NEHEMIAS

1 Amo ini ang pulong ni Nehemias*+ nga anak ni Hacalias: Sang bulan sang Chislev,* sang ika-20 nga tuig, didto ako sa palasyo sang Susan.*+ 2 Sina nga tion, si Hanani,+ nga isa sa akon mga utod, nag-abot kaupod ang pila ka lalaki halin sa Juda. Ginpamangkot ko sila tuhoy sa Jerusalem kag tuhoy sa nagkalabilin nga mga Judiyo nga nagpauli halin sa pagkabihag.+ 3 Nagsabat sila: “Makaluluoy gid ang kahimtangan sang mga nagkalabilin halin sa pagkabihag kag ginapakahuy-an sila sa probinsia* sang Juda.+ Ang mga pader sang Jerusalem guba,+ kag ang mga gawang sini sunog.”+

4 Sang nabatian ko ini, nagpungko ako kag naghibi, kag pila ka adlaw ako nga naglalaw kag nagpuasa+ kag nagpangamuyo sa Dios sang kalangitan. 5 Nagsiling ako: “O Jehova nga Dios sang kalangitan, ang gamhanan kag makahalawhaw nga Dios, nga nagatuman sang iya katipan kag nagapakita sing mainunungon nga gugma sa mga nagahigugma kag nagatuman sang iya mga sugo,+ 6 talupangda kag pamatii palihug ang pangamuyo sang imo alagad, nga ginapangamuyo ko sa imo karon nga adlaw. Adlaw kag gab-i+ nagapangamuyo ako tuhoy sa mga Israelinhon nga imo mga alagad. Ginatu-ad ko ang mga sala sang katawhan sang Israel. Nakasala kami sa imo. Nakasala kami, ako kag ang panimalay sang akon amay.+ 7 Malaut gid ang ginhimo namon batok sa imo+ kay wala namon gintuman ang mga sugo, mga pagsulundan, kag mga kasuguan nga ginhatag mo paagi kay Moises nga imo alagad.+

8 “Dumduma palihug ang ginsugo* mo kay Moises nga imo alagad: ‘Kon indi kamo magmatutom, paalaplaagon ko kamo.+ 9 Apang kon magbalik kamo sa akon kag tumanon ang akon mga sugo kag himuon ini, bisan mag-alaplaag pa kamo sa pinakamalayo nga bahin sang langit, tipunon ko kamo+ halin didto kag dalhon kamo sa lugar nga ginpili ko nga ibutang ang akon ngalan.’+ 10 Sila imo mga alagad kag imo katawhan, nga gintubos mo paagi sa imo daku nga gahom kag kusog.+ 11 O Jehova, pamatii palihug ang pangamuyo sang imo alagad kag ang pangamuyo sang imo mga alagad nga nagahandum sa pagkahadlok sa imo ngalan, kag palihug hatagi karon sing kadalag-an ang imo alagad, kag kabay nga pakitaan niya ako sing kaluoy.”+

Sadto nga tion, manugtagay ako sang alak sang hari.+

2 Sang bulan sang Nisan,* sang ika-20 nga tuig+ sang paggahom ni Hari Artajerjes,+ luyag sang hari nga mag-inom sing alak kag subong sang ginahimo ko pirme, nagkuha ako sing alak kag ginhatag ini sa hari.+ Apang wala pa gid matabo nga nag-atubang ako sa iya nga masinulub-on. 2 Gani nagsiling ang hari sa akon: “Ngaa masinulub-on ka? Wala ka man nagamasakit. May nagatublag bala sa imo?” Bangod sini hinadlukan gid ako.

3 Nagsiling ako sa hari: “Mabuhi ang hari sa wala sing katubtuban! Masinulub-on ako kay ang siudad nga ginlubngan sa akon mga katigulangan guba kag ang mga gawang sini sunog.”+ 4 Ang hari namangkot sa akon: “Ano ang luyag mo himuon?” Gilayon nga nangamuyo ako sa Dios sang kalangitan.+ 5 Dayon nagsiling ako: “Kon buot sang hari kag kon nahamuot ka sa imo alagad, pakadtua ako sa Juda, sa siudad nga ginlubngan sa akon mga katigulangan agod matukod ko liwat ang mga pader sini.”+ 6 Samtang nagapungko sa tupad niya ang rayna, namangkot ang hari sa akon: “Daw ano ka kadugay didto kag san-o ka mabalik?” Sang ginsugid ko sa iya kon san-o ako mabalik,+ nagpasugot sia nga malakat ako.+

7 Nagsiling ako sa hari: “Kon buot sang hari, hatagan niya ako sing mga sulat para sa mga gobernador sa Tabok sang Suba,*+ agod tugutan nila ako nga mag-agi sa ila duta tubtob nga makalab-ot ako sa Juda, 8 kag sing sulat man para kay Asap nga manugbantay sang Parke sang Hari,* agod hatagan niya ako sing mga kahoy nga gamiton ko sa paghimo sang mga gawang sang Pamakod+ sang Balay,* kag sa pagtukod sang mga pader sang siudad+ kag sang balay nga akon istaran.” Gani ginhatagan ako sang hari sing mga sulat,+ kag suno gid ini sa kaayo nga ginpakita sang Dios sa akon.+

9 Ginpaupdan ako sang hari sa iya mga pangulo sang kasuldadusan kag mga manugkabayo. Sang nakalab-ot ako sa Tabok sang Suba, ginhatag ko sa mga gobernador ang mga sulat sang hari. 10 Sang nahibaluan ini ni Sanbalat+ nga Horonhon kag ni Tobias+ nga opisyal* sang mga Ammonhon,+ naakig sila nga may nag-abot nga tawo nga luyag magbulig sa katawhan sang Israel.

11 Sang ulihi nakalab-ot ako sa Jerusalem, kag nagpabilin ako didto sing tatlo ka adlaw. 12 Sang gab-i nagbangon ako kag ang pila ko ka kaupod, kag wala ako sing ginsugiran kon ano ang ginbutang sang Dios sa akon tagipusuon nga himuon para sa Jerusalem. Wala kami sing sapat nga dala magluwas sa asno nga akon ginasakyan. 13 Naggua ako sa Gawang sang Nalupyakan+ kag nag-agi sa atubangan sang Tuburan sang Daku nga Man-ug padulong sa Gawang sang mga Tumpok sang Abo,+ kag gin-usisa ko sing maayo ang guba nga mga pader sang Jerusalem kag ang sunog nga mga gawang sini.+ 14 Nag-agi ako sa Gawang sang Tuburan+ kag sa Punong sang Hari, apang indi makaagi didto ang asno nga akon ginasakyan. 15 Apang sina nga gab-i, nagtaklad ako sa nalupyakan*+ kag nagpadayon sa pag-usisa sa pader, pagkatapos nagbalik ako kag nag-agi liwat sa Gawang sang Nalupyakan.

16 Wala makahibalo ang mga tiglawas nga manuggahom+ kon diin ako naghalin kag kon ano ang akon ginahimo; kay wala ko pa ginsugiran ang mga Judiyo, saserdote, dungganon, tiglawas nga manuggahom, kag iban pa nga trabahador. 17 Sang ulihi ginsilingan ko sila: “Nakita ninyo ang aton makaluluoy nga kahimtangan, nga guba ang Jerusalem kag sunog ang mga gawang sini. Tukuron naton liwat ang mga pader sang Jerusalem agod indi na kita pagpakahuy-an.” 18 Dayon ginsugiran ko sila sang kaayo nga ginpakita sang Dios sa akon+ kag sang ginsiling man sang hari sa akon.+ Kag nagsiling sila: “Sige, tukuron naton ini liwat.” Gani naghanda sila sa pagtukod.+

19 Sang nahibaluan ini ni Sanbalat nga Horonhon, ni Tobias+ nga opisyal* sang mga Ammonhon,+ kag ni Gesem nga Arabianhon,+ ginyaguta nila kami+ kag ginpakita nga akig sila sa pagsiling: “Ano ang ginahimo ninyo? Magarebelde bala kamo sa hari?”+ 20 Apang, nagsabat ako: “Ang Dios sang kalangitan magahatag sa amon sing kadalag-an,+ kag kami nga iya mga alagad magatukod sang pader; apang wala kamo sing labot ukon kinamatarong ukon bahin sa maragtas sang Jerusalem.”+

3 Gintukod ni Eliasib+ nga mataas nga saserdote kag sang iya mga utod nga mga saserdote ang Gawang sang mga Karnero.+ Gintakdan nila ini sang mga puertahan kag ginpakabalaan*+ halin sa Torre sang Mea+ tubtob sa Torre sang Hananel.+ 2 Kag ang tupad ginkay-o sang mga lalaki sang Jerico;+ kag ang masunod nga bahin ginkay-o ni Zaccur nga anak ni Imri.

3 Gintukod sang mga anak ni Hasenaa ang Gawang sang Isda.+ Ginhambahan nila ini+ kag gintakdan sang mga puertahan, mga trangka, kag mga baral. 4 Ang pader sa tupad nila ginkay-o ni Meremot+ nga anak ni Urija nga anak ni Hakoz, kag ang masunod nga bahin ginkay-o ni Mesulam+ nga anak ni Berequias nga anak ni Mesezabel, kag ang masunod ginkay-o ni Zadok nga anak ni Baana. 5 Kag ang tupad nila ginkay-o sang mga taga-Tekoa,+ apang ang ila mga dungganon wala magpasakop* sa mga nagadumala.

6 Ginkay-o ni Joiada nga anak ni Pasea kag ni Mesulam nga anak ni Besodeias ang Gawang sang Daan nga Siudad.+ Ginhambahan nila ini kag gintakdan sang mga puertahan, mga trangka, kag mga baral. 7 Ang pader sa tupad nila ginkay-o ni Melatias nga Gibeonhon+ kag ni Jadon nga Meronotnon, mga lalaki halin sa Gibeon kag Mizpa,+ nga sakop* sang gobernador sang rehiyon sa Tabok sang Suba.*+ 8 Ang tupad nila ginkay-o ni Uzziel nga anak ni Harhaias, nga isa sa mga platero. Ang tupad niya ginkay-o ni Hananias, nga isa sa mga manughimo sang inugbanyos,* kag ginsalugan nila sang mga bato* ang mga dalan sa Jerusalem tubtob sa Malapad nga Pader.+ 9 Ang tupad nila ginkay-o sang anak ni Hur nga si Refaias, nga prinsipe sa katunga nga distrito sang Jerusalem. 10 Ang tupad nila ginkay-o ni Jedaias nga anak ni Harumaf. Yara ini sa atubangan sang iya balay. Kag ang tupad niya ginkay-o ni Hatus nga anak ni Hasabnias.

11 Ginkay-o ni Malquias nga anak ni Harim+ kag ni Hasub nga anak ni Pahat-moab+ ang isa ka bahin* sang pader, pati ang Torre sang mga Pugon.+ 12 Kag ang tupad nila ginkay-o sang anak ni Halohes nga si Sallum, nga prinsipe sa katunga nga distrito sang Jerusalem. Ginbuligan sia sang iya mga anak nga babayi.

13 Ginkay-o ni Hanun kag sang mga pumuluyo sang Zanoa+ ang Gawang sang Nalupyakan.+ Gintukod nila ini kag gintakdan sang mga puertahan, mga trangka, kag mga baral. Ginkay-o man nila ang bahin sang pader nga mga 1,000 ka maniko* ang kalabaon tubtob sa Gawang sang mga Tumpok sang Abo.+ 14 Kag ginkay-o sang anak ni Recab nga si Malquias, nga prinsipe sang distrito sang Bet-hakerim+ ang Gawang sang mga Tumpok sang Abo. Gintukod niya ini kag gintakdan sang mga puertahan, mga trangka, kag mga baral.

15 Ginkay-o sang anak ni Colhoze nga si Salun, nga prinsipe sang distrito sang Mizpa+ ang Gawang sang Tuburan.+ Gintukod niya ini kag gin-atupan kag gintakdan sang mga puertahan, mga trangka, kag mga baral. Ginkay-o man niya ang pader sang Punong sang Kanal+ padulong sa Hardin sang Hari+ kag tubtob sa Hagdanan+ nga nagapadulhog sa Siudad ni David.+

16 Ginkay-o sang anak ni Azbuk nga si Nehemias, nga prinsipe sang katunga sang distrito sang Bet-zur+ ang masunod nga bahin sang pader halin sa atubangan sang Mga Lulubngan ni David*+ tubtob sa ginpahimo nga punong+ kag tubtob sa Balay sang mga Gamhanan.

17 Ang tupad niya ginkay-o sang mga Levinhon nga gindumalahan ni Rehum nga anak ni Bani, kag ang masunod nga bahin ginkay-o ni Hasabias, nga prinsipe sang katunga sang distrito sang Keila,+ bilang tiglawas sang iya distrito. 18 Ang tupad niya ginkay-o sang ila mga utod nga gindumalahan sang anak ni Henadad nga si Bavai, nga prinsipe sang katunga sang distrito sang Keila.

19 Ginkay-o sang anak ni Jesua+ nga si Ezer, nga prinsipe sang Mizpa ang masunod nga bahin sa atubangan sang taklaran padulong sa Talaguan sang Hinganiban sa Pamakod sang Pader.+

20 May kapagsik nga ginkay-o ni Baruc nga anak ni Zabbai+ ang masunod nga bahin, halin sa Pamakod sang Pader tubtob sa puertahan sang balay ni Eliasib+ nga mataas nga saserdote.

21 Ginkay-o ni Meremot+ nga anak ni Urija nga anak ni Hakoz ang masunod nga bahin, halin sa puertahan sang balay ni Eliasib tubtob sa punta sang balay ni Eliasib.

22 Ang pader sa tupad niya ginkay-o sang mga saserdote nga halin sa distrito sang Jordan.*+ 23 Ang masunod nga bahin ginkay-o ni Benjamin kag ni Hasub. Yara ini sa atubangan sang ila balay. Ang masunod nga bahin ginkay-o ni Azarias nga anak ni Maaseias nga anak ni Ananias. Malapit ini sa iya balay. 24 Kag ginkay-o ni Binui nga anak ni Henadad ang masunod nga bahin, halin sa balay ni Azarias tubtob sa Pamakod sang Pader+ kag tubtob pa gid sa pamusod.

25 Ginkay-o ni Palal nga anak ni Uzai ang masunod nga bahin sa atubangan sang Pamakod sang Pader kag sang torre nga nagalabaw sa Balay* sang Hari,+ ang naibabaw nga torre nga yara sa Luwang sang Bantay.+ Ang tupad niya ginkay-o ni Pedaya nga anak ni Paros.+

26 Ginkay-o sang mga alagad+ sa templo* nga nagaistar sa Opel+ ang masunod nga bahin sang pader tubtob sa atubangan sang Gawang sang Tubig+ sa sidlangan kag sang nagalabaw nga torre.

27 Ginkay-o sang mga taga-Tekoa+ ang masunod nga bahin, halin sa atubangan sang daku nga nagalabaw nga torre tubtob sa pader sang Opel.

28 Ginkay-o sang mga saserdote ang pader sa ibabaw sang Gawang sang Kabayo,+ ang kada isa nagkay-o sang pader sa atubangan sang iya balay.

29 Ginkay-o ni Zadok+ nga anak ni Imer ang masunod nga bahin sang pader nga yara sa atubangan sang iya balay.

Kag ang tupad niya ginkay-o sang anak ni Secanias nga si Semaias, ang manugbantay sang Gawang sa Sidlangan.+

30 Ang masunod nga bahin ginkay-o ni Hananias nga anak ni Selemias kag ni Hanun nga ikan-om nga anak nga lalaki ni Zalaf.

Ang masunod nga bahin ginkay-o ni Mesulam+ nga anak ni Berequias. Yara ini sa atubangan sang iya balay.*

31 Ginkay-o ni Malquias, nga katapo sang grupo sang mga platero, ang masunod nga bahin sang pader tubtob sa balay sang mga alagad sa templo*+ kag sang mga negosyante, nga malapit sa Gawang sang Pag-usisa, kag ginkay-o man niya ang pader tubtob sa kuarto sa atop sang pamusod.

32 Kag ginkay-o sang mga platero kag mga negosyante ang pader sa tunga sang kuarto sa atop sang pamusod kag sang Gawang sang mga Karnero.+

4 Sang mabatian ni Sanbalat+ nga ginatukod namon liwat ang pader, naakig gid sia* kag gintamay niya ang mga Judiyo. 2 Nagsiling sia sa iya mga utod kag sa kasuldadusan sang Samaria: “Ano ang ginahimo sang mahuyang nga mga Judiyo? Nagahunahuna bala sila nga masarangan nila ining daku nga hilikuton sa pagtukod? Magahalad bala sila? Mahuman bala ini sa isa ka adlaw? Magamit pa bala nila ang nasunog nga mga bato halin sa tinumpok nga yab-ukon nga basura?”+

3 Si Tobias+ nga Ammonhon,+ nga yara sa tupad niya, nagsiling man: “Bisan ido nga talunon lang ang magtaklas sa pader nga ginatukod nila, marumpag na ini.”

4 Kag si Nehemias nagsiling: “O Dios namon, pamatii kami kay ginatamay kami,+ kag ibalik sa ila ang ila pagpakahuya sa amon,+ kag itugyan sila kaangay sang inagaw kag sang mga bihag sa iban nga pungsod. 5 Indi pagtabuni ang ila sayop kag indi pagpanasa ang ila sala sa atubangan mo,+ kay gin-insultuhan nila ang mga manunukod.”

6 Gani padayon namon nga ginkay-o ang pader kag nahuman namon ang katunga sang kataason sini sa palibot sang siudad, kag ang katawhan nagpangabudlay sing bug-os sa sini nga hilikuton.

7 Sang mabatian ni Sanbalat, ni Tobias,+ kag sang mga Arabianhon,+ mga Ammonhon, kag mga Asdodnon+ nga padayon nga ginakay-o ang pader sang Jerusalem kag natakpan na namon ang mga buho, naakig gid sila. 8 Gani, naghimbon sila tanan nga makig-away sa Jerusalem kag gamuhon kami. 9 Apang nangamuyo kami sa amon Dios kag nagbutang sing bantay sa adlaw kag gab-i agod amligan ang amon kaugalingon.

10 Apang ang mga taga-Juda nagsiling: “Nakapoy na ang mga manughakot,* kag madamo pa sing halakuton; indi na namon mahuman ang pader.”

11 Kag ang amon mga kaaway padayon nga nagasiling: “Makibot na lang sila sa aton pagsalakay, dayon pamatyon naton sila agod mapauntat ang ila hilikuton.”

12 Gani, sulitsulit* kami nga ginapaandaman sang mga Judiyo nga nagaistar malapit sa ila: “Salakayon kita sang mga kaaway halin sa aton palibot.”

13 Gani nagbutang ako sing mga bantay sa likod sang pader sa manubo kag madali sudlon nga mga bahin sini. Ginpabantayan ko ini sa tagsa ka pamilya kag may mga espada, bangkaw, kag pana sila. 14 Sang makita ko nga hinadlukan sila, nagtindog ako gilayon kag nagsiling sa mga dungganon+ kag sa tiglawas nga mga manuggahom kag sa iban pa nga katawhan: “Indi kamo mahadlok sa ila.+ Dumduma ninyo si Jehova nga gamhanan kag makahalawhaw;+ kag makig-away kamo para sa inyo mga utod, sa inyo mga kabataan, sa inyo mga asawa kag mga balay.”

15 Sang mabatian sang amon mga kaaway nga nahibaluan na namon ang ila plano kag nga ginguba ini sang matuod nga Dios, ginpadayon namon ang pagkay-o sang pader. 16 Sugod sina nga adlaw, ang katunga sang akon mga tinawo masako sa pagpangabudlay+ kag ang katunga sa ila may mga bangkaw, taming, pana kag panagang sa lawas. Kag ang mga prinsipe+ nagatindog sa likod sang mga Judiyo 17 samtang nagatukod sila sang pader. Ang mga manughakot nagapangabudlay samtang ang isa nila ka kamot nagauyat sing hinganiban.* 18 Ang tanan nga nagapangabudlay may ginataklus nga espada, kag ang manugpatunog sang budyong+ yara sa akon tupad.

19 Kag nagsiling ako sa mga dungganon kag sa tiglawas nga mga manuggahom, kag sa iban pa nga mga tawo: “Madamo kita sing hilimuon kag nagalapta kita sa palibot sang pader. Malayo kita sa isa kag isa. 20 Gani kon diin ninyo mabatian ang tunog sang budyong, magtipon kamo upod namon. Ang aton Dios magapakig-away para sa aton.”+

21 Gani nagpadayon kami sa amon hilikuton samtang ang katunga nagauyat sing mga bangkaw sugod sa pamanagbanag tubtob sa kagab-ihon. 22 Sadto nga tion, nagsiling man ako sa katawhan: “Ang tagsa ka tawo magpaligad sing gab-i kaupod sang iya alagad sa Jerusalem, kag mangin mga bantay naton sila sa gab-i kag mga trabahador sa adlaw.” 23 Gani ako, ang akon mga utod, ang akon mga alagad,+ kag ang mga bantay nga nagaupod sa akon, wala na mag-ilis sang bayo, kag ang kada isa may hinganiban sa tuo nga kamot.

5 Apang, ang mga lalaki kag ang ila mga asawa nagreklamo batok sa ila kauturan nga mga Judiyo.+ 2 May pila nga nagsiling: “Madamo kami lakip ang amon mga anak nga lalaki kag babayi. Dapat kami magkuha sang uyas agod may makaon kag mabuhi.” 3 Ang iban nagsiling: “Ginhatag namon subong garantiya ang amon mga uma kag ang amon mga ulubasan kag ang amon mga balay agod may uyas kami sa tion sang tiggulutom.” 4 Ang iban pa gid nagsiling: “Nanghulam kami sang kuarta sa amon mga uma kag sa amon mga ulubasan agod ibayad sa buhis sang hari.+ 5 Kami pareho man sang amon mga kauturan,* ang amon mga anak pareho man sang ila mga anak; apang kinahanglan namon ipaulipon ang amon mga anak nga lalaki kag babayi, kag ang iban namon nga anak nga babayi mga ulipon na.+ Wala kami sing mahimo bangod ang amon mga uma kag mga ulubasan ginapanag-iyahan na sang iban.”

6 Naakig gid ako sang mabatian ko ang ila ginsiling kag mga reklamo. 7 Ginhunahuna ko ini sing maayo kag nakita ko nga may sala ang mga dungganon kag ang mga tiglawas nga manuggahom, kag ginsilingan ko sila: “Ang kada isa sa inyo nagakuha sing saka* sa inyo mismo utod.”+

Gani, ginpatawag ko sila sa isa ka daku nga pagtilipon. 8 Kag nagsiling ako sa ila: “Sa amon masarangan, gintubos namon ang amon Judiyo nga mga kauturan nga ginbaligya sa mga pungsod, apang ibaligya bala ninyo ang inyo mga kauturan+ kag kinahanglan pa nga baklon namon sila liwat?” Gani naghipos sila, kag wala makasabat. 9 Kag nagsiling pa gid ako: “Indi maayo ang inyo ginahimo. Indi bala dapat kamo maglakat nga may kahadlok sa Dios+ agod indi kamo pagyagutaon sang aton mga kaaway halin sa iban nga pungsod? 10 Dugang pa, ako mismo, ang akon mga kauturan, kag ang akon mga alagad nagapahulam man sa ila sang kuarta kag uyas. Palihug untati ninyo ining pagpahulam nga may saka.+ 11 Karon mismo ibalik ninyo sa ila ang ila mga uma,+ mga ulubasan, mga talamnan sang olibo kag ang ila mga balay. Ibalik man ninyo sa ila ang ika-isa ka gatos* nga bahin sang kuarta, uyas, bag-o nga alak kag lana.”

12 Nagsabat sila: “Ibalik namon ini, kag indi na namon sila pagsukton. Himuon namon ang tanan mo nga ginsiling.” Gani ginpatawag ko ang mga saserdote kag ginpasumpa sila nga tumanon ang ila saad. 13 Ginwaswas ko man ang akon panapton* kag nagsiling: “Kabay nga pareho man sini ang himuon sang matuod nga Dios sa balay kag pagkabutang sang isa ka tawo kon indi niya pagtumanon ang iya ginsaad, wala gid sing mabilin sa iya.” Dayon ang bug-os nga katilingban nagsiling: “Amen!”* Kag gindayaw nila si Jehova, kag gintuman ang ila ginsaad.

14 Sa sulod sang 12 ka tuig nga gintangdo niya ako nga gobernador+ sa duta sang Juda, halin sang ika-20 nga tuig+ tubtob sa ika-32 nga tuig+ ni Hari Artajerjes,+ ako kag ang akon mga kauturan wala magkaon sing pagkaon nga gintigana para sa gobernador.+ 15 Apang ang mga gobernador nga nauna sa akon nagpabug-at sa mga tawo, kag ginkuhaan nila sila sang 40 ka siklo* nga pilak kada adlaw para sa ila tinapay kag alak. Isa pa, ang ila mga alagad nagpigos sa mga tawo. Apang wala ko ina ginhimo+ tungod sa kahadlok sa Dios.+

16 Dugang pa, ako kag ang tanan ko nga alagad nagbulig man sa pagkay-o sining pader, kag wala kami sing ginkuha nga uma.+ 17 Ginapakaon ko ang 150 ka Judiyo kag mga tiglawas nga manuggahom, kag ang mga nag-abot halin sa iban nga mga pungsod. 18 Adlaw-adlaw nagapaihaw ako sang isa ka toro nga baka, anom ka matambok nga karnero, kag mga pispis. Kag kada napulo ka adlaw bugana ako nga nagaaman sang lainlain nga sahi sang alak. Bisan pa sini, wala ako nagpangayo sing tinapay nga gintigana para sa gobernador, bangod nakita ko nga nabug-atan na ang mga tawo. 19 Gani nangamuyo ako: “O Dios ko, dumduma ako nga may kahamuot* tungod sa tanan nga ginhimo ko para sa sini nga katawhan.”+

6 Sang ginsugid kay Sanbalat, Tobias,+ Gesem nga Arabianhon,+ kag sa iban pa namon nga kaaway nga gintukod ko liwat ang pader+ kag natakpan na ang tanan nga buho sini (bisan pa nga wala ko pa matakod ang mga ganhaan sa mga gawang),+ 2 nagpadala gilayon si Sanbalat kag si Gesem sing mensahe sa akon, nga nagasiling: “Magkadto ka kag makigkita sa amon sa isa sa mga baryo sa Nalupyakan nga Patag sang Ono.”+ Apang pahito nila ini agod halitan ako. 3 Gani nagpadala ako sing mga mensahero sa pagsiling sa ila: “Daku nga trabaho ang ginahimo ko, kag indi ako makadulhog. Kay kon magdulhog ako, mauntat ang trabaho.” 4 Apat ka beses nga ginpadala nila sa akon ini nga mensahe, apang amo gihapon ang ginsiling ko sa ila.

5 Sang ulihi, sa ikalima nga tion, ginpadala ni Sanbalat sa iya alagad ini gihapon nga mensahe upod ang bukas na nga sulat, 6 nga nagasiling: “Si Gesem+ kag ang mga pungsod nagasiling nga ikaw kag ang mga Judiyo nagaplano nga magrebelde.+ Amo ina kon ngaa ginatukod mo ang pader; kag suno sa balita ikaw ang magahari sa ila. 7 Nagtangdo ka pa gani sang mga manalagna agod ipahayag sa bug-os nga Jerusalem ang tuhoy sa imo, nga nagasiling, ‘May hari na sa Juda!’ Kag pat-od gid nga mabalitaan ini sang hari. Gani magkadto ka kag hambalan naton ini.”

8 Apang ini ang ginpadala ko nga sabat sa iya: “Indi matuod ang imo ginasiling; ginhimuhimo mo lang ini sa imo hunahuna.”* 9 Kay ginapahog nila kami, kag nagasiling sila: “Magaluya sila kag magauntat sa pag-obra, kag indi na ini mahuman.”+ Apang karon nagapangamuyo ako, pabakura ang akon mga kamot.+

10 Dayon, ginkadtuan ko si Semaias nga anak ni Delaias nga anak ni Mehetabel samtang nagapabukot sia sa iya balay. Nagsiling sia: “Makitaay kita sa balay sang matuod nga Dios, sa sulod sang templo, kag sirhan naton ang mga ganhaan sang templo, kay sa gab-i magakari sila agod patyon ka.” 11 Apang nagsiling ako: “Puede bala ako makapalagyo sa templo? Makasulod bala ako didto kag indi mapatay?+ Indi ako magsulod didto!” 12 Kag nahangpan ko nga wala sia ginpadala sang Dios, kundi nagpanagna sia batok sa akon bangod ginsuhulan sia ni Tobias kag ni Sanbalat.+ 13 Ginsuhulan sia agod pahugon ako kag pahimuon sing sala para maguba nila ang akon ngalan kag mapakahuy-an ako.

14 O Dios ko, indi pagkalimti ang tanan nga ginhimo ni Tobias+ kag ni Sanbalat kag ang ginhimo man sang babayi nga manalagna nga si Noadias kag sang iban pa nga manalagna nga padayon nga nagapahog sa akon.

15 Gani nahuman ang pader sang ika-25 nga adlaw sang Elul,* sa sulod sang 52 ka adlaw.

16 Sang nabatian ini sang tanan namon nga kaaway kag sang nakita ini sang tanan nga pungsod sa palibot namon, nahuy-an gid sila,*+ kag nahibaluan nila nga nahimo ini bangod sa bulig sang amon Dios. 17 Sadto nga tion ang mga dungganon+ sang Juda nagapadala sing madamo nga sulat kay Tobias kag nakabaton man sila sing mga sulat halin sa iya. 18 Madamo nga taga-Juda ang nagsumpa nga magdampig sa iya, kay umagad sia ni Secanias nga anak ni Arah,+ kag ginpangasawa sang iya anak nga si Jehohanan ang anak nga babayi ni Mesulam+ nga anak ni Berequias. 19 Padayon nila nga ginasugid sa akon ang maayo nga mga butang tuhoy sa iya kag ginasugid man nila sa iya ang akon ginasiling. Kag ginapadalhan ako ni Tobias sing mga sulat agod pahugon ako.+

7 Sang nahuman na ang pader,+ gintakod ko gilayon ang mga ganhaan sini;+ dayon nagtangdo ako sang mga manugbantay sang gawang,+ mga manug-amba,+ kag mga Levinhon.+ 2 Kag ginhimo ko nga manugdumala sang Jerusalem si Hanani+ nga akon utod, upod kay Hananias nga prinsipe sang Pamakod+ sang templo. Kay si Hananias ang pinakamasaligan nga tawo kag mas mahinadlukon sa matuod nga Dios+ sangsa iban. 3 Gani nagsiling ako sa ila: “Ang mga gawang sang Jerusalem indi pagbuksan kon indi pa mataas ang adlaw, kag ang mga ganhaan dapat siraduhan kag trangkahan samtang yara pa ang mga manugbantay. Kag magbutang kamo sing mga manugbantay halin sa mga pumuluyo sang Jerusalem, ang iban magabantay sa lugar nga gintangdo sa ila kag ang iban sa atubangan sang ila mismo balay.” 4 Ang siudad malapad kag daku, apang diutay lang ang mga pumuluyo+ kag ang mga balay wala pa matukod liwat.

5 Apang ginbutang sang Dios sa akon tagipusuon nga tipunon ko ang mga dungganon kag ang mga tiglawas nga manuggahom kag ang katawhan agod listahon sila suno sa ila kaliwatan.+ Kag nakita ko ang libro sang listahan sang kaliwatan sang mga una nga nagbalik, kag amo ini ang nasulat:

6 Amo ini ang mga pumuluyo sang probinsia,* ang kaliwat sang mga gintapok+ ni Nabocodonosor+ nga hari sang Babilonia. Nagbalik sila sa ila kaugalingon nga siudad sa Jerusalem kag sa Juda,+ 7 ang mga nagbalik upod nanday Zorobabel,+ Jesua,+ Nehemias, Azarias, Raamias, Nahamani, Mardoqueo, Bilsan, Misperet, Bigvai, Nehum, kag Baana.

Kadamuon sang mga lalaki sang Israel:+ 8 mga anak ni Paros, 2,172; 9 mga anak ni Sepatias, 372; 10 mga anak ni Arah,+ 652; 11 mga anak ni Pahat-moab,+ halin sa mga anak ni Jesua kag ni Joab,+ 2,818; 12 mga anak ni Elam,+ 1,254; 13 mga anak ni Zattu, 845; 14 mga anak ni Zaccai, 760; 15 mga anak ni Binui, 648; 16 mga anak ni Bebai, 628; 17 mga anak ni Azgad, 2,322; 18 mga anak ni Adonikam, 667; 19 mga anak ni Bigvai, 2,067; 20 mga anak ni Adin, 655; 21 mga anak ni Ater, sa panimalay ni Ezequias, 98; 22 mga anak ni Hasum, 328; 23 mga anak ni Bezai, 324; 24 mga anak ni Harif, 112; 25 mga anak ni Gibeon,+ 95; 26 mga lalaki sang Betlehem kag sang Netofa, 188; 27 mga lalaki sang Anatot,+ 128; 28 mga lalaki sang Bet-azmavet, 42; 29 mga lalaki sang Kiryat-jearim,+ Kefira, kag Beerot,+ 743; 30 mga lalaki sang Rama kag Geba,+ 621; 31 mga lalaki sang Micmas,+ 122; 32 mga lalaki sang Betel+ kag Ai,+ 123; 33 mga lalaki sang isa pa ka Nebo, 52; 34 mga anak sang isa pa ka Elam, 1,254; 35 mga anak sang Harim, 320; 36 mga anak sang Jerico, 345; 37 mga anak sang Lod, Hadid, kag Ono,+ 721; 38 mga anak sang Senaa, 3,930.

39 Mga saserdote:+ mga anak ni Jedaias sang panimalay ni Jesua, 973; 40 mga anak ni Imer, 1,052; 41 mga anak ni Pasur,+ 1,247; 42 mga anak ni Harim,+ 1,017.

43 Mga Levinhon:+ mga anak ni Jesua, sang panimalay ni Kadmiel,+ halin sa mga anak ni Hodeva, 74. 44 Mga manug-amba:+ mga anak ni Asaf,+ 148. 45 Mga manugbantay sang gawang:+ mga anak ni Sallum, mga anak ni Ater, mga anak ni Talmon, mga anak ni Akub,+ mga anak ni Hatita, mga anak ni Sobai, 138.

46 Mga alagad sa templo:*+ mga anak ni Ziha, mga anak ni Hasufa, mga anak ni Tabaot, 47 mga anak ni Keros, mga anak ni Sia, mga anak ni Padon, 48 mga anak ni Lebana, mga anak ni Hagaba, mga anak ni Salmai, 49 mga anak ni Hanan, mga anak ni Gidel, mga anak ni Gahar, 50 mga anak ni Reaya, mga anak ni Rezin, mga anak ni Nekoda, 51 mga anak ni Gazam, mga anak ni Uza, mga anak ni Pasea, 52 mga anak ni Besai, mga anak ni Meunim, mga anak ni Nefusesim, 53 mga anak ni Bakbuk, mga anak ni Hakufa, mga anak ni Harhur, 54 mga anak ni Bazlit, mga anak ni Mehida, mga anak ni Harsa, 55 mga anak ni Barkos, mga anak ni Sisera, mga anak ni Tema, 56 mga anak ni Nezia, mga anak ni Hatifa.

57 Mga anak sang mga alagad ni Solomon:+ mga anak ni Sotai, mga anak ni Soferet, mga anak ni Perida, 58 mga anak ni Jaala, mga anak ni Darkon, mga anak ni Gidel, 59 mga anak ni Sepatias, mga anak ni Hatil, mga anak ni Poqueret-hazebaim, mga anak ni Amon. 60 Ang tanan nga alagad sa templo*+ kag ang mga anak sang mga alagad ni Solomon, 392.

61 Kag amo ini ang nagtaklad halin sa Tel-mela, Tel-harsa, Kerub, Adon, kag Imer, apang wala nila mapamatud-an kon bala ang ila panimalay* kag ang kaliwat sang ila katigulangan mga Israelinhon:+ 62 mga anak ni Delaias, mga anak ni Tobias, mga anak ni Nekoda, 642. 63 Mga saserdote: mga anak ni Habaias, mga anak ni Hakoz,+ mga anak ni Barzilai nga nagpangasawa sang isa sa mga anak ni Barzilai+ nga taga-Gilead kag gintawag sa ila ngalan. 64 Amo ini sila ang nagpangita sang ila mga ngalan sa listahan agod mapat-od ang ila kaliwatan, apang wala nila ini makita, gani indi sila kalipikado sa pagkasaserdote.*+ 65 Ginsilingan sila sang gobernador*+ nga indi sila magkaon sang labing balaan nga mga butang+ tubtob may saserdote na nga makapamangkot paagi sa Urim kag Tumim*+ kon bala mga saserdote gid sila.

66 Sa kabug-usan ang katilingban 42,360,+ 67 luwas sa ila 7,337 ka ulipon nga lalaki kag babayi;+ kag may yara sila 245 ka manug-amba nga lalaki kag babayi.+ 68 Ang ila kabayo 736, ang mula* 245, 69 ang kamelyo 435, kag ang asno 6,720.

70 Ang iban sa mga pangulo sang mga panimalay nag-amot para sa hilikuton.+ Ang gobernador* nag-amot sing 1,000 ka bulawan nga drakma,* 50 ka yahong, kag 530 ka malaba nga panapton para sa mga saserdote.+ 71 Kag ang pila ka pangulo sang mga panimalay nag-amot para sa hilikuton sing 20,000 ka bulawan nga drakma kag sing 2,200 ka pilak nga mina.* 72 Kag ang iban nga katawhan nag-amot sing 20,000 ka bulawan nga drakma kag 2,000 ka pilak nga mina kag 67 ka malaba nga panapton para sa saserdote.

73 Kag ang mga saserdote, ang mga Levinhon, ang mga manugbantay sang gawang, ang mga manug-amba,+ ang iban nga katawhan, ang mga alagad sa templo,* kag ang bug-os nga Israel nag-istar sa ila mga siudad.+ Sang ikapito nga bulan,+ ang mga Israelinhon nagaistar na sa ila mga siudad.+

8 Ang tanan nga katawhan nagtipon sa plasa nga yara sa atubangan sang Gawang sang Tubig,+ kag nagsiling sila kay Esdras+ nga manugkopya* nga dalhon ang libro sang Kasuguan ni Moises,+ nga ginhatag ni Jehova subong sugo sa Israel.+ 2 Gani sang nahauna nga adlaw sang ikapito nga bulan,+ gindala ni Esdras nga saserdote ang Kasuguan sa atubangan sang katilingban+ sang mga lalaki, mga babayi, kag sang mga kabataan nga sarang na makahangop. 3 Ginbasa niya ini+ sa ila sing mabaskog didto sa plasa nga yara sa atubangan sang Gawang sang Tubig halin sa pagbutlak sang adlaw tubtob sa udtong-adlaw; kag ginpamatian sing maayo+ sang tanan nga katawhan ang libro sang Kasuguan. 4 Si Esdras nga manugkopya* nagatindog sa kahoy nga entablado nga ginhimo nila para sa sini nga okasyon. Nagatindog man sa iya tuo sanday Matitias, Sema, Anaias, Urias, Hilkias, kag Maaseias; kag sa iya wala sanday Pedaya, Misael, Malquias,+ Hasum, Has-badana, Zacarias, kag Mesulam.

5 Bangod mataas ang ginatindugan ni Esdras, nakita sang tanan nga katawhan nga ginbuksan niya ang libro. Samtang ginabuksan niya ini, nagtindog ang tanan nga katawhan. 6 Dayon gindayaw ni Esdras si Jehova, ang matuod kag gamhanan nga Dios, kag ang tanan nga katawhan nagsabat, “Amen!* Amen!”+ kag ginbayaw nila ang ila mga kamot. Kag nagduko sila kag nagyaub kay Jehova nga ang ila nawong nagadapat sa duta. 7 Kag samtang nagatindog ang katawhan, ginpaathag nanday Jesua, Bani, Serebias,+ Jamin, Akub, Sabetai, Hodias, Maaseias, Kelita, Azarias, Jozabad,+ Hanan, kag Pelaya nga mga Levinhon ang Kasuguan sa ila.+ 8 Ginbasa nila sing mabaskog ang libro sang Kasuguan sang matuod nga Dios, nian ginpaathag kag ginhatagan ini sing kahulugan; ginbuligan nila ang katawhan nga mahangpan ang ginabasa.*+

9 Si Nehemias nga gobernador,* si Esdras+ nga saserdote kag manugkopya,* kag ang mga Levinhon nga nagatudlo sa tanan nga katawhan nagsiling: “Ini nga adlaw balaan kay Jehova nga inyo Dios.+ Indi kamo magpangasubo ukon maghibi.” Kay ang tanan nga katawhan nagahibi samtang nagapamati sa ginasiling sang Kasuguan. 10 Nagsiling si Nehemias sa ila: “Maglakat kamo kag magkaon sing manamit nga pagkaon* kag mag-inom sing matam-is nga ilimnon, kag hatagi ninyo sing pagkaon+ ang mga wala sing handa; kay ini nga adlaw balaan sa aton Ginuo, kag indi kamo magpangasubo, kay ang kalipay ni Jehova amo ang inyo pamakod.”* 11 Ang tanan nga katawhan ginpakalma sang mga Levinhon paagi sa pagsiling: “Maghipos kamo! kay ini nga adlaw balaan, kag indi kamo magpangasubo.” 12 Gani naglakat ang tanan nga katawhan kag nagkaon kag nag-inom kag naghatag sing pagkaon sa iban kag nagkinalipay,+ kay nahangpan nila ang mga pulong nga ginpaathag sa ila.+

13 Sang ikaduha nga adlaw, ang tanan nga pangulo sang mga panimalay, ang mga saserdote, kag ang mga Levinhon nagkadto kay Esdras nga manugkopya* agod mahangpan sing labi pa gid ang Kasuguan. 14 Kag nakita nila nga suno sa Kasuguan, si Jehova nagsugo paagi kay Moises nga ang mga Israelinhon dapat mag-istar sa mga payagpayag* sa tion sang kapiestahan sa ikapito nga bulan,+ 15 kag dapat nila ipahibalo+ sa tanan nila nga siudad kag sa bug-os nga Jerusalem: “Magkadto kamo sa kabukiran kag magkuha sang madabong nga mga sanga sang olibo, pino, mirto kag paklang sang palma, kag sanga sang madabong nga mga kahoy agod himuon nga payagpayag suno sa nasulat.”

16 Gani ang mga tawo naglakat kag nagpanguha sang mga sanga kag naghimo sang mga payagpayag sa atop sang ila balay, sa ila mga luwang, sa mga luwang sang balay sang matuod nga Dios,+ sa plasa sang Gawang sang Tubig,+ kag sa plasa sang Gawang sang Efraim.+ 17 Gani ang tanan nga katilingban nga nagbalik halin sa pagkabihag naghimo sang mga payagpayag kag nag-istar sa sini, kay ang mga Israelinhon wala pa gid makahimo sing subong sini halin sang panahon ni Josue+ nga anak ni Nun tubtob sa sini nga tion, amo nga may daku nga kinalipay.+ 18 Adlaw-adlaw nga ginabasa sing mabaskog ang libro sang Kasuguan sang matuod nga Dios,+ sugod sa nahauna nga adlaw tubtob sa katapusan nga adlaw. Ginhiwat nila ang kapiestahan sa sulod sang pito ka adlaw, kag sang ikawalo nga adlaw may balaan nga pagtilipon, subong sang ginapatuman.+

9 Sang ika-24 nga adlaw sini nga bulan nagtipon ang mga Israelinhon kag nagpuasa. Nagsuksok sila sang sako kag nagsabwag sang yab-ok sa ila ulo.+ 2 Nagpain ang mga Israelinhon sa tanan nga dumuluong.+ Nagtindog sila kag gintu-ad ang ila mga sala kag ang mga sayop sang ila mga amay.+ 3 Nagpabilin sila nga nagatindog kag ginbasa nila sing mabaskog ang libro sang Kasuguan+ ni Jehova nga ila Dios sa sulod sang tatlo ka oras;* kag sa sulod sang tatlo pa ka oras gintu-ad nila ang ila mga sala kag nagyaub kay Jehova nga ila Dios.

4 Sanday Jesua, Bani, Kadmiel, Sebanias, Buni, Serebias,+ Bani, kag Kenani nagtindog sa entablado+ sang mga Levinhon, kag nagpangamuyo sa mabaskog nga tingog kay Jehova nga ila Dios. 5 Kag ang mga Levinhon nga sanday Jesua, Kadmiel, Bani, Hasabnias, Serebias, Hodias, Sebanias, kag Petahias nagsiling: “Magtindog kamo kag dayawa ninyo si Jehova nga inyo Dios tubtob sa wala sing katubtuban.*+ O Dios, tuguti sila nga dayawon ang imo mahimayaon nga ngalan, nga takus sang tanan nga pagdayaw.

6 “Ikaw lamang amo si Jehova;+ gintuga mo ang langit, huo, ang langit sang mga langit kag ang tanan nga kasuldadusan sini, ang duta kag ang tanan nga yara sa sini, ang kadagatan kag ang tanan nga yara sa sini. Kag ginatipigan mo sila tanan nga buhi, kag ang kasuldadusan sang langit nagayaub sa imo. 7 Ikaw si Jehova ang matuod nga Dios, nga nagpili kay Abram+ kag nagdala sa iya pagua sa Ur+ sang mga Caldeanhon kag gintawag mo sia nga Abraham.+ 8 Nakita mo nga matutom sia sa imo,+ gani nagpakigkatipan ka sa iya nga ihatag mo sa iya ang duta sang mga Canaanhon, mga Hethanon, mga Amornon, mga Pereznon, mga Jebusnon, kag mga Girgasnon, agod ihatag ini sa iya kaliwatan.*+ Kag gintuman mo ang imo ginsaad, bangod matarong ka.

9 “Nakita mo ang pag-antos sang amon mga katigulangan sa Egipto,+ kag nabatian mo ang ila pagpangayo sing bulig sa Pula nga Dagat. 10 Gani naghimo ka sang mga tanda kag mga milagro batok sa Paraon kag sa tanan niya nga alagad kag sa tanan niya nga katawhan,+ kay nahibaluan mo nga ginpaantos+ nila ang amon mga katigulangan. Gindayaw ang imo ngalan tubtob subong.+ 11 Ginpahawa mo ang dagat sa atubangan nila, agod makatabok sila sa mamala nga duta sa tunga sang dagat,+ kag gintagbong mo sa kadadalman ang mga naglagas sa ila kaangay sang bato sa mabalod nga dagat.+ 12 Gintuytuyan mo sila kon adlaw paagi sa haligi nga panganod, kag kon gab-i paagi sa haligi nga kalayo, agod masanagan ang ila alagyan.+ 13 Nagpanaug ka sa Bukid Sinai+ kag naghambal ka sa ila halin sa langit+ kag ginhatag mo sa ila ang matarong nga mga sugo, mga kasuguan sang kamatuoran,* maayo nga mga pagsulundan kag mga mando.+ 14 Ginsugo mo sa ila nga pakabalaanon ang imo Adlaw nga Inugpahuway,+ kag ginhatagan mo sila sang mga mando, mga pagsulundan, kag sang kasuguan paagi kay Moises nga imo alagad. 15 Sang gingutom sila, ginhatagan mo sila sing tinapay halin sa langit+ kag sang gin-uhaw sila ginhatagan mo sila sing tubig halin sa igang,+ kag ginsilingan mo sila nga magsulod kag panag-iyahan ang duta nga ginsaad mo* nga ihatag sa ila.

16 “Apang ang amon mga katigulangan nangin matinaastaason+ kag nangin tingkuyan,*+ kag wala nila ginpamatian ang imo mga mando. 17 Indi nila luyag magpamati,+ kag ginkalimtan nila ang tumalagsahon nga mga buhat nga ginhimo mo sa ila kag nangin tingkuyan sila* kag nagtangdo sang pangulo agod magbalik sa pagkaulipon sa Egipto.+ Apang ikaw isa ka Dios nga handa gid magpatawad,* mainawaon,* maluluy-on, indi madali maakig kag bugana sa mainunungon nga gugma,*+ gani wala mo sila ginpabay-an.+ 18 Bisan sang naghimo sila sang metal nga estatwa* sang tinday nga baka kag nagsiling, ‘Amo ini ang imo Dios nga nagpagua sa imo sa Egipto,’+ kag tuman gid ang ila pagpasipala sa imo, 19 apang tungod sa imo daku nga kaluoy, wala mo sila ginpabay-an sa kamingawan.+ Ang haligi nga panganod padayon nga nagtuytoy sa ila kon adlaw, kag ang haligi nga kalayo padayon nga nagpasanag sang ila alagyan kon gab-i.+ 20 Ginhatag mo sa ila ang imo espiritu* agod mangin maalamon sila,+ kag ginhatagan mo sila sing manna agod may makaon sila,+ kag sing tubig agod may mainom sila.+ 21 Sa sulod sang 40 ka tuig ginhatagan mo sila sing kalan-on sa kamingawan.+ Wala sing nakulang sa ila. Ang ila panapton wala magdaan,+ kag wala magbanog ang ila mga tiil.

22 “Ginhatag mo sa ila ang mga ginharian kag ang mga katawhan, ginpartida sa ila ang mga duta,+ gani ginpanag-iyahan nila ang duta ni Sihon,+ ang duta sang hari sang Hesbon,+ subong man ang duta ni Og+ nga hari sang Basan. 23 Kag ginpadamo mo ang ila mga anak kaangay sang mga bituon sa kalangitan.+ Dayon gindala mo sila sa duta nga ginsaad mo sa ila mga katigulangan nga panag-iyahan nila.+ 24 Gani ginpanag-iyahan sang ila mga anak ang duta,+ kag ginlutos mo sa atubangan nila ang mga pumuluyo sang Canaan,+ kag gintugyan mo sa ila ang mga hari kag mga katawhan sini, agod himuon nila sa ila ang luyag nila. 25 Kag naagaw nila ang mga siudad nga may pamakod+ kag ang matambok* nga duta,+ kag ang mga balay nga puno sang tanan nga maayo nga mga butang, mga bubon, mga ulubasan, mga katamnan sang olibo,+ kag mga kahoy nga nagapamunga. Nagkaon sila kag nabusog kag nagtambok, kag nagkalipay tungod sa imo daku nga kaayo.

26 “Apang wala sila magtuman kundi nagrebelde sila+ kag ginsikway ang imo Kasuguan.* Ginpatay nila ang imo mga manalagna nga nagpaandam sa ila agod magbalik sila sa imo, kag ginpasipalahan ka pa gid nila.+ 27 Bangod sini gintugyan mo sila sa kamot sang ila mga kaaway,+ nga nagpaantos sa ila.+ Apang sang nagaantos na sila nagapangayo sila sing bulig sa imo, kag ginapamatian mo sila halin sa kalangitan; kag tungod sa imo daku nga kaluoy, nagapadala ka sang mga magaluwas sa ila sa kamot sang ila mga kaaway.+

28 “Apang kon maayo na gani ang ila kahimtangan, nagahimo sila liwat sing malain sa imo atubangan,+ gani ginatugyan mo sila sa kamot sang ila kaaway, nga magasakop sa ila.*+ Dayon nagabalik sila sa imo kag nagapangayo sing bulig,+ kag ginapamatian mo sila halin sa kalangitan kag tungod sa imo daku nga kaluoy ginaluwas mo sila pirme.+ 29 Bisan ginapaandaman mo sila agod tumanon ang imo Kasuguan, nangin matinaastaason pa sila kag wala magtuman sa imo mga mando;+ kag nagpakasala sila batok sa imo mga pagsulundan, nga kon tumanon lamang nila mabuhi sila.+ Apang nagpabungolbungol sila, nangin tingkuyan, kag wala magpamati. 30 Ginbatas mo sila+ sa sulod sang madamo nga tuig kag padayon mo sila nga ginapaandaman paagi sa imo mga manalagna nga ginhatagan mo sang imo espiritu, apang wala sila magpamati. Sang ulihi, gintugyan mo sila sa kamot sang mga katawhan sa ila palibot.+ 31 Kag tungod sa imo daku nga kaluoy, wala mo sila ginpapas+ ukon ginpabay-an, kay ikaw mainawaon* kag maluluy-on nga Dios.+

32 “Kag karon, O amon Dios, ang Dios nga daku, gamhanan, kag makahalawhaw, nga nagtuman sang iya katipan kag nagpakita sing mainunungon nga gugma,+ talupangda ang tanan nga kabudlayan nga naagihan namon, sang amon mga hari, mga prinsipe,+ mga saserdote,+ mga manalagna,+ mga katigulangan, kag sang tanan mo nga katawhan halin sang mga adlaw sang mga hari sang Asiria+ tubtob subong. 33 Indi ka namon mabasol bangod sa tanan nga naagihan namon, kay matutom ka gid sa amon; apang kami naghimo sang kalautan.+ 34 Ang amon mga hari, mga prinsipe, mga saserdote, kag mga katigulangan, wala magtuman sang imo Kasuguan, ukon magsunod sang imo mga mando ukon sang imo mga pahanumdom* nga paagi sini ginpaandaman mo sila. 35 Sang naggahom sila sa ila ginharian kag nagpanginpulos sa bugana kag maayo nga mga butang nga gin-aman mo sa ila sa malapad kag matambok* nga duta nga ginhatag mo sa ila, wala sila mag-alagad sa imo+ kag wala nila gintalikdan ang ila malain nga ginahimo. 36 Gani mga ulipon+ kami karon, mga ulipon kami sa duta nga ginhatag mo sa amon mga katigulangan agod makapanginpulos sila sa bunga kag sa maayo nga mga butang sini. 37 Ang bugana nga patubas sini nagkadto sa dumuluong nga mga hari nga ginpadumala mo sa amon bangod sang amon mga sala.+ Naggahom sila sa amon kag sa amon kasapatan suno sa ila luyag, kag nag-antos gid kami sing tuman.

38 “Gani tungod sini tanan, nagahimo kami sang masaligan nga kasugtanan,+ nga nasulat kag gintimbrehan sang selyo sang amon mga prinsipe, mga Levinhon, kag mga saserdote.”+

10 Ang mga nagpamatuod paagi sa pagtimbre sang ila selyo sa sini+ amo sanday:

Nehemias nga gobernador* nga anak ni Hacalias,

Kag Sedequias, 2 Seraya, Azarias, Jeremias, 3 Pasur, Amarias, Malquias, 4 Hatus, Sebanias, Malluc, 5 Harim,+ Meremot, Obadias, 6 Daniel,+ Gineton, Baruc, 7 Mesulam, Abias, Mijamin, 8 Maazias, Bilgai, kag Semaias; sila ang mga saserdote.

9 Subong man ang mga Levinhon: Jesua nga anak ni Azanias, Binui nga halin sa mga anak ni Henadad, Kadmiel,+ 10 kag ang ila mga utod nga sanday Sebanias, Hodias, Kelita, Pelaya, Hanan, 11 Mica, Rehob, Hasabias, 12 Zaccur, Serebias,+ Sebanias, 13 Hodias, Bani, kag Beninu.

14 Ang mga pangulo sang katawhan: Paros, Pahat-moab,+ Elam, Zatu, Bani, 15 Buni, Azgad, Bebai, 16 Adonias, Bigvai, Adin, 17 Ater, Ezequias, Azur, 18 Hodias, Hasum, Bezai, 19 Harif, Anatot, Nebai, 20 Magpias, Mesulam, Hezir, 21 Mesezabel, Zadok, Jadua, 22 Pelatias, Hanan, Anaias, 23 Hosea, Hananias, Hasub, 24 Halohes, Pilha, Sobec, 25 Rehum, Hasabna, Maaseias, 26 Ahias, Hanan, Anan, 27 Malluc, Harim, kag Baana.

28 Ang iban pa nga katawhan—ang mga saserdote, mga Levinhon, mga manugbantay sang gawang, mga manug-amba, mga alagad sa templo,* kag ang tanan nga nagpain sa mga taga-iban nga pungsod sa pagtuman sang Kasuguan sang matuod nga Dios,+ lakip ang ila mga asawa, kag ang tanan nga may ihibalo kag paghangop*— 29 nag-ugyon sa ila mga utod, kag sa mga dungganon. Nagsaad sila sa idalom sang silot nga pagpakamalaut nga tumanon nila ang Kasuguan sang matuod nga Dios, nga ginhatag paagi kay Moises nga alagad sang matuod nga Dios, kag sundon nila kag himuon ang tanan nga sugo, kasuguan, kag pagsulundan ni Jehova nga amon Ginuo. 30 Indi namon pagtugutan ang amon mga anak nga magpamana ukon magpangasawa sang mga taga-iban nga pungsod.+

31 Indi kami magbakal sang bisan ano nga kalan-on ukon butang nga ginabaligya sang mga taga-iban nga pungsod sa Adlaw nga Inugpahuway+ ukon sa balaan nga adlaw.+ Sa ikapito nga tuig+ indi namon pagtamnan ang amon duta kag patawaron namon ang tanan nga may utang sa amon.+

32 Nagsaad man kami nga ang tagsa sa amon magahatag kada tuig sing ikatlo nga bahin sang isa ka siklo* para sa mga buluhaton sa balay* sang amon Dios,+ 33 para sa gintangkas nga tinapay,*+ sa dulot nga uyas adlaw-adlaw,+ sa dulot nga sinunog sa mga Adlaw nga Inugpahuway+ kag sa mga lati,+ kag sa iban pa nga kapiestahan,+ kag para sa balaan nga mga butang kag para sa mga dulot tungod sa sala+ sa paghimo sing pagtumbas sa sala sang Israel, kag para sa iban pa nga kinahanglanon sa balay sang amon Dios.

34 Nagpagabutgabot man kami agod mahibaluan kon sin-o sa mga saserdote, mga Levinhon, kag katawhan ang magadala sang kahoy nga inuggatong sa balay sang amon Dios paagi sa tagsa ka ulo sang panimalay, sa gintalana nga tion kada tuig agod gamiton nga gatong sa halaran ni Jehova nga amon Dios, suno sa nasulat sa Kasuguan.+ 35 Nagsaad man kami nga dalhon namon ang nahauna nga bunga sang amon uma kag ang nahauna nga bunga sang tanan namon nga tanom kada tuig sa balay ni Jehova,+ 36 kag dalhon namon ang panganay sang amon mga anak kag mga kasapatan+—suno sa nasulat sa Kasuguan—ang panganay sang mga baka kag mga karnero. Dalhon namon ini sa balay sang amon Dios, sa mga saserdote nga nagaalagad didto.+ 37 Dalhon namon ang amon nahauna nga bahol nga harina,+ ang amon mga amot, ang bunga sang tanan namon nga tanom,+ ang bag-o nga alak, kag ang lana+ sa mga saserdote sa mga bodega* sa balay sang amon Dios.+ Dalhon man namon ang ikanapulo nga bahin* sang patubas sang amon uma sa mga Levinhon,+ kay sila ang nagabaton sang ikanapulo nga bahin sang patubas sang tanan nga siudad nga may uma.

38 Kag dapat yara ang isa ka saserdote, nga anak ni Aaron, kon batunon sang mga Levinhon ang ikanapulo nga bahin; kag dapat ihalad sang mga Levinhon ang ikanapulo sang ikanapulo nga bahin sa balay sang amon Dios,+ sa mga hulot* nga yara sa bodega. 39 Dapat dalhon sang mga Israelinhon kag sang mga anak sang mga Levinhon ang amot+ nga uyas, bag-o nga alak, kag lana+ sa mga bodega.* Diri ginatago ang kagamitan sang santuaryo kag diri man nagatener ang nagaalagad nga mga saserdote, mga manugbantay sang gawang, kag ang mga manug-amba. Namat-od kami nga indi namon pagpatumbayaan ang balay sang amon Dios.+

11 Sadto nga tion ang mga prinsipe sang katawhan nagaistar sa Jerusalem;+ apang nagpagabutgabot+ ang iban nga katawhan agod sa kada napulo ka pamilya may isa ka pamilya nga magaistar sa Jerusalem, ang balaan nga siudad, samtang ang nabilin nga siam ka pamilya magaistar sa iban nga mga siudad. 2 Kag ginpakamaayo sang katawhan ang tanan nga nagboluntaryo sa pag-istar sa Jerusalem.

3 Amo ini ang mga pangulo sang probinsia* sang Juda nga nag-istar sa Jerusalem. (Ang iban sa mga Israelinhon, ang mga saserdote, mga Levinhon, mga alagad sa templo,*+ kag ang mga anak sang mga ulipon ni Solomon+ nag-istar sa siudad sang Juda. Ang kada isa nag-istar sa ila ginpanubli nga duta sa ila mga siudad.+

4 Nag-istar man sa Jerusalem ang pila nga halin sa katawhan sang Juda kag sang Benjamin.) Halin sa katawhan sang Juda amo si Ataias nga anak ni Uzias nga anak ni Zacarias nga anak ni Amarias nga anak ni Sepatias nga anak ni Mahalalel halin sa pamilya ni Perez,+ 5 kag si Maaseias nga anak ni Baruc nga anak ni Colhoze nga anak ni Hazaias nga anak ni Adaya nga anak ni Joiarib nga anak ni Zacarias halin sa pamilya sang mga Selanhon. 6 Ang tanan nga anak ni Perez nga nagpuyo sa Jerusalem 468 ka lalaki.

7 Kag amo ini ang halin sa katawhan sang Benjamin: si Sallu+ nga anak ni Mesulam nga anak ni Joed nga anak ni Pedaya nga anak ni Kolaias nga anak ni Maaseias nga anak ni Itiel nga anak ni Jesaias, 8 kag sunod sa iya si Gabai kag Sallai, 928 ka lalaki; 9 kag si Joel nga anak ni Zikri amo ang ila manugdumala, kag si Juda nga anak ni Hasenua amo ang ikaduha nga manugdumala sang siudad.

10 Ang mga saserdote: si Jedaias nga anak ni Joiarib, si Jaquin,+ 11 si Seraya nga anak ni Hilkias nga anak ni Mesulam nga anak ni Zadok nga anak ni Meraiot nga anak ni Ahitub+ nga nagadumala sa balay* sang matuod nga Dios, 12 kag ang ila mga utod nga nagahimo sang mga buluhaton sa balay, 822; kag si Adaya nga anak ni Jeroham nga anak ni Pelalias nga anak ni Amzi nga anak ni Zacarias nga anak ni Pasur+ nga anak ni Malquias, 13 kag ang iya mga utod, mga pangulo sang mga panimalay; 242, kag si Amashai nga anak ni Azarel nga anak ni Azai nga anak ni Mesillemot nga anak ni Imer, 14 kag ang ila mga utod, mga makusog kag isganan nga mga lalaki, 128; kag si Zabdiel nga halin sa kilala nga pamilya amo ang ila pangulo.

15 Ang mga Levinhon: si Semaias+ nga anak ni Hasub nga anak ni Azrikam nga anak ni Hasabias nga anak ni Buni, 16 kag si Sabetai+ kag si Jozabad,+ nga manugdumala sang mga Levinhon, sa mga buluhaton sa gua sang balay sang matuod nga Dios; 17 kag si Matanias+ nga anak ni Miqueas nga anak ni Zabdi nga anak ni Asaf+ nga nagapanguna sa pag-amba sing pagdayaw kag sa pagpangamuyo,+ kag si Bakbukias nga amo ang ikaduha nga pangulo sa iya mga utod, kag si Abda nga anak ni Samua nga anak ni Galal nga anak ni Jedutun.+ 18 Ang tanan nga Levinhon sa balaan nga siudad 284.

19 Kag ang mga manugbantay sang gawang amo sanday Akub, Talmon,+ kag ang ila mga utod nga nagabantay sa mga gawang, 172.

20 Ang iban nga Israelinhon, ang mga saserdote, kag ang mga Levinhon nag-istar sa iban nga mga siudad sang Juda. Ang kada isa nag-istar sa iya ginpanubli nga duta.* 21 Ang mga alagad sa templo*+ nagaistar sa Ofel,+ kag sanday Ziha kag Gispa amo ang nagadumala sa ila.

22 Ang nagdumala sa mga Levinhon sa Jerusalem amo si Uzzi nga anak ni Bani nga anak ni Hasabias nga anak ni Matanias+ nga anak ni Mica nga halin sa pamilya ni Asaf nga mga manug-amba. Si Uzzi man ang nagdumala sang buluhaton sa balay sang matuod nga Dios. 23 Kay may sugo ang hari tuhoy sa ila,+ kag may pat-od nga kahimusan para sa kinahanglanon sang mga manug-amba kada adlaw. 24 Kag si Petahias nga anak ni Mesezabel sang pamilya ni Zera nga anak ni Juda amo ang manuglaygay sang hari* sa tanan nga butang may kahilabtanan sa katawhan.

25 Ang iban nga katawhan sang Juda nag-istar sa mga lugar nga malapit sa ila mga uma. Nag-istar sila sa Kiryat-arba+ kag sa sakop* nga mga banwa sini, sa Dibon kag sa mga banwa sini, kag sa Jekabzeel+ kag sa mga baryo sini, 26 sa Jesua, Molada,+ Bet-pelet,+ 27 Hazar-sual,+ Beer-seba kag sa sakop* nga mga banwa sini, 28 sa Ziklag,+ Mekona kag sa sakop* nga mga banwa sini, 29 sa En-rimon,+ Zora,+ kag Jarmut, 30 sa Zanoa,+ Adulam kag sa mga baryo sini, sa Laquis+ kag sa mga uma sini, sa Azeka+ kag sa sakop* nga mga banwa sini. Nag-istar* sila sa Beer-seba tubtob sa Nalupyakan sang Hinom.+

31 Ang katawhan sang Benjamin nag-istar sa Geba,+ Micmash, Aija, Betel+ kag sa sakop* nga mga banwa sini, 32 sa Anatot,+ Nob,+ Ananias, 33 Hazor, Rama,+ Gitaim, 34 Hadid, Zeboim, Neballat, 35 Lod, kag Ono,+ ang nalupyakan sang sampaton nga mga manugpangabudlay. 36 Kag ang iban nga mga Levinhon nga taga-Juda anay nag-istar sa Benjamin.

12 Amo ini ang mga saserdote kag mga Levinhon nga nagtaklad kaupod ni Zorobabel+ nga anak ni Sealtiel,+ kag Jesua:+ sanday Seraya, Jeremias, Esdras, 2 Amarias, Malluc, Hatus, 3 Secanias, Rehum, Meremot, 4 Iddo, Ginetoi, Abias, 5 Mijamin, Maadias, Bilga, 6 Semaias, Joiarib, Jedaias, 7 Sallu, Amok, Hilkias, kag Jedaias. Sila ang mga pangulo sang mga saserdote kag sang ila mga utod sang panahon ni Jesua.

8 Ang mga Levinhon amo sanday Jesua, Binui, Kadmiel,+ Serebias, Juda, kag Matanias.+ Si Matanias kag ang iya mga utod ang nagdumala sa pag-amba sang pagpasalamat sa Dios. 9 Kag si Bakbukias kag si Unni nga ila mga utod yara sa atubangan nila nga nagabantay.* 10 Si Jesua amay ni Joiakim, kag si Joiakim amay ni Eliasib,+ kag si Eliasib amay ni Joiada.+ 11 Kag si Joiada amay ni Jonatan, kag si Jonatan amay ni Jadua.

12 Sang panahon ni Joiakim, amo ini ang mga saserdote nga mga pangulo sang mga panimalay: sa panimalay ni Seraya,+ si Meraya; sa panimalay ni Jeremias, si Hananias; 13 sa panimalay ni Esdras,+ si Mesulam; sa panimalay ni Amarias, si Jehohanan; 14 sa panimalay ni Maluki, si Jonatan; sa panimalay ni Sebanias, si Jose; 15 sa panimalay ni Harim,+ si Adna; sa panimalay ni Meraiot, si Helkai; 16 sa panimalay ni Iddo, si Zacarias; sa panimalay ni Gineton, si Mesulam; 17 sa panimalay ni Abias,+ si Zicri; sa panimalay ni Miniamin, . . . ;* sa panimalay ni Moadias, si Piltai; 18 sa panimalay ni Bilga,+ si Samua; sa panimalay ni Semaias, si Jehonatan; 19 sa panimalay ni Joiarib, si Matenai; sa panimalay ni Jedaias,+ si Uzzi; 20 sa panimalay ni Sallai, si Kalai; sa panimalay ni Amok, si Eber; 21 sa panimalay ni Hilkias, si Hasabias; sa panimalay ni Jedaias, si Netanel.

22 Sang panahon nanday Eliasib, Joiada, Johanan, kag Jadua,+ ginlista ang mga pangulo sang mga panimalay sang mga Levinhon, subong man ang mga saserdote, tubtob sang paghari ni Dario nga Persianhon.

23 Tubtob sang panahon ni Johanan nga anak ni Eliasib, ginlista sa libro sang maragtas ang mga Levinhon nga mga pangulo sang mga panimalay. 24 Ang mga pangulo sang mga Levinhon amo sanday Hasabias, Serebias, kag Jesua+ nga anak ni Kadmiel,+ kag ang ila mga utod yara sa atubangan nila sa pagdumala sang pagdayaw kag pagpasalamat sa Dios suno sa sugo ni David+ nga tawo sang matuod nga Dios. Ang isa ka grupo sang mga bantay yara sa tupad sang isa pa ka grupo sang mga bantay. 25 Sanday Matanias,+ Bakbukias, Obadias, Mesulam, Talmon, kag Akub+ amo ang manugbantay sang gawang,+ nga nagabantay sang mga talaguan sa mga gawang. 26 Nag-alagad sila sang panahon ni Joiakim nga anak ni Jesua+ nga anak ni Jozadak kag sang panahon ni Gobernador Nehemias kag ni Esdras+ nga saserdote kag manugkopya.*

27 Sang malapit na ang inagurasyon sang mga pader sang Jerusalem, ginpatawag nila ang mga Levinhon halin sa tanan nga lugar kag ginpakadto sa Jerusalem para sa pagsaulog sang inagurasyon nga may pagkinalipay, ambahanon sang pagpasalamat,+ kag mga simbal, de-kuerdas nga mga instrumento, kag mga arpa. 28 Kag nagtipon ang mga anak sang mga manug-amba* halin sa malapit nga distrito,* sa palibot sang Jerusalem, sa mga baryo sang mga Netofanhon,+ 29 sa Bet-gilgal,+ kag sa mga uma sang Geba+ kag Azmavet,+ kay may mga manug-amba nga yara sa mga baryo sa palibot sang Jerusalem. 30 Kag gintinluan sang mga saserdote kag sang mga Levinhon ang ila kaugalingon, kag gintinluan man nila ang katawhan,+ ang mga gawang,+ kag ang pader.+

31 Pagkatapos gindala ko ang mga prinsipe sang Juda sa ibabaw sang pader. Dayon nagtangdo ako sang duha ka daku nga grupo sang manug-amba sang pagpasalamat sa Dios kag sang mga grupo sang katawhan nga magasunod sa ila. Ang isa ka grupo naglakat patuo sa ibabaw sang pader pakadto sa Gawang sang mga Tumpok sang Abo.+ 32 Nagsunod sa ila si Hosaias kag ang katunga sang mga prinsipe sang Juda, 33 kaupod sanday Azarias, Esdras, Mesulam, 34 Juda, Benjamin, Semaias, kag Jeremias. 35 Upod man nila ang pila sa mga anak sang mga saserdote nga may mga trumpeta:+ si Zacarias nga anak ni Jonatan nga anak ni Semaias nga anak ni Matanias nga anak ni Micaya nga anak ni Zaccur nga anak ni Asap,+ 36 kag ang iya mga utod nga sanday Semaias, Azarel, Milalai, Gilalai, Maai, Netanel, Juda, kag Hanani, nga may mga instrumento sa musika ni David+ nga tawo sang matuod nga Dios; kag nagauna sa ila si Esdras+ nga manugkopya.* 37 Nag-agi sila sa Gawang sang Tuburan+ kag nalabayan nila ang Hagdanan+ sang Siudad ni David+ sa alagyan sa pader nga mas mataas sangsa Balay ni David kag nagdiretso sila tubtob sa Gawang sang Tubig+ sa sidlangan.

38 Ang isa pa ka grupo sang manug-amba sang pagpasalamat sa Dios naglakat sa pihak nga direksion,* kag nagsunod ako sa ila kag ang katunga sang katawhan. Nagsaka kami sa pader sa Torre sang Pugon+ kag nag-agi sa Malapad nga Pader+ 39 kag nagtaklad kami sa Gawang sang Efraim+ pakadto sa Gawang sang Daan nga Siudad+ tubtob sa Gawang sang Isda+ kag sa Torre sang Hananel,+ sa Torre sang Mea, kag sa Gawang sang mga Karnero;+ kag nagdulog kami sa Gawang sang Bantay.

40 Sang ulihi, ang duha ka grupo sang manug-amba sang pagpasalamat sa Dios, nagtindog sa atubangan sang balay sang matuod nga Dios, lakip ako kag ang katunga sang mga tiglawas nga manuggahom nga kaupod ko, 41 kag ang mga saserdote nga sanday Eliakim, Maaseias, Miniamin, Micaya, Elioenai, Zacarias, kag Hananias nga may mga trumpeta, 42 kag sanday Maaseias, Semaias, Eleazar, Uzzi, Jehohanan, Malquias, Elam, kag Ezer. Kag nagpadayon sa pag-amba ang mga manug-amba kaupod ang manugdumala nga si Izrahias.

43 Sina nga adlaw madamo sila sang ginhalad kag nagkalipay sila,+ bangod ginpahalipay gid sila sang matuod nga Dios. Nagkalipay man ang mga babayi kag ang mga kabataan,+ gani mabatian sa malayo ang pagkinalipay sa Jerusalem.+

44 Nagtangdo man kami sang mga tawo nga magdumala sang mga bodega+ nga ginataguan sang mga amot,+ nahauna nga mga bunga,+ kag mga ikanapulo nga bahin.*+ Tipunon nila halin sa mga uma sang mga siudad ang para sa mga saserdote kag mga Levinhon+ suno sa ginapatuman sang Kasuguan,+ kay may kinalipay sa Juda bangod sa pag-alagad sang mga saserdote kag sang mga Levinhon. 45 Kag gintuman nila ang ila katungdanan sa Dios kag ang katungdanan nga putlion ang ila kaugalingon, amo man ang mga manug-amba kag ang mga manugbantay sang gawang, suno sa sugo ni David kag ni Solomon nga iya anak. 46 Kay sang panahon ni David kag ni Asap may mga pangulo* para sa mga manug-amba kag para sa mga ambahanon sang pagdayaw kag pagpasalamat sa Dios.+ 47 Kag sang panahon ni Zorobabel+ kag ni Nehemias, ginhatag sang bug-os nga Israel ang kinahanglanon adlaw-adlaw sang mga manug-amba+ kag sang mga manugbantay sang gawang.+ Ginpain man nila ang bahin nga para sa mga Levinhon,+ kag ang mga Levinhon nagpain man sang pila ka bahin sini para sa mga anak ni Aaron.

13 Sadto nga adlaw ginbasa ang libro ni Moises sa atubangan sang mga tawo,+ kag nakita nila nga nasulat sa sini nga ang mga Ammonhon kag mga Moabnon+ ginadumilian sa pagpakigsimpon sa katilingban sang matuod nga Dios,+ 2 kay wala nila ginhatagan sing tinapay kag tubig ang mga Israelinhon, sa baylo ginsuhulan nila si Balaam agod pakamalauton ang mga Israelinhon.+ Apang ginhimo sang amon Dios ang pagpakamalaut nga pagpakamaayo.+ 3 Sang mabatian nila ini nga Kasuguan, ginpain nila sa mga Israelinhon ang tanan nga mga dumuluong* kag ang ila mga kaliwat.+

4 Antes sini nga hitabo, si Eliasib+ nga paryente ni Tobias+ amo ang saserdote nga nagadumala sang mga bodega* sang balay* sang amon Dios.+ 5 Gintugutan niya si Tobias nga gamiton ang isa ka daku nga bodega,* nga sang una amo ang talaguan sang amot para sa mga saserdote+ kag sang dulot nga uyas, olibano, kag mga kagamitan, kag ang ikanapulo nga bahin* sang uyas, bag-o nga alak, kag lana,+ nga para sa mga Levinhon,+ mga manug-amba, kag mga manugbantay sang gawang.

6 Wala ako sa Jerusalem sang matabo ini, kay sang ika-32 nga tuig+ ni Hari Artajerjes+ sang Babilonia, nagkadto ako sa iya; kag sang ulihi nangayo ako sing pahanugot sa hari nga malakat anay ako. 7 Nag-abot ako sa Jerusalem kag nakita ko ang kalainan nga ginhimo ni Eliasib+ bangod gintugutan niya si Tobias+ nga gamiton ang isa ka bodega sa luwang sang balay sang matuod nga Dios. 8 Naakig gid ako, gani ginpanghaboy ko sa gua sang bodega* ang tanan nga pagkabutang ni Tobias. 9 Dayon ginpatinluan ko sa ila ang mga bodega;* kag ginbalik ko didto ang mga kagamitan sang balay sang matuod nga Dios,+ lakip na ang dulot nga uyas kag ang olibano.+

10 Natukiban ko man nga ang mga amot nga para sa mga Levinhon+ wala ginhatag sa ila,+ gani ang mga Levinhon kag ang mga manug-amba nga nagaalagad sa balay sang matuod nga Dios nagbalik sa ila mga uma.+ 11 Gani, ginsabdong ko ang tiglawas nga mga manuggahom+ kag ginsilingan: “Ngaa ginpabay-an ninyo ang balay sang matuod nga Dios?”+ Dayon gintipon ko ang mga Levinhon kag ginpabalik sa ila buluhaton. 12 Kag gindala sang bug-os nga Juda ang ikanapulo nga bahin+ sang uyas, bag-o nga alak, kag lana sa mga talaguan.+ 13 Gintugyan ko kay Selemias nga saserdote, kay Zadok nga manugkopya,* kag kay Pedaya nga Levinhon ang pagdumala sa mga talaguan, kag kabulig nila si Hanan nga anak ni Zaccur nga anak ni Matanias, kay kilala sila nga mga masaligan. Sila ang may katungdanan sa pagpanagtag sa ila mga utod.

14 O Dios ko, dumduma ako+ kag indi pagkalimti ang akon buhat sang mainunungon nga gugma nga ginhimo ko para sa balay sang akon Dios kag sa pag-alagad* sa sini.+

15 Sadto nga tion, may nakita ako nga katawhan sang Juda nga nagalinas sang ubas sa mga linasan sa Adlaw nga Inugpahuway.+ Gintipon nila kag ginkarga sa mga asno ang mga uyas, alak, ubas, igos,* kag ang tanan nga sahi sang mga butang kag gindala ini sa Jerusalem sang Adlaw nga Inugpahuway.+ Gani ginpaandaman ko sila nga indi magbaligya sang ila mga inugbaligya sa sina nga adlaw.* 16 Kag ang mga taga-Tiro nga nagapuyo sa siudad, nagadala sang mga isda kag sang tanan nga sahi sang inugbaligya kag ginabaligya ini sa mga taga-Juda kag sa Jerusalem sa Adlaw nga Inugpahuway.+ 17 Gani ginsabdong ko ang mga dungganon sang Juda kag ginsilingan: “Ano ining kalautan nga ginahimo ninyo, kay ginapasipalahan ninyo bisan ang Adlaw nga Inugpahuway? 18 Indi bala nga amo man sini ang ginhimo sang inyo mga katigulangan kag bangod sini, kita kag ini nga siudad ginsilutan sang Dios? Karon ginadugangan pa ninyo ang kaakig batok sa Israel paagi sa pagpasipala sa Adlaw nga Inugpahuway.”+

19 Gani, nagsugo ako nga sa kahapunanon antes magsugod ang Adlaw nga Inugpahuway, ang mga gawang sang Jerusalem dapat siraduhan. Ginsilingan ko man sila nga buksan lamang ini kon matapos na ang Adlaw nga Inugpahuway, kag ginpabantay ko sa gawang ang pila sa akon alagad agod wala sing makasulod nga inugbaligya sa Adlaw nga Inugpahuway. 20 Gani duha ka beses nga nagtulog sa gua sang Jerusalem ang mga negosyante kag mga manugbaligya. 21 Ginpaandaman ko sila kag ginsilingan: “Ngaa nagatulog kamo sa atubangan sang pader? Kon himuon pa ninyo ini liwat, magamit ako sing kusog sa pagtabog sa inyo.” Halin sadto, wala na sila nagakadto kon Adlaw nga Inugpahuway.

22 Kag ginsugo ko ang mga Levinhon nga dapat nila putlion sing padayon ang ila kaugalingon kag magkari kag magbantay sa mga gawang, agod mapakabalaan nila ang Adlaw nga Inugpahuway.+ Bangod sini, O Dios ko, dumduma ako kag kaluy-i suno sa imo bugana nga mainunungon nga gugma.+

23 Sadto nga tion, nakita ko man ang mga Judiyo nga nangasawa* sang mga Asdodnon,+ Ammonhon, kag Moabnon+ nga mga babayi.+ 24 Katunga sang ila mga anak nagahambal sang lenguahe sang mga Asdodnon kag ang katunga nagahambal sang lenguahe sang iban nga mga pungsod, apang wala sing isa sa ila ang nagahambal sang lenguahe sang mga Judiyo. 25 Ginsabdong ko sila kag ginpakamalaut kag ginhanot ang pila sa ila+ kag gingan-it ang ila buhok kag ginpasumpa sila sa Dios: “Kamo kag ang inyo mga anak indi dapat magpamana ukon magpangasawa sang ila mga anak.+ 26 Indi bala nga amo man sini ang sala ni Solomon nga hari sang Israel? Wala sing hari nga kaangay sa iya sa madamo nga pungsod;+ kag ginhigugma sia sang Dios+ amo nga ginhimo sia sang Dios nga hari sa bug-os nga Israel. Apang bangod sa iya dumuluong nga mga asawa, nagpakasala sia.+ 27 Wala pa gid mabatian nga naghimo kamo sining daku nga kalainan kag paglapas sa Dios paagi sa pagpangasawa sa mga dumuluong nga babayi.”+

28 Ang isa sa mga anak ni Joiada+ nga anak sang mataas nga saserdote nga si Eliasib+ nagpangasawa sang anak ni Sanbalat+ nga Horonhon. Gani gintabog ko sia.

29 O Dios ko, indi pagkalimti nga gindagtaan nila ang pagkasaserdote kag ang pagpakigkatipan sa mga saserdote+ kag mga Levinhon.+

30 Gani ginputli ko ang katawhan sa bisan ano nga impluwensia sang mga dumuluong, kag ginhatagan ko ang tagsa ka saserdote kag Levinhon sang ila buluhaton,+ 31 ginsiguro ko man nga ang inuggatong+ madala sa nagakaigo nga tion pati ang nahauna nga mga bunga.

O Dios ko, dumduma ako nga may kahamuot.*+