Sabat sa Pangamuyo

ANG isa ka babayi nga taga-Christchurch, New Zealand, nagsiling nga ang mga artikulo sang Awake! tuhoy sa “Healing the Wounds of Child Abuse” amo ang sabat sa iya pangamuyo. Sia nagapaathag:

‘Sang Agosto 1991 pila sa amon ang may makangilidlis nga eksperiensia nga masaksihan ang isa ka abyan nga nagaagom sing kasakit sang pagpanumdom sa pag-abuso. Mga tatlo ka adlaw nga nagbatyag ako sang kasubo kag kalisud, apang nangamuyo kami sing hanuot kay Jehova para sa isa ka magasin nga magahinun-anon sang topiko. Luyag namon ang bulig. Naghulat lamang kami sing lima ka semana. Tungod sa madamo, madamong biktima, salamat sa maayo, sensitibo nga mga artikulo sang Oktubre 8, 1991, nga Awake!’

Ang nasambit isa lamang sang ginatos ka sulat sang apresasyon para sa Awake! nahanungod sa pag-abuso sa bata. Sa isa pa ka sulat nga nabaton sing maaga sini nga tuig, ang manunulat nagsiling nga pila ka beses niya nga gintilawan nga tapuson basahon ang mga artikulo bangod indi niya mapunggan ang maghibi. Siling niya:

“Bisan sa karon, makusog gid ang akon balatyagon nga ipabutyag ang akon apresasyon sa tion kag kusog nga ginhinguyang ninyo sa pagbulig sa amon nga nakabatyag sing amo sina nga kahuya kag kasal-anan pagkatapos nga seksuwal kag emosyonal nga ginlugos sang isa nga nagapangangkon nga ‘nagahigugma’ sa amon sang mga bata pa kami kag maluya. Wala ako makahibalo nga tuman kadamo gali ang nakaeksperiensia sang kaangay sang akon. Nabudlayan gihapon ako sa paglandas sa akon balatyagon, apang ang mga panugda sa pahina 10 kag 11 daku gid ang nabulig. Madamo pa ako sing luyag isiling, apang bastante na isiling nga nagapangamuyo ako kay Jehova para sa inyo tungod sang inyo pagsalig kay Jehova nga hatagan kamo sing kaisog nga makasulat nahanungod sinang sensitibo nga topiko.”

Ang isa pa nagsiling: “Amo ini isa sang pinakamaayo nga mga obra-maestra nga ginbalhag na ninyo nahanungod sa tawhanon nga kaangtanan. Ginabuyagyag sini ining sataniko nga buhat kag ang mga nagahimo sini, gin-athag sa mga indi biktima ang mapintas nga paghapay sini; ang mga biktima sini nalugpayan kag natudluan. Ang ganhaan sang pagpaabot sang kaluoy kag pagsakdag gikan sa katawhan sang Dios bug-os nga ginbuksan.”

Ang mga Saksi ni Jehova isa ka internasyonal nga organisasyon sang kapin sa apat ka milyon nga estudyante sang Biblia nga debotado sa pagbulig sa mga tawo sa ila mga problema kag sa pagbulig sa ila nga makatuon sing dugang nahanungod sa mga katuyuan sang Dios. Kon luyag ninyo nga makatigayon sang dugang nga impormasyon ukon sang isa ka libre nga pagtuon sa Biblia, magsulat palihug sa Watch Tower, P. O. Box 2044, 1099 Manila, ukon sa nagakaigo nga direksion nga nalista sa pahina 5.