Ang Adlaw sang mga Tagipusuon—Sa Diin Ini Maghalin?

NAKAPADALA ukon nakabaton ka na bala sing regalo ukon kard sa Adlaw sang mga Tagipusuon? Sa madamo nga pungsod isa ka kinabatasan ang magpadala sing mga kard ukon regalo kon Pebrero 14, ang Adlaw sang mga Tagipusuon. Amo ini ang adlaw nga ginasaulog sang mga magkahagugma. Apang paano nagsugod ini nga kinabatasan?

Ang Brewer’s Dictionary of Phrase and Fable nagasiling: Valentino, isa anay ka Santo, Isa ka pari sa Roma nga ginbilanggo bangod sa pagbulig sa mga ginhingabot nga mga Cristiano. Nangin isa sia ka pinaliso kag, . . . ginbakol tubtob napatay. Napatay sia sang Pebrero 14 . . .

“Ang dumaan nga kinabatasan sa pagpili sang Adlaw sang mga Tagipusuon natabuan lamang nga gin-angot sa isa ka santo, kay ini isa ka importante nga kinabatasan sang dumaan nga Romanong Lupercalia . . . ukon gin-angot sa tion sang pagkupahay sang mga pispis. Gintandaan ini sing paghatagay sing mga regalo kag sa karon paagi sa pagpadala sing kard nga ginapakita ang duha ka tagipusuon nga gintuhog sang pana ni Kupido ukon sang iban pa nga paglaragway.”

Apang ano ang kaangtanan ni Kupido sa Adlaw sang mga Tagipusuon? Ang amo man gihapon nga tuburan sang impormasyon nagasiling: “Si Kupido (Lat[in] cupido, handum, gugma). Amo ang Romanong dios sang gugma, nga nakilala kaupod sang Griego nga si Eros. Masami sia nga ginalaragway subong ang maambong nga bata nga lalaki nga may pakpak, nga may buta ang mga mata, kag nagabitbit sing pana.”

Ang The World Book Encyclopedia nagahatag sing dugang nga impormasyon, nagapakita sing madamo nga teoriya sa ginhalinan sang pagsaulog sang Adlaw sang mga Tagipusuon. “Suno sa isa ka istorya, ang Romanong Emperador nga si Claudius II sang katuigan 200 A.D. nagdumili sa mga pamatan-on nga lalaki nga magpangasawa. Naghunahuna ang emperador nga mangin maayo nga mga soldado ang mga wala sing asawa nga mga lalaki. Ang isa ka pari nga nagahingalan kay Valentino naglapas sang sugo sang emperador kag sekreto nga nagkasal sa mga pamatan-on nga naganobyahanay. . . . Madamo nga istorya ang nagasiling nga si Valentino ginsilutan sing kamatayon sang mga ika-269 A.D. Pebrero 14. Sang A.D. 496, gintawag ni Santo Papa Gelasius I ang Pebrero 14 subong Adlaw ni Santo Valentino.”

Walay sapayan sang matuod nga ginhalinan sini nga kinabatasan, maathag nga naghalin ini sa dumaan pagano nga mga pagpati kag sa lista sang mga “santo” sang Cristiandad. Ang Adlaw sang mga Tagipusuon isa man ka paagi sang balibad sang komersial nga paghingalit sa wala sing alam nga mga tawo.​—2 Corinto 6:​14-18.

Kon, pagkatapos nga mabasa ini nga magasin, may yara kamo pila ka pamangkot sa Biblia, palihug indi magduhaduha nga makig-angot sa mga Saksi ni Jehova sa ila mga Kingdom Hall sa inyo duog, ukon magsulat sa manugbalhag sini nga magasin. (Tan-awa ang pahina 5.)

[Picture Credit Line sa pahina 32]

Dover Publications, Inc.