Mga Pamangkot Gikan sa mga Bumalasa

◼ Dapat bala kita maghinakop gikan sa Mateo 7:​13, 14 kag Lucas 13:​24 nga bisan sa pagkabanhaw, ang kalabanan nga tawo magasikway sang matuod nga pagsimba?

Indi, ining mga bersikulo wala nagasuporta sina nga konklusion. Sa baylo, may kahilabtanan ini labi na sa pagtigayon sing kabuhi sa langitnon nga Ginharian.

Ang pinamulong ni Jesus sa Mateo 7:​13, 14 bahin sang Sermon sa Bukid. Sia nagsiling: “Sulod kamo sa gawang nga makitid; kay masangkad ang gawang kag malapad ang dalan nga nagapadulong sa kalaglagan, kag madamo ang nagasulod sa sini; kay makitid ang gawang kag masiput ang dalan nga nagapadulong sa kabuhi, kag pila lamang ang nakatultol sa sini.”

Kalabanan sang ginsiling ni Jesus sa sining okasyon labi na nga may kahilabtanan sa langitnon nga Ginharian. Halimbawa, nag-umpisa sia sa mga pulong: “Malipayon ang mga nabalaka sa ila espirituwal nga kinahanglan, kay ila ang ginharian sang langit.” Nagsiling sia nga ang putli sang tagipusuon “makakita sa Dios” kag nga “ang ginharian sang langit” ila sadtong “ginhingabot tungod sang pagkamatarong.” (Mateo 5:​3, 8, 10) Sang ulihi sa sina man nga diskurso, si Jesus nagpamulong nahanungod sa malapad nga dalan nga nagapadulong sa kalaglagan kag sa masiput nga dalan nga nagapadulong sa kabuhi. Sing bahin, sia nagdugang: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang nagahimo sang kabubut-on sang akon Amay nga yara sa langit.”​—⁠Mateo 7:​13, 14, 21.

Pareho man ang kahulugan sang Lucas 13:​24, subong sang ginapakita sang konteksto. Si Jesus naghatag sing duha ka ilustrasyon nahanungod sa “ginharian sang Dios.” Sang ulihi, namangkot sia: “Ginuo, diutay lamang bala ang maluwas?” Si Jesus nagsabat: “Panikasog kamo sing lakas sa pagsulod sa ganhaan nga makitid, kay, nagasiling ako sa inyo, madamo ang magapaninguha sa pagsulod kag indi makasarang.” Ang “madamo” nagapatuhoy sa mga tawo nga nagapakiluoy sa pagsulod sa tapos nga matakpan kag makandaduhan ang isa ka ganhaan. Amo ini sila ang mga “magbubuhat sang dimatarong” nga indi kalipikado mangin kaupod ni “Abraham kag ni Isaac kag ni Jacob kag sang tanan nga mga manalagna sang ginharian sang Dios.” Ang “madamo” naghunahuna nga sila mangin una “sa ginharian sang Dios,” apang sa pagkamatuod sila mangin ulihi, sing maathag nagakahulugan nga indi gid sila mangin sa sini.​—⁠Lucas 13:​18-30.

Ginapakita sang konteksto nga si Jesus wala nagahinun-anon nahanungod sa pagsulod sa langitnon nga Ginharian sang Dios. Ang Judiyong mga lider sadto anay nag-agom sing may pribilehiyo nga posisyon, nga makakadto sa Pulong sang Dios. Abi nila sila manggaranon sa espirituwal kag matarong sa itololok sang Dios, kon ipaanggid sa kinaandan nga katawhan, nga ginakabig nila nga manubo. (Juan 9:​24-34) Apang, si Jesus nagsiling nga ang mga manugsukot sing buhis kag mga makihilawason nga nagbaton sang iya mensahe kag naghinulsol makatigayon sang kahamuot sang Dios.​—⁠Ipaanggid ang Mateo 21:​23-32; Lucas 16:​14-31.

Ang kinaandan nga katawhan nga nangin mga disipulo ni Jesus yara sa posisyon nga batunon subong espirituwal nga mga anak sang ang langitnon nga pagtawag ginbuksan sang Pentecostes 33 C.⁠E. (Hebreo 10:​19, 20) Bisan pa ang dakung kadam-an nakabati kay Jesus, diutay lamang ang nagbaton sa iya kag sang ulihi nakatigayon sing langitnon nga paglaum. Apang ang diutay nga panong sang ginpanganak sa espiritu nga katawhan nga nakabaton sang pagdaya mahimo mapaanggid sa pagsaliay ni Jacob sa latok sa langit kaupod ni Jehova (ang Dakung Abraham) kag sang iya Anak (nga ginalaragway ni Isaac). Takus gid ina nga panikasugan sing lakas, apang wala ina paghimua sang kalabanan nga nakabati kay Jesus.

Gani, makita naton gikan sa konteksto sa duha ka halimbawa nga ang komento ni Jesus (nahanungod sa diutay lamang nga yara sa masiput nga dalan padulong sa kabuhi kag naluwas) may kahilabtanan una sa pagtigayon sang kahamuot sang Dios sadtong tion nga ginhatag Niya ang paglaum sang langitnon nga kabuhi. Diutay lamang sang nakabati sang mensahe sang kamatuoran kag nakahibalo kon ano ang ginakinahanglan ang naghulag kag nagmatutom.​—⁠Mateo 22:​14; 24:​13; Juan 6:​60-66.

Makawiwili nga bisan karon, nga ang bug-os nga Biblia matigayon kag may yara madamo nga katumanan sang balaan nga mga tagna nahanungod sa katapusan nga mga adlaw, diutay lamang ang namati sa Cristianong mensahe kag nagbatas sa pag-alagad kay Jehova. Nahisanto ini sa ilustrasyon ni Jesus nahanungod sa lainlain nga mga duta. Sia nagsiling nga ang iban magapamati sang “pulong sang ginharian,” apang agawon ni Satanas kon ano ang ginsab-ug. Ang iban nagbaton sang pulong upod ang kalipay apang sang ulihi napaslawan bangod sang kapipit-an ukon paghingabot. Apang ang iban mangin dimabungahon bangod sang “paghimud-os sining sistema sang mga butang kag sang malalangon nga gahom sang manggad.”​—⁠Mateo 13:​18-23.

Makasiguro kita nga daku gid ang kinatuhayan kon ang mga minilyon banhawon sa Adlaw sang Paghukom. Nian si Satanas indi mangin hilway sa pag-agaw sang binhi sang kamatuoran nga ginsab-ug sa ila mga tagipusuon. Indi na sila magaantos sing paghingabot ukon mga paghimud-os sang karon malaut nga sistema. Pagatudluan sila sa isa ka matarong nga palibot, nga ginapalibutan sang milagruso nga hinimuan sang Dios, lakip ang pagbanhaw sa patay kag ang pag-ayo sa mga pungsod. Huo, ang iban indi magahulag bisan sa sina nga tion. (Ipaanggid ang Juan 11:​45-53.) Apang may maayong rason sa paghunahuna nga ang kalabanan magahangop sang kahulugan sang pulong, magahulag sa sini, kag maluwas.