“Magpadayon sa Pagbantay!” Distrito nga Kombension sang mga Saksi ni Jehova
◼ Nobenta’y seis sa sining tatlo ka adlaw nga kombension ang hiwaton sa bug-os nga Pilipinas sa madason nga mga binulan. Pagahiwaton ini sa kada hingapusan sang semana sugod sa Oktubre 23-25, 2009 tubtob sa Enero 8-10, 2010. Ang sesyon kada adlaw magasugod sa 8:20 sang aga paagi sa musika. Ang tema sa Biernes nga “Pamatud-i . . . Ninyo nga Handa Kamo,” nabase sa Mateo 24:44. Pagkatapos sang pamulongpulong sang tsirman, magasunod ang mga pamulongpulong nga “Ang mga Kombension Nagabulig sa Aton nga Magpabilin nga Nagabantay” kag “Si Jehova—Ang Dios ‘sang mga Tion kag sang mga Panag-on.’” Dayon binagbinagon sang simposium nga “Iluga ang mga Matutom nga Padayon nga Nagbantay” kon paano ini nahimo nanday Noe, Moises, kag Jeremias. Ang programa sa aga matapos paagi sa keynote address nga “Kon Paano Kita Ginabuligan ni Jehova nga ‘Magpadayon sa Pagbantay.’”
Ang una nga bahin sa Biernes sang hapon amo ang “Mga Sabat sa mga Pamangkot Tuhoy sa ‘Katapusan nga mga Adlaw,’” nga pagasundan sang mga pamulongpulong nga “‘Wala Kamo Makahibalo sang Adlaw Ukon sang Oras’—Ngaa?” kag “Hibalua nga ang Katapusan Malapit Na.” Ang masunod amo ang anom ka bahin nga simposium nga “‘Magpabilin nga Nagamata’ Subong Cristianong mga Pamilya!” Ang una nga tatlo ka bahin sini para sa mga bana, asawa, kag mga pamatan-on. Kag ang nabilin nga tatlo ka bahin may mga tig-ulo nga “Hupti nga Simple ang Inyo Mata,” “Magpadayon sa Paglab-ot sing Espirituwal nga mga Tulumuron,” kag “Himua nga Regular ang Inyo Pangpamilya nga Pagsimba.” Ang sesyon sa hapon matapos sa bahin nga “Mga Pulong nga Nagapahulag sa Aton nga ‘Magpadayon sa Pagbantay sing Maayo.’”
Ang tema sa Sabado nga “Hupti ang Inyo Kaligdong, Mangin Mabinantayon,” nabase sa 1 Pedro 5:8. Ang lima ka bahin nga simposium nga “Buligi ang mga Tawo nga Magbugtaw sa Katulugon,” magalakip sang mga tema nga “Ang Aton Ministeryo—Ngaa Importante Gid?,” “Mangin Mapanilagon sa Ministeryo,” “Magkonsentrar sa Pagpauswag sang Imo mga Kalantip,” “Indi Pagkalimti ang Imo mga Paryente!,” kag “Pirme Magbatyag sing Pagkahilingagawon!” Pagkatapos sang mga pamulongpulong nga “Iluga ang Pagkamabinantayon ni Jesus” kag “Mangin Mabinantayon May Kaangtanan sa mga Pangamuyo,” ang sesyon tapuson paagi sa pamulongpulong para sa bawtismo. Dayon pagabawtismuhan ang mga kalipikado sa bawtismo.
Mabatian sa programa sa Sabado sang hapon ang lima ka bahin nga simposium nga “Mag-andam sa mga Siod ni Satanas!”—“Ang Kalayo,” “Ang Tugalbong,” “Ang Tiglapak,” “Ang Tigsuhot,” kag “Ang Balatik.” Pagasundan ini sang pinasahi nga presentasyon nga “Tubtob Mapatay Ako Indi Ko Pag-isikway ang Akon Integridad!” Matapos ang Sabado nga sesyon paagi sa mga pamulongpulong nga “Indi Magbalikid” kag “Magtuon sing Pagkamabinantayon Gikan sa mga Apostoles ni Jesus.”
Ang tema sa Domingo nga “Padayon nga Hulata, Indi Ini Magpalantang” nabase sa Habacuc 2:3. Pagkatapos sang pamulongpulong tuhoy sa tema sina nga adlaw, pagabinagbinagon sang simposium nga “Ituon ang Inyo mga Mata sa mga Butang nga Indi Makita” ang mga tema nga “Ang Napulo ka Sungay . . . Magadumot sa Makihilawason nga Babayi,” “Kilalahon sang mga Pungsod si Jehova,” “‘Ini Tanan nga Ginharian’ Pagadugmukon,” “Ang Yawa Gapuson sa Sulod sang Isa ka Libo ka Tuig,” “Magapatindog Sila sing mga Balay kag Magatanom sing mga Ulubasan,” “Ang Lobo kag ang Kordero Magakaon sing Tingob,” “Pahiran sang Dios ang Tagsa ka Luha,” “Ang Tanan nga Yara sa Handumanan nga mga Lulubngan . . . Magagua,” kag “Ang Dios Mangin Tanan nga Butang sa Tanan.” Ang pamulongpulong publiko nga “Paano Ka Maluwas sa Katapusan sang Kalibutan?,” amo ang katapusan nga bahin sa sesyon sa aga.
Ang pinasahi nga bahin sa Domingo sang hapon amo ang moderno nga drama nga “Ang Imo Utod Napatay kag Nabuhi,” base sa parabola ni Jesus parte sa buhaha nga anak. Pagkatapos sang sumaryo sang semanal nga Pagtinuon sa Lalantawan, ang kombension pagatakpan sang pamulongpulong nga “Magpadayon sa Pagpaabot, Nagabantay sang Adlaw ni Jehova!”
Magplano na nga daan agod makatambong ka. Agod mahibaluan mo ang pinakamalapit nga hiwatan sang kombension sa inyo lugar, makig-angot sa Kingdom Hall sang mga Saksi ni Jehova sa inyo lugar ukon magsulat sa mga manugbalhag sini nga magasin.