Ang Maayo nga Kinaiya nga Natalupangdan sang mga Maestra
● Si Irena, estudyante sa hayskul nga nagaistar sa Kurtovo Konare, isa ka lugar sa Bulgaria. Sa isa ka miting sang mga ginikanan kag manunudlo, ginhatagan sang iya iloy ang iya maestra sing libro nga Questions Young People Ask—Answers That Work.
Sang ulihi, samtang ginauyatan sang maestra ang libro, gintawag niya si Irena sa atubangan sang klase kag nagsiling: “Ikaw subong ang matudlo sa klase. May ginpili ako nga kapitulo para basahon mo, kag gusto ko isugid mo sa amon kon paano ini ginahimo sang inyo pamilya.” Ang kapitulo nga iya ginpili amo ang “Why Should I ‘Honor My Father and My Mother’?”
Samtang nagapakadto sia sa tunga, ang pila sang iya mga klasmeyt nagkomento nga ang ginikanan ni Irena lain gid sa iban. Ang iya maestra nagsabat: “Kabalo kamo kon ngaa lain gid ang iya pamilya? Kay nagatuon sila sa Biblia. Ako man ang maestra sang iya mga magulang nga lalaki kag halin sang nagsugod ako sa pagtudlo, sila lang ang estudyante nga nakita ko nga matinahuron kag ginpadaku sing maayo.”
Dayon ginpabasa sang maestra si Irena. Pagkatapos nga mabasa niya ang parapo nga ginhatagan sang Dios ang mga ginikanan sing kinamatarong nga maghimo sing mga pagsulundan, namangkot ang maestra: “Irena, paano ini ginahimo sang inyo pamilya? Ginasunod gid bala ninyo ang tanan nga ginahambal sang inyo ginikanan?”
“Mahimo nga may opinyon ang kada isa sa aton,” siling ni Irena, “pero nagsiling ang Biblia nga dapat tahuron sang mga kabataan ang ila ginikanan kag magpasakop sa ila. Amo sini ang ginahimo namon. Pero ang kada isa sa amon ginapahambal sang amon opinyon kag ginaistoryahan ini sang pamilya.” Sang matapos na ang klase, nanamian gid ang tanan sa iya ginhambal.
Makapangabay ka sing isa ka kopya sini nga libro paagi sa pagsulat sa kaupod nga kupon kag sa pagpadala sini sa nagakaigo nga adres sa pahina 5 sini nga magasin.
□ Interesado ako nga makabaton sing kopya sang libro nga ginpakita diri.
□ Palihug kontaka ako tuhoy sa walay bayad nga pagtuon sa Biblia sa puluy-an.