Malain Bala Pirme ang Kahadlok?

SARANG sini maguba ang kalipay kag ang paglaum. Ginpatuhuyan ini nga hilo sa hunahuna, ang manuglaglag sa rason, kag ginasiling ini nga mas malaglagon sang sa pinakagrabe nga balatian. Huo, ang kahadlok isa ka gamhanan nga emosyon. Apang, malain bala ini pirme?

Handurawa nga nagamaneho ka sing salakyan sa isa ka indi pamilyar nga dalanon. Ang dalan nagasaka padulong sa kabukiran kag nagalikoliko. Nag-abot ang kagab-ihon, kag nagtalithi sing yelo. Nadanlog diutay ang imo salakyan, kag narealisar mo nga nakalab-ot ka na sa mataas nga lugar nga sa diin ang dalan may yelo na.

Dapat ka karon mangin alisto. Samtang mahalungon ka nga nagaliko sa may yelo nga dalanon, ginpamensar mo kon daw ano kahapos nga madulaan ka sing kontrol sa imo salakyan sa madanlog nga dalanon kag mahulog sa nalupyakan sa ubos. Dugang pa, wala ka sing ideya kon ano pa nga mga katalagman ang nagapanago sa kadudulman. Samtang ginapamensar mo ining mga butang, ang imo baba nagamala kag ang imo tagipusuon nagapitik sing madasig. Listo gid ikaw. Kon ano man ang imo ginahunahuna antes sini, masako gid ikaw karon sa imo ginaatubang: tipigan ang imo salakyan nga indi mahulog kag likawan ang aksidente.

Sang ulihi, ang dalan nagdulhugon. May mga suga sa kalye, kag wala na sing yelo. Sing amat-amat, nadula ang imo kahuol. Nagrelaks ka kag nagpanghayhay. Wala gid sing kaayuhan yadtong kahadlok!

Apang wala gid bala sing kaayuhan yadto? Indi gid man. Ang rasonable nga pagkanerbios sa idalom sinang mga kahimtangan isa ka normal nga reaksion. Ginapaalisto kita sini kag ginapabantay. Ang mapuslanon nga kahadlok nagabulig sa aton nga indi magpadasudaso kag mahalitan ang aton kaugalingon. Huo, ang kahadlok indi pirme manuglaglag sang rason ukon hilo sa hunahuna. Sa idalom sinang mga kahimtangan, mangin mapuslanon pa gani ini.

Ang Biblia nagahambal nahanungod sa kahadlok kag nagapatalupangod sing duha ka sahi sang kahadlok. Ang isa ka sahi sang kahadlok isa gid ka hilo sa hunahuna. Apang ang isa pa indi lamang normal kag mapuslanon kundi kinahanglanon pa sa aton kaluwasan. Ano ang duha ka sahi sang kahadlok? Kag paano naton mapalambo ang isa samtang ginalikawan ang isa naman? Binagbinagon ini sa masunod nga artikulo.