Report sang mga Manugbantala sang Ginharian

Ang Pagkabunayag Nagadala sing Kadayawan kay Jehova

GINAPATUMAN ni Jehova nga ang iya mga alagad mangin bunayag, matarong, kag masaligan. Halimbawa, ginlaygayan si Moises nga pilion subong mga manugtatap yadtong “sangkol nga mga tawo, mahinadlukon sa Dios, masaligan nga mga tawo, nagadumot sa dimatarong nga ganansia.” (Exodo 18:21) Kaangay sadtong pinili nga mga lalaki, kilala sa bug-os nga kalibutan ang pagkamasaligan sang mga Saksi ni Jehova, subong ginapakita sang masunod nga eksperiensia.

◻ Ang isa ka Saksi nga nagatrabaho sa sanga talatapan sang Watch Tower Society sa Ghana sala nga ginbayaran sing $3,630 sang isa ka kahero sang banko. Ang sala wala matalupangdi sadto nga tion sang kahero ukon sang utod. Apang, sang pagpauli niya, nakita sang utod nga sobra ang ginbayad sa iya kag sa gilayon nagbalik sia sa banko nga dala ang kuwarta. Sang makita sang kahero ang utod, nagtuaw sia: “Yari na sia! Nagbalik gid sia! David, gindala sang inyo upod ang kuwarta!” Ang kuwarta ginbalik sa kahero. Si David, isa sang mga Saksi ni Jehova nga nagatrabaho sa amo man nga banko, nagpasalig sa kahero kag sa iban pa nga nakahibalo sa sala nga ang kuwarta ibalik sa gilayon nga matukiban sang utod ang sala.

“Samtang nagapadayon ining drama,” siling sang report, ang “tanan nga mga mata” nagatulok sa duha ka utod. Ang isa nga nagbalik sang kuwarta nagpaathag: “Bueno, indi ko matago ining kuwarta nga may maayong konsiensia sa atubangan sang akon Dios, si Jehova.” Bangod sining hitabo, nadugangan pa ang pagtahod sang mga opisyales sang banko sa Watch Tower Society.

Ang pagkabunayag nagabunga sing pagtahod, labi na sa isa ka kalibutan nga tuman ka dayaan. Nahibaloan sining utod nga manabat sia sa isa nga mataas pa sa tawo, si Jehova nga Dios. Ina nga pagkabunayag nagadala sing kadayawan kay Jehova, kay sia “isa ka Dios sang katutom, kag wala sing kalautan sa iya.”—Deuteronomio 32:4.

◻ Ang pagkabunayag kag paghupot sing maayong konsiensia sa Dios natalupangdan man sa eksperiensia sang isa ka pamatan-on nga lalaki sa Thai­land. Nagsuskriber sia sa Ang Lalantawan kag Magmata! kag nagasugod na sa pag-aplikar sang laygay sang Biblia nga nasapwan niya sa sining mga balasahon. Sia ang puno nga ac­count­ant sang kompanya nga iya ginaobrahan, kag ang iya konsiensia nagsugod sa pagtublag sa iya, bangod kinabatasan na sang madamo nga negosyo nga magtipig sing duha ka libro agod makalikaw sa buhis. Sang ginpalapitan niya ang manedyer tuhoy sa sini nga butang, nagkadlaw lamang ang manedyer. Nian nag-abot ang isa pa ka artikulo sa isa sang mga magasin nga nagapadaku sang kinahanglanon nga mangin bunayag. Natublag ang konsiensia, ang ac­count­ant nangamuyo kay Jehova agod mangayo sing bulig sa pagtadlong sining butang tuhoy sa buhis upod sa iya manedyer. Daku nga kantidad sang kuwarta ang nadalahig. Pagkaaga naglisensya sia sa manedyer nga bayaran ang buhis nga balayran, kag sa iya kakibot, nagsugot ang manedyer nga wala na sing pagbais.

Karon ining tawo malipayon na samtang nagakabuhi sia sing bunayag sa atubangan sang Dios kag sang tawo. Inang maalamon nga dalanon nagapahalipay man kay Jehova, kay suno sa ginasiling sang Hulubaton 27:11: “Magmaalam ka, anak ko, kag pasadyaha ang akon tagipusuon, agod nga masabat ko sia nga nagapakahuya sa akon.”

[Laragway sa pahina 21]

“Indi ko matago ining kuwarta nga may maayong konsiensia”