Kabuhi kag Ministeryo ni Jesus

Gin-ayo ang Bata nga Ginsudlan sang Demonyo

SAMTANG sanday Jesus, Pedro, Santiago, kag Juan naglakat, ayhan didto sa kiliran sang Bukid Hermon, ang iban nga mga disipulo nakasugata sing isa ka problema. Sang pagbalik niya, gilayon nga nakita ni Jesus nga may malain nga natabo. May kadam-an nga nagalibot sa iya mga disipulo, kag ang mga escriba nagapakigpuyas sa ila. Sang makita si Jesus, ang katawhan nakibot sing daku kag nagdalagan sa pagsug-alaw sa iya. “Ano bala ang ginapakigpuyas ninyo sa ila?” pamangkot niya.

Nagaabante gikan sa kadam-an, isa ka tawo ang nagluhod kay Jesus kag nagpaathag: “Manunudlo, gindala ko sa imo ang akon anak nga lalaki nga may espiritu nga apa; kag bisan diin madakop sia sini, ginapus-ang sia sini, kag nagabura sia kag nagapabagrut sang iya mga ngipon kag nagapalamaskug. Kag naghambal ako sa imo mga disipulo nga subulon nila ini, apang indi sila makasarang.”

Ayhan ginapadaku sang mga escriba ang kapaslawan sang mga disipulo nga ayuhon ang bata, ayhan nagayaguta sang ila mga panikasog. Sa sining ital-ital gid nga tion, nag-abot si Jesus. “O kaliwatan nga dimatinuohon,” siling niya, “tubtob san-o pa bala nga ako magaupod sa inyo? Tubtob san-o pa bala nga ako magabatas sa inyo?”

Ginapatuhoy ni Jesus ang iya komento sa tagsatagsa nga yadto didto, apang walay duhaduha nga ginpatuhoy ini sing direkta sa mga escriba, nga nagagamo sa iya mga disipulo. Masunod, si Jesus nagsiling tuhoy sa bata: “Dalha sia sa akon.” Apang sang magpalapit na ang bata kay Jesus, ang demonyo nga nagapanag-iya sa iya nagtumba sa iya sa duta kag nagkombulsion sing grabe. Ang bata nagligid sa duta kag nagabura ang baba.

“Daw ano na bala kadugay kutob nga nahanabo ini sa iya?” pamangkot ni Jesus.

“Kutob sang bata pa,” sabat sang amay. “Kag sa makadamo ginpilak sia [sang demonyo] sa kalayo kag sa tubig man sa paglaglag sa iya.” Nian ang amay nagpakiluoy: “Kon ikaw makahimo sing bisan ano, kaluoyi kami kag tabangi kami.”

Ayhan sa sulod sang mga tinuig, ang amay nagpangayo sing bulig. Kag, karon, bangod sang kapaslawan sang mga disipulo ni Jesus, daku gid ang iya kasubo. Nahangpan ang halos wala na sing paglaum nga pangabay sang amay, makapalig-on nga nagsiling si Jesus: “Inang ekspresyon, ‘Kon ikaw makahimo’! Ang tanan nga butang mahimo sa iya nga nagatuo.”

“Nagatuo ako!” gilayon nga singgit sang amay, kag nagpakiluoy sia: “Tabangi ang akon pagkadimatinuohon!”

Sang matalupangdan nga ang kadam-an nagadalagan kaupod nila, ginsabdong ni Jesus ang demonyo: “Ikaw nga espiritu nga apa kag bungol, nagasugo ako sa imo, guwa ka sa iya kag dili na magsulod sa iya.” Sang manugguwa ang demonyo, ginhimo sini ang bata nga magsinggit kag magkombulsion sing madamong beses. Nian ang bata nahimo nga daw patay sa duta, sa bagay nga ang kalabanan nagsiling: “Patay na sia!” Apang ginkaptan ni Jesus sa kamot ang bata, kag ginbangon sia.

Sang nagligad, sang ang mga disipulo ginpadala sa pagbantala, nagpaguwa sila sang mga demonyo. Gani karon, sang magsulod sila sa balay, ginpamangkot nila si Jesus sing pahain: “Ngaa bala nga indi kami makasubol sa iya?”

Nagapakita nga bangod ini sa ila kakulang sing pagtuo, si Jesus nagsabat: “Ini nga bagay indi mapaguwa sa bisan ano kundi sa pangamuyo kag puasa.” Maathag nga kinahanglan ang paghanda para mapaguwa ang makusog nga demonyo nga naulamid sa sini nga kaso. Kinahanglan ang makusog nga pagtuo upod ang pangamuyo nga nagapangabay sa nagahatag sing gahom nga bulig sang Dios.

Nian si Jesus nagadugang: “Sa pagkamatuod nagasiling ako sa inyo, Kon kamo may pagtuo subong sa lamigas sang mustasa, magasiling kamo sa sining bukid, ‘Saylo didto,’ kag ini magasaylo, kag wala gid sing dimahimo ninyo.”

Daw ano ka kusog ang pagtuo! Ang mga sablag kag mga kabudlayan nga nagaupang sang pag-uswag sa pag-alagad kay Jehova mahimo nga daw indi malandas kag indi madula subong sang dakung literal nga bukid. Apang, ginapakita ni Jesus nga kon palambuon naton ang pagtuo sa aton mga tagipusuon, bunyagan kag palig-unon ini nga magtubo, magahamtong ini kag makasarang sa paglandas sa katulad-bukid nga mga sablag kag mga kabudlayan. Marcos 9:14-29; Mateo 17:19, 20; Lucas 9:37-43.

◆ Ano nga kahimtangan ang nasapwan ni Jesus sang magbalik halin sa Bukid Hermon?

◆ Ano nga pagpalig-on ang dugang nga ginhatag ni Jesus sa amay sang ginsudlan sang demonyo nga bata nga lalaki?

◆ Ngaa wala mapaguwa sang mga disipulo ang demonyo?

◆ Daw mangin ano kakusog ang pagtuo subong sang ginpakita ni Jesus?