TOPIKO SA KOBER | PRAKTIKAL PA BALA ANG BIBLIA SUBONG?

Mga Kinaiya nga Mapuslanon Tubtob San-o—Gugma

PRINSIPIO SA BIBLIA: “Isuksok ninyo ang gugma, kay amo ini ang himpit nga higot sang paghiusa.”—Colosas 3:14.

MGA BENEPISYO: Ang gugma nga pirme ginasambit sa Biblia indi ang romantiko ukon seksuwal nga sahi sang gugma. Sa baylo, amo ini ang gugma nga nabase sa prinsipio nga makilala paagi sa mga kinaiya subong sang kaawa, pagkamapinatawaron, pagkamapainubuson, pagkamainunungon, kaayo, kalulo, kag pagkamapinasensiahon. (Miqueas 6:8; Colosas 3:12, 13) Indi kaangay sang romantiko nga pagsalimuang, nga sa ulihi nagakadula, ang gugma nagadaku sing padayon.

Si Brenda, nga minyo na sing halos 30 ka tuig, nagsiling: “Ang gugma sang bag-o nakasal indi gid mapaanggid sa imo gugma samtang nagadugay ang inyo pag-asawahay.”

Si Sam, nga isa ka bana nga minyo na sing sobra 12 ka tuig, nagkomento: “Nalipay gid kami nga mag-asawa, kag nagakakibot pa gani, kon daw ano ka epektibo kag simple ang laygay sang Biblia! Kon iaplikar mo ini, daw wala gid sing problema. Pero, bisan pa gusto ko ihambal nga pirme ko ini ginaaplikar, kon kaisa indi ko ini mahimo kon sobra ako ka sensitibo, maiyaiyahon, ukon kapoy. Kon matabo ini, nagapangabay ako kay Jehova nga buligan niya ako nga dulaon ining negatibo nga mga balatyagon. Dayon ginahakos ko ang akon asawa, kag pagkatapos sini, daw wala lang sing malain nga natabo!”

“Ang kaalam ginapamatud-an nga matarong paagi sa mga resulta sini”

Nagsiling si Jesucristo nga “ang kaalam ginapamatud-an nga matarong paagi sa mga resulta sini.” (Mateo 11:19, footnote) Ginapakita sini nga kamatuoran nga masaligan gid ang kaalam sang Biblia. Ang mga panudlo kag ang mga kinaiya nga ginalaygay sini epektibo gid tubtob san-o. Maaplikar ini sang tanan nga kultura kag nasyonalidad. Kag nagahatag ini sing paghangop tuhoy sa kinaugali sang tawo nga nagatudlo sa mas mataas nga Ginhalinan—ang aton Manunuga nga si Jehova nga Dios. Mapamatud-an mo ini kon iaplikar mo ini. Gani, ginaagda kita sang Biblia nga ‘tilawan kag tan-awon nga si Jehova maayo.’ (Salmo 34:8) Batunon mo bala ini nga pangagda?

NAPAUSWAG SANG BIBLIA ANG AKON KABUHI

Nagaistar si Linh sa Southeast Asia. Ginsugid niya sa Magmata! kon paano sia nabuligan sang Biblia nga pauswagon ang iya kabuhi.

Ano ang imo relihion sang una?

Naghalin ako sa isa ka Budhista nga pamilya nga nagasunod sa mga tradisyon sini. Indi ko gid kilala ang matuod nga Dios.

Malipayon ka bala sa imo kabuhi?

Indi! Madamo ako sing mga problema. Indi ako makahibalo magbadyet sing kuarta, mangita sing maayo nga mga abyan, kag indi ko mabuligan ang akon mga ginikanan sa ila mga problema.

Dayon nagbag-o ang imo kabuhi. Sugiri kami kon paano.

Gintudluan ako sang pila ka pamatan-on nga mga babayi nga mga Saksi ni Jehova sing Biblia. Kon may mga problema gani ako, ginapamangkot ko sila. Bisan pa mas bata sila sangsa akon, maayo gid ang ginalaygay nila sa akon, apang indi base sa ila kaugalingon nga mga pagtamod. Ginapakita nila sa akon kon ano ang ginasiling sang Biblia.

Karon nga naeksperiensiahan ko na ang mga benepisyo kon iaplikar ang mga panudlo sang Biblia, kumbinsido gid ako nga ini nga libro halin sa Dios kag makabulig ini kay bisan sin-o nga nagapanikasog nga sundon ini. Indi ini mahimo sang sekular nga edukasyon bisan pa may kapuslanan man ini.

Mapaathag mo bala ini sing dugang pa?

Nakatapos sa kolehiyo ang akon mga ginikanan kag ginakilala sila sa alta sosiedad. Pero, wala nila makita ang mga sabat sa ila mga problema. Ang matuod, nagdiborsio sila kag indi malipayon. Sang magkolehiyo ako, ginsugiran ako nga kon kaisa ang katilingban mahimo mapauswag paagi lamang sa kasingki. Pero, ginasugiran kita sang Biblia nga indi gid magmadinalag-on ang bisan ano nga panikasog sang tawo, kay wala kita ginhatagan sang Dios sing ikasarang ukon awtoridad nga gamhan ang aton kaugalingon. Amo sini kon ngaa ang tanan nga porma sang pagginahom sang tawo may depekto kag mahimo mangin korap.a Pero kon magpasakop kita sa Dios, mapauswag gid naton ang aton kabuhi kag mangin maayo kita nga impluwensia sa iban.

Paano nakabulig sa imo ang Biblia?

Sa madamo nga praktikal nga mga paagi. Mas diutay ang akon ginakabalak-an, kag may maayo nga mga abyan ako subong. Makahibalo na ako magbadyet sing kuarta kag makalagawlagaw na ako sa iban nga mga lugar. Labaw sa tanan, makabulig na ako sa iban kon kinahanglan nila ini.

a Basaha ang Manugwali 8:9; Jeremias 10:23.