namon ginlapas ukon ginkalimtan ang imo mga sugo. 14 Wala kami magkaon sini samtang nagalalaw kami ukon magtandog sini samtang indi kami matinlo ukon maghatag sini para sa patay. Gintuman namon si Jehova nga amon Dios kag ginhimo namon ang tanan nga ginsugo mo sa amon. 15 Magtan-aw ka halin sa imo balaan nga puluy-an sa langit, kag pakamaayuha ang imo katawhan nga Israel kag ang duta diin nagailig ang gatas kag dugos+ nga ginhatag mo sa amon,+ suno sa ginpanumpa mo sa amon mga katigulangan.’+

16 “Ginasugo kamo subong ni Jehova nga inyo Dios nga tumanon ninyo ini nga mga pagsulundan kag mga kasuguan. Dapat ninyo tumanon ini sa bug-os ninyo nga tagipusuon+ kag sa bug-os ninyo nga kalag.* 17 Nabatian ninyo subong ang ginsiling ni Jehova nga mangin Dios ninyo sia, samtang nagalakat kamo sa iya mga dalanon kag ginatuman ninyo ang iya mga pagsulundan,+ ang iya mga sugo,+ kag ang iya mga kasuguan,+ kag nagapamati kamo sa iya. 18 Kag nabatian man ni Jehova subong ang ginsiling ninyo nga kamo mangin iya katawhan, isa ka hamili nga katawhan,*+ suno sa ginsaad niya sa inyo, kag tumanon ninyo ang tanan niya nga sugo, 19 kag himuon niya kamo nga labaw sa tanan nga pungsod nga ginhimo niya,+ kag hatagan niya kamo sing kadayawan kag kabantugan kag himaya, samtang ginapamatud-an ninyo nga kamo isa ka katawhan nga balaan para kay Jehova nga inyo Dios,+ suno sa ginsaad niya.”

27 Dayon ginsugo ni Moises kag sang mga gulang sang Israel ang katawhan: “Tumana ninyo ang tanan nga sugo nga ginahatag ko sa inyo subong. 2 Sa tion nga makatabok na kamo sa Jordan pakadto sa duta nga ginahatag sa inyo ni Jehova nga inyo Dios, magtumpok kamo sing dalagku nga mga bato kag palitadahan ninyo ini.*+ 3 Kon makatabok na kamo, isulat ninyo sa sini ang tanan nga pulong sini nga Kasuguan, agod makasulod kamo sa duta diin nagailig ang gatas kag dugos nga ginahatag sa inyo ni Jehova nga inyo Dios, suno sa ginsaad sa inyo ni Jehova nga Dios sang inyo mga katigulangan.+ 4 Kon makatabok na kamo sa Jordan, tumpukon ninyo ining mga bato sa Bukid Ebal+ kag palitadahan ninyo ini* suno sa ginasugo ko sa inyo subong. 5 Maghimo man kamo didto sing halaran nga bato para kay Jehova nga inyo Dios. Indi ninyo ini paggamitan sang salsalon nga gamit.+ 6 Maghimo kamo sing halaran para kay Jehova nga inyo Dios kag gamiton ninyo ang mga bato nga wala mabasbasan, kag maghalad kamo sa sini sing mga dulot nga sinunog para kay Jehova nga inyo Dios. 7 Maghalad kamo sing mga halad sa pag-ambitanay*+ kag kaunon ninyo ini didto,+ kag magkasadya kamo sa atubangan ni Jehova nga inyo Dios.+ 8 Kag isulat ninyo sing maathag sa mga bato ang tanan nga pulong sini nga Kasuguan.”+

9 Dayon nagsiling si Moises kag ang mga saserdote nga Levinhon sa bug-os nga Israel: “Maghipos kamo kag magpamati, O Israel. Subong nga adlaw nangin katawhan kamo ni Jehova nga inyo Dios.+ 10 Magpamati kamo sa tingog ni Jehova nga inyo Dios kag tumanon ninyo ang iya mga sugo+ kag mga pagsulundan nga ginasugo ko sa inyo subong.”

11 Ginsugo ni Moises ang katawhan sa sina nga adlaw: 12 “Kon makatabok na kamo sa Jordan, amo ini ang mga tribo nga magtindog sa Bukid Gerizim+ agod pakamaayuhon ang katawhan: ang tribo ni Simeon, ni Levi, ni Juda, ni Isacar, ni Jose, kag ni Benjamin. 13 Amo ini ang magtindog sa Bukid Ebal+ agod magpakamalaut: ang tribo ni Ruben, ni Gad, ni Aser, ni Zebulon, ni Dan, kag ni Neptali. 14 Sabton sing mabaskog sang mga Levinhon ang tanan nga katawhan sang Israel:+

15 “‘Pakamalauton ang tawo nga maghimo sing tinigib nga imahen+ ukon sing metal nga estatwa,*+ nga ginhimo sang panday,* kag gintago niya ini. Makangilil-ad ini kay Jehova.’+ (Dayon masabat ang tanan nga katawhan, ‘Amen!’*)

16 “‘Pakamalauton ang tawo nga nagatamay sa iya amay kag sa iya iloy.’+ (Dayon masabat ang tanan nga katawhan, ‘Amen!’)

17 “‘Pakamalauton ang tawo nga nagahalin sing muhon sang iya isigkatawo.’+ (Dayon masabat ang tanan nga katawhan, ‘Amen!’)

18 “‘Pakamalauton ang tawo nga nagapatalang sang bulag sa dalan.’+ (Dayon masabat ang tanan nga katawhan, ‘Amen!’)

19 “‘Pakamalauton ang tawo nga nagapatiko sang paghukom+ sa dumuluong nga pumuluyo, sa ilo,* ukon sa balo nga babayi.’+ (Dayon masabat ang tanan nga katawhan, ‘Amen!’)

20 “‘Pakamalauton ang tawo nga nagahulid sa asawa sang iya amay, kay ginapakahuy-an niya ang iya amay.’*+ (Dayon masabat ang tanan nga katawhan, ‘Amen!’)

21 “‘Pakamalauton ang tawo nga nagahulid sa bisan ano nga sapat.’+ (Dayon masabat ang tanan nga katawhan, ‘Amen!’)

22 “‘Pakamalauton ang tawo nga nagahulid sa iya utod nga babayi, nga anak sang iya amay ukon anak sang iya iloy.’+ (Dayon masabat ang tanan nga katawhan, ‘Amen!’)

23 “‘Pakamalauton ang tawo nga nagahulid sa iya ugangan nga babayi.’+ (Dayon masabat ang tanan nga katawhan, ‘Amen!’)

24 “‘Pakamalauton ang tawo nga maglambat kag magpatay sang iya isigkatawo.’+ (Dayon masabat ang tanan nga katawhan, ‘Amen!’)

25 “‘Pakamalauton ang tawo nga nagabaton sang bayad agod patyon ang isa ka tawo nga wala sing sala.’*+ (Dayon masabat ang tanan nga katawhan, ‘Amen!’)

26 “‘Pakamalauton ang tawo nga indi magtuman sa mga pulong sini nga Kasuguan kag indi maghimo sini.’+ (Dayon masabat ang tanan nga katawhan, ‘Amen!’)

28 “Kon magpamati kamo kay Jehova nga inyo Dios paagi sa pagtuman sang tanan niya nga sugo nga ginasugo ko karon sa inyo, himuon kamo ni Jehova nga inyo Dios nga mas labaw sa tanan nga pungsod sa duta.+ 2 Ining tanan nga pagpakamaayo magaabot sa inyo sing bugana,+ bangod nagapamati kamo kay Jehova nga inyo Dios:

3 “Pakamaayuhon kamo sa siudad, kag pakamaayuhon kamo sa uma.+

4 “Pakamaayuhon ang inyo mga anak*+ kag ang patubas sang inyo duta kag ang mga tinday sang inyo kasapatan, ang inyo mga tinday nga baka kag karnero.+

5 “Pakamaayuhon ang inyo alat+ kag ang inyo lamasan.+

6 “Pakamaayuhon ang tanan ninyo nga ginahimo.

7 “Pahanabuon ni Jehova nga mapierde ninyo ang mga kaaway nga nagasalakay sa inyo.+ Salakayon nila kamo halin sa isa lang ka direksion, apang magapalagyo sila sa inyo sa pito ka direksion.+ 8 Pakamaayuhon ni Jehova ang inyo mga bodega+ kag ang tanan ninyo nga ginahimo, kag pakamaayuhon niya kamo sa duta nga ginahatag sa inyo ni Jehova nga inyo Dios. 9 Himuon kamo ni Jehova nga iya balaan nga katawhan,+ suno sa ginpanumpa niya sa inyo,+ bangod ginatuman ninyo ang mga sugo ni Jehova nga inyo Dios kag nagalakat kamo sa iya mga dalanon. 10 Makita sang tanan nga katawhan sa duta nga ginatawag kamo sa ngalan ni Jehova,+ kag mahadlok sila sa inyo.+

11 “Padamuon ni Jehova ang inyo mga anak kag ang inyo kasapatan kag ang inyo mga patubas sa duta+ nga ginpanumpa ni Jehova sa inyo mga katigulangan nga ihatag sa inyo.+ 12 Buksan sa inyo ni Jehova ang langit pareho sang pagbukas sa puno nga bodega, agod magpaulan sa inyo duta sa husto nga tion+ kag agod pakamaayuhon ang tanan nga ginahimo ninyo. Magapahulam kamo sa madamo nga pungsod, apang indi kamo magpanghulam.+ 13 Kon sundon ninyo ang mga sugo ni Jehova nga inyo Dios nga ginasugo ko karon sa inyo nga tumanon ninyo, himuon kamo ni Jehova nga ulo kag indi ikog; kag mangin labaw kamo sa iban+ kag indi kubos. 14 Sa tanan nga pulong nga ginasugo ko subong sa inyo, indi kamo magsipak sa tuo ukon sa wala,+ sa pagsunod sa iban nga mga dios agod mag-alagad sa ila.+

15 “Apang kon indi kamo magpamati kay Jehova nga inyo Dios paagi sa pagtuman sang tanan niya nga sugo kag mga pagsulundan nga ginasugo ko subong sa inyo, magaabot sa inyo ining tanan nga pagpakamalaut:+

16 “Pakamalauton kamo sa siudad, kag pakamalauton kamo sa uma.+

17 “Pakamalauton ang inyo alat+ kag ang inyo lamasan.+

18 “Pakamalauton ang inyo mga anak*+ kag ang patubas sang inyo duta kag ang inyo mga tinday nga baka kag karnero.+

19 “Pakamalauton ang tanan ninyo nga ginahimo.

20 “Padalhan kamo ni Jehova sing pagpakamalaut, kagamo kag silot sa tanan ninyo nga ginahimo, tubtob malaglag kamo kag mapapas sa gilayon, bangod malain ang inyo mga ginahimo kag gintalikdan ninyo ako.+ 21 Padalhan kamo ni Jehova sing balatian tubtob malaglag niya kamo sa duta nga panag-iyahan ninyo.+ 22 Padalhan kamo ni Jehova sing anos, mataas nga hilanat,+ pagpalamanog, masingkal nga init, espada,+ pagpanglaya bangod sang mainit nga hangin, kag peste sa mga pananom;+ kag magahalit ini sa inyo tubtob malaglag kamo. 23 Ang langit mangin saway, kag ang duta mangin salsalon.+ 24 Magapaulan si Jehova sing balas kag yab-ok halin sa langit tubtob nga malaglag kamo. 25 Pahanabuon ni Jehova nga mapierde kamo sang inyo mga kaaway.+ Salakayon ninyo sila halin sa isa lang ka direksion, apang magapalagyo kamo sa ila sa pito ka direksion; kag ang tanan nga ginharian sa duta mahadlok kon makita nila ang malain nga nagakatabo sa inyo.+ 26 Kaunon sang mga pispis kag sang mga sapat sa duta ang inyo mga bangkay, kag wala sing magatabog sa ila.+

27 “Patubuan kamo ni Jehova sing mga hubag nga kinaandan sa mga Egiptohanon, sing almoranas, sing eksema, kag sing gurosguros nga indi gid mag-ayo. 28 Pahanabuon ni Jehova nga magbuang kamo, mabulag,+ kag magsalasala.* 29 Magapangapkap kamo bisan udtong-adlaw, pareho sang bulag nga nagapangapkap sa dulom,+ kag indi magmadinalag-on ang bisan ano nga ginahimo ninyo; kag pirme lang kamo dayaan kag kawatan, kag wala sing magaluwas sa inyo.+ 30 Himuslan sang iban nga lalaki ang babayi nga inyo pangasaw-on. Magapatindog kamo sing balay apang indi kamo makaistar sa sini.+ Magatanom kamo sing mga ubas, apang indi kamo makapulos sa sini.+ 31 Ihawon ang inyo baka sa inyo atubangan, apang indi kamo makakaon sini. Kawaton ang inyo asno sa inyo atubangan, apang indi ninyo ini mabawi. Kuhaon sang inyo mga kaaway ang inyo mga karnero, apang wala sing magaluwas sa inyo. 32 Makita ninyo nga kuhaon sang iban nga tawo ang inyo mga anak nga lalaki kag ang inyo mga anak nga babayi,+ kag handumon ninyo pirme nga makita sila liwat, apang wala kamo sing mahimo. 33 Kaunon sang mga tawo nga wala ninyo makilala ang inyo mga patubas kag ang tanan nga pagkaon nga inyo ginpangabudlayan,+ kag dayaan kamo pirme kag piguson. 34 Magabuang gid kamo bangod sang inyo makita.

35 “Patubuan kamo ni Jehova sing masakit kag indi mag-ayo nga mga hubag sa inyo mga tuhod kag mga tiil, halin sa dapadapa tubtob sa alimpudwan. 36 Dalhon kamo ni Jehova kag ang hari nga pilion ninyo sa pungsod nga wala ninyo makilala ukon sang inyo mga katigulangan,+ kag magaalagad kamo didto sa iban nga mga dios nga ginhimo halin sa kahoy kag bato.+ 37 Ang tanan nga katawhan nga dalhan sa inyo ni Jehova mahadlok tungod sa matabo sa inyo, kag tamayon* nila kamo kag yagutaon.+

38 “Magasab-ug kamo sing madamo nga binhi sa inyo mga uma, apang diutay lang ang inyo anihon,+ bangod kaunon ini sang mga apan. 39 Magatanom kamo sing mga ubas kag atipanon ini, apang wala kamo sing mainom nga alak kay wala kamo sing duguson,+ bangod kaunon ini sang mga ulod. 40 May mga kahoy nga olibo sa bug-os ninyo nga kadutaan, apang wala kamo sing ibanyos nga lana, bangod magkalahulog ang mga bunga sini. 41 Magaanak kamo sing mga lalaki kag mga babayi, apang indi sila magpabilin sa inyo, bangod bihagon sila.+ 42 Kaunon sang nagapanong nga mga insekto* ang tanan ninyo nga kahoy kag ang patubas sang inyo duta. 43 Ang dumuluong nga mga pumuluyo padayon nga magauswag, samtang kamo padayon nga magausmod. 44 Sila ang magapahulam sa inyo, kag indi kamo ang magapahulam sa ila.+ Sila ang mangin ulo, samtang kamo ang mangin ikog.+

45 “Ining tanan nga pagpakamalaut+ magaabot sa inyo tubtob malaglag kamo,+ bangod wala kamo magpamati kay Jehova nga inyo Dios paagi sa pagtuman sa iya mga sugo kag mga pagsulundan nga ginsugo niya sa inyo.+ 46 Matabo ini sa inyo kag sa inyo mga anak bilang tanda kag paandam tubtob san-o,+ 47 bangod wala kamo mag-alagad kay Jehova nga inyo Dios nga may kalipay kag kasadya bisan pa bugana kamo sa tanan nga butang.+ 48 Ipadala ni Jehova sa inyo ang inyo mga kaaway kag magaalagad kamo sa ila+ samtang gutom kamo,+ uhaw, hublas, kag ginakulang sa tanan nga butang. Takdan niya sing salsalon nga gota ang inyo liog tubtob malaglag niya kamo.

49 “Magapadala si Jehova sing isa ka pungsod batok sa inyo halin sa pinakamalayo nga bahin sang duta;+ kag magasalakay ini pareho sang nagapangdagit nga agila.+ Isa ini ka pungsod nga indi ninyo mahangpan ang lenguahe,+ 50 isa ka pungsod nga mapintas, nga wala sing kaluoy sa mga tigulang kag sa mga kabataan.+ 51 Kaunon nila ang mga tinday sang inyo kasapatan kag ang mga patubas sang inyo uma tubtob malaglag kamo. Wala sila sing ibilin sa inyo nga mga uyas, bag-o nga alak, lana, ukon mga tinday sang inyo baka kag sang inyo karnero, tubtob malaglag nila kamo.+ 52 Likupan nila ang bug-os ninyo nga duta kag indi kamo makagua sa inyo mga siudad,* tubtob marumpag ang mataas kag mabakod nga mga pader nga inyo ginasaligan. Likupan gid nila ang tanan nga siudad sa inyo bug-os nga duta, nga ginhatag sa inyo ni Jehova nga inyo Dios.+ 53 Kaunon ninyo ang inyo mga anak,* ang unod sang inyo mga anak nga lalaki kag mga anak nga babayi+ nga ginhatag sa inyo ni Jehova nga inyo Dios, bangod sang kabudlayan nga resulta sang paglikop sang inyo mga kaaway.

54 “Bisan ang mabuot gid kag maayo sing pangabuhi nga lalaki indi maluoy sa iya utod ukon sa iya pinalangga nga asawa ukon sa iya mga anak nga nabilin, 55 kag indi gid sia manghatag sing unod sang iya mga anak nga kaunon niya, kay wala sing mabilin sa iya tungod sa kabudlayan nga resulta sang paglikop sang inyo mga kaaway sa inyo mga siudad.+ 56 Ang mabuot kag maayo sing pangabuhi nga babayi, nga indi gani magtapak sang iya dapadapa sa duta,+ indi maluoy sa iya pinalangga nga bana, sa iya anak nga lalaki, ukon sa iya anak nga babayi. 57 Kaunon niya sa tago bisan ang inunlan nga naggua halin sa iya tiyan kag ang iya ginbun-ag nga anak tungod sa kabudlayan nga resulta sang paglikop sa inyo sang inyo mga kaaway sa inyo mga siudad.

58 “Kon indi ninyo pagtumanon ang tanan nga pulong sini nga Kasuguan nga nasulat sa sini nga libro+ kag kon indi ninyo pagkahadlukan ining mahimayaon kag makahalawhaw nga ngalan+ ni Jehova+ nga inyo Dios, 59 padalhan kamo ni Jehova pati ang inyo mga anak sing grabe gid kag indi madula nga mga kalalat-an,+ kag sing masakit kag indi mag-ayo nga mga balatian. 60 Ibalik niya sa inyo ang tanan nga balatian sa Egipto nga ginkahadlukan ninyo sadto, kag magatapik ini sa inyo. 61 Hatagan pa kamo ni Jehova sing mga balatian ukon kalalat-an nga wala nasulat sa libro sini nga Kasuguan tubtob malaglag kamo. 62 Bisan pa nagdamo kamo pareho sang mga bituon sa langit,+ diutay lang ang mabilin sa inyo,+ bangod wala kamo magpamati kay Jehova nga inyo Dios.

63 “Kag kon nalipay anay si Jehova sa pagpauswag kag sa pagpadamo sa inyo, malipay man si Jehova sa paglaglag kag sa pagpapas sa inyo; kag gabuton kamo sa duta nga panag-iyahan ninyo.

64 “Paalaplaagon kamo ni Jehova sa tanan nga pungsod sa bug-os nga duta,+ kag magaalagad kamo didto sa mga dios nga ginhimo halin sa kahoy kag bato, nga wala ninyo makilala ukon sang inyo mga katigulangan.+ 65 Wala kamo sing kalinong kag wala sing mapahuwayan ang inyo mga tiil sa sini nga mga pungsod.+ Pahanabuon ni Jehova nga mahadlok kamo,+ magdulom ang inyo panulok, kag madulaan kamo sing paglaum.*+ 66 Mabutang sa daku nga katalagman ang inyo kabuhi, kag makulbaan kamo sa adlaw kag gab-i; kag wala sing kasiguruhan ang inyo kabuhi. 67 Sa aga magasiling kamo, ‘Kuntani gab-i na!’ kag sa gab-i magasiling kamo, ‘Kuntani aga na!’ bangod mahadlukan kamo kag bangod sang makita ninyo. 68 Kag pabalikon kamo ni Jehova sa Egipto sakay sa barko, sa dalanon nga tuhoy sini nagsiling ako sa inyo, ‘Indi na gid ninyo ini makita liwat,’ kag ibaligya ninyo didto ang inyo kaugalingon sa inyo mga kaaway bilang mga ulipon nga lalaki kag babayi, apang wala sing magabakal sa inyo.”

29 Amo ini ang mga pulong sang katipan nga ginsugo ni Jehova kay Moises nga himuon sa katawhan sang Israel sa duta sang Moab, dugang pa sa katipan nga ginhimo niya sa ila sa Horeb.+

2 Dayon gintipon ni Moises ang bug-os nga Israel kag nagsiling sia sa ila: “Nakita ninyo ang tanan nga ginhimo ni Jehova sa Paraon, sa tanan niya nga alagad, kag sa bug-os niya nga kadutaan sa Egipto,+ 3 ang daku nga mga pagtilaw* nga nakita ninyo, ang daku nga mga tanda kag mga milagro.+ 4 Apang wala kamo ginhatagan ni Jehova sing tagipusuon nga makahangop kag mga mata nga makakita kag mga dulunggan nga makabati tubtob sa sini nga adlaw.+ 5 ‘Sang gintuytuyan ko kamo sa kamingawan sa sulod sang 40 ka tuig,+ wala magdaan ang inyo mga bayo kag mga sandalyas.+ 6 Wala kamo sing makaon nga tinapay, kag wala kamo sing mainom nga alak kag makahulubog nga ilimnon, agod mahibaluan ninyo nga ako si Jehova nga inyo Dios.’ 7 Sang ulihi, nag-abot kamo sa sini nga lugar, kag nagpakig-away sa aton si Sihon nga hari sang Hesbon+ kag si Og nga hari sang Basan,+ apang napierde naton sila.+ 8 Ginkuha naton ang ila duta kag ginhatag ini bilang palanublion sa mga Rubenhon, sa mga Gadhanon, kag sa katunga sang tribo ni Manases.+ 9 Gani, tumana ninyo ang mga pulong sini nga katipan, agod mangin maayo ang resulta sang tanan nga himuon ninyo.+

10 “Nagatindog kamo tanan subong sa atubangan ni Jehova nga inyo Dios, ang mga ulo sang inyo mga tribo, ang inyo mga gulang, ang inyo mga manugdumala, ang tanan nga lalaki sa Israel, 11 ang inyo mga kabataan, ang inyo mga asawa,+ kag ang dumuluong nga mga pumuluyo+ sa inyo kampo, ang inyo mga manugpangahoy kag manugsag-ub. 12 Yari kamo diri agod makapakigbahin kamo sa katipan ni Jehova nga inyo Dios kag sa iya pagpanumpa, nga amo subong ang ginahimo ni Jehova nga inyo Dios upod sa inyo+ 13 agod mahimo niya kamo subong nga iya katawhan+ kag mangin Dios ninyo sia,+ suno sa ginsaad niya sa inyo kag suno sa ginpanumpa niya sa inyo mga katigulangan nga si Abraham,+ si Isaac,+ kag si Jacob.+

14 “Indi lamang sa inyo nga ginahimo ko ini nga katipan kag ini nga pagpanumpa, 15 kundi sa mga nagatindog man diri upod sa aton subong sa atubangan ni Jehova nga aton Dios kag sa mga wala man diri sa aton subong. 16 (Kay nahibaluan gid ninyo kon ano ang kahimtangan naton sadto sang nagaistar kita sa duta sang Egipto kag kon paano naton ginlatas ang mga pungsod nga gin-agyan naton.+ 17 Nakita ninyo ang ila makangilil-ad nga mga butang kag ang ila makangilil-ad nga mga diosdios,*+ nga human sa kahoy kag bato, sa pilak kag bulawan.) 18 Mag-andam kamo nga wala sing lalaki ukon babayi, pamilya ukon tribo sa tunga ninyo subong nga ang ila tagipusuon magtalikod kay Jehova nga aton Dios kag mag-alagad sa mga dios sadtong mga pungsod,+ agod wala sing tawo sa inyo nga mangin pareho sang gamot sang isa ka tanom nga nagapamunga sing makahililo kag mapait nga bunga.+

19 “Apang kon ang isa ka tawo makabati sang mga pulong sining pagpanumpa kag magpabugal sia sa iya kaugalingon kag magsiling sia, ‘Wala sing malain nga matabo sa akon, bisan pa himuon ko kon ano ang luyag sang akon tagipusuon,’ sa tuyo nga laglagon ang tanan,* 20 indi sia pagpatawaron ni Jehova.+ Sa baylo, magadabdab ang daku nga kaakig ni Jehova batok sa sina nga tawo, kag matabo sa iya ang tanan nga pagpakamalaut nga nasulat sa sini nga libro,+ kag panason ni Jehova ang iya ngalan sa idalom sang langit. 21 Dayon painon sia ni Jehova halin sa tanan nga tribo sang Israel agod halitan sia suno sa tanan nga pagpakamalaut sang katipan nga nasulat sa sini nga libro sang Kasuguan.

22 “Makita sang palaabuton nga kaliwatan sang inyo mga anak kag sang mga dumuluong halin sa malayo nga lugar ang mga kalalat-an nga ginpahanabo ni Jehova sa sina nga duta. 23 Nagpadala sia sing asupre kag asin kag sunog, amo nga ang bug-os nga duta indi masab-ugan, ukon wala sing magpamuhi, kag wala sing tanom nga magtubo sa sini, pareho sang pagpukan sa Sodoma kag Gomorra,+ sa Adma kag Zeboiim,+ nga ginpukan ni Jehova tungod sa iya kaakig kag kasingkal. 24 Ang inyo mga anak kag ang mga dumuluong kag ang tanan nga pungsod magasiling, ‘Ngaa ginhimo ini ni Jehova sa sini nga duta?+ Ngaa nagbalingaso gid ang iya kaakig?’ 25 Dayon magasiling sila, ‘Bangod gintalikdan nila ang katipan ni Jehova+ nga Dios sang ila mga katigulangan, nga ginhimo niya upod sa ila sang ginpagua niya sila sa duta sang Egipto.+ 26 Apang nag-alagad sila sa iban nga mga dios kag nagyaub sila sa ila, sa mga dios nga wala nila makilala kag wala niya gintugutan nga simbahon nila.*+ 27 Dayon nagdabdab batok sa sina nga duta ang kaakig ni Jehova kag ginpadala niya sa ila ang tanan nga pagpakamalaut nga nasulat sa sini nga libro.+ 28 Gani gingabot sila ni Jehova sa ila duta tungod sa iya kaakig,+ kasingkal, kag daku nga kaalipungot kag gintabog niya sila pakadto sa iban nga duta nga amo ang ginaistaran nila subong.’+

29 “Nahibaluan ni Jehova nga aton Dios ang tanan nga likom,+ apang gintugyan niya sa aton kag sa aton mga anak tubtob san-o ang butang nga luyag niya ipahayag sa aton, agod tumanon naton ang tanan nga pulong sini nga Kasuguan.+

30 “Kon mahanabo sa inyo ining tanan nga pulong, ang pagpakamaayo kag ang pagpakamalaut nga ginabutang ko sa inyo atubangan,+ kag madumduman ninyo ini*+ sa tanan nga pungsod nga dalhan sa inyo ni Jehova nga inyo Dios,+ 2 kag magbalik kamo kag ang inyo mga anak kay Jehova nga inyo Dios+ kag magpamati kamo sa iya sa bug-os ninyo nga tagipusuon kag sa bug-os ninyo nga kalag,*+ suno sa tanan nga ginasugo ko sa inyo subong nga adlaw, 3 ibalik ni Jehova nga inyo Dios ang mga nabihag sa inyo+ kag kaluy-an niya kamo+ kag tipunon niya kamo liwat halin sa tanan nga katawhan diin ginpaalaplaag kamo ni Jehova nga inyo Dios.+ 4 Bisan pa naglapta ang inyo katawhan sa pinakamalayo nga bahin sang duta, halin didto tipunon kamo kag ibalik ni Jehova nga inyo Dios.+ 5 Dalhon kamo ni Jehova nga inyo Dios sa duta nga ginpanag-iyahan sang inyo mga amay, kag panag-iyahan ninyo ini. Pauswagon niya kamo kag padamuon sing labaw pa sa inyo mga amay.+ 6 Tinluan* ni Jehova nga inyo Dios ang inyo tagipusuon kag ang tagipusuon sang inyo kaliwat,+ agod higugmaon ninyo si Jehova nga inyo Dios sa bug-os ninyo nga tagipusuon kag sa bug-os ninyo nga kalag* agod padayon kamo nga magkabuhi.+ 7 Pahanabuon ni Jehova nga inyo Dios ining tanan nga pagpakamalaut sa inyo mga kaaway nga nagadumot kag nagahingabot sa inyo.+

8 “Dayon magabalik kamo kag magapamati kay Jehova kag tumanon ninyo ang tanan niya nga sugo nga ginasugo ko sa inyo subong nga adlaw. 9 Pauswagon gid kamo ni Jehova nga inyo Dios sa tanan ninyo nga ginahimo.+ Padamuon niya ang inyo mga anak, ang inyo kasapatan, kag ang patubas sang inyo duta, bangod malipay liwat si Jehova sa pagpauswag sa inyo, subong nga nalipay sia sa pagpauswag sa inyo mga katigulangan.+ 10 Kay magapamati kamo sa tingog ni Jehova nga inyo Dios kag tumanon ninyo ang iya mga sugo kag ang iya mga pagsulundan nga nasulat sa sini nga libro sang Kasuguan, kag magabalik kamo kay Jehova nga inyo Dios sa bug-os ninyo nga tagipusuon kag sa bug-os ninyo nga kalag.*+

11 “Ini nga sugo nga ginasugo ko sa inyo subong nga adlaw indi mabudlay para sa inyo, kag indi ini malayo sa inyo.+ 12 Wala ini sa langit amo nga masiling kamo, ‘Sin-o ang makayab sa langit kag kuhaon ini para sa amon, agod mabatian namon ini kag tumanon ini?’+ 13 Wala man ini sa tabok sang dagat amo nga masiling kamo, ‘Sin-o ang matabok sa dagat kag kuhaon ini para sa amon, agod mabatian namon ini kag tumanon ini?’ 14 Kay ang pulong malapit gid sa inyo, sa inyo mismo baba kag sa inyo tagipusuon,+ agod himuon ninyo ini.+

15 “Ginabutang ko subong nga adlaw sa inyo atubangan ang kabuhi kag ang kaayuhan, ang kamatayon kag ang kalainan.+ 16 Kon mamati kamo sa mga sugo ni Jehova nga inyo Dios nga ginasugo ko sa inyo subong nga adlaw, paagi sa paghigugma kay Jehova nga inyo Dios,+ sa paglakat sa iya mga dalanon, kag sa pagtuman sang iya mga sugo kag mga pagsulundan kag mga kasuguan, magakabuhi kamo+ kag magadamo, kag pakamaayuhon kamo ni Jehova nga inyo Dios sa duta nga inyo panag-iyahan.+

17 “Apang kon magpalayo ang inyo tagipusuon+ kag indi kamo magpamati kag maganyat kamo nga magyaub sa iban nga mga dios kag mag-alagad sa ila,+ 18 ginasiling ko sa inyo subong nga adlaw nga malaglag gid kamo.+ Indi maglawig ang inyo kabuhi sa duta sa tabok sang Jordan nga inyo kadtuan agod panag-iyahan. 19 Ginahimo ko ang langit kag ang duta nga mga saksi batok sa inyo subong nga adlaw, nga ginabutang ko sa inyo atubangan ang kabuhi kag ang kamatayon, ang pagpakamaayo kag ang pagpakamalaut;+ pilia ninyo ang kabuhi agod magkabuhi kamo+ kag ang inyo mga kaliwat,+ 20 paagi sa paghigugma kay Jehova nga inyo Dios,+ sa pagpamati sa iya, kag sa pag-unong sa iya,+ kay sia ang inyo kabuhi kag paagi sa iya magapabilin kamo sing malawig sa duta nga ginpanumpa ni Jehova nga ihatag sa inyo mga katigulangan nga si Abraham, si Isaac, kag si Jacob.”+

31 Dayon naglakat si Moises kag ginhambal ini nga mga pulong sa bug-os nga Israel, 2 kag nagsiling sia sa ila: “Nagaedad na ako karon sing 120 ka tuig.+ Indi na ako makapanguna sa inyo,* kay si Jehova nagsiling sa akon, ‘Indi ka makatabok sa Jordan.’+ 3 Si Jehova nga inyo Dios magauna sa inyo sa pagtabok, kag laglagon niya ini nga mga pungsod sa inyo atubangan, kag tabugon ninyo sila.+ Si Josue ang magapanguna sa inyo sa pagtabok,+ suno sa ginsiling ni Jehova. 4 Himuon ni Jehova sa ila ang ginhimo niya kay Sihon+ kag kay Og+ nga mga hari sang mga Amornon, kag sa ila duta, sang ginlaglag niya sila.+ 5 Pierdihon sila ni Jehova para sa inyo, kag himuon ninyo sa ila ang tanan nga ginsugo ko sa inyo.+ 6 Magpakaisog kamo kag magpakabakod.+ Indi kamo mahadlok sa ila,+ kay si Jehova nga inyo Dios nagalakat upod sa inyo. Indi gid niya kamo pagbayaan ukon pagpabay-an.”+

7 Dayon gintawag ni Moises si Josue kag nagsiling sia sa iya sa atubangan sang bug-os nga Israel: “Magpakaisog ka kag magpakabakod,+ kay ikaw ang magadala sa sini nga katawhan sa duta nga ginpanumpa ni Jehova sa ila mga katigulangan nga ihatag sa ila, kag ihatag mo ini sa ila bilang palanublion nila.+ 8 Si Jehova magalakat sing una sa imo, kag padayon sia nga magaupod sa imo.+ Indi gid niya ikaw pagbayaan ukon pagpabay-an. Indi ka mahadlok.”+

9 Dayon ginsulat ni Moises ini nga Kasuguan+ kag ginhatag ini sa mga saserdote nga Levinhon, nga amo ang nagadala sang kaban sang katipan ni Jehova, kag sa tanan nga gulang sang Israel. 10 Ginsugo sila ni Moises: “Sa katapusan sang kada pito ka tuig, sa gintalana nga tion sang tuig sang paghilway,+ sa Kapiestahan sang mga Payagpayag,*+ 11 sa tion nga ang bug-os nga Israel mag-atubang kay Jehova+ nga inyo Dios sa lugar nga pilion niya, dapat mo basahon ini nga Kasuguan agod mabatian ini sang bug-os nga Israel.+ 12 Tipuna ang katawhan,+ ang mga lalaki, ang mga babayi, ang mga kabataan,* kag ang dumuluong nga mga pumuluyo sa sulod sang inyo mga siudad,* agod magpamati sila kag makatuon kag magkahadlok kay Jehova nga inyo Dios kag tumanon nila ang tanan nga pulong sining Kasuguan. 13 Dayon ang ila mga anak nga wala makahibalo sini nga Kasuguan magapamati+ kag makatuon sa pagkahadlok kay Jehova nga inyo Dios samtang nagakabuhi kamo sa duta nga panag-iyahan ninyo sa tabok sang Jordan.”+

14 Dayon nagsiling si Jehova kay Moises: “Malapit ka na mapatay,+ gani ipatawag si Josue kag magkadto kamo* sa tolda nga tilipunan, agod matangdo ko sia.”+ Gani nagkadto si Moises kag si Josue sa tolda nga tilipunan. 15 Dayon nagpakita si Jehova sa tolda paagi sa haligi nga panganod, kag ang haligi nga panganod nagpabilin sa puertahan sang tolda.+

16 Nagsiling si Jehova kay Moises: “Malapit ka na mapatay,* kag ini nga katawhan magahimo sing espirituwal nga pagpakighilawas sa iban nga mga dios nga yara sa palibot sang duta nga kadtuan nila.+ Talikdan nila ako+ kag lapason nila ang katipan nga ginhimo ko upod sa ila.+ 17 Sa sina nga tion, magadabdab ang akon kaakig sa ila,+ kag sikwayon ko sila+ kag lipdan ko ang akon nawong sa ila+ tubtob malaglag sila. Pagkatapos sang madamo nga kapahamakan kag kabudlayan nga matabo sa ila,+ magasiling sila, ‘Indi bala nga natabo ini nga mga kapahamakan sa aton bangod indi naton kaupod ang aton Dios?’+ 18 Apang lipdan ko gihapon ang akon nawong sa sina nga tion bangod sang tanan nga kalainan nga ginhimo nila, kay nagdangop sila sa iban nga mga dios.+

19 “Gani isulat ninyo ini nga ambahanon+ kag itudlo ninyo ini sa mga Israelinhon.+ Ipasaulo ninyo ini sa ila* agod ini nga ambahanon mangin saksi ko batok sa katawhan sang Israel.+ 20 Kon dalhon ko na sila sa duta diin nagailig ang gatas kag dugos+ nga ginpanumpa ko sa ila mga katigulangan,+ kag magkaon sila didto kag mabusog kag mag-uswag* sila,+ magadangop sila sa iban nga mga dios kag alagaron nila sila kag indi na sila magtahod sa akon kag lapason nila ang akon katipan.+ 21 Kon matabo sa ila ang madamo nga kapahamakan kag kabudlayan,+ ini nga ambahanon mangin saksi batok sa ila (kay indi ini dapat pagkalimtan sang ila mga kaliwat), kay nahibaluan ko na ang ila huyog+ bisan wala ko pa sila madala sa duta nga ginpanumpa ko sa ila.”

22 Gani ginsulat ni Moises ini nga ambahanon sadto nga tion kag gintudlo niya ini sa mga Israelinhon.

23 Ginhimo man sang Dios si Josue+ nga anak ni Nun nga mangin lider nila kag nagsiling sia sa iya: “Magpakaisog ka kag magpakabakod,+ kay ikaw ang magadala sa mga Israelinhon sa duta nga ginpanumpa ko sa ila,+ kag padayon ako nga magaupod sa imo.”

24 Sang nasulat na ni Moises sa libro ang tanan nga pulong sini nga Kasuguan,+ 25 ginsugo ni Moises ang mga Levinhon, nga nagadala sang kaban sang katipan ni Jehova: 26 “Kuhaa ninyo ining libro sang Kasuguan+ kag ibutang ninyo ini sa tupad sang kaban+ sang katipan ni Jehova nga inyo Dios, kag mangin saksi ini sang Dios batok sa inyo. 27 Kay nahibaluan ko gid ang inyo pagkarebelyuso+ kag pagkabatinggilan.*+ Kon nagarebelde kamo kay Jehova bisan buhi pa ako kag kaupod ninyo, ano pa ayhan kon patay na ako! 28 Tipuna sa akon ang tanan nga gulang sang inyo mga tribo kag ang inyo mga manugdumala, kag ihambal ko sa ila ini nga mga pulong, kag mangin saksi ko ang langit kag ang duta batok sa ila.+ 29 Kay nahibaluan ko gid nga kon patay na ako, magahimo kamo sing malain+ kag magasipak kamo sa dalan nga ginsugo ko sa inyo. Mapahamak gid kamo+ sa ulihi, bangod magahimo kamo sing malain sa atubangan ni Jehova kag maakig sia bangod sang inyo himuon.”

30 Dayon ginhambal ni Moises ining bug-os nga ambahanon samtang nagapamati ang bug-os nga katilingban sang Israel:+

 3 Ibantala ko ang ngalan ni Jehova.+

Isugid ninyo ang pagkagamhanan sang aton Dios!+

 5 Sila ang naghimo sing malain.+

Indi niya sila mga anak, sila ang may sala.+

Tiko sila kag balingag nga kaliwatan!+

15 Sang nagtambok si Jesurun,* nagpanindak sia kag nagrebelde.

Nagtambok sia, nagtibsol sia kag naghabok.+

29 Kon maalam lamang sila kuntani!+ Hunahunaon nila ini.+

Binagbinagon nila ang ila madangatan.+

Pabuliga sila sa inyo.

Himua sila nga dalangpan ninyo.

Ako ang nagapatay, kag ako man ang nagahatag sing kabuhi.+

44 Gani ginhambal ni Moises kag ni Hosea*+ nga anak ni Nun ang tanan nga pulong sini nga ambahanon samtang nagapamati ang katawhan.+ 45 Sang nahambal na ni Moises ining tanan nga pulong sa bug-os nga Israel, 46 nagsiling sia sa ila: “Hupti ninyo sa inyo tagipusuon ang tanan nga pulong nga akon ginapaandam sa inyo subong,+ agod matudluan ninyo ang inyo mga anak nga tumanon gid nila ang tanan nga pulong sini nga Kasuguan.+ 47 Kay indi ini wala sing pulos nga pulong para sa inyo, kundi nagakahulugan ini sang inyo kabuhi,+ kag paagi sa sini nga pulong magakabuhi kamo sing malawig sa duta nga inyo panag-iyahan sa tabok sang Jordan.”

48 Naghambal si Jehova kay Moises sa sini man nga adlaw: 49 “Magtaklad ka sa sini nga bukid sang Abarim,+ sa Bukid Nebo,+ nga yara sa duta sang Moab, nga nagaatubang nayon sa Jerico, kag tan-awa ang duta sang Canaan, nga ginahatag ko sa mga Israelinhon agod panag-iyahan nila.+ 50 Mapatay ka sa bukid nga takladan mo, kag ilubong ka pareho sang imo mga katigulangan,* subong nga si Aaron nga imo utod napatay sa Bukid Hor+ kag ginlubong pareho sang iya mga katigulangan, 51 bangod nangin indi matutom kamo sa akon sa atubangan sang mga Israelinhon may kaangtanan sa tubig sa Meriba+ nga yara sa Kades sa kamingawan sang Zin, bangod wala ninyo ako ginpakabalaan sa atubangan sang katawhan sang Israel.+ 52 Makita mo sa malayo ang duta nga ginahatag ko sa katawhan sang Israel, apang indi ka makakadto didto.”+

33 Amo ini ang pagpakamaayo nga ginhambal ni Moises nga alagad sang matuod nga Dios sa mga Israelinhon antes sia mapatay.+ 2 Nagsiling sia:

 7 Ginhambal niya ini nga pagpakamaayo kay Juda:+

 8 Nagsiling sia tuhoy kay Levi:+

12 Nagsiling sia tuhoy kay Benjamin:+

13 Nagsiling sia tuhoy kay Jose:+

18 Nagsiling sia tuhoy kay Zebulon:+

19 Pakadtuon nila ang mga katawhan sa bukid.

Magahalad sila didto sing mga halad sang pagkamatarong.

20 Nagsiling sia tuhoy kay Gad:+

“Pakamaayuhon ang isa nga nagapalapad sang mga dulunan ni Gad.+

Magatipon ang mga pangulo sang katawhan.

22 Nagsiling sia tuhoy kay Dan:+

“Si Dan isa ka totoy nga leon.+

Magalumpat sia halin sa Basan.”+

23 Nagsiling sia tuhoy kay Neptali:+

Panag-iyahi ang duta sa katundan kag sa bagatnan.”

24 Nagsiling sia tuhoy kay Aser:+

“Pakamaayuhon si Aser sing mga anak.

29 Malipayon ka, O Israel!+

34 Halin sa desyerto nga kapatagan sang Moab nagtaklad si Moises sa Bukid Nebo,+ sa putukputukan sang Pisga,+ nga nagaatubang sa Jerico.+ Dayon ginpakita sa iya ni Jehova ang bug-os nga duta, halin sa Gilead tubtob sa Dan,+ 2 kag ang bug-os nga Neptali, kag ang duta sang Efraim kag Manases, kag ang bug-os nga duta sang Juda tubtob sa nakatundan nga dagat,*+ 3 kag ang Negeb+ kag ang Distrito+ sang Jordan, ang nalupyakan nga patag sang Jerico, ang siudad sang mga kahoy nga palma, tubtob sa Zoar.+

4 Dayon nagsiling si Jehova sa iya: “Amo ini ang duta nga ginpanumpa ko kay Abraham, kay Isaac, kag kay Jacob, kag nagsiling ako, ‘Ihatag ko ini sa imo kaliwat.’*+ Ginpakita ko ini sa imo, apang indi ka makatabok didto.”+

5 Pagkatapos sini, si Moises nga alagad ni Jehova napatay didto sa duta sang Moab suno sa ginsiling ni Jehova.+ 6 Ginlubong niya sia sa nalupyakan sa duta sang Moab sa atubang sang Bet-peor, kag wala sing nakahibalo sang iya lulubngan tubtob sini nga adlaw.+ 7 Nagaedad si Moises sing 120 ka tuig sang napatay sia.+ Wala magdulom ang iya mga mata, kag wala sia magluya. 8 Naghibi ang katawhan sang Israel tungod kay Moises sa desyerto nga kapatagan sang Moab. Natapos ang paglalaw para kay Moises sa sulod sang 30 ka adlaw.+

9 Si Josue nga anak ni Nun napuno sing kaalam,* kay gintungtong ni Moises ang iya kamot sa iya;+ kag nagpamati sa iya ang mga Israelinhon, kag ginhimo nila ang suno sa ginsugo ni Jehova kay Moises.+ 10 Apang wala na sing manalagna sa Israel nga pareho kay Moises,+ nga nakilala gid* ni Jehova.+ 11 Ginhimo niya ang tanan nga tanda kag mga milagro nga ginpahimo sa iya ni Jehova sa duta sang Egipto batok sa Paraon, kag sa tanan niya nga alagad kag sa bug-os niya nga kadutaan.+ 12 Nagpakita si Moises sing gamhanan nga kamot kag makahalawhaw nga gahom sa bug-os nga Israel.+