Indi Mapunggan sang Gamo ang Maayong Balita

ISA ka adlaw sang nagligad nga Pebrero, ang madugay na ginahulat sang Venezuela nga kasugtanan sa ekonomiya ginpahibalo. Ang mga prisyo nagsaka sing kapin sa 100 porsiento sa pangunang mga pagkaon kaangay sang gatas, harina, kag tinapay. Ang prisyo sang gasolina magasaka sing 90 porsiento. Ang plete sa transportasyon magasaka sing tubtob sa 30 porsiento. Nakibang ang pungsod. Sang hinali, sang Lunes, Pebrero 27, ang mga tawo naghulag paagi sa pagginamo sa bug-os nga pungsod.

Pagkaaga, naggrabe pa gid ang pagpangguba kag pagpangawat. Ang tinirohay mabatian sa madamong lugar. Ang bata kag tigulang akig katama sa mga kalye sang siudad, nagabilin sing madamong kagulub-an nga kaa­ngay sang nahalitan sang inaway nga patag-awayan.

Sadto nga hapon ang presidente sang pungsod nagdeklarar sang makatalagam nga kahimtangan kag nagsuspende sang konstitusyonal nga mga garantiya sa sulod sang napulo ka adlaw. Ginpatuman ang curfew sa mga takna sa ulot sang alas 6:​00 s.g. kag alas 6:​00 s.a. Sang madason nga adlaw, ang ministro sang depensa nagpahibalo nga ang curfew padayon nga ginapatuman tubtob may dugang nga pahibalo. Gingamit sang militar ang iya awtoridad sa pagkontrol sa mga kalye, sa pagsulod sa mga balay nga wala sing awtorisasyon, kag sa pagpadulog kag pag-arikisa sa mga tawo. “Duha ka gatos ang patay kag isa ka libo ang napilasan sa tatlo ka adlaw nga ginamo,” balita sang isa ka pamantalaan.

Kamusta ang mga kongregasyon sang mga Saksi ni Jehova sa panahon sang krisis? Ang mga utod ginlaygayan: Mangin mainandamon kag likawi ang magamo nga mga lugar. Bag-oha ang mga oras sang miting sa pagsunod sa curfews, kag likawi ang pagbantala sa dalagku nga grupo. Apang, ang pagbantala sang maayong balita sang Ginharian sang Dios nagpadayon.​—⁠Mateo 24:​14; 28:​19, 20.

Bangod ang ditumuluo nga bana sang isa ka Cristianong babayi nabalaka nahanungod sa iya kaayuhan kon magguwa sia sa balay sa pagbantala, gindumilian niya sia sa paglakat. “Wala mo mahangpi nga may obligasyon ako nga tumanon,” siling sang asawa sa bana. “Ti sige! Magatuon ako sang Biblia upod sa imo!”

Amo ini ang unang tion sa 22 ka tuig sining babayi subong Saksi nga ang iya bana nagpabutyag sing kahanda sa pagtuon sa Biblia. Apang nagpaandam ang bana: “Sige, basta manaad ka nga indi magguwa. Apang indi ako pagpamangkota, basahi lang ako.” Walay sapayan, ang utod nga babayi nagtuon upod sa iya sa sulod sang isa ka oras kag tunga. “Isa yadto ka huwaran nga pagtuon, ang labing maayong pagtuon nga nahiwat ko sa akon 22 ka tuig sa kamatuoran,” siling niya, samtang nagatulo ang luha sa iya mga mata.

Sa isa pa ka hitabo, ang regular payunir nagapanilhig sa guwa sang iya balay sang ginpalapitan sia sang isa ka babayi nga wala gid anay nagapamati sa mga Saksi kon nagaduaw sila sa iya balay. “Wala ko makita kamo nga mga Saksi nga nagabantala sining karon,” siling sang babayi. “Indi kamo magsiling nga indi na kamo magbantala!”

Ang utod nga babayi nagpaathag nga nag-untat lamang sila sa pagbantala sa balay kag balay bangod sang gamo. “Apang magaabot ang adlaw nga indi na gid kami magabantala sa mga tawo, kag nagakahulugan ina sang katapusan sang kalibutan,” siling sang utod. “Dapat mo himuslan ang kahigayunan karon kag ba­tunon ang isa ka pagtuon sa Biblia sa inyo balay.”

“San-o kita makahimo sing kahimusan?” gilayon nga pamangkot sang babayi. Didto mismo ginhimo ang kahimusan sa pagsugod sing isa ka pagtuon sang Biblia sa balay.

Sing mapasalamaton, ang gamo nag-untat, nagtugot sa buluhaton sang pungsod nga magbalik sa normal. Apang, sa tion sang magamo nga mga kahimtangan, makapasulhay mahibaluan nga sa dili madugay ang bag-ong kalibutan sang paghidait kag kalig-onan magaluntad diri. Ang Pulong sang Dios nagasaad: “Suno sa iya saad nagahulat kita sing bag-ong mga langit kag bag-ong duta, kag sa sini nagapuyo ang pagkamatarong.” (2 Pedro 3:13) Kag tubtob ginatugot sang Dios, ang mga Saksi ni Jehova padayon nga magabantala sang maayong balita sang Ginharian.

[Mga piktyur sa pahina 31]

Ang gamo wala magpauntat sa mga manugbantala sang Ginharian

[Credit Line]

Retrato sang Publicaciones Capriles, Caracas, Venezuela