“Muklata Lamang ang Imo mga Mata kag Tan-awa”
ANO ang makita sang imo kabataan? Inaway? Krimen? Polusyon? Kaimulon? Balatian? Huo, matuod gid ini sa karon. Apang ginatudluan mo bala sila nga magtulok sing labaw pa sa sining mga butang sa matahom nga palaabuton nga ginsaad sa Biblia? Ginhimo ini sang mga ginikanan sang nuebe anyos nga si Joel Pierson. Ano ang resulta?
Binagbinaga ang ginsulat ni Joel sa tema nga “Muklata Lamang ang Imo mga Mata kag Tan-awa.” Ginpasulat ini nga topiko sa mga pamatan-on sa isa ka eskwelahan sa distrito sa Virginia, E.U.A. Talupangda kon paano ginpakita sang salaysay ni Joel, nga ginbalhag sa pamantalaan nga The Central Virginian, Agosto 22, 1996, nga ang iya paglaum napasad sa natun-an niya gikan sa Pulong sang Dios. Sia nagsulat:
“Muklata lamang ang imo mga mata kag tan-awa, ang tanan nga katahom nga gintalana nga matabo.
“Indi bala makalilipay nga magbugtaw sa isa ka aga kag makabati nga wala na sing polusyon? Sa baylo sang ginabalita nga pagpamatay kag krimen, ang paghidait kag kalipay amo ang yara sa kabuhi sang mga tawo.
“Ang mga kaingod nagabuligay agod tukuron ang balay sang isa ka abyan. Sa malapit, makita naton ang iban nga nagapanghardin. Indi lamang ini, kundi ang ila motibo matuod. Ang tanan nagabuylog agod buligan ang isa kag isa. Wala na sing imol nga mga tawo, kag may bugana nga pagkaon agod maayawan. May paghiusa kag paghidait sa bug-os nga kalibutan. Wala na sing gutumon ukon magbalatian. May matahom nga talan-awon sa palibot kag tan-awa, ang isa ka bata nga nagasakay sa tigre! Indi lamang ang tigre kundi ang tanan nga sapat mahidaiton sa mga tawo.
“Luyag ko magpuyo sa duog nga kaangay sini. Luyag mo bala magpuyo upod sa akon didto?”
Ginsaad gid bala sang Dios ang mga pagpakamaayo subong sang ginalaragway diri sang bata nga si Joel? Sa pagkamatuod, ginsaad niya! Buksi palihug ang imo Biblia kag basaha ang tuhoy sining mga saad subong sang masapwan sa Salmo 46:8, 9; 67:6; 72:16; Isaias 2:3, 4; 11:6-9; 33:24; 65:17-25; Mateo 6:9, 10; 2 Pedro 3:13; Bugna 21:3, 4.