ANG IKADUHA NGA SULAT PARA KAY TIMOTEO

1 Halin kay Pablo, nga apostol ni Cristo Jesus paagi sa kabubut-on sang Dios suno sa saad nga kabuhi paagi kay Cristo Jesus,+ 2 para kay Timoteo, nga hinigugma nga anak:+

Kabay nga mabaton mo ang wala tupong nga kaayo, kaluoy, kag paghidait halin sa Dios nga aton Amay kag kay Cristo Jesus nga aton Ginuo.

3 Nagapasalamat ako sa Dios, nga sa iya nagahimo ako sang sagrado nga pag-alagad upod ang matinlo nga konsiensia, subong sang ginhimo sang akon mga katigulangan, gani wala ko ikaw ginakalimtan sa akon mga pag-ampo sa adlaw kag gab-i. 4 Kon madumduman ko ang imo mga luha, ginahandum ko nga makita ka, agod mapuno ako sing kalipay. 5 Kay ginadumdom ko ang imo pagtuo nga indi salimpapaw,+ nga una ko nga nakita sa imo lola nga si Loida kag sa imo iloy nga si Eunice, kag nagasalig ako nga makita man ini sa imo.

6 Bangod sini ginapahanumdom ko ikaw nga padabdabon mo kaangay sang kalayo ang dulot sang Dios nga nabaton mo paagi sa pagtungtong ko sang akon mga kamot sa imo.+ 7 Kay ginhatagan kita sang Dios indi sing espiritu sang katalaw,+ kundi sang gahom+ kag sang gugma kag sang maligdong nga hunahuna. 8 Gani indi pag-ikahuya ang panaksi tuhoy sa aton Ginuo+ ukon tuhoy sa akon nga isa ka bilanggo tungod sa iya, kundi magpakigbahin ka sa pag-antos sang kapiutan+ para sa maayong balita paagi sa pagsalig sa gahom sang Dios.+ 9 Ginluwas niya kita kag gintawag kita sa isa ka balaan nga pagtawag,+ indi bangod sa aton mga buhat, kundi bangod sa iya kaugalingon nga katuyuan kag wala tupong nga kaayo+ nga madugay na nga ginhatag sa aton paagi kay Cristo Jesus. 10 Apang karon ginhimo na ini nga maathag gid paagi sa pagpadayag sang aton Manluluwas, si Cristo Jesus,+ nga nagdula sang kamatayon+ kag nagpaathag sa aton paagi sa maayong balita+ kon paano matigayon ang kabuhi+ kag pagkadimadinulunton,+ 11 nga sa sini gintangdo ako nga manugbantala, apostol, kag manunudlo.+

12 Amo ini kon ngaa ginaantos ko man ining mga butang,+ apang wala ako mahuya.+ Kay nakilala ko ang Isa nga akon ginatuuhan, kag nagasalig ako nga sarang niya mabantayan ang gintugyan ko sa iya tubtob sa amo nga adlaw.+ 13 Padayon nga sunda ang talaksan* sang maayo* nga mga pulong+ nga nabatian mo sa akon nga may pagtuo kag gugma nga resulta sang pagkanahiusa kay Cristo Jesus. 14 Bantayi ining maayo nga butang nga ginsalig sa imo paagi sa balaan nga espiritu nga yara sa aton.+

15 Nakahibalo ka nga gintalikdan ako sang madamo nga tawo sa probinsia sang Asia,*+ lakip sa ila sanday Figelo kag Hermogenes. 16 Kabay nga kaluuyan sang Ginuo ang panimalay ni Onesiforo,+ kay ginapaumpawan niya ako pirme, kag wala niya ginakahuya ang akon mga kadena sang pagkabilanggo. 17 Sa baylo, sang didto sia sa Roma, ginpangita gid niya ako kag nakita niya ako. 18 Kabay nga kaluuyan sia sang Ginuong Jehova* sa amo nga adlaw. Kag nahibaluan mo gid ang tanan nga pag-alagad nga ginhimo niya sa Efeso.

2 Gani, anak ko,+ padayon ka nga magbakod paagi sa wala tupong nga kaayo nga yara kay Cristo Jesus; 2 kag itugyan ang mga butang nga nabatian mo sa akon, nga ginpamatud-an sang madamo nga saksi,+ sa matutom nga mga lalaki agod mangin kalipikado gid sila nga itudlo ini sa iban. 3 Subong isa ka maayo nga soldado+ ni Cristo Jesus, magpakigbahin ka sa pag-antos sang kabudlayan.+ 4 Wala sing soldado nga nadalahig sa negosyo* sang kabuhi, agod matigayon niya ang kahamuot sang isa nga naglista sa iya subong soldado. 5 Kag bisan sa hinampang, indi makabaton sang purongpurong ang isa nga nag-entra kon wala niya ginsunod ang mga pagsulundan.+ 6 Ang nagapangabudlay sing lakas nga mangunguma dapat amo ang una nga makaambit sa mga bunga. 7 Hunahunaa pirme ang akon ginasiling; ang Ginuo magahatag sa imo sang paghangop* sa tanan nga butang.

8 Dumduma nga si Jesucristo ginbanhaw+ kag kaliwat* sia ni David,+ suno sa maayong balita nga akon ginabantala,+ 9 nga tungod sini nagaantos ako kag nabilanggo subong isa ka kriminal.+ Apang, ang pulong sang Dios wala magapos.+ 10 Bangod sini padayon ako nga nagabatas para sa mga pinili,+ agod matigayon man nila ang kaluwasan paagi kay Cristo Jesus, upod ang wala sing katapusan nga himaya. 11 Ini nga pinamulong masaligan: Kon mapatay kita kaupod niya, mabuhi man kita kaupod niya;+ 12 kon padayon kita nga magbatas, magagahom man kita subong mga hari kaupod niya;+ kon ipanghiwala naton sia, ipanghiwala man niya kita;+ 13 kon kita indi matutom, nagapabilin sia nga matutom, kay indi niya mapanghiwala ang iya kaugalingon.

14 Padayon nga ipahanumdom sa ila ini nga mga butang, kag hatagi sila sing instruksion* sa atubangan sang Dios nga indi magbais tuhoy sa mga tinaga. Ini wala gid sing pulos kay nagahalit* ini sa mga nagapamati. 15 Himua ang imo bug-os nga masarangan nga ipresentar ang imo kaugalingon nga kalahamut-an sa Dios, isa ka manugpangabudlay nga wala sing ginakahuya, kag ginagamit sing husto ang pulong sang kamatuoran.+ 16 Apang isikway ang wala sing pulos nga mga hambalanon nga nagapakahuya sa Dios,+ kay ini nagadul-ong sa tanan nga sahi sang indi diosnon nga pamatasan, 17 kag magalapta ini subong sang gangrena. Lakip sanday Himeneo kag Fileto+ 18 sa mga nagsipak sa kamatuoran, nga nagasiling nga ang pagkabanhaw nahanabo na,+ kag ginaguba nila ang pagtuo sang iban. 19 Wala sapayan sina, ang malig-on nga sadsaran sang Dios nagapabilin nga nagatindog, nga may nakasulat, “Kilala ni Jehova* ang mga ginapanag-iyahan niya,”+ kag, “Ang tagsatagsa nga nagatawag sa ngalan ni Jehova*+ magbiya sa pagkadimatarong.”

20 Sa isa ka daku nga balay may mga kagamitan* nga indi lamang bulawan kag pilak kundi kahoy kag daga man, kag ang iban para sa dungganon nga paggamit apang ang iban para sa indi dungganon nga paggamit. 21 Gani kon ang isa magpalayo sa mga kagamitan nga para sa indi dungganon nga paggamit, mangin instrumento* sia para sa dungganon nga paggamit, ginpakabalaan, mapuslanon sa nagapanag-iya sa iya, kag handa para sa tagsa ka maayong buhat. 22 Gani palagyo ka sa mga kailigbon sang pagkapamatan-on, apang tinguhai nga ipakita ang pagkamatarong, pagtuo, gugma, kag paghidait. Himua ini upod sa mga nagasalig sa Ginuo bangod may matinlo sila nga tagipusuon.

23 Isikway man ang binuang kag wala sing pulos nga mga debate,+ kay nakahibalo ka nga nagaresulta lang ini sa inaway. 24 Kay ang ulipon sang Ginuo indi kinahanglan makig-away, kundi kinahanglan mangin malulo* sa tanan,+ kalipikado sa pagpanudlo, nagapugong sang kaugalingon kon nahimuan sing sala,+ 25 kag nagatudlo nga may kalulo sa mga masinupakon.+ Basi tugutan sang Dios nga maghinulsol sila* nga magadul-ong sa sibu nga ihibalo tuhoy sa kamatuoran,+ 26 kag makamarasmas sila kag makapalagyo sa siod sang Yawa, sanglit nadakpan niya sila nga buhi para himuon ang iya kabubut-on.+

3 Apang hibalua ini, nga sa katapusan nga mga adlaw+ magaabot ang makahalanguyos nga mga tion nga mabudlay atubangon. 2 Kay ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, manugpasipala, indi matinumanon sa mga ginikanan, indi mapinasalamaton, indi mainunungon, 3 indi mapinalanggaon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, 4 maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios, 5 daw diosnon kon tulukon apang wala sing impluwensia ang gahom sini sa ila kabuhi.+ Magpalayo ka sa ila. 6 Sa ila naghalin ang mga tawo nga nagadaya sa mga panimalay sa tuso nga paagi kag nagapamihag sang maluya nga mga babayi nga nabug-atan sang ila mga sala, kag nagapadala sa nagkalainlain nga kailigbon, 7 pirme nagatuon apang wala gid makadangat sa sibu nga ihibalo tuhoy sa kamatuoran.

8 Subong nga si Jannes kag si Jambres nagpamatok kay Moises, padayon man sila nga nagapamatok sa kamatuoran. Nahalitan gid ang hunahuna sini nga mga tawo, kag wala sila ginakahamut-an sang Dios kay wala sila nagalakat suno sa pagtuo. 9 Apang, indi na magpadayon ang ila ginahimo, kay ang ila kabuangan mangin maathag gid sa tanan, subong sang kabuangan sining duha ka lalaki.+ 10 Apang ginsunod mo sing maayo ang akon panudlo, ang akon dalanon sang kabuhi,+ ang akon katuyuan, ang akon pagtuo, ang akon pagkamapinasensiahon, ang akon gugma, kag ang akon pagbatas. 11 Naagihan mo man ang mga paghingabot kag pag-antos nga akon naagihan sa Antioquia,+ Iconio,+ kag Listra.+ Ginbatas ko ini nga mga paghingabot, kag sa sini tanan ginluwas ako sang Ginuo.+ 12 Ang matuod, ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.+ 13 Apang ang malaut nga mga tawo kag mga impostor magalain pa gid, nga nagapatalang kag ginapatalang.+

14 Apang, magpadayon ka sa mga butang nga imo natun-an kag nabuyok ka nga patihan,+ nga nakahibalo kon kay sin-o mo natun-an ini 15 kag kutob sa pagkalapsag+ nahibaluan mo ang balaan nga mga sinulatan,+ nga makapaalam sa imo para sa kaluwasan paagi sa pagtuo kay Cristo Jesus.+ 16 Ang pagsulat sa bug-os nga Kasulatan gintuytuyan sang Dios+ kag mapuslanon sa pagpanudlo,+ sa pagsabdong, sa pagtadlong, sa pagdisiplina sa pagkamatarong,+ 17 agod ang tawo sang Dios may ikasarang gid, kag nasangkapan sing bug-os para sa tagsa ka maayong buhat.

4 Sa atubangan sang Dios kag ni Cristo Jesus, nga magahukom+ sa mga buhi kag sa mga patay,+ kag paagi sa iya pagpadayag+ kag sa iya Ginharian,+ ginasugo ko ikaw: 2 Ibantala ang pulong;+ mangin masako ka sa sini sa maayo nga panahon kag sa mabudlay nga panahon; magsabdong ka,+ magsaway, kag maglaygay nga may bug-os nga pagkamapinasensiahon kag kalantip sa pagpanudlo.+ 3 Kay magaabot ang tion nga ang mga tawo indi magpamati sa maayo* nga panudlo.+ Sundon nila ang ila kailigbon kag palibutan ang ila kaugalingon sang mga manunudlo nga nagapakalam sang ila mga dulunggan.*+ 4 Indi sila magpamati sa kamatuoran kag magahatag sila sang igtalupangod sa butig nga mga sugilanon. 5 Apang ikaw, hupti ang imo ikasarang sa paghunahuna sing maayo sa tanan nga butang, batasa ang kabudlayan,+ himua ang hilikuton sang isa ka ebanghelisador, kag tumana sing bug-os ang imo ministeryo.+

6 Kay ginabubo na ako kaangay sang isa ka dulot nga ilimnon,+ kag malapit na lang ako mahilway.+ 7 Nakapakig-away na ako sang maayo nga pagpakig-away,+ natapos ko ang dalaganon,+ kag natuman ko na ang pagtuo. 8 Sugod karon, natigana sa akon ang purongpurong sang pagkamatarong,+ nga ihatag sa akon sang Ginuo, ang matarong nga hukom,+ subong padya sa amo nga adlaw,+ apang indi lamang sa akon kundi sa tanan man nga nagahandum sang iya pagpadayag.

9 Himua ang imo bug-os nga masarangan nga magkari sa akon sa indi madugay, 10 kay ginbayaan ako ni Demas+ bangod ginhigugma niya ini nga sistema sang mga butang,* kag nagkadto sa Tesalonica. Si Cresente didto sa Galacia, kag si Tito naman yara sa Dalmacia. 11 Si Lucas lamang ang kaupod ko. Upda si Marcos, kay daku ang iya nabulig sa akon sa ministeryo. 12 Ginpakadto ko man si Tiquico+ sa Efeso. 13 Kon magkari ka, dalha ang kunop nga ginbilin ko kay Carpo didto sa Troas, kag ang mga linukot, ilabi na ang mga pergamino.*

14 Si Alejandro nga manugsalsal sing saway naghimo sang madamo nga halit sa akon. Si Jehova* ang magabalos sa iya suno sa iya ginhimo.+ 15 Mag-andam ka man sa iya, kay ginpamatukan gid niya sing tuman ang aton mensahe.

16 Sa akon nahauna nga pagpangapin wala sing nagdampig sa akon, kundi tanan sila nagbiya sa akon—kabay nga indi sila manabat sa sini. 17 Apang ang Ginuo nagtindog sa tupad ko kag nagpabakod sa akon, agod paagi sa akon matuman sing bug-os ang pagbantala kag mabatian ini sang tanan nga pungsod;+ kag ginluwas ako sang Ginuo sa baba sang leon.+ 18 Luwason ako sang Ginuo sa tanan nga kalautan kag luwason niya ako para sa iya langitnon nga Ginharian.+ Mangin sa iya ang himaya tubtob sa wala sing katubtuban. Kabay pa.*

19 Ipalab-ot ninyo ang akon pangamusta kay Prisca kag kay Aquila+ kag sa panimalay ni Onesiforo.+

20 Si Erasto+ nagpabilin sa Corinto, apang ginbilin ko si Trofimo+ sa Mileto kay nagmasakit sia. 21 Himua ang bug-os mo nga masarangan nga makaabot ka antes ang tigtulugnaw.

Nagapangamusta sa imo si Eubulo, kag amo man sanday Pudente, Lino, Claudia, kag ang tanan nga kauturan.

22 Ang Ginuo mangin yara sa imo samtang ginapakita mo ang maayo nga mga kinaiya. Ang iya wala tupong nga kaayo mangin yara sa inyo.