JOEL
1 Amo ini ang ginsiling ni Jehova kay Joel* nga anak ni Petuel:
2 “Pamatii ninyo ini, kamo nga mga gulang,
Kag magpamati kamo tanan nga pumuluyo sang duta.
Natabo na bala ang pareho sini sang inyo panahon
Ukon sang panahon sang inyo mga katigulangan?+
3 Isugid ninyo ini sa inyo mga anak,
Kag isugid man ini sang inyo mga anak sa ila mga anak,
Kag sang ila mga anak sa masunod nga kaliwatan.
4 Ang wala maubos sang nagapang-ut-ot nga mga apan, ginkaon sang nagapanong nga mga apan;+
Kag ang wala maubos sang nagapanong nga mga apan, ginkaon sang mga apan nga wala pa sing pakpak;
Kag ang wala maubos sang mga apan nga wala pa sing pakpak, ginkaon sang maasab nga mga apan.+
5 Magmata kamo kag maghibi, kamo nga mga palahubog!+
Maghaya kamo tanan nga palainom sing alak,
Bangod ginkuha ang matam-is nga alak sa inyo baba.+
6 Kay may pungsod nga nagsalakay sa akon duta, nga ang katawhan sini isganan kag indi maisip.+
Ang ila mga ngipon kag sag-ang pareho sang mga ngipon kag sag-ang sang leon.+
7 Ginpierde nila ang akon tanom nga ubas kag ginhimo nila ang akon kahoy nga higuera nga isa ka tuod.
Ginpanitan nila ini kag ginpilak,
Kag nagpuluti ang mga sanga sini.
9 Nag-untat na ang paghalad sing dulot nga uyas+ kag dulot nga ilimnon+ sa balay ni Jehova;
Nagalalaw ang mga saserdote nga mga alagad ni Jehova.
10 Ginhalitan ang mga uma, nagalalaw ang duta;+
Kay ginhalitan ang mga uyas, wala na sing bag-o nga alak, kag nagmala ang lana.+
11 Nasubuan ang mga mangunguma, naghaya ang mga manug-atipan sang ulubasan,
Bangod sang trigo kag sang sebada;
Kay nagkalapierde ang patubas sang uma.
12 Nalaya ang tanom nga ubas,
Nalayong ang kahoy nga higuera.
Nalaya man ang kahoy nga granada, ang palma, kag ang mansanas,
Ang tanan nga kahoy sa latagon;+
Kay ang kalipay sang katawhan ginbuslan sing kahuy-anan.
13 Magsuksok kamo sing sako* kag maglalaw,* kamo nga mga saserdote;
Maghaya kamo nga nagaalagad sa halaran.+
Magsulod kamo nga mga alagad sang akon Dios kag magpaligad kamo sang gab-i nga nagasuksok sing sako;
Kay wala na sang nagahalad sing dulot nga uyas+ kag dulot nga ilimnon+ sa balay sang inyo Dios.
14 Magpatuman* kamo sing puasa; kag ipahibalo ninyo nga may sagrado nga pagtilipon.+
Tipuna ang mga gulang kag ang tanan nga pumuluyo sang duta,
Sa balay ni Jehova nga inyo Dios,+ kag magpangayo kamo sing bulig kay Jehova.
15 Magkasubo kamo bangod sina nga adlaw!
Kay malapit na ang adlaw ni Jehova,+
Kag magaabot ini kaangay sang kalaglagan halin sa Labing Gamhanan!
16 Indi bala nga nakita gid naton nga ginkuha ang pagkaon,
Kag ang kasadya kag ang kalipay sa balay sang aton Dios?
17 Ang mga binhi* nahuyos sa idalom sang ila mga pala.
Ginpabay-an ang mga bodega.
Ginguba ang mga kamalig, kay nalaya ang mga uyas.
18 Bisan ang mga sapat nagaugayong!
Nagdalangdalang ang mga baka, kay wala sila sing halalban!
Kag ang mga karnero nagaantos sang silot.
19 Manawag ako sa imo, O Jehova;+
Kay ginlamon sang kalayo ang mga halalban sa kamingawan,
Kag nasunog ang tanan nga kahoy sa latagon.
20 Bisan ang talunon nga mga sapat nagahulat sa imo,
Bangod nagmala ang mga sapa
Kag ginlamon sang kalayo ang mga halalban sa kamingawan.”
2 “Magpatunog kamo sing budyong sa Sion!+
Magsinggit kamo sing singgit sa inaway sa akon balaan nga bukid.
Magkurog ang tanan nga pumuluyo sang duta,
Kay maabot ang adlaw ni Jehova!+ Malapit na ini!
2 Adlaw ini sang grabe nga kadulom,+
Adlaw sang mga panganod kag madamol nga gal-um,+
Pareho sang kasanag sang pamanagbanag nga ginalipdan sang kabukiran.
May katawhan nga madamo kag isganan;+
Wala pa gid sing pareho sa ila,
Kag wala na gid sing pareho pa sa ila
Sa tanan nga kaliwatan nga magaabot.
3 Sa unahan nila ang kalayo nagapanglamon,
Kag sa likuran nila ang nagadabdab nga kalayo nagapangsunog.+
Ang duta sa unahan nila pareho sang hardin sang Eden,+
Apang sa likuran nila isa ini ka nahapay nga kamingawan,
Kag wala gid sing makapalagyo.
4 Ang ila hitsura daw mga kabayo,
Kag nagadalagan sila nga daw mga kabayo sa inaway.+
5 Ang gahod pareho sang mga kangga samtang nagalukso sila sa ibabaw sang mga bukid,+
Pareho sa tunog sang nagadabdab nga kalayo nga nagasunog sing dagami.
Pareho sila sang isganan nga mga soldado nga handa sa pagpakig-away.+
6 Bangod sa ila, ang mga tawo magaantos.
Kag magapalamula sila tanan.
7 Nagadalagan sila pareho sang mga hangaway,
Nagataklas sila sa pader pareho sang mga soldado,
Ang kada isa nagapabilin sa iya dalanon,
Kag wala sila nagalisa sa ila banas.
8 Wala sila nagadis-uganay;
Ang kada isa nagalakat sa iya dalanon.
Kon ang iban mapukan tungod sang mga armas,*
Ang iban wala nagahalin sa ila puesto.
9 Nagasalakay sila sa siudad, nagataklas sila sa pader.
Nagasaka sila sa mga balay kag nagaagi sa mga bintana nga daw kawatan.
10 Nagakurog ang duta kag nagauyog ang langit sa atubangan nila.
Nagadulom ang adlaw kag ang bulan,+
Kag wala na nagasanag ang mga bituon.
11 Pabaskugon ni Jehova ang iya tingog sa atubangan sang iya kasuldadusan,+ kay madamo gid ang iya mga soldado.+
Kay ang isa nga nagatuman sang Iya pulong gamhanan;
Kay ang adlaw ni Jehova makahaladlok kag makahalawhaw gid.+
Sin-o ang makaagwanta sini?”+
12 “Apang karon,” siling ni Jehova, “magbalik kamo sa akon sa bug-os ninyo nga tagipusuon,+
Nga nagapuasa+ kag nagahibi kag nagahaya.
13 Gisia ninyo ang inyo tagipusuon+ kag indi ang inyo bayo,+
Kag magbalik kamo kay Jehova nga inyo Dios,
Kay sia mainawaon* kag maluluy-on, indi dali maakig+ kag bugana sa mainunungon nga gugma,+
Kag magabag-o ang iya hunahuna tuhoy* sa kalaglagan.
14 Sin-o ang nakahibalo kon bala magliso sia kag magbag-o sang iya hunahuna*+
Kag hatagan kamo sing pagpakamaayo,
Agod makahalad kamo sing dulot nga uyas kag dulot nga ilimnon para kay Jehova nga inyo Dios?
15 Magpatunog kamo sing budyong sa Sion!
Magpatuman* kamo sing puasa; kag ipahibalo ninyo nga may sagrado nga pagtilipon.+
16 Tipuna ang katawhan; pakabalaana ang katilingban.+
Tipuna ang tigulang nga mga lalaki;* ang mga bata kag ang nagasuso nga mga lapsag.+
Maggua ang nobyo sa iya kuarto, kag maggua ang nobya sa iya kuarto.
17 Sa ulot sang portiko kag sang halaran+
Maghibi ang mga saserdote nga mga alagad ni Jehova, kag magsiling:
‘O Jehova, kaluuyi ang imo katawhan;
Indi pagtuguti nga yagutaon ang imo palanublion,
Sa pagtugot nga gamhan sila sang mga pungsod.
Ngaa magsiling ang mga tawo, “Diin na ang ila Dios?” ’+
19 Sabton ni Jehova ang iya katawhan:
‘Hatagan ko kamo sing uyas kag sing bag-o nga alak kag sing lana,
Kag maayawan gid kamo sini;+
Indi ko na pagtugutan nga mahuy-an kamo sa mga pungsod.+
20 Tabugon ko palayo sa inyo ang nagasalakay halin sa aminhan;
Tabugon ko sia sa kigas kag nahapay nga duta,
Ang iya mga soldado sa unahan* nagapakadto sa nasidlangan nga dagat*
Kag ang iya mga soldado sa likuran nagapakadto sa nakatundan nga dagat.*
Ang iya baho magausbong,
Padayon nga magausbong ang iya baho;+
Kay ang Dios magahimo sing makatilingala nga mga butang.’
21 Indi ka magkahadlok, O duta.
Magkalipay ka kag magkasadya, kay magahimo si Jehova sing makatilingala nga mga butang.
22 Indi kamo magkahadlok, kamo nga mga sapat sa latagon,
Kay magaberde ang mga halalban sa kamingawan,+
Kag magapamunga ang mga kahoy;+
Magapamunga sing madamo ang kahoy nga higuera kag ang ubas.+
23 Kamo nga mga anak sang Sion, magkalipay kamo kag magkasadya tungod kay Jehova nga inyo Dios;+
Kay hatagan niya kamo sing ulan sa tigragas nga hustuhan lang,
Kag magapatupa sia sing mabunok nga ulan sa inyo,
Ang ulan sa tigragas kag sa tigpamulak, pareho sang una.+
24 Ang mga linasan mapuno sang uyas,
Kag magaawas ang bag-o nga alak kag ang lana sa mga linasan sang ubas kag olibo.+
25 Kag ibalik ko ang nagkalapierde sa inyo sang mga tinuig
Nga ginkaon sang nagapanong nga mga apan, sang mga apan nga wala pa sing pakpak, sang maasab nga mga apan, kag sang nagapang-ut-ot nga mga apan ang inyo mga pananom,
Ang akon madamo nga kasuldadusan nga ginpadala sa inyo.+
26 Magakaon kamo kag mabusog,+
Kag dayawon ninyo ang ngalan ni Jehova nga inyo Dios,+
Nga naghimo sing makatilingala nga mga butang sa inyo;
Indi na gid mahuy-an liwat ang akon katawhan.+
27 Dayon mahibaluan ninyo nga kaupod ako sang Israel+
Kag ako si Jehova nga inyo Dios,+ wala na sing iban pa!
Indi na gid mahuy-an liwat ang akon katawhan.
28 Pagkatapos sini, ibubo ko ang akon espiritu+ sa tanan nga sahi sang tawo,
Kag magapanagna ang inyo mga anak nga lalaki kag ang inyo mga anak nga babayi,
Magadamgo ang inyo tigulang nga mga lalaki,
Kag makakita sing mga palanan-awon ang inyo lamharon nga mga lalaki.+
29 Sa amo nga mga adlaw, ibubo ko ang akon espiritu
Sa akon mga ulipon nga lalaki kag babayi.
30 Magapakita ako sing makatilingala nga mga butang sa langit kag sa duta,
Dugo kag kalayo kag daw mga haligi nga aso.+
31 Ang adlaw magadulom kag ang bulan mangin dugo+
Antes mag-abot ang daku kag makahalawhaw nga adlaw ni Jehova.+
32 Kag ang tagsatagsa nga nagatawag sa ngalan ni Jehova maluwas;+
Kay may mga makapalagyo sa Bukid Sion kag sa Jerusalem,+ suno sa ginsiling ni Jehova,
Ang mga nakaluwas nga ginatawag ni Jehova.”
3 “Sa amo nga mga adlaw kag sa sina nga tion,
Kon pabalikon ko na ang mga nabihag halin sa Juda kag sa Jerusalem,+
2 Tipunon ko man ang tanan nga pungsod
Hukman ko sila didto+
Tungod sang akon katawhan kag sang akon palanublion nga Israel,
Kay ginpaalaplaag nila sila sa mga pungsod,
Kag ginpartida nila ang akon duta.+
3 Nagpagabutgabot sila agod partidahon ang akon katawhan;+
Ginbaylo nila sa makihilawason nga babayi ang bata nga lalaki
Kag ginbaligya nila ang bata nga babayi agod may mainom sila nga alak.
4 Ngaa ginhimo ninyo ini sa akon,
Tiro kag Sidon kag kamo tanan nga rehiyon sang Filistia?
Ginabalusan bala ninyo ako sa butang nga akon ginhimo?
Kon ginabalusan ninyo ako,
Balusan ko man kamo gilayon sa inyo ginhimo.+
5 Bangod ginpanguha ninyo ang akon pilak kag bulawan,+
Kag gindala ninyo sa inyo mga templo ang akon malahalon nga mga butang;
6 Kag ginbaligya ninyo sa mga Griego ang katawhan sang Juda kag Jerusalem,+
Agod mapalayo ninyo sila sa ila teritoryo;
7 Pabalikon ko sila halin sa lugar nga ginbaligyaan ninyo sa ila,+
Kag balusan ko kamo sa inyo ginhimo.
8 Ibaligya ko ang inyo mga anak nga lalaki kag mga anak nga babayi sa katawhan sang Juda,+
Kag ibaligya nila sila sa mga taga-Sheba, sa isa ka pungsod nga malayo;
Kay si Jehova mismo ang nagsiling sini.
9 Ipahibalo ninyo ini sa mga pungsod:+
‘Maghanda* kamo sa pagpakig-away! Tipuna ang inyo isganan nga mga lalaki!
Pasulunga ninyo kag pasalakaya ang tanan nga soldado!+
10 Salsala ang punta sang inyo mga arado nga mangin mga espada kag ang inyo mga garab nga inughagbas nga mangin mga bangkaw.
Ang mga maluya magsiling: “Makusog ako.”
11 Magtipon kamo kag magbuligay, kamo tanan nga pungsod sa palibot!’ ”+
O Jehova, dalha sa sina nga lugar ang imo mga gamhanan.*
12 “Magtipon ang mga pungsod kag magkadto sila sa Nalupyakan* ni Jehosapat;
Kay hukman ko didto ang tanan nga pungsod sa palibot.+
13 Ihanda ninyo ang mga garab, kay luto na ang alanyon.
Magpanaug kamo kag maglinas, kay puno na ang linasan sang ubas.+
Nagaawas ang mga suludlan, kay sobra na ang ila kalautan.
14 Ang madamo nga katawhan yara sa nalupyakan* sang paghukom,
Kay malapit na ang adlaw nga hukman ni Jehova ang katawhan didto.+
15 Ang adlaw kag ang bulan magadulom,
Kag madula sang mga bituon ang ila kasanag.
16 Halin sa Sion si Jehova magangurob pareho sang leon,
Halin sa Jerusalem magasinggit sia.
Ang langit kag ang duta magatay-ug;
Apang si Jehova mangin dalangpan sang iya katawhan,+
Kag mangin kuta sang katawhan sang Israel.
17 Kag mahibaluan ninyo nga ako si Jehova nga inyo Dios nagapuyo sa Sion, ang akon balaan nga bukid.+
18 Sa sina nga adlaw, halin sa mga bukid magatulo ang matam-is nga alak,+
Halin sa mga bakulod magailig ang gatas,
Kag magailig ang tubig sa tanan nga sapa sang Juda.
Halin sa balay ni Jehova may tuburan nga magailig,+
Kag tubigan sini ang Nalupyakan* sang mga Kahoy nga Akasya.
19 Apang ang Egipto mangin ginbayaan nga lugar,+
Kag ang Edom mangin ginbayaan nga kamingawan,+
Tungod sang kapintas nga ginhimo nila sa katawhan sang Juda,+
Diin ginpaagay nila sa ila duta ang dugo sang wala sing sala nga mga tawo.+
20 Apang ang Juda pagaistaran tubtob san-o,
Kag ang Jerusalem tubtob sa tanan nga kaliwatan.+
21 Kabigon ko nga wala sing sala ang ila dugo nga ginkabig ko anay nga may sala;+
Kag magapuyo si Jehova sa Sion.”+
Buot silingon, “Si Jehova Dios.”
Ukon “pamatan-on nga babayi.”
Ukon “bana.”
Sa literal, “Mangwagkus kamo.”
Ukon “pukpuka ang inyo dughan.”
Sa literal, “Magpakabalaan.”
Ukon mahimo, “binulad nga igos.”
Ukon “baslay.”
Ukon “mainayuhon.”
Ukon “Kag magakalisod sia tungod.”
Ukon “kag magkalisod.”
Sa literal, “Magpabalaan.”
Ukon “ang mga gulang.”
Sa literal, “iya nawong.”
Ang Patay nga Dagat.
Ang Dagat Mediteraneo.
Ukon “Manubo nga Patag.”
Buot silingon, “Si Jehova Hukom.”
Sa literal, “Magpakabalaan.”
Ukon “hangaway.”
Ukon “Manubo nga Patag.”
Ukon “manubo nga patag.”
Ukon “estranghero.”
Tan-awa ang Glossary.