Isa ka Pinasahi nga Sulat Para sa Ila mga Ginikanan

Duha ka tin-edyer nga babayi sa Espanya ang nagsulat sini lang sing isa ka sulat sang pagpasalamat para sa ila mga ginikanan. Yari ang pila ka bahin sini:

Sa amon pinalangga nga mga ginikanan, Pepe kag Vicenta:

Sa diin kami magaumpisa? Madamo kami sing luyag ihambal, kag mabudlay sambiton ini tanan sa pila lamang ka tinaga. Luyag namon kamo pasalamatan tungod sa amon 17 kag 15 ka tinuig sang pagkabuhi, tinuig nga puno sang pag-ulikid kag pagpalangga.

Nahibaluan namon pirme ang inyo mga panugyan kag pagsulundan. Kon kaisa nagapalibog kami kon ngaa dapat gid kami magpauli sa natalana nga tion, apang sa karon, pagkatapos makit-an ang nagakalatabo sa iban nga mga pamatan-on nga wala sing ginasunod nga oras sa pagpauli, nakita namon nga naamligan kami gali sadto nga mga pagsulundan.

Ang inyo halimbawa sang indi pagwasi sang isa ka Cristianong miting sa Kingdom Hall, luwas lang kon may importante gid nga mga rason, nakabulig sa amon sing daku, subong man ang pagbantala upod sa inyo kada Domingo. Kon Domingo sang aga, indi na kinahanglan nga mamangkot pa kami kon bala magaguwa kita sa latagon. Nahibaluan gid namon nga magaguwa kita!

Nalakip sa pagpadaku sa amon ang pagtuon sang pagkamaabiabihon. Madamo na ang nagbisita sa aton puluy-an, kag pirme ninyo sila ginahatagan sang inyo pinakamaayo. Nakita ini sang amon mismo lanubo nga mga mata, kag nagapasalamat kami nga may yara kami pinasahi nga mga ginikanan.

Wala sang iban nga nakakilala ukon nakahangop sa amon sing labing maayo liwan sa inyo. Kamo ang amon pinakasuod nga mga abyan, ang amon masaligan sing bug-os.

Sa paghingapos, luyag namon ipabutyag nga ginahigugma gid kamo namon. Kamo ang amon ginikanan, kag indi gid namon kamo ibaylo sa iban. Kon papilion kami liwat sang amon mga ginikanan kag sang amon paagi sang pagkabuhi, kami, sa wala duhaduha, magapili sa inyo, kag magakabuhi sing amo sa gihapon.

Upod ang mapinalanggaon nga halok, ang inyo mga anak,

ESMERALDA KAG YOLANDA