“Aguma ang mga Pagpakamaayo Paagi sa Hari nga Ginatuytuyan sang Espiritu ni Jehova”

◼ “Ang isa ka tawo may gahum sa isa sa iya kasamaran.” Ina nga pinamulong nga narekord sa Manugwali 8:9 sibu gid nga nagalaragway sa pagginahom sang tawo halin pa sang una. May mas maayo pa ayhan nga pagginahom? Ukon ang mga hitabo sadto mangin sulundan na lang sang mahanabo sa palaabuton? Ini nga mga pamangkot binagbinagon sa pamulongpulong publiko sa 2008/​2009 “Pagtuytoy sang Espiritu sang Dios” nga Distrito nga Kombension sang mga Saksi ni Jehova. Ini nga pamulongpulong nga may tig-ulo “Aguma ang mga Pagpakamaayo Paagi sa Hari nga Ginatuytuyan sang Espiritu ni Jehova,” magabinagbinag tuhoy kay Jesucristo, ang isa nga magagahom sa matuod nga katarungan kag gugma nga naghatag sang iya kabuhi para sa aton.​—Mateo 20:28.

Ngaa tuhay gid si Jesus sa iban nga mga manuggahom? Ang manalagna sang Dios nga si Isaias nagsiling: “Magadolog sa iya ang Espiritu sang GINOO, ang espiritu sang kaalam kag paghangup, ang espiritu sang laygay kag kusug, ang espiritu sang ihibalo kag sang kahadluk sa GINOO. Kag magakalipay sia sa kahadluk sa GINOO. Indi sia maghukom sono sa panolok sang iya mga mata, ukon maghusay sono sa pagpamati sang iya mga idulungug; kondi magahukom sia nga may pagkamatarung sang mga imol, kag magahusay nga may pag-alangay sa mga mahagup sang duta.”​—Isaias 11:2-4.

Luyag mo bala ini nga sahi sang paggahom? Kon amo, ginaagda ka nga magtambong sa pamulongpulong publiko sa isa sa 80 ka distrito nga kombension nga pagahiwaton sa Pilipinas sugod sa talipuspusan sini nga bulan. Agod mahibaluan mo kon diin nga kombension ang pinakamalapit sa inyo, pamangkuta ang mga Saksi ni Jehova sa inyo lugar ukon magsulat sa manugbalhag sini nga magasin sa isa sa mga adres nga nalista sa pahina 5.