Maayo kag Malain nga mga Hari

SUBONG sang gintagna ni Jehova, natunga ang Israel pagkatapos nga ginbiyaan ni Solomon ang matuod nga pagsimba. Mapintas ang nagbulos nga anak niya nga si Rehoboam. Gani nagrebelde ang napulo ka tribo sang Israel. Amo ini ang nangin naaminhan nga ginharian sang Israel. Duha ka tribo ang nag-unong sa trono ni David sa Jerusalem, ini naman amo ang nabagatnan nga ginharian sang Juda.

Ining duha ka ginharian may magamo nga kasaysayan bangod sang kakulang sing pagtuo kag pagsupak sang mga hari sini. Mas malala pa ang kahimtangan sang Israel sangsa Juda, kay halin pa sa umpisa ginpasanyog na nila ang butig nga pagsimba. Bisan pa sa pagpanikasog sang mga propeta kaangay nanday Elias kag Eliseo, nga nagbuhi pa gani sang mga patay, nagpadayon ang Israel sa ila kalautan. Sang ulihi, gintugutan sang Dios nga laglagon sang Asiria ang aminhan nga ginharian.

Nagdugay pa sing sulusobra isa ka gatos ka tuig ang Juda sangsa Israel antes ginsilutan sang Dios. Pila lamang sa mga hari sang Juda ang nagpamati sa paandam sang mga propeta sang Dios kag nanikasog nga ipasag-uli ang pungsod kay Jehova. Halimbawa, gintinluan ni Hari Josias ang Juda batok sa butig nga pagsimba kag ginkay-o ang templo ni Jehova. Sang nakita ang orihinal nga kopya sang Kasuguan sang Dios nga ginhatag paagi kay Moises, nagkasubo gid si Josias, amo nga ginpabaskog pa gid niya ang iya kampanya batok sa butig nga pagsimba.

Pero, makapasubo nga ang mga hari nga nagbulos kay Josias wala nagsunod sa iya maayong halimbawa. Gintugutan ni Jehova ang Babilonia nga daugon ang Juda kag ginlaglag sini ang Jerusalem kag ang templo. Madamo ang gindala nga bihag sa Babilonia. Gintagna sang Dios nga magadugay sing 70 ka tuig ini nga pagkabihag. Wala sing pumuluyo ang Juda sa sina nga mga tinion, asta nga natuman ang saad nga pabalikon sila sa Jerusalem.

Pero, wala na sing kaliwat si David nga magahari asta sa paggahom sang ginsaad nga Manluluwas, ang gintagna nga Mesias. Ang kalabanan sa mga hari nga naglingkod sa trono ni David sa Jerusalem, nagpamatuod nga ang indi perpekto nga mga tawo indi kalipikado sa paggahom. Ang Mesias lamang ang kalipikado sa paggahom. Gani nagsiling si Jehova sa katapusan nga hari sa kaliwat ni David: “Huksa ang purungpurung [korona]. . . . Manginwalay agi ini tubtub nga mag-abut ang may kinamatarung sini; kag sa iya ihatag ko ini.”—Ezequiel 21:26, 27.

​—Base sa 1 Hari; 2 Hari; 2 Cronica kapitulo 10 asta 36; Jeremias 25:8-11.