Madumduman Mo Bala?

Nabasa mo bala ang ulihi nga pila ka mga guwa sang Ang Lalantawan? Nian tan-awa kon bala madumduman mo ang masunod nga mga punto:

◻ Sa anong kahulugan makasiling si Pablo nga sia “matinlo gikan sa dugo sang tanan nga tawo”? (Binuhatan 20:26, 27)

Sing maathag, sa iya bug-os nga pagkabuhi si Pablo wala gid makapatulo sing dugo sa inaway ukon nakakaon sia sang dugo. Apang, sing importante pa gid, ginpakita niya ang daku nga interes sa kabuhi sang iban subong sang ginarepresentar sang ila dugo. Nabalaka sia nga wala sing isa ang mapatay sa adlaw sang paghukom sang Dios bangod wala niya sila paghatagi sing maid-id nga panaksi.—9/1, pahina 27.

◻ Ngaa ang wali ni Jesus sa higad sang bukid tuman ka epektibo?

Ang wali ni Jesus importante indi lamang bangod sang iya espirituwal nga kaundan kundi sang iya man pagkasimple kag pagkaathag.—9/15, pahina 9.

◻ Ano ang naghimo sa laygay ni apostol Pablo nga tuman ka epektibo?

Ang iya pagkaepektibo nasandig sa kamatuoran nga ang ginpatuhoyan sini ni Pablo nakahibalo nga ginahigugma sila niya. Subong man, nagsalig sia sa diosnon nga kaalam, indi sa iya kaugalingon nga mga opinyon, kag naghatag sia sing laygay sa espiritu sang kalulo. (2 Timoteo 3:16; Tito 3:1, 2)—9/15, pahina 12, 13.

◻ Ano ang ginarepresentar sang apat ka sapat nga nakita ni Daniel sa iya damgo nga narekord sa Daniel kapitulo siete?

Nagarepresentar sila sa mga kagamhanan sa kalibutan nga napetsahan kutob sang adlaw ni Daniel padayon tubtob sa pagtukod sa Ginharian sang Dios. Sila amo ang: Babilonia, Medo-Persia, Gresya, kag Roma kag ang nag-ulhot sa sini, ang Anglo-Amerikano nga Kagamhanan sa Kalibutan.—10/1, pahina 7.

◻ Ngaa ang pagbantala sang maayong balita nahanungod sa Ginharian isa ka praktikal nga paagi sa pagpakita sing gugma sa isigkatawo sang isa?

Ang pagbantala nga hilikuton praktikal bangod nagabulig ini sa mga tawo nga mapadapat ang moral nga mga prinsipio. Nagahimo man ini sa ila nga malikawan ang madamong palaligban sa kabuhi.—10/1, pahina 23.

◻ Ngaa ang termino nga “Anak sang tawo” nagakabagay kay Jesus?

Sang gin-aplikar ni Jesus ini nga termino sa iya kaugalingon isa sia ka tawo, kag gani literal sia nga “anak sang tawo.” Ginhatag man niya ang iya kabuhi agod gawaron ang mga tawo, sa amo nagabuhat sang papel sang pinakamalapit nga paryente sang tawo—sa pagkamatuod isa ka “Anak sang tawo.” (Mateo 20:28; Hebreo 2:11-17)—10/15, pahina 6.

◻ Ngaa ang makahulugan nga komunikasyon sa ulot sang mga ginikanan kag mga kabataan importante gid?

Inang paghambalanay nagatuga sing paghangop kag pag-ulikid sa isa kag isa. Kon ang kabataan nagapakita sing kahanda sa pagsugid bisan sang personal nga mga bagay, mahangpan sang mga ginikanan kon ano ang yara sa ila mga tagipusuon. Subong man, mahangpan sang kabataan nga ang balatyagon kag motibo sang ila mga ginikanan pareho gid sa ila. Ini tanan nagaamot sing daku sa isa ka malipayon kag nahiusa nga pamilya.—11/1, pahina 18, 19.

◻ Paano malikawan sang isa ka Cristiano ang madamong kabudlayan sa relasyon sa negosyo?

Dapat usisaon sing maayo sang isa ka Cristiano ang iya mga motibo sa wala pa magsulod sa negosyo. Ang laygay sang Biblia sa Roma 14:19 dapat pirme dumdumon, “nagahimo nga sa paghidait kag sa pagpalig-on sa isa kag isa.”—11/15, pahina 19.

◻ Ano ang mga benepisyo sang pagsunod sa inspirado nga laygay nga magminyo “lamang nga sa Ginuo”? (1 Corinto 7:39)

Ang Cristianong magtiayon sarang makapalig-onay sa isa kag isa sa pagsugata sing madinalag-on sa lainlain nga mga pagtilaw kag sa amo magpabilin nga matutom sa Dios. Sing nahiusa, sarang nila mabatoan ang lainlain nga mga pag-ipit nga makapaluya sa higut sang pag-asawahay. Ang ila mga panikasog nga alagaron si Jehova kag magkabuhi suno sa iya mga dalanon makaamot sa madinalag-on nga pag-asawahay nga nagapadungog kay Jehova.—11/15, pahina 26.

◻ Anong maayong panugda nahanungod sa amot ang ginhatag ni apostol Pablo sa kongregasyon sang Corinto?

Si Pablo nagsulat sa 1 Corinto 16:2: “Sa nahaunang adlaw sang tanan nga semana, ang tagsatagsa sa inyo magpain . . . suno sa iya pagkabugana.” Ang pagkatayuyon amo ang yabi nga ginapadaku, indi ang kantidad. Sa karon, ini man nga prinsipio sarang maaplikar sang katawhan ni Jehova agod masugata ang kinahanglanon nga mga gasto sa Kingdom Hall ukon makahimo sang iban pa nga may kahilabtanan sa Ginharian nga mga amot.—12/1, pahina 30.