Report sang mga Manugbantala sang Ginharian
Ang mga Nagapangita sing Kamatuoran Nagasabat sa Di-Pormal nga Pagpanaksi
ANG Biblia nagasugid sa aton nga ang tulad karnero nga mga tawo magasabat sa tingog sang Maayong Manugbantay. (Juan 10:27) Amo sini ang natabo sa madamo nga kadutaan, lakip ang Britanya.
◻ Halimbawa, sang 1988, antes sang Paskuwa, si Pamela, isa ka Saksi ni Jehova, nagsabat sa telepono sa opisina nga iya ginaobrahan kag nakighambal sa isa ka ahente nga nagatrabaho sa pareho nga kompanya sa pihak nga bahin sang Inglaterra. Sa hingapusan sang pagpanawag, namangkot ang lalaki: “Handa ka na bala para sa Paskuwa?” Si Pamela nagsiling: “Indi!” “Indi ayhan ulihi ka na?” pamangkot sang nagtawag. “Wala ako nagasaulog sing Paskuwa,” sabat ni Pamela. Nagsiling ang lalaki nga tumalagsahon ini kag nagpamangkot kon ngaa. Ginsugiran sia ni Pamela nga sia isa sang mga Saksi ni Jehova kag nagpaathag sia nga wala sing sugo sa Biblia nga saulugon ang kaadlawan ni Jesus, kag dugang pa, si Jesus wala matawo sang Disiembre 25. Labi pa, ang Paskuwa sa orihinal isa ka pagano nga kahiwatan. Ang nagpanawag nagsiling nga tama gid ka interesante sini tanan.
Tatlo ka bulan sang ulihi ginsabat ni Pamela ang telepono, kag ang nagpanawag nagsiling: “Nakadumdom ka bala nga nagpakighambal ka sa akon antes sang Paskuwa kag ginsugiran mo ako nga wala ka nagasaulog sing Paskuwa? Ti, nasapwan ko na ang kamatuoran!” Sia gihapon yadtong tawo, kag ginpaathag niya nga duha ka semana pagligad sang Paskuwa, may duha ka Saksi nga nagduaw sa iya balay. Ginpasulod niya sila, kag isa ka pagtuon sa Biblia ang nasugdan. Nagsiling sia nga madasig ang iya pag-uswag sa iya pagtuon. Ginsugiran niya ang iya ginapuyopuyo nga nobya nga indi kalahamut-an kay Jehova ang ila estilo sang pagkabuhi, gani nagbulagay sila, kag karon lunsay sila nagatambong sa mga miting sa Kingdom Hall.
Sang maghingapos ang tuig, ginbaton sila subong di-bawtismado nga mga manugbantala, kag sang maaga nga bahin sang 1990 nagpakasal sila. Nian dungan sila nga ginbawtismuhan. Isa gid ka matahom nga resulta sang malip-ot kag dipormal nga pagpanaksi sa telepono!
◻ Ginpakamaayo ni Jehova ang isa pa ka utod nga babayi nga nagpanaksi sing di-pormal sa Inglaterra. Sang mag-abot sa iya balay ang isa ka ahente sang pasiguro, ang utod nga babayi namangkot kon luyag bala sang ahente nga garantiyahan sia sing maayong panglawas, kalipay, kag kabuhi nga walay katapusan. Naghuo sia kag ginpamangkot ang utod nga babayi kon ano nga polisa sang pasiguro ang iya ginasiling. Sa tapos mapakita sa iya ang ginsaad sang Dios sa Biblia nga kabuhi nga walay katapusan sa Paraiso sa duta, ginbaton niya ang isa ka kopya sang libro nga Mahimu Ka Mabuhi sing Dayon sa Paraiso sa Duta kag ginbasa niya ang bug-os nga publikasyon sa isa lamang ka gab-i. Sang ginduaw niya liwat ang utod nga babayi, ginsugiran niya sia nga ang impormasyon matahom gid—kon may pagtuo lamang sia nga patihan ini. Ginpaathag sang utod nga babayi nga dapat sia magtuon sing Biblia kag magtambong sa mga miting sa Kingdom Hall. Ginhimos ang isa ka pagtuon sa Biblia, kag nagsugod sia sa pagtambong sa mga miting. Ginbawtismuhan sia sang tigragas sadto gihapon nga tuig. Isa ka tuig lamang sang ulihi, ginpangasawa niya ang anak nga babayi sang utod nga babayi nga una nga nagpanaksi sa iya.” “Gani,” siling sang utod nga babayi, “nakatigayon ako sing isa ka utod nga lalaki kag umagad nga lalaki paagi sa akon di-pormal nga pagpanaksi!”
Matuod gid nga ang mga nagapangita sang kamatuoran nagasabat kon ang kamatuoran sang Biblia ginapaalinton paagi sa di-pormal nga pagpanaksi. Subong sang ginsiling ni Jesus, ang iya karnero nagapamati sa iya tingog.