Isa Ka Problema sang mga Katoliko
ANG Iglesia Katolika nagaatubang karon sang duha ka problema may kahilabtanan sa Yawa. Sa isa ka bahin, dapat sini batuan ang huyog sa tunga sang modernong-adlaw nga mga Katoliko sa pagpangduhaduha sa pagluntad sang Yawa. Sa pihak nga bahin, dapat sini lubaron ang silabo sang indi opisyal nga eksorsismo, ukon pagpaguwa sa malaut nga mga espiritu.
Ginpahanumdom ni Papa Juan Paulo II ang Katolikong mga pamatan-on nga dapat nila binagbinagon sing serioso ang Yawa. Sa isa ka sulat, nagsiling sia: “Indi kamo dapat magkahadlok sa pagtawag sa una nga manughikot sing malaut sa iya ngalan: ang Isa nga Yawa. Naggamit sia kag padayon nga nagagamit sing mga padihot sang indi pagpakilala sang iya kaugalingon.”
Subong man, si kardinal Joseph Ratzinger, mataas nga opisyal sang Sacred Congregation for the Doctrine of the Faith, sa Roma, nagsiling: “Bisan ano man ang isiling sang kubos ka mahantupon nga mga teologo, ang yawa, kon nahanungod sa Cristianong pagtuluohan, makalilibog apang matuod, personal kag indi lamang simbuliko nga presensia. Sia isa ka gamhanan nga katunayan.”
Ginpabutyag man ni kardinal Ratzinger ang daku nga kabalaka nahanungod sa indi awtorisado may kahilabtanan kay Satanas nga mga miting nga ginahiwat sang mga Katoliko sa madamong pungsod. Sa isa ka sulat nga may petsa nga Septiembre 29, 1985, nga ginpatuhoy sa tanan nga Katolikong obispo sa bug-os nga kalibutan, sia nagsulat: “Sa sulod sang madamong tuig, sa pila ka grupo sang simbahan, dugang kag dugang nga mga miting sa pangamuyo ang ginahiwat agod hilwayon ang katawhan gikan sa impluensia sang demonyo.” Ginpahanumdom niya ang mga obispo nga suno sa kanon nga kasuguan, wala sing subong sina nga mga miting ang sarang mahiwat nga wala sing pahanugot gikan sa lokal nga obispo kag nga ina nga pahanugot dapat lamang ihatag sa mga pari. Wala sing lego ang may kinamatarong sa pagsambit sang “pormula sa pagtabog paguwa batok kay Satanas kag sa nahulog nga mga anghel.”
Ang Pranses nga pamantalaan nga Le Figaro nagreport: “Ang ‘hinali nga pagbantog’ sang eksorsismo kag batok kay Satanas nga mga hilikuton nabalahuba sang nagligad nga bulan sa Italya, labi na sa Turin, diin bag-o lang gintangdo ni kardinal Anastasio Ballestrero ang anum ka bag-ong manugpaguwa sang demonyo.” Nagahatag sa hitabo sing bug-os kalibutan nga kasangkaron, ang pamantalaan sa Paris nga International Herald Tribune nagsulat: “Ang kawili sa posible nga presensia ni Satanas sa Turin bahin lamang sang mas masangkad nga diskusyon sa tunga sang Iglesia Katolika Romana nahanungod sa personipikasyon sang malaut nga ginpatuhuyan sing nanuhaytuhay sa Kasulatan kag sa panudlo sang simbahan subong ‘ang prinsipe sining kalibutan,’ ‘ang gahom sang kadudulman,’ ang ‘dumaan nga man-ug,’ ang ‘manugpasipala.’ ”
Si Jean Dutourd, nga katapo sang French Academy, naghimo sing makawiwili nga komento sa modernong-adlaw nga mga pangduhaduha nahanungod sa pagluntad ni Satanas—bisan sa Katolikong mga obispo. Nagsulat sia sa Pranses nga pamantalaan nga L’Est-Républicain: “Ang pagpati sa Dios ginakurisungan sini nga mga adlaw, apang sa dimagsobra ukon dimagkubos ginapasapayanan. Ang pagpati sa Yawa, walay sapayan, ginatamod subong makahalam-ot. Ang pagsambit lamang sa ngalan nga Satanas . . . nagapalamho sa mga maalam, sa mga burgis, sa mga politiko, kag subong man, sa walay duhaduha, sa madamong obispo. Nakibot gid ako sa sini nga kaham-ot bangod daw subong bala nga ang Yawa naghatag sa aton sing partikular nga igtalupangod labi na kutob sang 1914.”
Kon ang mga Katoliko, lakip na ang iban nga klero, kinahanglan nga pahanumdumon sang papa kag sang iban nga si Satanas tunay nga nagaluntad, indi bala bangod ini sa pagbutang sang iglesia sa sulod sang mga siniglo sing labi pa nga pagpadaku sa tradisyon, pilosopiya, kag wala mapamatud-i nga sientipikong mga teoriya sang sa Biblia?
Ang pagsambit sa hitaas sang 1914 nagakaigo gid. Ina nga tuig gintandaan sa tagna sang Biblia subong ang ginsuguran sang “katapusan nga mga adlaw” nga ang Yawa, subong “ang gumalahom sang kalibutan,” magahimo sang iya katapusan nga panikasog sa paglaglag sa tanan nga katawhan. (2 Timoteo 3:1; Juan 14:30) Subong sang ginasiling sang badbad sang isa ka Katoliko nga Biblia: “Ang kalaglagan nagapakari—bangod ang yawa nagpanaug sa inyo sa kaakig, nakahibalo nga diutay na lang nga tion ang nabilin sa iya.” Mas maayo nga batunon sang hanuot nga mga Katoliko ang pamatuod sang Biblia. Ngaa? Bangod ang mga kahimtangan sa kalibutan karon nagapamatuod nga “ang ginharian sang Dios malapit na.”—Bugna 12:7-12; Lucas 21:25-31, The New Jerusalem Bible.
Sanglit ina nga Ginharian nagasaad sa pagtapos sa tanan nga kalainan kag kabangdanan sini, ang pagdula sa Yawa kag sa iya sumalakdag malapit na. Apang, ang katawhan lamang nga nakahibalo nga ang Yawa nagaluntad ang makatindog batok sa iya pagginahom kag makalaum sing kaluwasan. Paano? Indi paagi sa eksorsismo kundi, sa baylo, subong sang ginsulat ni apostol Pablo, paagi sa pagsuklob sang “bug-os nga hinganib sang Dios.” Huo, ang Pulong sang Dios maathag: “Sumpunga ang Yawa, kag magapalagyo sia sa imo.”—Efeso 6:11-18; Santiago 4:7.
[Piktyur sa pahina 26]
Ang Yawa kag ang iya mga demonyo gintagbong sa duta.—Bugna 12:9, 12
[Picture Credit Line sa pahina 26]
Picture Book of Devils, Demons and Witchcraft/Ernst kag Johanna Lehner/Dover