Kon Paano Mangin Malipayon

LUYAG naton tanan mangin malipayon, indi bala?⁠— Apang madamo ang indi malipayon. Nahibaluan mo bala kon ngaa?⁠— Bangod wala nila matun-an ang sekreto sang kalipay. Nagadumdom sila nga ang madamo nga materyal nga butang amo ang nagahatag sing kalipay. Apang sa tion nga matigayon na nila ining mga butang, ang ila kalipay wala nagadugay.

Yari ang importante nga sekreto. Ang Daku nga Manunudlo nagsiling: “May kapin nga kalipay sa paghatag sangsa pagbaton.” (Binuhatan 20:35) Gani, paano kita mangin malipayon?⁠— Huo, paagi sa paghatag sa iban kag paagi sa paghimo sing mga butang para sa ila. Nahibaluan mo bala ini?⁠—

Binagbinagon naton ini sing dugang pa. Nagsiling bala si Jesus nga indi malipayon ang isa ka tawo nga nakabaton sing regalo?⁠— Wala, wala sia magsiling sina. Luyag mo makabaton sing mga regalo, indi bala?⁠— Luyag sang tanan nga makabaton sing mga regalo. Malipayon kita kon makabaton kita sing matahom nga mga butang.

Apang nagsiling si Jesus nga daku pa ang aton kalipay kon kita ang maghatag. Gani sin-⁠o sa banta mo ang may pinakamadamo nga nahatag sa tawo?⁠— Huo, si Jehova nga Dios.

Ang Biblia nagasiling nga ang Dios “nagahatag sa tanan sing kabuhi kag sing ginhawa kag sing tanan nga butang.” Ginahatagan niya kita sing ulan gikan sa langit kag sing silak sang adlaw man, gani nagatubo ang mga tanom amo nga may pagkaon kita. (Binuhatan 14:17; 17:25) Indi katingalahan nga ginatawag sang Biblia si Jehova nga “malipayon nga Dios”! (1 Timoteo 1:11) Ang paghatag sa iban amo ang isa sa mga butang nga nagapahalipay sa Dios. Kag kon maghatag kita, makapahalipay man ini sa aton.

Karon, ano ang mahatag naton sa iban nga mga tawo? Ano sa banta mo?⁠— Kon kaisa ang regalo nagakinahanglan sing kuwarta. Kon ang iregalo mo yara sa balaligyaan, dapat mo ini bayaran. Gani kon amo sini ang iregalo mo, dapat ka magsupot sing kuwarta agod mabakal mo ini.

Apang indi tanan nga regalo yara sa balaligyaan. Halimbawa, sa isa ka mainit nga adlaw, ang isa ka baso sang mabugnaw nga tubig makaparepresko gid. Gani kon ihatag mo ini nga regalo sa isa ka tawo nga ginauhaw, mabatyagan mo ang kalipay sa paghatag.

Sa pila ka adlaw mahimo nga magluto kamo sang imo iloy sing cookies. Makalilipay gid ini. Apang ano ang himuon mo sa iban nga cookies nga magapahalipay sa imo sing dugang pa sa baylo nga ikaw lang ang makaon sini tanan?⁠— Huo, mahimo mo iregalo ang iban sini sa isa sang imo mga abyan. Luyag mo bala himuon ini sa pila ka adlaw?⁠—

Nahibaluan sang Daku nga Manunudlo kag sang iya mga apostoles ang kalipay sa paghatag. Nahibaluan mo bala kon ano ang ginhatag nila sa iban nga mga tawo?⁠— Amo yadto ang pinakamaayo nga butang sa kalibutan! Nahibaluan nila ang kamatuoran tuhoy sa Dios, kag malipayon nga ginpaambit nila ining maayong balita sa iban. Wala sila magpabayad.

Isa ka adlaw, si apostol Pablo kag ang iya mahirop nga abyan nga si disipulo Lucas may nakilala nga isa ka babayi nga luyag man makabatyag sing kalipay sa paghatag. Nakilala nila sia sa suba. Nagkadto didto si Pablo kag si Lucas bangod nabatian nila nga isa ini ka duog nga palangamuyuan. Kag matuod gid, pag-abot nila didto, may nakita sila nga pila ka babayi nga nagapangamuyo.

Ginsugid ni Pablo sa sining mga babayi ang maayong balita tuhoy kay Jehova nga Dios kag sa iya Ginharian. Ang isa sa ila, nga si Lydia, namati sing maayo. Pagkatapos sini, luyag ipakita ni Lydia nga naluyagan gid niya ang maayong balita nga nabatian niya. Gani ginpilit niya si Pablo kag si Lucas: “Kon ginhukman ninyo ako nga matutom kay Jehova, sulod kamo sa akon balay kag magpabilin.” Kag ginpilit niya sila nga magkadto sa iya balay.​​—⁠Binuhatan 16:13-​15.

Nalipay si Lydia nga gin-agda niya sa iya puluy-an ining mga alagad sang Dios. Ginhigugma niya sila bangod ginbuligan nila sia nga matun-an kon sin-o si Jehova kag si Jesus kag kon paano mabuhi sing dayon ang tawo. Nalipay man sia nga nahatagan niya si Pablo kag si Lucas sing pagkaon kag sing duog nga mapahuwayan nila. Gani nalipay si Lydia sa iya paghatag bangod luyag gid niya nga maghatag. Amo ini ang dapat naton tandaan. Ayhan may magsiling sa aton nga dapat kita maghatag sing regalo. Apang kon indi naton luyag magregalo, ini nga paghatag indi magapahalipay sa aton.

Halimbawa, ano kon may dulse ka nga luyag mo kaunon? Kon suguon ko ikaw nga dapat mo man hatagan sing dulse ang isa ka bata, malipay ka bala?⁠— Apang ano kon may dulse ka sang masugata mo ang imo nanamian gid nga abyan? Kon ikaw ang nagmatumato nga hatagan ang imo abyan, indi bala malipay ka?⁠—

Kon kaisa ginahigugma gid naton ang isa ka tawo amo nga luyag naton ihatag sa iya ang tanan bisan pa wala sing mabilin sa aton. Samtang nagalambo ang aton gugma sa Dios, dapat subong sini ang batyagon naton sa Iya.

May kilala ang Daku nga Manunudlo nga isa ka imol nga babayi nga subong sini. Nakita sia ni Jesus sa templo sa Jerusalem. May duha sia ka gamay nga sensilyo; amo lamang ini ang iya kuwarta. Apang ginhulog niya ini tanan sa kahon subong amot, ukon dulot, para sa templo. Wala sia ginpilit. Wala gani mahibal-an sang mga tawo kon ano ang iya ginhimo. Ginhimo niya ini bangod amo ini ang luyag niya himuon kag bangod ginahigugma gid niya si Jehova. Nalipay sia sa paghatag.​​—⁠Lucas 21:​1-4.

Makahatag kita sa madamo nga paagi. Mahunahuna mo bala ang pila ka paagi?⁠— Kon maghatag kita bangod luyag gid naton maghatag, mangin malipayon kita. Amo kon ngaa ang Daku nga Manunudlo nagasugo sa aton: “Ugalia ang paghatag.” (Lucas 6:38) Kon himuon naton ini, pahalipayon naton ang iban nga mga tawo. Kag kita ang mangin pinakamalipayon sa tanan!