Luyag ni Juan nga Mabatian Mismo kay Jesus

Mga isa na ka tuig nga nabilanggo si Juan nga Manugbawtismo. Pero nabatian niya gihapon ang makatilingala nga mga buhat ni Jesus. Handurawa kon ano ang ginabatyag ni Juan sang ginsilingan sia sang iya mga disipulo nga ginbanhaw ni Jesus ang anak sang balo sa Nain. Pero luyag ni Juan nga mabatian mismo kay Jesus kon ano ang buot silingon sini tanan. Gani ginpatawag niya ang iya duha ka disipulo para pamangkuton nila si Jesus: “Ikaw bala ang Isa nga Magaabot, ukon may iban pa?”—Lucas 7:19.

Indi bala nga makatilingala ini nga pamangkot? Debotado nga tawo si Juan sang ginbawtismuhan niya si Jesus halos duha ka tuig na ang nagligad, kag nakita niya ang espiritu sang Dios nga nanaug kay Jesus kag nabatian ang ginsiling sang Dios nga nahamuot Sia kay Jesus. Wala kita sing rason nga maghinakop nga nagluya ang pagtuo ni Juan. Kay kon matuod ini, indi sia pagdayawon ni Jesus, subong sang ginhimo niya sini nga hitabo. Pero kon wala nagaduhaduha si Juan, ngaa namangkot sia sini kay Jesus?

Mahimo luyag lang siguraduhon ni Juan kay Jesus mismo nga sia ang Mesias. Mahimo nga mapalig-on sini si Juan samtang ara sia sa bilangguan. Kag may buot silingon pa ang pamangkot ni Juan. Nahibaluan niya ang mga tagna sa Biblia nga nagapakita nga ang Isa nga Hinaplas sang Dios mangin hari kag mangin manluluwas. Pero pila ka bulan pagkatapos mabawtismuhan si Jesus, nabilanggo si Juan. Gani nagapamangkot sia kon may iban pa nga magakari, ang magabulos kay Jesus, nga magatuman sang tanan nga mga tagna parte sa Mesias.

Sa baylo nga hambalan lang ang mga disipulo ni Juan nga, ‘Siempre ako ang Isa nga magakari,’ ginpakita ni Jesus ang pamatuod nga ginasakdag sia sang Dios paagi sa pagpang-ayo sang madamo nga may balatian. Ginsilingan niya dayon ang mga disipulo: “Magbalik kamo kay Juan kag sugiri ninyo sia sang inyo nabatian kag nakita: Ang mga bulag nakakita kag ang mga piang nakalakat, ang mga aruon nag-ayo kag ang mga bungol nakabati, ang mga patay nabanhaw kag ang mga imol ginabantalaan sang maayong balita.”—Mateo 11:4, 5.

Ang pamangkot ni Juan mahimo magpahangop nga ginapaabot niya nga indi lang amo sini ang himuon ni Jesus kag mahimo hilwayon pa sia sa bilangguan. Pero ginsilingan sia ni Jesus nga indi magpaabot sing dugang pa nga milagro sangsa iya mismo ginahimo.

Sang naghalin na ang mga disipulo ni Juan, ginpasalig ni Jesus ang kadam-an nga indi lang isa ka manalagna si Juan. Sia “ang mensahero” nga gintagna ni Jehova sa Malaquias 3:1. Sia man si manalagna Elias nga gintagna sa Malaquias 4:5, 6. Si Jesus nagpaathag: “Sa pagkamatuod nagasiling ako sa inyo, wala pa gid sing natawo nga labaw pa kay Juan nga Manugbawtismo, apang ang tawo nga kubos sa Ginharian sang langit labaw pa sa iya.”—Mateo 11:11.

Paagi sa pagsiling nga ang kubos sa Ginharian sang langit labaw pa kay Juan, ginpakita ni Jesus nga wala nalakip si Juan sa langitnon nga Ginharian. Si Juan ang naghanda sang dalan para kay Jesus pero napatay sia antes mabuksan sang Cristo ang dalan pa langit. (Hebreo 10:19, 20) Pero si Juan matutom nga manalagna sang Dios kag mangin sakop sia sang Ginharian sang Dios diri sa duta.