Report sang mga Manugbantala sang Ginharian
“Mga Nagahupot sing Integridad” nga mga Kombension sa Pilipinas
MADINALAG-ON gid sa tanan nga paagi ang serye sang 23 ka “Mga Nagahupot sing Integridad” nga mga Kombension nga ginhiwat sa Pilipinas sang 1985. Ang gintingob nga tumalambong nga 213,734, 27-porsiento nga pag-uswag sang sa kadamuon sang nagligad nga tuig, labaw sing duha kag tunga ka beses sa kabilogan nga kadamuon sang mga manugbantala sa pungsod. Nagapakita ini nga madamo sing interesado nga mga tawo ang nagatambong sa mga kombension. Subong man, 2,223 ang nabawtismohan, labaw sing 14.5 porsiento sang sa nagligad nga tuig.
Sa Tuguegarao, Cagayan, ginpaabot nga 12,000 ang magatambong sa kombension, apang 24,327 ang nag-abot! Ang isa ka estasyon sang radyo nagpalayag sing 30-minutos nga interbyu sa kauturan, nga wala sing duhaduha nakabulig sa madamo nga tumalambong. Namangkot ang nagainterbyu kon paano naton ginahuptan ang paghidait kag kahim-ong sa aton mga kombension. Ginpaathag nga ang tanan nga katapo sang aton organisasyon nagatinguha sa pagpalambo sing mga bunga sang Biblia nga gugma kag paghidait. Gani kon may kombension kita kaangay sini, wala sing ilinaway. Natingala ang manug-interbyu kag nagsiling: “Dalayawon gid ang inyo organisasyon! Ang iban nga mga organisasyon indi makahimo sini. Sa kada tion nga may subong sini nga kadam-an, pirme nga may malain nga mga hitabo.”
Sa sini gihapon nga kombension, ang isa ka instruktor sa Cagayan State University nagsiling: “Kadamo gid sang nagtambong; ang mga delegado disiplinado; nagabinuligay sila; nagpakita sila sing bug-os nga dedikasyon sa ministeryo. Walay sapayan sang madamo nga delegado, ang lugar matinlo; may kahim-ong kag wala sing malain nga natabo, nga nagapamatuod lamang nga ang mga Saksi reliohiso nga nagabuhat sang ila naton-an gikan sa Kasulatan.”
Ang concessionaire sa Rizal Memorial Stadium sa Manila nagkomento sa tion sang kombension: “Ginadayaw ko ang kahimusan sang inyo asambleya. Organisado ang inyo Sosiedad, kag karon ko lang nasaksihan ini nga sahi sang pagkahim-ong sang mga Saksi bangod karon lang ako nakakita sing asambleya nga subong sini.”
Sa kombension sa Calbayog City, 7 ka manugbantala ang nagtambong gikan sa isa ka naligwin nga grupo, kag may ginpaupod sila nga 14 ka interesado nga tawo. Sa pag-apresyar sang kinahanglanon nga magtambong sa sining espirituwal nga piesta, ang isa ka pamilya gikan sa Palawan naggasto sing mga 20 porsiento sang ila tuigan nga kita agod makatambong sa Puerto Princesa City.
Madamo nga delegado gikan sa luwas ang naglakbay padulong sa kombension sa Manila, kag mga 80 porsiento sini ang yara sa bug-os tion nga pag-alagad. Makalilipay nga makita kon paano ang kauturan napalig-on sang drama nga “Ang Imo Palaabuton—Isa ka Hangkat,” nga nahanungod sa bug-os tion nga pag-alagad. Sa Iloilo City, tatlo ka tawo nga nagapakigbahin sa sini nga drama ang napahulag sa tion sang mga pag-ensayo amo kon ngaa nagpadala sila sing aplikasyon para sa regular payunir bisan sa wala pa magsugod ang kombension. Sa Ormoc City, ginsambit sang tsirman sang kombension nga sa tapos gid sang drama, anum ka manugbantala ang nangayo sing aplikasyon para sa regular payunir.
Sa pagkamatuod ginapahulag gid sang espiritu ni Jehova ang iya katawhan sa “paghalad sang ila kaugalingon sing kinabubut-on” sa sining katapusan nga mga adlaw. (Salmo 110:3) Ang “Mga Nagahupot sing Integridad” nga mga Kombension sa Pilipinas nagpalig-on gid sing daku sa mga kauturan kag interesado nga mga tawo didto.