SULAT PARA SA MGA TAGA-EFESO

1 Halin kay Pablo, nga apostol ni Cristo Jesus paagi sa kabubut-on sang Dios, para sa mga balaan sa Efeso+ nga matutom nga nahiusa kay Cristo Jesus:

2 Kabay nga mabaton ninyo ang wala tupong nga kaayo kag paghidait halin sa Dios nga aton Amay kag kay Ginuong Jesucristo.

3 Dayawon ang Dios kag Amay sang aton Ginuong Jesucristo, kay sa langitnon nga mga lugar ginhatag niya sa aton ang tanan nga pagpakamaayo halin sa iya espiritu, subong mga disipulo sang Cristo,+ 4 subong nga ginpili niya kita nga nahiusa sa iya sa wala pa matukod ang kalibutan, agod mangin balaan kita kag wala sing depekto+ sa iya atubangan bangod sang gugma. 5 Kay gintangdo na nga daan niya+ ang pag-adoptar sa aton subong iya mga anak+ paagi kay Jesucristo, suno sa iya nahamut-an kag kabubut-on,+ 6 agod dayawon ang Dios bangod gingamit niya ang iya hinigugma nga Anak+ para ipakita sa aton ang iya wala tupong nga kaayo.+ 7 Paagi sa paggawad sa aton paagi sa iya dugo,+ nahilway kita, nga buot silingon, mapatawad na ang aton mga paglapas,+ suno sa kabuganaan sang iya wala tupong nga kaayo.

8 Ginhatag niya sa aton ining wala tupong nga kaayo sing bugana upod ang bug-os nga kaalam kag paghangop 9 paagi sa pagpahibalo sa aton sang sagrado nga likom+ sang iya kabubut-on. Nahisuno ini sa iya nahamut-an nga katuyuan 10 nga magtukod sang pagdumalahan* sa katapusan sang iya gintalana nga mga tion, sa pagtipon sang tanan nga butang sa Cristo, ang mga butang sa langit kag ang mga butang sa duta.+ Huo, sa iya 11 nga nahiusa kami kag gintangdo subong mga manunubli,+ nga gintangdo na nga daan suno sa katuyuan sang isa nga nagahimo sang tanan nga butang samtang nagapamat-od sia suno sa iya kabubut-on, 12 agod kami nga una nga naglaum sa Cristo magaalagad para sa pagdayaw kag paghimaya sa iya. 13 Apang naglaum man kamo sa iya sa tapos ninyo mabatian ang pulong sang kamatuoran, ang maayong balita tuhoy sa inyo kaluwasan. Sang nagtuo kamo, ginpat-inan kamo+ paagi sa iya sang ginsaad nga balaan nga espiritu, 14 nga isa ka pauna nga garantiya* sang aton palanublion,+ sa katuyuan nga mahilway ang ginapanag-iyahan sang Dios+ paagi sa gawad,+ para sa iya himaya kag kadayawan.

15 Amo kon ngaa, sang nabatian ko ang inyo pagtuo kay Ginuong Jesus kag ang inyo gugma nga ginpakita sa tanan nga balaan, 16 wala ako mag-untat sa pagpasalamat tungod sa inyo. Ginasambit ko kamo pirme sa akon mga pangamuyo, 17 agod ang Dios sang aton Ginuong Jesucristo, ang Amay sang himaya, maghatag sa inyo sang espiritu sang kaalam kag sang kapahayagan may kaangtanan sa sibu nga ihibalo tuhoy sa iya.+ 18 Ginpasanag niya ang mga mata sang inyo tagipusuon, agod mahibaluan ninyo kon sa ano nga paglaum gintawag niya kamo, kon ano ang mahimayaon nga kamanggaran nga ginatigana niya subong palanublion para sa mga balaan,+ 19 kag kon ano kadaku sang iya gahom sa aton nga mga tumuluo.+ Suno ini sa pagpanghikot sang pagkagamhanan sang iya kusog, 20 nga iya gingamit sang ginbanhaw niya ang Cristo kag ginpapungko sa iya tuo+ sa langitnon nga mga lugar, 21 nga labaw gid sa tanan nga panguluhan, awtoridad, gahom, pagkaginuo kag ngalan,+ indi lamang sa sini nga sistema sang mga butang,* kundi sa magaabot man. 22 Ginpasakop man niya ang tanan nga butang sa idalom sang iya mga tiil+ kag ginhimo sia nga ulo sang tanan nga butang nga may kaangtanan sa kongregasyon,+ 23 nga amo ang iya lawas,+ nga ginapuno niya sang iya mga kinaiya kag ginakompleto ang tanan nga butang sa tanan nga paagi.

2 Dugang pa, ginbuhi kamo sang Dios bisan pa mga patay kamo bangod sa inyo mga paglapas kag mga sala,+ 2 nga ginhimo ninyo sadto suno sa sistema sang mga butang* sini nga kalibutan,+ suno sa manugdumala sang awtoridad sang hangin,+ ang espiritu+ nga nagapanghikot na karon sa mga anak sang pagkadimatinumanon. 3 Huo, kaangay nila naggawi kita sadto suno sa mga handum sang aton unod, nga ginapasundan ang kabubut-on sang unod+ kag sang aton hunahuna,+ kag halin sa aton pagkabun-ag nagakadapat kita sa kaakig sang Dios+ kaangay man sa ila. 4 Apang ang Dios, nga bugana sa kaluoy,+ bangod sang iya daku nga gugma sa aton,+ 5 nagbuhi sa aton upod sa Cristo bisan sang patay pa kita bangod sa aton mga paglapas+—paagi sa wala tupong nga kaayo naluwas kamo. 6 Dugang pa, ginbuhi niya kita kag ginpapungko sa langitnon nga mga lugar nga nahiusa kay Cristo Jesus,+ 7 agod sa magaabot nga sistema sang mga butang* mapakita niya ang labaw nga kamanggaran sang iya wala tupong nga kaayo sa iya pagkamainayuhon* sa aton nga nahiusa kay Cristo Jesus.

8 Paagi sa sining wala tupong nga kaayo ginluwas kamo paagi sa pagtuo,+ kag indi ini bangod sa inyo binuhatan; sa baylo, dulot ini sang Dios. 9 Indi ini bangod sa inyo mga buhat,+ agod wala sing isa nga may rason sa pagpabugal. 10 Binuhatan kita sang Dios* kag gintuga+ nga nahiusa kay Cristo Jesus+ para sa maayong mga buhat, nga gintalana na nga daan sang Dios nga himuon naton.

11 Gani, dumduma ninyo nga sang una, mga tawo kamo sang mga pungsod sa pagkabun-ag; gintawag kamo nga wala matuli sang mga gintuli sang tawo. 12 Sang una, wala kamo sang Cristo, nahamulag kamo sa katawhan sang Israel, indi kamo bahin sa mga katipan sang saad;+ wala kamo sing paglaum kag wala sing Dios sa kalibutan.+ 13 Apang karon nga nahiusa na kamo kay Cristo Jesus, kamo nga malayo anay sa Dios, malapit na sa iya paagi sa dugo sang Cristo. 14 Kay ginhatagan kita sang Cristo sing paghidait,+ gintingob niya ang duha ka grupo+ kag ginguba ang pader nga nagapain sa ila.+ 15 Paagi sa iya unod gindula niya ang kaawayon, ang Kasuguan nga nagalakip sang mga sugo kag mga mando, agod himuon ang duha ka grupo nga nahiusa sa iya nga isa ka bag-o nga tawo+ kag agod mapaluntad ang paghidait, 16 kag agod mapasag-uli sing bug-os sa Dios ang duha ka katawhan sa isa ka lawas paagi sa usok sang pag-antos,*+ paagi sa iya kamatayon gindula niya ang kaawayon.+ 17 Nag-abot sia kag ginpahayag ang maayong balita sang paghidait sa inyo nga sadto wala nakakilala sa Dios, kag amo man sa mga nakakilala sa Dios, 18 bangod paagi sa iya ining duha ka katawhan hilway nga makapalapit sa Amay paagi sa isa ka espiritu.

19 Gani indi na kamo mga estranghero kag mga dumuluong,+ kundi mga kasimanwa+ kamo sang mga balaan kag mga katapo sang panimalay sang Dios,+ 20 kag gintukod na kamo sa sadsaran sang mga apostoles kag mga manalagna,+ samtang si Cristo Jesus mismo amo ang pinakaimportante nga sadsaran nga pamusod nga bato.+ 21 Ang bug-os nga tinukod nga nahiusa sa iya, nga ang tanan nga bahin nagaangtanay sing sibu,+ mangin isa ka balaan nga templo para kay Jehova.*+ 22 Bangod nahiusa kamo sa Cristo, ginhimo kamo sang Dios upod sa iban nga isa ka balay nga iya ginaistaran, bangod yara sa sini ang iya espiritu.+

3 Bangod sini ako, si Pablo, nabilanggo+ tungod kay Cristo Jesus kag tungod sa inyo nga mga tawo sang mga pungsod— 2 nabatian gid ninyo nga ginhatagan ako sing responsibilidad+ nga buligan kamo nga makapanginpulos sa wala tupong nga kaayo sang Dios, 3 nga ginpahayag sa akon ang sagrado nga likom, subong sang nasambit ko na sing malip-ot lang sa akon sulat. 4 Gani kon mabasa ninyo ini, mahibaluan ninyo nga nahangpan ko ang sagrado nga likom+ tuhoy sa Cristo. 5 Ini nga likom wala ginpahayag sa nagligad nga kaliwatan kaangay sa pagpahayag sini karon sa iya balaan nga mga apostoles kag mga manalagna paagi sa espiritu.+ 6 Amo ini ang likom: Ang mga tawo sang mga pungsod nga nahiusa kay Cristo Jesus, mangin mga masigkamanunubli sang Cristo, kag mangin bahin sang lawas.+ Mabaton man nila ang ginsaad sang Dios sa amon bangod sa maayong balita. 7 Nangin ministro ako sining likom bangod sa wala tupong nga kaayo sang Dios. Ginhatag niya sa akon ining wala bayad nga dulot subong pagpakita sang iya gahom.+

8 Ining wala tupong nga kaayo ginhatag sa akon,+ nga pinakakubos sa tanan nga balaan,+ agod mapahayag ko sa mga pungsod ang maayong balita tuhoy sa indi matungkad nga kamanggaran sang Cristo 9 kag mapakita sa tanan ang pagdumalahan sang sagrado nga likom+ nga madugay na nga natago sa Dios, nga nagtuga sang tanan nga butang. 10 Agod paagi sa kongregasyon+ ipahibalo sa mga panguluhan kag mga awtoridad sa langitnon nga mga lugar ang madamo nga bahin sang kaalam sang Dios.+ 11 Suno ini sa iya dayon nga katuyuan may kaangtanan sa Cristo,+ si Jesus nga aton Ginuo, 12 nga paagi sa iya may kahilwayan kita sa paghambal kag pagpalapit sa Dios+ nga may pagsalig, kay nagatuo kita sa Cristo. 13 Gani ginapangabay ko kamo nga indi magpangampo bangod sang akon mga kapipit-an tungod sa inyo, kay ini nagapadungog sa inyo.+

14 Bangod sini nagaluhod ako sa atubangan sang Amay, 15 nga sa iya utang sang tanan nga pamilya sa langit kag sa duta ang ngalan sini. 16 Nagapangamuyo ako nga tugutan niya kamo paagi sa iya daku nga himaya nga magbaskog ang inyo tagipusuon+ kag hunahuna paagi sa gahom sang iya espiritu, 17 kag paagi sa inyo pagtuo magaistar ang Cristo sa inyo tagipusuon, subong man ang inyo gugma sa iban.+ Kabay nga manggamot kamo+ kag matukod sa sadsaran,+ 18 agod mahangpan ninyo sing bug-os upod sa tanan nga balaan kon ano ang kasangkaron, kalabaon, kataason, kag kadalumon sang kamatuoran, 19 kag agod makilala ninyo ang gugma sang Cristo,+ nga nagalabaw gid sa ihibalo, agod mabaton ninyo halin sa Dios ang tagsa niya ka kinaiya.

20 Ang Dios, suno sa iya gahom nga nagapanghikot sa aton,+ makahimo sing sobra pa kabugana labaw sa aton ginapangayo ukon ginahunahuna.+ 21 Gani takus sia himayaon paagi sa kongregasyon kag paagi kay Cristo Jesus, sa tanan nga kaliwatan tubtob sa wala sing katubtuban. Kabay pa.*

4 Gani, ako nga nabilanggo+ tungod sa Ginuo, nagahingyo sa inyo nga magkabuhi sing takus+ sa pagtawag nga inyo nabaton, 2 nga may bug-os nga pagpaubos*+ kag kalulo, pagkamapinasensiahon,+ nagabatas sa isa kag isa sa gugma,+ 3 nagapakighidait sa isa kag isa, kag nagatinguha nga tipigan ang paghiusa nga nabaton ninyo paagi sa balaan nga espiritu.+ 4 May isa ka lawas,+ kag isa ka espiritu,+ kaangay nga may isa ka paglaum+ nga sa sini gintawag kamo; 5 isa ka Ginuo,+ isa ka pagtuo, isa ka bawtismo; 6 isa ka Dios kag Amay sang tanan, nga labaw sa tanan kag nagapanghikot paagi sa tanan kag nagapanghikot man sa tanan.

7 Ginhatag sa kada isa sa aton ang wala tupong nga kaayo suno sa pagbahinbahin sang Cristo sa wala bayad nga dulot.+ 8 Kay nagasiling ini: “Sang nagsaka sia sa kahitaasan nagdala sia sing mga bihag; naghatag sia sing mga dulot nga mga lalaki.”+ 9 Karon ano ang buot silingon sang “nagsaka sia”? Ginapahangop sini nga nagpanaug man sia sa mas manubo nga mga lugar, nga amo ang duta. 10 Ang isa mismo nga nagpanaug amo man ang nagsaka+ sing mataas pa sa tanan nga kalangitan,+ agod mabug-os niya ang tanan nga butang.

11 Kag ginhatag niya ang iban subong mga apostoles,+ ang iban subong mga manalagna,+ ang iban subong mga ebanghelisador,*+ ang iban subong mga manugbantay kag mga manunudlo,+ 12 agod pasibuon* ang mga balaan sa husto nga dalan, para sa hilikuton sa pag-alagad, sa pagpabakod sa lawas sang Cristo,+ 13 tubtob makadangat kita tanan sa nahiusa nga pagtuo kag sibu nga ihibalo tuhoy sa Anak sang Dios, kag mangin hamtong gid nga tawo,+ kaangay sang bug-os nga kahamtong sang Cristo. 14 Gani indi na kita mangin kaangay sang mga bata nga ginaanod-anod sang mga balod kag ginapalidpalid sang tagsa ka hangin sang panudlo+ sang tuso nga mga tawo, kag sang malimbungon nga mga pahito. 15 Sa baylo, maghambal kita sing kamatuoran kag magpakita sing gugma, agod mangin hamtong kita sa tanan nga paagi bilang pag-ilog sa ulo, ang Cristo.+ 16 Paagi sa iya ang bug-os nga lawas+ nagaangtanay sing sibu kag nagabuligay paagi sa tagsa ka lutalutahan nga nagapanghikot sing maayo. Kon ang tagsa ka bahin nagapanghikot sing nagakaigo, nagabulig ini sa pagpatubo sang lawas samtang ginapabakod sini ang lawas paagi sa gugma.+

17 Gani, ginasiling ko ini sa inyo kag ginahingyo kamo sa ngalan sang Ginuo, nga indi na kamo magpadayon sa paglakat kaangay sang mga pungsod+ nga nagalakat suno sa ila wala sing pulos nga panghunahuna.+ 18 Nadulman ang ila panghunahuna kag nahamulag sa kabuhi nga iya sang Dios, bangod wala sila sing nahibaluan, bangod sa katig-a sang ila tagipusuon. 19 Wala na sila sang igbalatyag sa maayo kag malain, nagpatuyang sila sa matampalason nga paggawi*+ sa paghimo sang tanan nga kahigkuan nga may kakagod.

20 Apang natun-an ninyo nga indi subong sina ang Cristo, 21 kon matuod gid nga nakabati kamo kag gintudluan nahisuno sa kamatuoran nga gintudlo ni Jesus. 22 Gintudluan kamo nga ubahon ninyo ang daan nga personalidad+ nga nahisuno sa inyo paggawi sadto, nga ginapalain pa gid sang madaya nga mga handum sini.+ 23 Padayon nga bag-uha ninyo ang inyo panghunahuna,*+ 24 kag isuklob ang bag-o nga personalidad+ nga gintuga suno sa kabubut-on sang Dios sa matuod nga pagkamatarong kag pagkamainunungon.

25 Gani, karon nga ginsikway na ninyo ang pangdaya, ang kada isa sa inyo maghambal sang kamatuoran sa iya isigkatawo,+ kay mga bahin kita sang isa ka lawas.+ 26 Kon mangakig kamo, indi kamo magpakasala;+ indi pagpatunuri sang adlaw nga akig kamo;+ 27 indi paghatagi sing kahigayunan ang Yawa.*+ 28 Ang kawatan indi na magpangawat; sa baylo magpangabudlay sia. Magtrabaho sia sing dungganon,+ agod may ipaambit sia sa nagakinahanglan.+ 29 Indi maggua ang dunot nga pinamulong sa inyo baba,+ kundi ang maayo lang nga pinamulong nga makapabakod suno sa kinahanglanon, agod mahatag sini ang maayo sa mga nagapamati.+ 30 Indi man pagpasubua ang balaan nga espiritu sang Dios,+ nga ginpat-in sa inyo+ para sa adlaw sang paghilway paagi sa gawad.+

31 Isikway ninyo ang tanan nga sahi sang dumot,+ kaakig, kasingkal, sininggitanay, masakit nga hambal,+ kag ang tanan nga kalainan.+ 32 Sa baylo mangin mainayuhon kamo sa isa kag isa, mangin maluluy-on,+ nga nagapatawad sing kinabubut-on sa isa kag isa subong nga ang Dios nagpatawad man sing kinabubut-on sa inyo paagi sa Cristo.+

5 Gani, mangin manug-ilog kamo sa Dios,+ subong mga anak nga hinigugma, 2 kag padayon kamo nga maglakat sa gugma,+ subong nga ang Cristo naghigugma man sa aton*+ kag naghatag sang iya kaugalingon para sa aton* subong isa ka maamyon nga dulot kag halad sa Dios.+

3 Ang seksuwal nga imoralidad* kag ang tanan nga sahi sang kahigkuan ukon kakagod indi gid paghinambitan sa tunga ninyo,+ kay indi ini nagakaigo sa mga tawo nga balaan.+ 4 Wala sing makahuluya nga paggawi, binuang nga hambal kag malaw-ay nga linahog sa tunga ninyo,+ kay ini nga mga butang indi nagakaigo, sa baylo maghambal kamo sang pagpasalamat sa Dios.+ 5 Kay nahibaluan kag nahangpan gid ninyo nga wala sing tawo nga nagahimo sang seksuwal nga imoralidad*+ ukon indi matinlo nga tawo ukon makagod nga tawo,+ nga buot silingon nagasimba sa mga diosdios, ang may palanublion sa Ginharian sang Cristo kag sang Dios.+

6 Indi kamo magpadaya sa wala sing pulos nga mga pulong, kay bangod sini magaabot ang kasingkal sang Dios sa mga anak sang pagkadimatinumanon. 7 Gani, indi kamo mangin umalambit upod sa ila; 8 kay kadudulman kamo sadto, apang kapawa na kamo karon+ may kaangtanan sa Ginuo.+ Padayon kamo nga maglakat subong mga anak sang kapawa, 9 kay ang mga bunga sang kapawa nagalakip sang tanan nga sahi sang kaayo, pagkamatarong kag kamatuoran.+ 10 Padayon ninyo nga pat-ura kon ano ang kalahamut-an+ sa Ginuo; 11 kag untati ninyo ang pagpakigbahin sa indi mabungahon nga mga buhat sang kadudulman;+ sa baylo, ibuyagyag kon ano ini. 12 Kay makahuluya bisan ihambal ang ginahimo nila sing tago. 13 Karon ang tanan nga butang nga ginabuyagyag* ginapakita sang kapawa, kay ang tanan nga butang nga ginapakita kapawa. 14 Gani ginasiling: “Magbugtaw, O ikaw nga nagakatulog, magbangon ka gikan sa mga patay,+ kag ang Cristo magasilak sa imo.”+

15 Gani padayon nga bantayi sing maayo nga ang inyo paglakat indi kaangay sang indi maalam kundi sang maalam nga mga tawo, 16 nga nagagamit sing maayo sang inyo tion,*+ bangod ang mga adlaw malaut. 17 Bangod sini, indi na kamo mangin indi makatarunganon, sa baylo, padayon nga hantupa ninyo kon ano ang kabubut-on ni Jehova.*+ 18 Indi man kamo magpahubog sa alak,+ kay nagadul-ong ini sa pagpatuyang,* kundi padayon kamo nga mapuno sing balaan nga espiritu. 19 Mag-amba kamo sa isa kag isa sang mga salmo, mga pagdayaw sa Dios, kag espirituwal nga mga ambahanon, nga nagadayaw+ kay Jehova*+ paagi sa ambahanon+ sa inyo tagipusuon, 20 nga nagapasalamat pirme+ sa aton Dios kag Amay sa ngalan sang aton Ginuong Jesucristo+ tungod sa tanan nga butang.

21 Magpasakop kamo sa isa kag isa+ tungod sa kahadlok sa Cristo. 22 Ang mga asawa magpasakop sa ila bana+ subong sang ila pagpasakop sa Ginuo, 23 bangod ang bana amo ang ulo sang iya asawa+ subong nga ang Cristo amo ang ulo sang kongregasyon,+ kay sia ang manluluwas sini nga lawas. 24 Gani, subong nga ang kongregasyon nagapasakop sa Cristo, ang mga asawa dapat man magpasakop sa ila bana sa tanan nga butang. 25 Mga bana, padayon nga higugmaa ang inyo asawa,+ subong nga ang Cristo naghigugma man sang kongregasyon kag naghatag sang iya kaugalingon tungod sa sini,+ 26 agod mapakabalaan niya ini, paagi sa pagtinlo sini sa tubig, nga amo ang pulong sang Dios.+ 27 Ginhimo niya ini agod ang kongregasyon mangin matahom sa iya panulok, wala sing higko ukon kurinot ukon bisan anong butang nga kaangay sini,+ kundi balaan kag wala sing depekto.+

28 Sing kaanggid, ang mga bana dapat maghigugma sang ila asawa kaangay sang ila kaugalingon nga lawas. Ang nagahigugma sang iya asawa nagahigugma sang iya kaugalingon, 29 kay wala sing tawo nga nagadumot sa iya kaugalingon nga lawas,* kundi ginapakaon kag ginapalangga niya ini, subong sang ginahimo sang Cristo sa kongregasyon, 30 bangod kita mga bahin sang iya lawas.+ 31 “Bangod sini bayaan sang lalaki ang iya amay kag ang iya iloy kag magahiusa* sia sa iya asawa, kag sila nga duha mangin isa ka unod.”+ 32 Ining sagrado nga likom+ importante gid. Karon nagahambal ako tuhoy sa Cristo kag sa kongregasyon.+ 33 Gani, ang kada isa sa inyo dapat maghigugma sang iya asawa+ kaangay sang paghigugma niya sang iya kaugalingon. Subong man, ang asawa dapat may tudok nga pagtahod sa iya bana.+

6 Mga anak, mangin matinumanon kamo sa inyo mga ginikanan+ sa paagi nga kalahamut-an sa Ginuo, kay matarong ini. 2 “Padunggi ang imo amay kag ang imo iloy”;+ amo ini ang nahauna nga sugo nga may saad: 3 “Agod mag-uswag ka* kag magkabuhi ka sing malawig sa duta.” 4 Kag mga amay, indi ninyo pagpaakiga ang inyo mga anak,+ kundi padayon sila nga padakua sa disiplina+ kag laygay* ni Jehova.*+

5 Mga ulipon, mangin matinumanon kamo sa inyo mga agalon sa duta,+ nga may kahadlok, pagtahod kag pagkasinsero sa inyo tagipusuon, kaangay sa pagtuman ninyo sa Cristo, 6 indi lang kon may nagatan-aw para pahamut-an ang tawo,+ kundi subong mga ulipon sang Cristo, nga nagahimo sang kabubut-on sang Dios sing bug-os kalag.*+ 7 Alagda sing kinabubut-on ang inyo agalon. Kabiga nga si Jehova*+ ang inyo ginaalagad, kag indi ang mga tawo, 8 kay nahibaluan ninyo nga si Jehova*+ amo ang magapadya sang inyo maayo nga hinimuan, ulipon man kamo ukon hilway nga tawo. 9 Kag kamo nga mga agalon, dumduma man ninyo ini kon nagapakig-angot kamo sa inyo mga ulipon. Indi na ninyo sila pagpahuga, kay nakahibalo kamo nga ang ila kag ang inyo Agalon yara sa langit,+ kag wala sia sing ginapasulabi.

10 Sa katapusan, padayon kamo nga magbakod+ paagi sa Ginuo kag sa gahom sang iya kusog. 11 Isuklob ang kompleto nga hinganib+ halin sa Dios agod makatindog kamo sing malig-on batok sa tuso nga mga pahito sang Yawa; 12 bangod nagapakig-away* kita,+ indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, kag batok sa puersa sang malaut nga mga espiritu+ sa langitnon nga mga lugar. 13 Bangod sini isuklob ninyo ang kompleto nga hinganib halin sa Dios,+ agod kon mag-abot ang malaut nga adlaw makabato kamo, kag sa tapos ninyo mahimo ini tanan, makatindog kamo sing malig-on.

14 Gani, magtindog kamo sing malig-on nga may paha sing kamatuoran sa inyo hawak,+ may panaming sang pagkamatarong sa dughan,+ 15 kag may kahanda sa pagbantala sing maayong balita sang paghidait nga nasuksok sa inyo mga tiil.+ 16 Luwas sa sini, gamita ninyo ang daku nga taming sang pagtuo,+ nga paagi sini mapalong ninyo ang tanan nga nagadabadaba nga baslay* sang isa nga malauton.+ 17 Batuna man ninyo ang helmet sang kaluwasan,+ kag ang espada sang espiritu, nga amo ang pulong sang Dios,+ 18 samtang padayon kamo nga nagapangamuyo+ sa tagsa ka higayon paagi sa espiritu,+ nga nagagamit sang tanan nga sahi sang pangamuyo kag pag-ampo. Bangod sini, magpabilin kamo nga nagamata, nga nagaampo para sa tanan nga balaan. 19 Mangamuyo man kamo para sa akon, agod ihatag sa akon ang pulong kon maghambal ako, para mabantala ko nga may kaisog ang tuhoy sa sagrado nga likom sang maayong balita,+ 20 nga tungod sini nagapanghikot ako subong embahador+ nga nakadenahan, kag agod mahambal ko nga may kaisog ang dapat ko ihambal.

21 Karon agod mahibaluan man ninyo ang tuhoy sa akon kahimtangan kag kon ano ang akon ginahimo, isugid ini tanan sa inyo ni Tiquico,+ isa ka hinigugma nga utod kag matutom nga ministro sa Ginuo.+ 22 Tungod sini, ginapadala ko sia dira sa inyo agod mahibaluan ninyo ang amon ginahimo kag agod malugpayan niya ang inyo tagipusuon.

23 Kabay nga ang mga kauturan may paghidait kag gugma nga may pagtuo halin sa Dios nga aton Amay kag kay Ginuong Jesucristo. 24 Kabay nga ang wala tupong nga kaayo mangin yara sa tanan nga may matuod nga gugma sa aton Ginuong Jesucristo.