Nabaton ni Cornelio ang Balaan nga Espiritu

Sa Cesarea, may kilala nga opisyal sang mga soldado sang Roma nga ang ngalan si Cornelio. Bisan pa indi sia Judiyo, ginarespeto sia sang mga Judiyo. Maalwan sia nga nagabulig sa pigado nga mga tawo. Nagapati si Cornelio kay Jehova kag pirme sia nagapangamuyo sa iya. Isa ka adlaw, nagpakita ang anghel kay Cornelio kag nagsiling: ‘Ginapamatian sang Dios ang imo mga pangamuyo. Gani magpadala ka sing mga tawo sa siudad sang Joppe, sa ginadayunan ni Pedro, kag pangabaya sia nga kadtuan ka niya.’ Nagpadala dayon si Cornelio sang tatlo ka lalaki sa Joppe, mga 30 ka milya pakadto sa bagatnan.

Sa Joppe, nakabaton si Pedro sang palanan-awon. Nakita niya ang mga sapat nga indi puede kaunon sang mga Judiyo, kag may nabatian sia nga tingog nga nagasiling nga kaunon niya ini. Indi ini pagkaunon ni Pedro, nga nagasiling: ‘Wala pa gid ako makakaon sang indi matinlo nga sapat.’ Dayon ang tingog nagsiling sa iya: ‘Indi pagtawga ini nga mga sapat nga indi matinlo. Natinluan na sila sang Dios.’ Ginsilingan man si Pedro: ‘May tatlo ka lalaki sa puertahan. Upod ka sa ila.’ Nagkadto si Pedro sa puertahan kag ginpamangkot ang mga lalaki kon ngaa ara sila didto. Nagsabat sila: ‘Ginpadala kami ni Cornelio nga opisyal sang mga soldado sang Roma. Ginapakadto ka niya sa iya balay sa Cesarea.’ Ginhagad ni Pedro ang mga lalaki nga magtulog sa balay bilang iya mga bisita. Pagkasunod nga adlaw, nag-upod sia sa ila sa Cesarea, upod man sa pila ka utod sa Joppe.

Sang nakita ni Cornelio si Pedro, naghapa sia sa iya tiilan. Pero nagsiling si Pedro: ‘Tindog ka! Tawo lang ako pareho mo. Ginsilingan ako sang Dios nga magkadto sa imo balay, bisan pa ang mga Judiyo wala nagasulod sa balay sang mga Gentil. Gani sugiri ako kon ngaa ginpasugat mo ako.’

Si Cornelio nagsiling kay Pedro: ‘Sang nagligad nga apat ka adlaw, nangamuyo ako sa Dios, kag ginsilingan ako sang anghel nga magpadala sing mga lalaki nga magsugat sa imo. Palihug tudlui kami sang mga pulong ni Jehova.’ Si Pedro nagsiling: ‘Natun-an ko nga ang Dios wala sing ginapasulabi. Ginabaton niya ang bisan sin-o nga gusto magsimba sa iya.’ Madamo sang gintudlo si Pedro sa ila parte kay Jesus. Dayon nabaton ni Cornelio ang balaan nga espiritu, pati na sang mga kaupod niya didto, kag tanan sila ginbawtismuhan.