Madumduman Mo Bala?

Ginbinagbinag mo bala sing maayo ang bag-o nga mga guwa sang Ang Lalantawan? Kon amo, ayhan madumduman mo ang masunod:

◻ Ngaa ang isa ka Cristiano indi dapat magsaulog sang Paskua?

Ang isa ka rason amo nga ang kapiestahan sang Paskua naghalin sa paganong pagsaulog sang Saturnalia, ang Romanong kapiestahan sang dios sa agrikultora nga si Saturn. Ang Pulong sang Dios nagasiling: “Indi magpagota sa mga ditumuluo.” (2 Corinto 6:14-17) Ang Cristiano indi mahamulag sa mga ditumuluo kon nagasaulog gihapon sia sang kapiestahan nga may paganong ginhalinan.—12/15, pahina 6.

◻ Ano ang Cristianong Paghinugyaw?

Amo ini ang kahilwayan nga nagadalahig sa “kamatuoran” nga magahilway sa katawhan gikan sa “kasuguan sang sala kag sang kamatayon.” Ini nga kamatuoran nasentro sa “Anak,” si Jesucristo. (Juan 8:31-36; Roma 8:1, 2, 21)—1/1, pahina 21.

◻ San-o ginsaulog ang Cristianong Paghinugyaw?

Sang Pentecostes 33 C.E., ang Cristianong Paghinugyaw nagsugod nga ginsaulog sadtong gintangdo nga mabuhi sa langit. Para sa tumuluo nga katawhan nga magaagom sing kabuhi nga walay katapusan sa duta, isa ka dakung Cristianong Paghinugyaw ang maeksperiensiahan sa Milenyo, kay ang tanan nga agi sang ginpanubli nga sala kag pagkadihimpit pagadulaon.—1/1, pahina 21, 22, 27.

◻ Ngaa ang mga Saksi ni Jehova wala nagapalakat sing mga eskwelahan para sa mga kabataan sa Asia kag sa bisan diin?

Bangod sang ginasiling sang Biblia, ang mga Saksi ni Jehova dapat mabalaka una sa gintangdo sa ila nga pagbantala sang importante nga mensahe nahanungod sa Ginharian sang Dios. (Mateo 24:14; 28:19, 20) Nahibaluan nila ang tawhanon nga pag-antos kag mga inhustisya sa karon nga sistema, kag nagabulig sila tubtob sa masarangan nila. Apang ginakilala nila nga ang matuod nga lubad nasandig, indi sa tawhanon nga mga kamut, kundi sa kaluwasan nga pahanabuon sa dili madugay sang Ginharian sang Dios. (Salmo 146:3-10)—1/15, pahina 7.

◻ Ano nga mga bahin sang pagtuo ang matun-an naton gikan sa mga halimbawa nanday Abel, Enoc, Noe, Abraham, kag Moises?

Ang pagtuo kaangay sang iya ni Abel nagapasangkad sang aton apresasyon sa halad ni Jesus. Ang matuod nga pagtuo nagabulig sa aton nga magmaisugon, kaangay ni Enoc. Kaangay ni Noe, ang pagtuo nagapahulag sa aton nga sundon ang mga instruksion sang Dios. Ang pagtuo ni Abraham nagapatudok sa aton sang kinahanglanon nga tumanon ang Dios kag saligan ang iya mga saad. Dapat kita magpabilin nga walay dagta gikan sa kalibutan kag magtindog nga matutom kaupod sa katawhan sang Dios, subong sang ginpakita ni Moises.—1/15, pahina 20.

◻ Sa anong paagi ang pagkamausisaon mahimo nga pagpakamaayo ukon pagkamalaut?

Ang maayo nga pagkamausisaon nahanungod sa aton Manunuga, sa iya kabubut-on, kag sa iya mga katuyoan tuman ka makaalayaw kag mapuslanon, nagadala sing kalipay kag kasulhay sa aton kabuhi. Sa pihak nga bahin, ang walay pagpugong nga pagkamausisaon magadul-ong sa aton sa pagbantabanta kag tawhanon nga mga teoriya, nagapadiutay sang matuod nga pagtuo kag diosnon nga debosyon. 2/1, pahina 29.

◻ Ano ang buot silingon ni Jesus sang mangamuyo sia: “Amay ko, kon mahimo, paligara sa akon ining tagayan”? (Mateo 26:39)

Si Jesus nabalaka nahanungod sa panumbungon nga pasipala nga nakita niya nga isumbong sa iya. Amo ini ang pinakamalain nga krimen nga mahimo sang isa ka Judiyo. Ang iya kamatayon sa idalom sina nga sala, kon amo, daw magahatag sing pasipala sa iya langitnon nga Amay. 2/15, pahina 13.

◻ Kon ang isa magabatas sing pag-antos ukon kasisit-an, ano ang maalamon nga dalanon nga himuon niya?

Labing maayo para sa iya nga magpailob, nagahulat sing malaumon sa Dios sang paumpaw, kag nagasuod pa gid sa Iya. Magapahapos ini para sa iya nga mabatas ang iban pa kaanggid nga mga eksperiensia nga indi madulaan sing paglaum. (Panalabiton 3:25-31) 2/15, pahina 24.

◻ Sin-o ang “napulog-duha ka tribo sang Israel” nga ginhambal ni Jesus sa Lucas 22:28-30?

Nagarepresentar ini sa tanan nga katawhan nga pagahukman ni Cristo kag sang iya 144,000 ka kabulig nga mga saserdote may kahilabtanan sa bag-o nga kaliwatan sang tanan nga gintuyo ni Jehova para sa sining duta. (Mateo 19:28) 3/1, pahina 28.

◻ Ano ang kahulugan sang balaan nga paghidait, kag paano ini matigayon?

Ang balaan nga paghidait amo ang malinong nga kahimtangan sang hunahuna kag tagipusuon, nasulod nga kahimtangan sang kalinong, walay sapayan sang kon ano ang nagakatabo. (Salmo 4:8) Matigayon lamang ini paagi sa kalahamut-an nga kaangtanan sa Dios, nga ginapaposible sang halad gawad ni Cristo Jesus. (Colosas 1:19, 20) 3/15, pahina 11, 14, 15.

◻ Ano nga bulig ang matigayon naton karon agod makilala sing maayo ang Dios?

Yara ang Biblia kag hitabo sang mga siniglo nga nagtuman sang mga tagna sa Biblia. Subong man, yara ang mga rekord sang Ebanghelyo sang kabuhi, binuhatan, kag pinamulong ni Jesucristo, nahanungod sa iya si Pablo nagsulat: “Sa iya [kay Cristo] nagapuyo sing lawasnon ang bilog nga kabug-osan sang balaan nga kinaiya.” (Colosas 2:9) 4/1, pahina 6.