Report sang mga Manugbantala sang Ginharian

Nakombinse Sila sa Kathmandu

ANG isa ka pintor nagsugod sa pagpangita sa kamatuoran sa Brittany, Pransya, sang 1980. Nakighambal sia sa mga Pentecostal kag nagtuon sang mga relihion sang Sidlangan​—⁠nga wala makontento. Nian nakahambal niya sing pila ka beses ang isa sang mga Saksi ni Jehova apang nag-untat sia wala madugay. Nakilala niya ang isa ka pintor kag nag­trabaho sia kag nagpuyo upod sa iya.

Wala madugay sa tapos sini ang wala makasal nga mag-asawa namat-od nga magduaw sa Nepal. Nahamuot gid sila sing daku sa katahom kag kalinong sadto nga pungsod apang ginsubuan sila sa caste system, nga daw indi makatarunganon gikan sa ila pagtamod subong mga taga-Nakatundan.

Sang magbalik sila sa Pransya, ginpanugda sang babayi sa iya kaupod nga magtuon sila sing Biblia, kag sa iya kakibot nagsugot sia. Ginpangita nila ang Saksi nga nakahambal niya anay sang nagligad nga duha ka tuig. Sang primero Biblia lamang ang ila gingamit, apang sang ulihi nagsugot sila nga gamiton ang libro nga Ang Kamatuoran nga Nagadul-ong sa Kabuhi nga Dayon kag sang ulihi ang libro nga Mahimu Ka Mabuhi sing Dayon sa Paraiso sa Duta. Sa sulod sang isa ka tuig nag-untat sila sa pag-inom sing droga.

Sa tapos maduaw liwat ang Nepal sing duha ka bulan, ang mag-asawa nagbalik sa Pransya nga sa diin ginpadayon nila ang pagtuon. Gin-untatan nila ang pagpanigarilyo kag ang pagkadto sa mga bar kag sa mga night­club kag nagsugod sila sa pagtambong sa mga miting sang mga Saksi ni Jehova. Apang, sang matapos nila ang ­libro nga Mabuhi sing Dayon, namat-od sila nga mag-untat sa pagtuon.

Nagkadto sila liwat sa Nepal, nga sa diin nagpuyo sila sa isa ka diutay nga balay sa tiilan sang Himalaya Mountains. Isa ka adlaw ang isa ka tigulang nga lalaki, nga nagasuksok sing amerikana kag kurbata, nanuktok sa ila ganhaan. Ang ­babayi isahanon sa balay, kag nagdumdom sia nga ang lalaki manugbaligya nga nagkari agod tan-awon ang ila mga painting. Sa iya kakibot sia isa ka Saksi nga nagaduaw para sa tawo nga nagtuon anay upod sa ila sa Pransya. Wala madugay nag-abot ang iya kaupod, kag nagsunod ang duha ka oras nga paghambalanay.

Pagligad sang pila ka adlaw, ang mag-asawa nagtambong sa isa ka miting sang mga Saksi ni Jehova sa Kathmandu kag nahamuot gid sila sa matinlo nga panagway sang mga nagtambong. Napanilagan nila ang pareho nga utudnon nga gugma kag kalipay nga nakita nila sa mga miting sa Pransya. Natalupangdan man nila ang paghiusa sang Nepalese nga mga tawo nga nagtambong, bisan pa naghalin sila sa nanuhaytuhay nga mga caste. Nakombinse sila karon nga amo gid ini ang organisasyon ni Jehova.

Isa ka bulan sang ulihi nagbalik sila sa Pransya kag sa gilayon ginpadayon nila liwat ang ila pagtuon sa Biblia kag ang pagtambong sa mga miting. Nagpakasal sila, nagsugod sa pagpakigbahin sa pagpanaksi nga hilikuton, kag sang ulihi ginbawtismuhan. Ang bana isa na karon ka ministeryal nga alagad, kag ang iya asawa regular nga nagapakigbahin sa pag-auxiliary payunir. Sa pagkamatuod, ang mga tawo nga may matarong nga tagipusuon pagabuligan sang espiritu ni Jehova sa pag-uswag kag mangin iya mga sumilimba.​—⁠Bugna 7:15-17.

[Kahon/Mapa sa pahina 9]

NEPAL

Populasyon- 17,712,221

1990 Kataason sang Manugbantala- 63

Katumbas, 1 ka Manugbantala sa- 281,146

Promedyo sa Payunir nga Manugbantala- 10

Kadamuon sang Kongregasyon - 1

Promedyo sa Pagtuon sa Biblia- 107

Tumalambong sa Memoryal- 220

[Mapa

(Para sa kabug-usan sang teksto, tan-awa ang publikasyon)

NEPAL

INDIA

[Laragway sa pahina 9]

Danyag sa tiendahan sa Kathmandu, Nepal