Report sang mga Manugbantala sang Ginharian

‘Pagpangani’ sa Venezuela

Sang isa ka okasyon ginpaanggid ni Jesus ang pagbantala nga hilikuton sa tuigan nga ani. (Mateo 9:36-38) Ang Agalon sang ani amo si Jehova nga Dios, kag ang ani bugana gid sa bug-os nga globo. Nagalakip ini sa malaka lang ginapangabudlayan nga teritoryo sa Venezuela.

Ang sanga talatapan sang Watch Tower Society sa Venezuela nagareport kon ano ang natabo sang ginpangabudlayan sang isa ka grupo sang mga Saksi ang teritoryo sang Sabana Grande, Estado sang Guárico. Ang mga Saksi nagaasoy: “Ang balay nga gindayunan namon isa ka maayong duog nga hiwatan sing mga miting, gani ginsugdan namon sa gilayon ang pag-agda sa mga tawo sa mga miting didto. Indi kilala sang mga tawo didto ang mga Saksi ni Jehova. Bisan pa may yara apat ka ebanghelikal nga mga grupo sa banwa, ang mga tawo nalangkag sa pagtuon sa Biblia.

“Nangabudlay kami sing tatlo ka oras sa aga kag tatlo ka oras sa hapon, sa pagduaw sa mga balay kag pag-agda sa mga tawo sa isa ka miting para sa masunod nga gab-i. Wala kami sing mga bangko, gani gin-agda namon sila nga magdala sang ila kaugalingon nga mga bangko. Sang nag-abot na ang oras agod sugdan ang miting, ang mga tawo nag-inabot, ang kada isa nagabitbit sing bangko. Sang matapos ang miting, ginsilingan namon sila nga luyag namon isulat ang mga ngalan sadtong maluyag sing walay bayad nga pagtuon sang Biblia sa puluy-an. Ang tanan nga 29 nga nagtambong nagpalista sang ila ngalan.

“Sang ginasiraduhan na namon ang puwertahan paghalin sang katapusan nga bisita, nakita namon ang tatlo ka lalaki nga nagatindog sa kilid sang balay. Sang mga alas nuebe, manugpanihapon na kami sang nanuktok sila sa puwertahan. Namangkot sila subong sang: ‘Ano ining pagbantala nga ginahimo ninyo sa sining banwa? Sa anong rason nga nagmiting kamo sini nga gab-i?’

“Ginpamangkot namon sila kon bala may ginlapas kami nga layi. Nagsabat sila nga wala kag nagsiling nga mga pastor sila sang tatlo ka ebanghelikal nga simbahan sang banwa. Naakig sila bangod wala sing unod ang ila mga simbahan sadto nga gab-i. Ginpasulod namon sila kag ginpaathag ang amon hilikuton. Ginpahamtangan man namon sila sing pila ka literatura kag ginpangabay nga magbalik sila sa masunod nga Huebes.

“Sang masunod nga Huebes ang mga pastor nagbalik kag kaupod nila ang 22 pa ka tawo nga maluyag mamati sa amon isiling. Abi sang mga pastor, bangod mga babayi kami, wala kami sing padaug sa paghinun-anon sa ila. Apang, sa amon punto-de-vista nagmadinalag-on ang miting. Sa katapusan ginpaathag namon nga ginalista namon ang luyag magtuon sing dugang pa gikan sa Biblia. Madamo sa kaupod sang mga pastor ang naluyag magpalista sang ila mga ngalan, kag nagsiling pa gani ang iban nga luyag nila mag-upod sa amon sa pagbantala nga hilikuton!

“Ginpaathag namon sa ila nga kinahanglan nila ang dugang nga ihibalo kag paghanas sa Biblia antes sila makabuylog sa amon sa pagbantala nga hilikuton. Kada adlaw ang mga tawo nagakadto sa balay, nagapangabay sa amon nga ipaathag ang Biblia sa ila. Kon kaisa, kon magab-ihan kami sa paghambalanay, kami pa ang nagapangabay sa ila nga magpauli na. Sang manughalin na kami sang ulihi sa teritoryo, nagkasubo gid sila kag nagsiling sa amon nga sa pagbalik namon, magaupod sila sa amon sa pagbantala nga hilikuton. Nangako sila nga sa sina nga tion nakahimo na sila sang ginakinahanglan nga pag-uswag.”

Sang naghalin ang mga Saksi sa sinang teritoryo, 40 ka tawo ang luyag magtuon sa Biblia. Ang mga ngalan sining mga interesado ginhatag sa pinakamalapit nga kongregasyon, nga mga 50 kilometros kalayo. Sang ulihi, ang iban nga mga Saksi halin sa iban nga siudad nagsaylo sa sining banwa, kag isa ka grupo sang mapisan nga mga manugbantala sang maayong balita ang ginhuman.