SULAT PARA SA MGA HEBREO

1 Sang una nagpakighambal ang Dios sa aton mga katigulangan paagi sa mga manalagna sa madamo nga higayon kag sa madamo nga paagi.+ 2 Karon sa katapusan sini nga mga adlaw nagpakighambal sia sa aton paagi sa isa ka Anak,+ nga gintangdo niya nga manunubli sang tanan nga butang,+ kag paagi sa iya ginhimo niya ang mga sistema sang mga butang.*+ 3 Sia ang banaag sang himaya sang Dios+ kag ang sibu nga larawan sang iya mismo kinaugali,+ kag padayon niya nga ginapaluntad ang tanan nga butang paagi sa iya gamhanan nga pulong. Kag sa tapos sia makahimo sang pagpaninlo para sa aton mga sala,+ nagpungko sia sa tuo sang Halangdon sa kahitaasan.+ 4 Gani nangin maayo pa sia sangsa mga anghel+ bangod nagpanubli sia sang ngalan nga mas maayo gid sangsa ila ngalan.+

5 Halimbawa, sin-o sa mga anghel ang ginsilingan sang Dios: “Ikaw ang akon anak; karon nga adlaw ako nangin imo amay”?+ Kag sa liwat: “Mangin amay niya ako, kag mangin anak ko sia”?+ 6 Apang tuhoy sa tion nga ipadala niya liwat ang iya Panganay+ sa napuy-an nga duta, nagsiling sia: “Kag ang tanan nga anghel sang Dios magyaub sa iya.”*

7 Subong man, tuhoy sa mga anghel nagsiling sia: “Ginhimo niya ang iya mga anghel nga gamhanan nga mga puersa,*+ kag ang iya mga alagad nga dabdab sang kalayo.”+ 8 Apang tuhoy sa Anak, nagsiling sia: “Ang Dios amo ang imo trono+ tubtob sa wala sing katubtuban, kag ang setro sang imo Ginharian amo ang setro sang katarungan. 9 Ginahigugma mo ang pagkamatarong, kag ginadumtan mo ang pagkamalinapason. Gani ang Dios, nga imo Dios, naghaplas sa imo+ sing lana sang kalipay labaw sa imo kaupdanan.”+ 10 Kag: “Sa ginsuguran ikaw, O Ginuo, ginpasad mo ang mga sadsaran sang duta, kag ang mga langit binuhatan sang imo mga kamot. 11 Magataliwan sila, apang ikaw magapabilin; kag kaangay sang panapton magadaan sila, 12 kag piuron mo sila kaangay sang kunop, kaangay sang panapton, kag magabag-o sila. Apang ikaw amo man gihapon, kag wala ka sing katapusan.”+

13 Apang sin-o sa mga anghel ang ginsilingan niya: “Pungko ka sa akon tuo tubtob mahimo ko ang imo mga kaaway nga palatungan sang imo mga tiil”?+ 14 Indi bala sila tanan mga espiritu para sa balaan nga pag-alagad,*+ nga ginpadala agod mag-alagad sa mga magapanubli sang kaluwasan?

2 Amo kon ngaa kinahanglan hatagan naton sing labaw pa sa kinaandan nga igtalupangod ang mga butang nga aton nabatian,+ agod indi gid kita maanod palayo.+ 2 Kay kon ang pulong nga ginhambal paagi sa mga anghel+ napamatud-an nga malig-on, kag ang tagsa ka paglapas kag indi matinumanon nga buhat nasilutan nahisanto sa katarungan,+ 3 paano kita makapalagyo kon ginapatumbayaan naton ang subong sini kadaku nga kaluwasan?+ Kay una ini nga ginbantala sang aton Ginuo+ kag ginpamatud-an sa aton sang mga nakabati sa iya, 4 samtang ang Dios nagbuylog sa pagpanaksi paagi sa mga tanda, mga kalatingalahan, nagkalainlain nga milagro,+ kag paagi sa balaan nga espiritu nga ginpanagtag suno sa iya kabubut-on.+

5 Kay wala niya ginpasakop sa mga anghel ang magaabot nga napuy-an nga duta,+ nga tuhoy sa sini nagahambal kami. 6 Apang sa isa ka duog may isa ka saksi nga nagsiling: “Ano gid bala ang tawo nga ginadumdom mo sia, ukon ang anak sang tawo nga ginaatipan mo sia?+ 7 Ginhimo mo sia nga kubos diutay sa mga anghel; ginkoronahan mo sia sing himaya kag dungog, kag gintangdo sia sa imo mga binuhatan. 8 Ginpasakop mo ang tanan nga butang sa idalom sang iya mga tiil.”+ Paagi sa pagpasakop sang tanan nga butang sa iya,+ ang Dios wala magbilin sang bisan ano nga butang nga wala mapasakop sa iya.+ Apang karon, wala pa naton makita nga napasakop sa iya ang tanan nga butang.+ 9 Apang nakita naton si Jesus, nga ginhimo nga kubos diutay sa mga anghel,+ ginkoronahan na karon sing himaya kag dungog bangod nag-antos sia tubtob sa kamatayon,+ agod paagi sa wala tupong nga kaayo sang Dios matilawan niya ang kamatayon para sa tagsa ka tawo.+

10 Agod madala ang madamo nga anak sa himaya,+ ang isa nga tungod sa iya kag paagi sa iya ang tanan nga butang nagluntad, nagakaigo nga maghimpit sa Pangulo nga Ahente* sang ila kaluwasan+ paagi sa mga pag-antos.+ 11 Kay ang isa nga nagapabalaan kag sila nga ginapakabalaan+ isa lang ang ginhalinan,+ kag bangod sini wala sia mahuya nga tawgon sila nga kauturan,+ 12 kay nagasiling sia: “Ipahayag ko ang imo ngalan sa akon mga kauturan; dayawon ko ikaw sa tunga sang kongregasyon paagi sa ambahanon.”+ 13 Kag nagsiling pa sia: “Magasalig ako sa iya.”+ Kag nagdugang pa sia: “Ako kag ang kabataan, nga ginhatag ni Jehova* sa akon.”+

14 Gani, sanglit ang “kabataan” umalambit sa dugo kag unod, sia man nag-ambit sini nga mga butang,+ agod paagi sa iya kamatayon malaglag niya ang isa nga may ikasarang sa pagpahanabo sing kamatayon,+ nga amo ang Yawa,+ 15 kag agod mahilway* niya ang tanan nga naulipon sa bug-os nila nga kabuhi tungod sa ila kahadlok sa kamatayon.+ 16 Kay ang matuod, indi ang mga anghel ang ginabuligan niya, kundi ang kaliwat* ni Abraham.+ 17 Gani, kinahanglan mangin kaangay sia sa iya “mga kauturan” sa tanan nga paagi,+ agod mangin maluluy-on sia kag matutom nga mataas nga saserdote sa mga butang may kaangtanan sa Dios, agod magdulot sang nagapasag-uli nga halad*+ para sa mga sala sang katawhan.+ 18 Bangod sia mismo nag-antos sang gintilawan sia,+ mahangpan niya ang kahimtangan sang mga ginatilawan kag buligan niya sila.+

3 Gani, balaan nga mga kauturan, nga mga umalambit sa langitnon nga pagtawag,*+ hunahunaa ninyo sing maayo ang aton ginakilala* nga apostol kag mataas nga saserdote—si Jesus.+ 2 Matutom sia sa Isa nga nagtangdo sa iya,+ kaangay kay Moises nga matutom man sa bug-os nga panimalay sinang Isa.+ 3 Kay mahimayaon sia*+ sangsa kay Moises, sanglit ang nagtukod sang balay may labi pa nga dungog sangsa balay nga iya gintukod. 4 Ang matuod, ang tagsa ka balay may nagtukod, apang ang nagtukod sang tanan nga butang amo ang Dios. 5 Si Moises matutom nga alagad sa bug-os nga panimalay sinang Isa. Ang iya pag-alagad pamatuod* sang mga butang nga ipahayag sa ulihi, 6 apang ang Cristo matutom nga anak+ sa panimalay sang Dios. Kita ang Iya panimalay,+ kon ginahuptan naton sing malig-on ang aton kahilwayan sa paghambal kag ang aton ginapabugal nga paglaum tubtob sa katapusan.

7 Gani, subong sang ginasiling sang balaan nga espiritu,+ “Karon kon mamati kamo sa iya, 8 indi pagpatig-aha ang inyo tagipusuon kaangay sadto sang napukaw ang nagabalingaso nga kaakig, subong sang natabo ang pagtilaw sa kamingawan,+ 9 didto gintilawan ako sang inyo mga katigulangan, bisan pa nakita nila ang akon mga binuhatan sa sulod sang 40 ka tuig.+ 10 Bangod sini naakig ako sa sini nga kaliwatan kag nagsiling: ‘Pirme nagatalang ang ila tagipusuon, kag wala nila ginasunod ang akon mga dalanon.’ 11 Gani sa akon kaakig nagpanumpa ako: ‘Indi gid sila makasulod sa akon kapahuwayan.’”+

12 Mga kauturan, mag-andam kamo kay basi may isa sa inyo nga tubuan sang malaut nga tagipusuon nga wala sing pagtuo bangod sa pagpalayo sa buhi nga Dios;+ 13 apang padayon kamo nga magpalig-unay kada adlaw, samtang matawag pa ini nga “Karon nga adlaw,”+ agod wala sing isa sa inyo nga magtig-a bangod sa madaya nga gahom sang sala. 14 Kay sa pagkamatuod mangin mga umalambit lamang kita sang Cristo kon ginahuptan naton sing malig-on tubtob sa katapusan ang pagsalig nga yara sa aton sa ginsuguran.+ 15 Kaangay ini sang ginasiling, “Karon kon mamati kamo sa iya, indi pagpatig-aha ang inyo tagipusuon kaangay sadto sang napukaw ang nagabalingaso nga kaakig.”+

16 Kay sin-o ang nakabati apang nagpukaw sa iya sa nagabalingaso nga kaakig? Sa pagkamatuod, indi bala ang tanan nga naggua sa Egipto sa idalom sang pagpanguna ni Moises?+ 17 Dugang pa, kay sin-o naakig ang Dios sa sulod sang 40 ka tuig?+ Indi bala sa mga nagpakasala, nga nagkalamatay sa kamingawan?+ 18 Kag kay sin-o sia nagpanumpa nga indi sila makasulod sa iya kapahuwayan? Indi bala sa mga indi matinumanon? 19 Gani nakita naton nga indi sila makasulod bangod wala sila sing pagtuo.+

4 Gani, sanglit may saad pa nga makasulod sa iya kapahuwayan, magbantay nga wala sing isa sa inyo nga indi makasulod sa sini.+ 2 Kay ang maayong balita ginpahayag man sa aton,+ subong man sa ila; apang wala sila makabenepisyo sa pulong nga ila nabatian, bangod ang ila pagtuo indi kaangay sa pagtuo sang mga nagpamati. 3 Kay kita nga nagtuo nakasulod sa kapahuwayan, subong sang iya ginsiling: “Gani sa akon kaakig nagpanumpa ako, ‘Indi gid sila makasulod sa akon kapahuwayan,’”+ bisan pa natapos na ang iya mga binuhatan halin sang pagtukod sa kalibutan.+ 4 Kay sa isa ka bahin nagsiling sia tuhoy sa ikapito nga adlaw sing subong sini: “Kag ang Dios nagpahuway sa ikapito nga adlaw sa tanan niya nga binuhatan,”+ 5 kag nagsiling man sia: “Indi gid sila makasulod sa akon kapahuwayan.”+

6 Gani, sanglit ang iban magasulod pa sa sini, kag ang mga una nga ginpahayagan sang maayong balita wala makasulod sa sini bangod sang pagkadimatinumanon,+ 7 nagtalana sia liwat sang isa ka adlaw paagi sa pagsiling pagligad sang malawig nga tion sa salmo ni David, “Karon nga adlaw”; subong sang nasiling na, “Karon kon mamati kamo sa iya, indi pagpatig-aha ang inyo tagipusuon.”+ 8 Kay kon gintuytuyan sila ni Josue+ pasulod sa isa ka lugar sang kapahuwayan, wala na kuntani maghambal sang ulihi ang Dios tuhoy sa iban pa nga adlaw. 9 Gani may nabilin pa nga kapahuwayan kaangay sa adlaw nga inugpahuway para sa katawhan sang Dios.+ 10 Kay ang tawo nga nakasulod sa kapahuwayan sang Dios nakapahuway man sa iya kaugalingon nga mga buhat, subong nga ang Dios nagpahuway man sa iya mga buhat.+

11 Gani himuon naton ang aton bug-os nga masarangan nga makasulod sa sina nga kapahuwayan, agod wala sing magsunod sa amo man nga pagkadimatinumanon.+ 12 Kay ang pulong sang Dios buhi kag gamhanan+ kag matalom pa sa bisan ano nga espada+ nga duha sing sulab kag nagadulot tubtob sa paghamulag sang kalag* kag espiritu,* kag sang mga lutalutahan sa utok sa tul-an, kag sarang makahantop sang mga panghunahuna kag mga tinutuyo sang tagipusuon. 13 Kag wala sing tinuga nga natago sa iya panulok,+ kundi ang tanan nga butang hublas kag dayag gid sa iya mga mata, kag manabat kita sa iya.+

14 Gani, sanglit may daku kita kag mataas nga saserdote nga nagkadto sa langit, si Jesus nga Anak sang Dios,+ huptan naton ang aton pangpubliko nga pagpahayag sing pagtuo sa iya.+ 15 Kay kita may mataas nga saserdote nga makapakita sing kahanuklog sa aton mga kaluyahon,+ ang isa nga natilawan sa tanan nga paagi kaangay sa aton, apang wala sing sala.+ 16 Gani, magpalapit kita sa trono sang wala tupong nga kaayo nga may kahilwayan sa paghambal,+ agod matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.

5 Ang tagsa ka tawo nga gintangdo bilang mataas nga saserdote nagaalagad sa mga tawo sa mga butang may kaangtanan sa ila pagsimba sa Dios,+ agod maghalad sang mga dulot kag mga halad para sa ila mga sala.+ 2 Makapakita sia sing kaawa* sa mga wala sing nahibaluan kag nakasayop* bangod sia may kaluyahon man, 3 kag bangod sina kinahanglan maghalad sia para sa iya mga sala subong sang ginahimo niya para sa katawhan.+

4 Indi mabaton sang tawo ini nga kadungganan suno sa iya luyag, luwas lang kon tawgon sia sang Dios, kaangay kay Aaron sadto.+ 5 Sa amo man, wala ginhimaya sang Cristo ang iya kaugalingon+ paagi sa paghimo sang iya kaugalingon nga mataas nga saserdote, kundi ginhimaya sia sang Isa nga nagsiling sa iya: “Ikaw ang akon anak; karon nga adlaw, ako nangin imo amay.”+ 6 Nagsiling man sia sa isa pa ka bahin, “Ikaw saserdote sa wala sing katubtuban kaangay ni Melquisedec.”+

7 Sang nagakabuhi ang Cristo sa duta nag-ampo sia kag nagpangabay man sa Isa nga makaluwas sa iya sa kamatayon, nga may mabaskog nga paghibi kag mga luha,+ kag ginpamatian ang iya mga pangamuyo bangod sang iya kahadlok sa Dios. 8 Bisan pa anak sia, nakatuon sia sang pagkamatinumanon sa mga butang nga iya gin-antos.+ 9 Kag sang nahimpit na sia sa sini,+ ang tanan nga nagatuman sa iya makabaton sang wala sing katapusan nga kaluwasan paagi sa iya,+ 10 bangod gintangdo sia sang Dios nga mataas nga saserdote kaangay ni Melquisedec.+

11 Madamo kami sang masiling tuhoy sa Cristo, kag mabudlay ini ipaathag, bangod mahinay kamo sa paghangop. 12 Kay bisan pa dapat nga mga manunudlo na kamo kuntani karon, nagakinahanglan kamo liwat sang isa nga magatudlo sa inyo sugod sa nahauna nga mga butang+ sang sagrado nga mga kapahayagan sang Dios, kag nagakinahanglan kamo liwat sang gatas, indi sang matig-a nga pagkaon. 13 Kay ang tagsatagsa nga padayon nga nagainom sang gatas wala makahibalo sa pulong sang pagkamatarong, kay bata sia.+ 14 Apang ang matig-a nga pagkaon para sa hamtong nga mga tawo, nga paagi sa paggamit sang ila mga ikasarang sa paghangop* nahanas ini nga makilala ang maayo kag malain.

6 Gani, karon nga ginbiyaan na naton ang panguna nga doktrina+ tuhoy sa Cristo, magpanikasog kita padulong sa pagkahamtong,+ nga wala nagapahamtang liwat sang sadsaran, nga amo ang paghinulsol sa patay nga mga buhat kag ang pagtuo sa Dios, 2 ang panudlo tuhoy sa mga bawtismo kag ang pagtungtong sang mga kamot,+ ang pagbanhaw sa mga patay+ kag wala katapusan nga paghukom. 3 Himuon naton ini, kon itugot gid sang Dios.

4 Kon tuhoy sa mga nasanagan na+ kag nakabaton sang wala sing bayad nga dulot halin sa langit kag nangin mga umalambit sang balaan nga espiritu 5 kag nakabaton sang maayo nga pulong sang Dios kag sang mga gahom sang palaabuton nga sistema sang mga butang,* 6 apang nagbiya,+ imposible nga mapasag-uli sila liwat sa paghinulsol, bangod ginlansang nila liwat sa usok ang Anak sang Dios kag ginpakahuy-an sia sing dayag.+ 7 Kay ang duta nagabaton sang pagpakamaayo halin sa Dios sa tion nga ginasuyop sini ang ulan nga pirme nagatupa sa sini kag nagapatubo sang mga tanom nga mapuslanon sa mga nagauma sini. 8 Apang kon nagapatubo ini sang tunukon nga mga tanom kag mga gamhon, ginasikway ini kag malapit na nga pakamalauton, kag pagasunugon ini sa ulihi.

9 Apang sa inyo bahin, mga hinigugma, kumbinsido kami sa mas maayo nga mga butang, mga butang nga may kaangtanan sa kaluwasan, bisan pa nagahambal kami sa sining paagi. 10 Kay ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan+ paagi sa pag-alagad kag sa padayon nga pag-alagad sa mga balaan. 11 Apang ginahandum namon nga ang kada isa sa inyo magpakita sang amo man nga kapisan agod matigayon ninyo ang bug-os nga kapat-uran sang paglaum+ tubtob sa katapusan,+ 12 agod indi kamo mangin uyaya,+ kundi mangin mga manug-ilog sang mga nagapanubli sang mga saad paagi sa pagtuo kag paghulat sing mapinasensiahon.

13 Sang nagsaad ang Dios kay Abraham, nagpanumpa sia sa iya kaugalingon kay wala sing daku pa sa iya nga mapanumpaan niya,+ 14 nga nagasiling: “Pakamaayuhon ko gid ikaw kag padamuon ko gid ikaw.”+ 15 Gani sa tapos naghulat sing mapinasensiahon si Abraham, nabaton niya ini nga saad. 16 Kon nagapanaad ang mga tawo, nagapanumpa sila paagi sa ngalan sang mas daku sa ila. Indi masuay ang ila panaad, kay ang ila panumpa legal nga garantiya para sa ila.+ 17 Sa sini man nga paagi, sang nagpamat-od ang Dios nga ipakita sing mas maathag sa mga manunubli sang saad+ nga indi mabag-o ang iya katuyuan,* gingarantiyahan niya ini* paagi sa isa ka panumpa, 18 agod paagi sa sining duha ka butang nga indi mabag-o nga may kaangtanan sini imposible nga magbutig ang Dios,+ kita nga nagpalagyo padulong sa dalangpan mapalig-on gid nga manguyapot sa paglaum nga ginbutang sa aton atubangan. 19 Ini nga paglaum+ nga yara sa aton daw kaangay sang angkla para sa kalag,* pat-od kag malig-on, kag ini nga paglaum nagadul-ong sa aton sa sulod sa likod sang kurtina,+ 20 diin si Jesus,+ nga nangin mataas nga saserdote sa wala sing katubtuban kaangay ni Melquisedec,+ nagsulod sing una para sa aton.

7 Kay si Melquisedec, nga hari sang Salem kag saserdote sang Labing Mataas nga Dios, nagsugata kay Abraham nga nagapauli halin sa pagpamatay sa mga hari kag nagpakamaayo sa iya,+ 2 kag ginhatagan* sia ni Abraham sing ikanapulo sang tanan nga butang. Ang iya ngalan ginbadbad nga “Hari sang Pagkamatarong,” kag hari man sia sang Salem, kon sayuron, “Hari sang Paghidait.” 3 Wala mahibaluan kon sin-o ang iya amay kag iloy, wala sing rekord tuhoy sa iya kaliwatan, kon san-o sia nabun-ag kag kon san-o sia napatay, apang tungod ginhimo sia nga kaangay sa Anak sang Dios, nagapabilin sia nga saserdote sa tanan nga tion.*+

4 Natalupangdan ninyo kon daw ano kadaku ining tawo nga ginhatagan ni Abraham nga ulo sang panimalay* sang ikanapulo nga bahin sang pinakamaayo nga mga butang nga inagaw sa inaway.+ 5 Matuod, suno sa Kasuguan, ang mga anak ni Levi+ nga gintangdo bilang mga saserdote ginsugo nga mangolekta sang mga ikanapulo sa mga tawo,+ buot silingon, sa ila mga kauturan, bisan pa sila kaliwat* ni Abraham. 6 Apang ini nga tawo nga indi nila kaliwat nagkuha sang mga ikanapulo kay Abraham kag nagpakamaayo sa isa nga nakabaton sang mga saad.+ 7 Ang tanan magaugyon nga ang nagahatag sing pagpakamaayo mas daku sangsa nagabaton sini. 8 Ang mga anak ni Levi nagabaton sang mga ikanapulo kag sila mamalatyon, apang ini nga tawo nga nagabaton sang mga ikanapulo, ginapamatud-an sang Kasulatan nga sia nagakabuhi.+ 9 Kag masiling man nga bisan si Levi, nga nagabaton sang mga ikanapulo nagbayad man sang mga ikanapulo paagi kay Abraham, 10 kay wala pa sia mabun-ag subong kaliwat* ni Abraham nga iya katigulangan sang ginsugata ni Melquisedec si Abraham.+

11 Gani, kon ang kahimpitan matigayon paagi gid sa Levinhon nga pagkasaserdote+ (kay nalakip ini sa Kasuguan nga ginhatag sa katawhan), ngaa kinahanglan pa nga magtindog ang isa pa ka saserdote nga ginasiling nga kaangay ni Melquisedec+ kag indi kaangay ni Aaron? 12 Sanglit ginbag-o ang pagkasaserdote, kinahanglan man nga bag-uhon ang Kasuguan.+ 13 Kay ang tawo nga ginapatuhuyan sini naghalin sa iban nga tribo, nga wala pa gid sing bisan isa nga nakaalagad sa halaran.+ 14 Kay maathag gid nga ang aton Ginuo naghalin sa Juda,+ apang wala nagsiling si Moises nga may saserdote nga magahalin sa sini nga tribo.

15 Kag nag-athag pa gid ini sang may isa ka saserdote+ nga nag-abot kaangay ni Melquisedec,+ 16 nga nangin subong sini, indi suno sa legal nga kinahanglanon nga nasandig sa kaliwatan, kundi suno sa gahom nga naghatag sa iya sang indi malaglag nga kabuhi.+ 17 Kay amo ini ang ginsiling tuhoy sa iya subong panaksi: “Ikaw saserdote sa wala sing katubtuban kaangay ni Melquisedec.”+

18 Gani, gindula ang nauna nga kasuguan bangod maluya ini kag indi epektibo.+ 19 Kay wala sing ginhimpit ang Kasuguan,+ apang nahimo ini sang ginhatag ang mas maayo nga paglaum,+ nga paagi sini nagapalapit kita sa Dios.+ 20 Dugang pa, ginhimo ini nga may panumpa, 21 (kay ang matuod, may mga tawo nga nangin mga saserdote nga wala sing panumpa, apang ining isa nangin saserdote sa panumpa may kaangtanan sa iya sang Isa nga nanumpa, nga nagsiling: “Si Jehova* nanumpa, kag indi niya ini pagbag-uhon,* ‘Ikaw saserdote sa wala sing katubtuban’”),+ 22 gani si Jesus nangin garantiya* sang mas maayo pa nga katipan.+ 23 Dugang pa, bangod indi makapadayon ang mga saserdote sa ila pag-alagad+ kay nagakapatay sila, ginabuslan sila sang iban, 24 apang bangod nagakabuhi sia sing dayon,+ wala sing nagabulos sa iya pagkasaserdote. 25 Gani maluwas man niya sing bug-os ang mga nagapalapit sa Dios paagi sa iya, bangod padayon sia nga nagakabuhi agod mangabay para sa ila.+

26 Kay nagakaigo para sa aton nga may subong sini nga mataas nga saserdote, nga mainunungon, wala sing kalainan, wala sing dagta,+ indi kaangay sa mga makasasala, kag ginpakataas labaw sa langit.+ 27 Indi kaangay sang mataas nga mga saserdote, indi niya kinahanglan nga magdulot sang mga halad kada adlaw,+ una para sa iya kaugalingon nga mga sala kag dayon para sa mga sala sang katawhan,+ kay ginhimo niya ini sing makaisa gid lang sang ginhalad niya ang iya kaugalingon.+ 28 Kay ang Kasuguan nagatangdo sang mga tawo nga may kaluyahon bilang mataas nga mga saserdote,+ apang ang panumpa+ nga ginpanumpa pagkatapos sang Kasuguan nagtangdo sa isa ka Anak, nga ginhimpit+ sing dayon.

8 Amo ini ang panguna nga punto sang amon ginahambal: May mataas nga saserdote kita nga subong sini,+ kag nagpungko sia sa tuo sang trono sang Halangdon sa langit,+ 2 isa ka alagad* sa balaan nga lugar+ kag sa matuod nga tolda, nga ginpatindog ni Jehova,* kag indi sang tawo. 3 Kay ang tagsa ka mataas nga saserdote ginatangdo agod maghalad sang mga dulot kag mga halad; gani kinahanglan nga may ihalad man ining isa.+ 4 Kon yari sia sa duta, indi sia mangin saserdote,+ kay may mga tawo na nga nagahalad sang mga dulot suno sa Kasuguan. 5 Ang sagrado nga pag-alagad nga ginahimo sini nga mga tawo nagalaragway kag nagalandong+ sang langitnon nga mga butang;+ subong nga si Moises, sang buot na niya himuon ang tolda, ginsugo sang Dios, nga nagasiling: “Siguraduha nga himuon mo ang tanan nga butang suno sa sulundan nga ginpakita sa imo sa bukid.”+ 6 Apang nakabaton si Jesus sang mas maayo pa nga hilikuton sa pag-alagad* bangod manugpatunga+ man sia sang mas maayo nga katipan,+ nga ginpasad sing legal sa mas maayo nga mga saad.+

7 Kon ang nahauna nga katipan wala sing sayop, indi na kuntani kinahanglan ang ikaduha.+ 8 Kay nakakita sia sang sayop sa katawhan sang nagsiling sia: “‘Magaabot ang tion,’ siling ni Jehova,* ‘nga magahimo ako sing bag-o nga katipan sa panimalay sang Israel kag sa panimalay sang Juda. 9 Indi ini pareho sa katipan nga ginhimo ko anay sa ila mga katigulangan sang gindapit ko sila kag ginpagua sila sa Egipto,+ bangod wala sila nagpabilin sa akon katipan, amo nga ginpabay-an ko sila,’ siling ni Jehova.”*

10 “‘Kay amo ini ang katipan nga himuon ko sa panimalay sang Israel pagkatapos sina nga tion,’ siling ni Jehova.* ‘Ibutang ko ang akon mga kasuguan sa ila hunahuna, kag isulat ko ini sa ila tagipusuon.+ Kag mangin Dios nila ako, kag mangin katawhan ko sila.+

11 “‘Kag ang tagsa sa ila indi na gid magtudlo sa iya masigkabanwahanon kag sa iya utod, nga nagasiling: “Kilalaha si Jehova!”* Kay sila tanan magakilala sa akon, halin sa pinakakubos tubtob sa pinakadungganon. 12 Kay patawaron ko sila sa ila indi matarong nga mga buhat, kag indi ko na pagdumdumon ang ila mga sala.’”+

13 Sang nagsiling sia nga “isa ka bag-o nga katipan,” ginhimo niya nga daan ang nahauna.+ Karon ining daan kag kinaraan na malapit na lang madula.+

9 Ang nahauna nga katipan may mga kasuguan nga ginasunod para sa sagrado nga pag-alagad kag may balaan nga lugar+ diri sa duta. 2 Kay ang gintukod nga tolda may una nga hulot nga may kandelero,+ lamesa, kag ginapasundayag nga mga tinapay nga gindulot sa Dios;*+ kag ginatawag ini ang Balaan nga Lugar.+ 3 Apang sa likod sang ikaduha nga kurtina+ amo ang hulot sang tolda nga ginatawag ang Labing Balaan.+ 4 Yara sa sini ang incensario+ nga bulawan kag ang kaban sang katipan+ nga nahaklapan sing bug-os sang bulawan.+ Yara sa sulod sang kaban ang tibod nga bulawan nga may unod nga manna+ kag ang sungkod ni Aaron nga nagpanalingsing+ kag ang mga tapitapi+ sang katipan; 5 kag sa ibabaw sini may mahimayaon nga mga kerubin nga ang ila landong yara sa takop sang pagpasag-uli.*+ Apang indi ini ang tion agod ihambal sing detalyado ini nga mga butang.

6 Sang natukod na ini, ang mga saserdote regular nga nagasulod sa una nga hulot sang tolda agod himuon ang sagrado nga mga pag-alagad;+ 7 apang ang mataas nga saserdote lamang ang nagasulod sa ikaduha nga hulot sing makaisa kada tuig,+ nga may dala nga dugo,+ nga ginahalad niya para sa iya kaugalingon+ kag para sa indi hungod nga mga sala sang katawhan.+ 8 Gani gin-athag sang balaan nga espiritu nga ang dalan pasulod sa balaan nga lugar* wala pa mapadayag samtang yara pa ang una nga tolda.+ 9 Ini nga tolda isa ka ilustrasyon sang mga butang nga nagakahanabo sa sini nga tion,+ kag nahisuno sa sini nga kahimusan, ginahalad ang mga dulot kag mga halad.+ Apang, indi ini makahimpit sa konsiensia sang tawo nga nagahimo sang sagrado nga pag-alagad.+ 10 May kaangtanan lamang ini sa mga kalan-on kag sa mga ilimnon kag sa mga seremonya sang pagpaninlo* paagi sa tubig.+ Ginapatuman ini sang kasuguan may kaangtanan sa lawas+ tubtob sa gintalana nga tion sa pagtadlong sa mga butang.

11 Apang, sang nag-abot ang Cristo bilang mataas nga saserdote sang maayong mga butang nga natuman na, nagsulod sia sa mas daku kag mas himpit nga tolda nga wala ginhimo sang mga kamot sang tawo, kon sayuron, indi sa sini nga tinuga. 12 Nagsulod sia sa balaan nga lugar sing makaisa gid lang, apang indi dugo sang mga kanding kag sang mga torite nga baka ang iya dala, kundi ang iya kaugalingon nga dugo,+ kag nagtigayon sia sang wala sing katapusan nga pagtubos* para sa aton.+ 13 Kay kon ang dugo sang mga kanding kag sang mga toro+ nga baka kag ang abo sang bakiya* nga baka nga ginsabwag sa mga nadagtaan makapatinlo sa tawo,+ 14 indi bala nga labi pa ang dugo sang Cristo,+ nga paagi sa wala sing katapusan nga espiritu naghalad sang iya kaugalingon nga wala sing depekto sa Dios, nagatinlo sang aton konsiensia sa patay nga mga buhat+ agod makahimo kita sang sagrado nga pag-alagad sa buhi nga Dios?+

15 Gani sia ang manugpatunga sang isa ka bag-o nga katipan,+ agod ang mga gintawag makabaton sang saad nga wala sing katapusan nga palanublion.+ Nangin posible ini tanan bangod sang iya kamatayon, nga paagi sini nahilway sila paagi sa gawad+ sa mga paglapas sa idalom sang nahauna nga katipan. 16 Kay kon may katipan, ang tawo nga nakigkatipan* kinahanglan mapatay, 17 bangod ang katipan napalig-on sa kamatayon,* sanglit wala ini sing puersa samtang buhi pa ang tawo nga nakigkatipan. 18 Gani, ginsugdan* man ang nahauna nga katipan paagi sa dugo. 19 Kay sang nahambal na ni Moises sa bug-os nga katawhan ang tagsa ka sugo suno sa Kasuguan, ginkuha niya ang dugo sang mga torite nga baka kag sang mga kanding, upod ang tubig, eskarlata nga de-lana, kag tanom nga hisopo kag ginwisikan ang libro* sang katipan kag ang bug-os nga katawhan, 20 kag nagsiling: “Ini amo ang dugo sang katipan nga ginsugo sang Dios nga tumanon ninyo.”+ 21 Ginwisikan man niya sing dugo+ ang tolda kag ang tanan nga suludlan nga ginagamit sa sagrado nga pag-alagad.* 22 Huo, halos ang tanan nga butang ginatinluan paagi sa dugo+ suno sa Kasuguan, kag wala sing kapatawaran luwas kon may ginbubo nga dugo.+

23 Gani, kinahanglan nga ang ginalaragway+ nga mga butang sa langit tinluan paagi sa sini,+ apang kinahanglan sang langitnon nga mga butang ang mas maayo pa nga mga halad. 24 Kay ang Cristo wala magsulod sa balaan nga lugar nga ginhimo sang mga kamot sang tawo,+ nga amo ang larawan sang katunayan,+ kundi sa langit mismo,+ agod mag-atubang karon sa Dios para sa aton.+ 25 Indi agod ihalad ang iya kaugalingon sing regular, subong sang ginahimo sang mataas nga saserdote nga nagasulod sa balaan nga lugar kada tuig,+ dala ang dugo nga indi iya. 26 Kay kon amo sina, dapat sia mag-antos sing masunson kutob sa pagtukod sa kalibutan. Apang karon ginpadayag niya ang iya kaugalingon sing makaisa gid lang sa hingapusan sang mga sistema sang mga butang* agod dulaon ang sala paagi sa paghalad sang iya kaugalingon.+ 27 Kag subong nga ang mga tawo gintalana nga mapatay sing makaisa gid lang, apang pagkatapos sini pagahukman, 28 ginhalad man ang Cristo sing makaisa gid lang agod dalhon ang mga sala sang madamo;+ kag sa ikaduha nga higayon nga magpakita sia indi na para magkuha sing sala, kundi magakari sia sa pagluwas sa mga hanuot nga nagapangita sa iya.+

10 Sanglit ang Kasuguan indi ang katunayan sang maayong mga butang nga magaabot+ kundi landong lamang,+ indi ini* makahimpit sa mga tawo nga nagapalapit sa Dios paagi sa paghalad sang amo gihapon nga mga halad kada tuig.+ 2 Kay kon makahimpit ini, indi bala nga indi na kuntani kinahanglan ang paghalad sing padayon? Kay kon natinluan na ang mga nagahimo sang sagrado nga pag-alagad indi na sila magbatyag nga nakasala sila. 3 Sa baylo, ini nga mga halad nagapahanumdom sang mga sala kada tuig,+ 4 kay ang dugo sang mga toro nga baka kag sang mga kanding indi makakuha sang mga sala.

5 Gani sang nag-abot sia sa kalibutan, nagsiling sia: “‘Indi mo luyag ang halad kag dulot, kundi nag-aman ka sang lawas para sa akon. 6 Wala ka mahamuot sa bug-os nga mga dulot nga sinunog kag sa mga dulot tungod sa sala.’+ 7 Kag nagsiling ako: ‘Yari ako! Nagkari ako sa paghimo (nasulat ang tuhoy sa akon sa linukot*) sang imo kabubut-on, O Dios.’”+ 8 Sa tapos sia magsiling: “Indi mo luyag kag wala ka mahamuot sa mga halad kag mga dulot kag sa bug-os nga mga dulot nga sinunog kag sa mga dulot tungod sa sala”—mga halad nga ginadulot suno sa Kasuguan— 9 nagsiling sia: “Yari ako! Nagkari ako sa paghimo sang imo kabubut-on.”+ Ginkuha niya ang nahauna agod mapasad niya ang ikaduha. 10 Suno sa sining “kabubut-on”+ ginpakabalaan kita paagi sa pagdulot sing lawas ni Jesucristo sing makaisa gid lang.+

11 Subong man, ang tagsa ka saserdote nagatindog sa iya lugar sa adlaw-adlaw agod maghimo sang balaan nga pag-alagad*+ kag maghimo sing masunson sang amo man nga mga halad,+ nga indi gid makakuha sang mga sala sing bug-os.+ 12 Apang ini nga tawo nagdulot sang isa lang ka halad nga makakuha sang mga sala sa tanan nga tion kag nagpungko sa tuo sang Dios,+ 13 nga sugod sadto nagahulat tubtob nga ang iya mga kaaway mabutang nga palatungan sang iya mga tiil.+ 14 Kay paagi sa isa lang ka halad nga gindulot, ang mga ginpakabalaan ginhimpit+ sa tanan nga tion. 15 Dugang pa, nagasaksi man ang balaan nga espiritu sa aton, kay sa tapos nga nagsiling ini: 16 “‘Amo ini ang katipan nga himuon ko sa ila pagkatapos sina nga tion,’ siling ni Jehova.* ‘Ibutang ko ang akon mga kasuguan sa ila tagipusuon, kag isulat ko ini sa ila hunahuna.’”+ 17 Nagsiling pa ini: “Kag indi ko na pagdumdumon ang ila mga sala kag ang ila malinapason nga mga buhat.”+ 18 Karon kon may kapatawaran sa sini, indi na kinahanglan ang dulot tungod sa sala.

19 Gani, mga kauturan, paagi sa dugo ni Jesus may kaisog* kita sa paggamit sing dalan pasulod sa balaan nga lugar,+ 20 nga ginbuksan* niya para sa aton subong isa ka bag-o kag buhi nga dalan paagi sa kurtina,+ nga amo ang iya unod, 21 kag sanglit may daku kita nga saserdote sa balay sang Dios,+ 22 magpalapit kita sa Dios upod ang sinsero nga tagipusuon kag bug-os nga pagtuo, nga ang aton tagipusuon natinluan gikan sa malaut nga konsiensia+ paagi sa pagwisik kag ang aton lawas nahugasan sang matinlo nga tubig.+ 23 Huptan naton sing malig-on ang dayag nga pagpahayag sang aton paglaum nga wala nagakalingkang,+ kay ang isa nga nagsaad matutom. 24 Kag hunahunaon* naton ang isa kag isa agod pahulagon sa gugma kag sa maayong mga buhat,+ 25 nga wala ginapabay-an ang aton pagtilipon,+ subong sang kinabatasan sang iban,+ kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.+

26 Kay kon hungod kita nga maghimo sang sala sa tapos mabaton ang sibu nga ihibalo tuhoy sa kamatuoran,+ wala na sing nabilin nga halad para sa aton mga sala,+ 27 kundi ang pagpaabot na lang sa makahaladlok nga paghukom kag sa nagahingalayo nga kaakig nga magalamon sa mga nagapamatok.+ 28 Ang bisan sin-o nga nagalapas sa Kasuguan ni Moises patyon nga wala sing kaluoy kon may duha ukon tatlo ka testigo.+ 29 Sa banta ninyo, ano pa ayhan kabug-at nga silot ang nagakadapat sa tawo nga nagtapak sa Anak sang Dios kag nagkabig nga kinaandan lang ang dugo sang katipan+ nga paagi sini ginpakabalaan sia, kag matinamayon nga nag-insulto sa espiritu sang wala tupong nga kaayo?+ 30 Kay kilala naton ang Isa nga nagsiling: “Akon ang pagtimalos; ako ang magabalos.” Kag sa liwat: “Hukman ni Jehova* ang iya katawhan.”+ 31 Makahaladlok ang mahulog sa mga kamot sang buhi nga Dios.

32 Apang, padayon nga dumduma ninyo ang nagligad nga mga adlaw, sa tapos kamo masanagan,+ nagbatas kamo kag nag-antos sang tuman nga mga pagtilaw. 33 Kon kaisa ginapasipalahan kamo kag ginapintasan sa atubangan sang publiko* kag kon kaisa umalambit* sa mga nakaeksperiensia sini. 34 Kay nagpakita kamo sang simpatiya sa mga yara sa bilangguan kag malipayon nga ginbaton ninyo ang pagpang-agaw sang inyo mga pagkabutang,+ kay nahibaluan ninyo nga kamo may mas maayo kag nagapabilin nga ginapanag-iyahan.+

35 Gani, indi ninyo pag-isikway ang inyo kaisog,* kay ini pagapadyaan sing daku.+ 36 Kay kinahanglan nga magbatas kamo,+ agod sa tapos ninyo mahimo ang kabubut-on sang Dios, mabaton ninyo ang katumanan sang saad. 37 Kay sa “malip-ot na lang nga tion,”+ kag “ang isa nga nagakari magaabot kag indi maatrasar.”+ 38 “Apang ang akon matarong nga tawo magakabuhi tungod sa pagtuo,”+ kag “kon mag-isol sia, wala ako* sing kahamuot sa iya.”+ 39 Indi kita ang sahi nga nagaisol sa kalaglagan,+ kundi kita ang sahi nga may pagtuo sa pagtipig sang aton kabuhi.*

11 Ang pagtuo amo ang masaligan nga pagpaabot sa kon ano ang ginalauman.+ Amo ini ang pamatuod* nga ang imo ginapatihan matuod, bisan wala mo pa ini makita. 2 Kay paagi sa sini, ang mga tawo sang una nga panahon* nakabaton sang pamatuod nga ginkahamut-an sila sang Dios.

3 Bangod sa pagtuo nahangpan naton nga ang mga sistema sang mga butang* ginpahamtang sing mahim-ong paagi sa pulong sang Dios. Gani, gingamit sang Dios ang mga butang nga indi makita agod magluntad ang mga butang nga makita.

4 Bangod sa pagtuo si Abel nagdulot sang halad sa Dios nga mas daku ang balor sangsa kay Cain,+ kag paagi sa sina nga pagtuo nakabaton sia sang pamatuod nga matarong sia, kay ginkahamut-an* sang Dios ang iya mga dulot,+ kag bisan patay na sia, nagahambal+ sia gihapon paagi sa iya pagtuo.

5 Bangod sa pagtuo si Enoc+ ginkuha sang Dios agod indi sia mag-antos sa iya kamatayon;+ kay antes sia ginkuha nakabaton sia sang pamatuod nga napahamut-an niya ang Dios. 6 Dugang pa, kon wala sing pagtuo imposible nga mapahamut-an ang Dios, kay ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.+

7 Bangod sa pagtuo si Noe,+ sa tapos makabaton sang paandam halin sa Dios tuhoy sa mga butang nga wala pa makita,+ nagpakita sang kahadlok sa Dios kag nagtukod sang arka+ agod maluwas ang iya panimalay; kag paagi sini nga pagtuo ginpakamalaut niya ang kalibutan,+ kag nangin manunubli sia sang pagkamatarong nga resulta sang pagtuo.

8 Bangod sa pagtuo si Abraham+ nagtuman sang gintawag sia sa pagkadto sa lugar nga batunon niya subong palanublion; naglakat sia, bisan pa wala niya mahibaluan kon diin sia makadto.+ 9 Bangod sa pagtuo nag-istar sia subong dumuluong+ sa duta nga ginsaad, kag nag-istar sa mga tolda+ upod sanday Isaac kag Jacob, nga iya mga masigkamanunubli sang amo man nga saad.+ 10 Kay ginahulat niya ang siudad nga may matuod nga mga sadsaran, nga ang nagdesinyo* kag manunukod amo ang Dios.+

11 Bangod man sa pagtuo si Sara nakapanamkon pa,* bisan lampas na sia sa edad,+ kay ginkabig niya nga matutom* ang Isa nga nagsaad. 12 Bangod sini, halin sa isa ka tawo nga daw patay na,+ nabun-ag ang mga anak,+ nga subong kadamo sang mga bituon sa langit kag subong sang mga balas sa higad sang dagat nga indi maisip.+

13 Sila tanan napatay nga may pagtuo, bisan pa wala nila mabaton ang katumanan sang mga saad;+ apang nakita nila ini sa malayo+ kag malipayon nga ginbaton ini kag dayag nga ginpahayag nga sila mga estranghero kag umalagi nga mga pumuluyo sa duta. 14 Kay ang mga nagahambal sa sini nga paagi nagapakita nga hanuot sila nga nagapangita sang lugar nga mangin ila ilistaran. 15 Kay kon padayon gid nila nga gindumdom ang lugar nga ila ginhalinan,+ may kahigayunan sila kuntani nga magbalik. 16 Apang ginatinguhaan nila ang mas maayo nga lugar, nga amo, ang isa nga natungod sa langit. Gani wala sila ginkahuya sang Dios, nga tawgon nila sia nga ila Dios,+ kay naghanda sia sang isa ka siudad para sa ila.+

17 Bangod sa pagtuo si Abraham, sang gintilawan sia,+ daw subong nga ginhalad na niya si Isaac—ang tawo nga malipayon nga nagbaton sang mga saad handa sa paghalad sang iya bugtong nga anak+— 18 bisan pa ginsilingan na sia: “Ang kaliwat* nga ginsaad sa imo magahalin kay Isaac.”+ 19 Apang nangatarungan sia nga ang Dios makasarang sa pagbanhaw sa iya bisan gikan sa mga patay, kag gikan sa sini ginbaton man niya sia sa malaragwayon nga paagi.+

20 Bangod man sa pagtuo ginpakamaayo ni Isaac sanday Jacob+ kag Esau+ nahanungod sa mga butang nga magaabot.

21 Bangod sa pagtuo si Jacob, sang madali na lang mapatay,+ nagpakamaayo sa tagsa ka anak ni Jose+ kag nagsimba sa Dios samtang nagapanukod sa iya sungkod.+

22 Bangod sa pagtuo si Jose, sang malapit na lang ang iya kamatayon, naghambal tuhoy sa paggua sa Egipto* sang mga anak sang Israel, kag naghatag sia sang instruksion* tuhoy sa iya mga tul-an.*+

23 Bangod sa pagtuo si Moises gintago sang iya mga ginikanan sa sulod sang tatlo ka bulan sang mabun-ag sia,+ bangod nakita nila nga matahom ang bata+ kag wala sila mahadlok sa sugo sang hari.+ 24 Bangod sa pagtuo si Moises, sang nagdaku na,+ nangindi nga tawgon nga anak sang anak nga babayi sang Paraon.+ 25 Ginpasulabi pa niya nga pintasan upod sa katawhan sang Dios sa baylo nga maagom ang umalagi nga pagpangalipay sa sala, 26 bangod ginkabig niya ang pagpakahuya sa Cristo nga labaw pa nga manggad sangsa mga bahandi sang Egipto, kay gintulok niya sing maayo ang mabaton niya nga padya. 27 Bangod sa pagtuo ginbayaan niya ang Egipto,+ indi bangod sa kahadlok sa kaakig sang hari,+ kay nagpabilin sia nga malig-on sa pagtuo subong nga nakakita sa Isa nga indi makita.+ 28 Bangod sa pagtuo ginhiwat niya ang Paskua kag ginwisik ang dugo, agod indi paghalitan* sang anghel sang Dios ang ila mga panganay.+

29 Bangod sa pagtuo nagtabok sila sa Pula nga Dagat nga daw nagatabok lang sila sa mamala nga duta,+ apang sang nagtabok ang mga Egiptohanon sa sini ginlamon sila sang dagat.+

30 Bangod sa pagtuo narumpag ang mga pader sang Jerico sa tapos nga nagmartsa ang katawhan sa palibot sini sa sulod sang pito ka adlaw.+ 31 Bangod sa pagtuo si Rahab nga makihilawason wala malaglag upod sa mga indi matinumanon, bangod mainabyanon niya nga ginbaton ang mga espiya.+

32 Kag ano pa ang akon masiling? Kay kulangon ako sing tion kon isaysay ko pa ang tuhoy kay Gideon,+ Barak,+ Samson,+ Jefte,+ David,+ Samuel,+ kag sa iban pa nga manalagna. 33 Paagi sa pagtuo ginlutos nila ang mga ginharian,+ nagdala sang pagkamatarong, nakabaton sang mga saad,+ nakapakium sang baba sang mga leon,+ 34 nakapalong sa gahom sang kalayo,+ nakalikaw sa sulab sang espada,+ nangin mabakod halin sa maluya nga kahimtangan,+ nangin isganan sa inaway,+ kag nagdaug sa nagasalakay nga mga kasuldadusan.+ 35 Ginbaton sang mga babayi ang ila mga patay paagi sa pagkabanhaw,+ apang ang iban ginpaantos bangod indi nila pag-isikway ang ila pagtuo kabaylo sang ila kahilwayan, agod maagom ang mas maayo nga pagkabanhaw. 36 Huo, ang iban ginyaguta kag ginlapdusan, ang matuod, indi lang amo sina, ginpanggapos+ pa kag ginpangbilanggo.+ 37 Ginbato+ sila, gintilawan, ginpanglagari tubtob mautod, ginpamatay paagi sa espada,+ nagdalangdalang nga nagapanapot sing panit sang mga karnero kag sang mga kanding,+ samtang yara sa kinawad-on, sa kapipit-an,+ kag ginapintasan;+ 38 kag ang kalibutan indi takus sa ila. Nagdalangdalang sila sa mga desyerto, sa mga bukid, sa mga kueba,+ kag sa mga gikab sa duta.

39 Apang sila tanan, bisan pa nakabaton sang pamatuod nga ginkahamut-an sila sang Dios bangod sa ila pagtuo, wala makabaton sang katumanan sang saad, 40 bangod nakita na nga daan sang Dios ang isa ka butang nga mas maayo para sa aton,+ agod indi sila mahimpit nga nahamulag sa aton.

12 Gani, sanglit ginalibutan kita sinang tuman kadaku nga panganod sang mga saksi, ihaboy man naton ang tagsa ka kabug-atan kag ang sala nga madali magsalawid sa aton,+ kag magdalagan kita nga may pagbatas sa palumba nga ginabutang sa aton atubangan,+ 2 samtang nagatulok kita sing maayo kay Jesus, nga Pangulo nga Ahente* kag Manughimpit sang aton pagtuo.+ Tungod sa kalipay nga ginbutang sa iya atubangan ginbatas niya ang usok sang pag-antos,* ginbalewala ang kahuluy-an, kag nagpungko sa tuo sang trono sang Dios.+ 3 Sa pagkamatuod, binagbinaga ninyo sing maayo ang isa nga nagbatas sang pagpakalain sang mga makasasala+ nga bangod sini ginahalitan nila mismo ang ila kaugalingon, agod indi kamo pagkapuyon kag magpangampo.*+

4 Sa inyo pagpakigsumpong sa sina nga sala wala pa gid kamo makapakig-away tubtob nga nag-agay ang inyo dugo. 5 Kag ginkalimtan ninyo sing bug-os ang laygay nga nagatawag sa inyo nga mga anak: “Anak ko, indi pagpakadiutaya ang disiplina ni Jehova,* ukon magpangampo kon ginatadlong ka niya; 6 kay ang ginahigugma ni Jehova* ginadisiplina niya, ang matuod, ginalapdusan* niya ang kada isa nga ginabaton niya subong anak.”+

7 Kinahanglan nga magbatas kamo subong bahin sang pagdisiplina* sa inyo. Ginakabig kamo sang Dios nga iya mga anak.+ Kay sin-o nga anak ang wala ginadisiplina sang iya amay?+ 8 Apang kon wala niya kamo ginadisiplina, indi niya kamo matuod nga mga anak. 9 Bisan gani ang aton amay diri sa duta nagadisiplina sa aton, kag ginatahod naton sila. Indi bala dapat nga mas handa kita nga magpasakop sa aton espirituwal nga Amay* agod magkabuhi?+ 10 Kay ginadisiplina nila kita sa malip-ot nga tion suno sa kon daw ano ang maayo sa ila, apang ginahimo ini sang Dios para sa aton kaayuhan agod makaambit kita sang iya pagkabalaan.+ 11 Ang matuod, sa umpisa wala sing disiplina nga makalilipay, kundi masakit;* apang sa ulihi nagapatubas ini sang mahidaiton nga bunga sang pagkamatarong sa mga nahanas sa sini.

12 Gani pabaskuga ang nagahuyhoy nga mga kamot kag ang maluya nga mga tuhod,+ 13 kag padayon nga tadlunga ang mga banas para sa inyo mga tiil,+ agod ang bahin nga nahalitan indi maglala kundi mag-ayo. 14 Tinguhai ninyo ang pagpakighidait sa tanan nga tawo.+ Tinguhai man ang pagkabalaan+ kay kon wala ini wala sing tawo nga makakita sa Ginuo. 15 Magbantay sing maayo agod ang tanan makabaton sang wala tupong nga kaayo sang Dios, agod wala sing magtubo nga makahililo nga gamot nga pagatunaan sang kagamo kag madamo ang nadagtaan sini;+ 16 kag mag-andam nga wala sing isa sa inyo nga nagahimo sang seksuwal nga imoralidad* ukon wala nagaapresyar sa sagrado nga mga butang, kaangay ni Esau, nga ginbaylo ang iya mga kinamatarong subong panganay sa isa lang ka pagkaon.+ 17 Kay nahibaluan ninyo nga sang ulihi sang luyag niya mapanubli ang pagpakamaayo, ginsikway sia; kay bisan pa gintinguhaan gid niya nga bag-uhon ang hunahuna* paagi sa paghibi,+ indi na niya ini mabag-o.

18 Kay wala kamo magpalapit sa bukid nga puede matandog+ kag nagadabdab sa kalayo,+ kag sa madulom nga panganod kag sa mangitungito nga kadudulman kag sa bagyo,+ 19 kag sa tunog sang trumpeta+ kag sa tingog nga nagahambal sang mga pulong,+ nga sang mabatian sang katawhan nagpakiluoy sila nga kon mahimo indi na maghambal sa ila.+ 20 Kay nahadlok sila sa sugo: “Bisan isa ka sapat ang makatandog sa bukid, dapat ini batuhon.”+ 21 Makahaladlok man ang ila nakita amo nga si Moises nagsiling: “Nahadlok ako kag nagakurog.”+ 22 Kundi nagpalapit kamo sa Bukid Sion+ kag sa siudad sang buhi nga Dios, ang langitnon nga Jerusalem,+ kag sa mga linaksa* nga anghel 23 sa ila kabilugan nga pagtinipon,+ kag sa kongregasyon sang panganay nga nalista sa langit, kag sa Dios nga Hukom sang tanan,+ kag sa espirituwal nga kabuhi+ sang mga matarong nga ginhimpit,+ 24 kag kay Jesus, nga manugpatunga+ sa bag-o nga katipan,+ kag sa ginwisik nga dugo, nga nagahambal sing mas maayo sangsa dugo ni Abel.+

25 Pat-ura ninyo nga indi kamo mangindi sa pagpamati* sa isa nga nagahambal. Kay kon wala maluwas ang mga nangindi sa pagpamati sa isa nga naghatag sang paandam sang Dios sa duta, labi pa gid nga indi kita maluwas kon magpalayo kita sa iya nga nagahambal halin sa langit!+ 26 Sadto nga tion ang iya tingog nagpauyog sang duta,+ apang karon nagsaad sia: “Sa liwat uyugon ko indi lamang ang duta kundi pati man ang langit.”+ 27 Karon ining ekspresyon nga “sa liwat” nagakahulugan sang pagkuha sa mga butang nga nagauyog, mga butang nga wala ginhimo sang Dios, agod ang mga butang nga wala nagauyog magpabilin. 28 Gani, bangod magabaton kita sang Ginharian nga indi mauyog, padayon kita nga magbaton sang wala tupong nga kaayo, nga paagi sini makahalad kita sang kalahamut-an nga sagrado nga pag-alagad sa Dios nga may diosnon nga kahadlok kag kakugmat. 29 Kay ang aton Dios isa ka kalayo nga nagapang-upos.+

13 Padayon ninyo nga ipakita ang inyo utudnon nga gugma.+ 2 Indi ninyo pagkalimti ang pagkamaabiabihon,*+ kay sa paghimo sini wala mahibaluan sang iban nga gin-amuma nila ang mga anghel.+ 3 Dumduma ninyo ang mga yara sa bilangguan,*+ nga daw subong nga nabilanggo man kamo upod sa ila,+ kag ang mga ginapintasan, sanglit kamo pareho man sa ila nga yara sa undanon nga lawas.* 4 Dapat padunggan sang tanan ang pag-asawahay kag ang bana kag asawa dapat mangin matutom sa isa kag isa,+ kay hukman sang Dios ang mga nagahimo sang seksuwal nga imoralidad* kag ang mga makihilahion.+ 5 Dapat nga ang inyo pagkabuhi hilway sa gugma sa kuarta,+ kag mangin kontento kamo sa mga butang nga yara sa inyo.+ Kay ang Dios nagsiling: “Indi ko gid kamo pagbayaan, kag indi ko gid kamo pagpabay-an.”+ 6 Gani, makasiling kita nga may pagsalig: “Si Jehova* ang akon manugbulig; indi ako magkahadlok. Ano ang mahimo sang tawo sa akon?”+

7 Dumduma ang mga nagapanguna sa inyo,+ nga nagtudlo sa inyo sang pulong sang Dios, kag samtang ginapanilagan ninyo ang resulta sang ila paggawi, iluga ang ila pagtuo.+

8 Si Jesucristo amo gihapon halin sadto, subong, kag tubtob san-o.

9 Indi kamo magpadala sa nagkalainlain kag tuhay nga mga panudlo. Magsalig sa gugma sang Dios sa pagpalig-on sa inyo tagipusuon kag indi sa pagkaon,* kay ang mga nagahatag sang sobra nga importansia sa pagkaon indi makapanginpulos sa sini.+

10 Ang mga nagahalad sang sagrado nga pag-alagad sa tolda, wala sing kinamatarong nga magkaon sa aton halaran.+ 11 Kay ang mga lawas sang mga sapat nga ang dugo ginadala sang mataas nga saserdote sa balaan nga lugar subong dulot tungod sa sala ginasunog sa gua sang kampo.+ 12 Amo nga si Jesus nag-antos man sa gua sang gawang+ sang siudad agod mapakabalaan ang katawhan paagi sa iya kaugalingon nga dugo.+ 13 Gani, magkadto kita sa iya sa gua sang kampo, nga nagadala sang kahuluy-an nga iya gindala,+ 14 kay wala kita diri sing nagapabilin nga siudad, kundi hanuot naton nga ginahulat ang isa nga magaabot.+ 15 Paagi sa iya magdulot kita pirme sa Dios sang halad sang pagdayaw,+ nga amo ang bunga sang aton mga bibig+ nga dayag nga nagapahayag sang iya ngalan.+ 16 Indi man pagkalimti nga maghimo sing maayo kag magpaambit sa iban sing mga butang nga yara sa imo,+ kay nahamuot gid ang Dios sa sini nga mga halad.+

17 Mangin matinumanon sa mga nagapanguna sa inyo+ kag mangin mapinasakupon,+ kay ginabantayan nila kamo* subong nga sila ang manabat,+ agod himuon nila ini nga may kalipay kag wala nagapanghayhay, kay makahalit ini sa inyo.

18 Padayon kamo nga magpangamuyo para sa amon, kay nagasalig kami nga may bunayag* kami nga konsiensia, kag luyag namon magkabuhi sing bunayag sa tanan nga butang.+ 19 Apang nagapangabay gid ako sa inyo nga ipangamuyo ninyo nga makabalik ako sa inyo sa labing madali.

20 Kabay nga ang Dios sang paghidait, nga nagbanhaw sa daku nga manugbantay+ sang mga karnero, ang aton Ginuong Jesus nga may dugo sang wala sing katapusan nga katipan, 21 magsangkap sa inyo sang tagsa ka maayong butang agod mahimo ang iya kabubut-on. Paagi kay Jesucristo ginapahulag niya kita nga himuon ang kalahamut-an sa iya. Mangin sa iya ang himaya tubtob sa wala sing katubtuban. Kabay pa.*

22 Karon ginapalig-on ko kamo, mga kauturan, nga magpamati sing mapailubon sa sini nga pulong sang pagpalig-on, kay malip-ot lang ining sulat ko sa inyo. 23 Luyag ko nga mahibaluan ninyo nga ang aton utod nga si Timoteo ginbuy-an na. Kon makaabot sia gilayon, upod kami nga makadto sa inyo.

24 Ipalab-ot ninyo ang akon pangamusta sa tanan nga nagapanguna sa inyo kag sa tanan nga balaan. Ang mga taga-Italya+ nagapangamusta sa inyo.

25 Ang wala tupong nga kaayo mangin yara sa inyo tanan.