Leksion 9
Ang mga Alagad sang Diyos Dapat Mangin Matinlo
Ngaa dapat kita mangin matinlo sa tanan nga paagi? (1)
Ano ang kahulugan sang mangin matinlo sa espirituwal? (2) matinlo sa moral? (3) matinlo sa hunahuna? (4) matinlo sa pisikal? (5)
Anong sahi sang dimatinlo nga mga hambal ang dapat naton likawan? (6)
1. Si Jehova nga Dios matinlo kag balaan. Ginapaabot niya ang iya mga sumilimba nga magpabilin nga matinlo—sa espirituwal, moral, hunahuna, kag pisikal. (1 Pedro 1:16) Kinahanglan gid ang daku nga panikasog agod magpabilin nga matinlo sa mata sang Dios. Nagapuyo kita sa dimatinlo nga kalibutan. Dapat man kita makigsumpong batok sa aton kaugalingon nga mga huyog sa paghimo sing malain. Apang indi kita dapat mangampo.
2. Espirituwal nga Katinlo: Kon luyag naton mag-alagad kay Jehova, indi kita mahimo magpadayon sa pagsunod sa bisan anong panudlo ukon kinabatasan sang butig nga relihion. Dapat kita magguwa sa butig nga relihion kag indi ini pagsakdagon sa bisan ano nga paagi. (2 Corinto 6:14-18; Bugna 18:4) Sa tion nga natun-an na naton ang kamatuoran tuhoy sa Dios, dapat kita maghalong nga indi pagpatalangon sang mga tawo nga nagatudlo sing kabutigan.—2 Juan 10, 11.
3. Moral nga Katinlo: Luyag ni Jehova nga ang iya mga alagad magagawi subong matuod nga mga Cristiano sa tanan nga tion. (1 Pedro 2:12) Makita niya ang tanan nga ginahimo naton, bisan sa tago. (Hebreo 4:13) Dapat naton likawan ang seksuwal nga imoralidad kag ang iban pa dimatinlo nga mga buhat sining kalibutan.—1 Corinto 6:9-11.
4. Katinlo sa Hunahuna: Kon ginapuno naton ang aton hunahuna sing matinlo, putli nga mga panghunahuna, ang aton paggawi mangin matinlo man. (Filipos 4:8) Apang kon pirme naton ginahunahuna ang dimatinlo nga mga butang, magaresulta ini sa malaut nga mga buhat. (Mateo 15:18-20) Dapat naton likawan ang mga porma sang kalingawan nga makadagta sang aton hunahuna. Sarang naton mapuno ang aton hunahuna sing matinlo nga mga panghunahuna paagi sa pagtuon sa Pulong sang Dios.
5. Pisikal nga Katinlo: Bangod ginatiglawas nila ang Dios, dapat huptan sang mga Cristiano ang ila lawas kag panapton nga matinlo. Dapat kita manghugas sang aton mga kamot pagkatapos maggamit sing kasilyas, kag dapat kita manghinaw antes magkaon ukon mag-uyat sing pagkaon. Kon wala kamo sing nagakaigo nga kasilyas, ang mga higko dapat ilubong. (Deuteronomio 23:12, 13) Ang paghupot sa pisikal nga katinlo nagaamot sa maayong panglawas. Ang puluy-an sang isa ka Cristiano dapat mahipid kag matinlo sa sulod kag sa guwa. Dapat ini makilal-an sa komunidad subong isa ka maayong halimbawa.
6. Matinlo nga Hambal: Ang mga alagad sang Dios dapat pirme maghambal sing kamatuoran. Ang mga butigon indi makasulod sa Ginharian sang Dios. (Efeso 4:25; Bugna 21:8) Ang mga Cristiano wala nagapamuyayaw. Wala sila nagapamati ukon nagasugid sing malaw-ay nga mga lahog ukon mahigko nga mga sugilanon. Bangod sang ila matinlo nga hambal, nakilal-an sila nga tuhay sa ulubrahan ukon sa eskwelahan kag sa mga kaingod.—Efeso 4:29, 31; 5:3.
[Retrato sa pahina 18, 19]
Ang mga alagad sang Dios dapat mangin matinlo sa tanan nga bahin