Pagbisita sa Cameroon

ANG Baka, nga kilala man nga Pygmy, mahimo amo ang una nga mga tawo nga nagpuyo sa Cam­er­oon. Nian sang dekada 1500, nag-abot ang mga Portuges. Pagligad sang pila ka gatos ka tuig, ginsakop sang mga Islam nga ginatawag Fulani ang naaminhan sang Cam­er­oon. Sa karon, 40 porsiento sang mga tawo sa Cam­er­oon ang nagapangangkon nga Cristiano, 20 porsiento ang Muslim, kag ang nabilin nga 40 porsiento tradisyunal nga mga relihion.

Ang mga nagapuyo sa kaumhan sang Cameroon maabiabihon gid. Ang mga bisita ginatamyaw nila kag ginapasulod sa ila balay kag ginaserbehan sang tubig kag pagkaon. Ginakabig nga insulto kon dis-ayrihan ang pag-abiabi sang tagbalay. Pero ginaapresyar gid nila kon batunon ini.

Nagasugod ang pag-istoryahanay paagi sa pagtamyaw sa mga miembro sang pamilya kag pagkamusta sa ila. Ginapamangkot pa gani nila kon kamusta na ang mga sapat. “Kon maglakat na ang bisita, indi bastante ang pagsiling lang sing ‘Babay,’” siling ni Joseph, nga taga-Cameroon. Masami ginadul-ong sang tagbalay ang bisita asta sa dalan samtang nagaistoryahanay sila. Dayon, mapaalam sia sa bisita kag magpauli. Mahimo magsunggod ang bisita kon indi amo sini ang pag-amuma sa iya.

Kon nagakaon upod sa iban, ang grupo sang mga mag-abyan mahimo nagasalo sa isa lang ka pinggan—kon kaisa nagakinamot. Sa Cameroon, ini nga kustombre isa ka simbulo sang paghiusa. May tion nga ginahiusa sini ang mga tawo nga daw nagluya na ang pag-abyanay. Ang pagsalo sa pagkaon daw pareho lang sa pagsiling, “Abyanay na kita liwat.”