Dimabungahon nga Palibot Para sa Kabataan

SING amat-amat ginbag-o sang modernong katilingban ang palibot para sa mapagros nga pagtubo sang bata gikan sa isa nga mabungahon pakadto sa isa nga baog, siling ni Propesor Ed­ward A. ­Wynne, sang Uni­ver­si­ty of Il­li­nois. Ginbasol niya ang sobra nga pagkaindibidualismo, manggad ukon kabuganaan kag ang kapaslawan sang relihion. “Halangpunon kon ngaa madamu nga mga ginikanan ang naligban,” siling ni Propesor ­Wynne sa The ­Wall ­Street Jour­nal. “Ginabaton sang iban ang kapaslawan kag ang sangkol nga mga mag-asawa nagaplano nga ipaisol ukon likawan pa gani ang pagsagud sa bata.” Naglaygay sia sang baliskad nga mga bagay subong sang paghimu sang mag-asawa sing serioso nga panaad nga padakuon sing nagakaigo ang bata, nga mahimu nagakahulugan sing pagpakig-upod sa isa ka relihion nga nagapalig-on sang paghiusa sang pamilya kag nagapaabot nga magsunod ang iya mga katapo, nagaupod sing gugma sa disiplina kag nagasakripisyo sang dungganon nga mga tulumuron.

Ginapadaku sang Biblia ini nga kinahanglanon sang nagligad nga mga siglo. Ginalaygayan sini ang mga ginikanan: “Padakua sila [ang mga kabataan] paagi sa Cristianong panudlo sa Cristianong disiplina.” (Efeso 6:4, Phil­lips) Ang Pulong sang Dios dugang nga nagalaygay: “Tipona ang mga tawo, ang mga lalaki kag mga babayi kag ang mga magagmay . . . agod nga sila magapamati kag agod nga sila magatuon.” (Deuteronomio 31:12) Ang dalayon nga pag-aplikar sa sini nga mga prinsipio tunay nga magabulig sa panimalay nga mabatoan ang pagbutong paubos sa modernong katilingban.