Makatuon Sila Gikan sa mga Buyog

“Sining ulihi nga tinuig, nahangpan sing labi sang mga enhinyero kag mga desinyador sang produkto ang butang nga nahibaluan na sang mga buyog: ang pagporma bisan sang manipis kaayo nga materyal sa anum-ka-bahin nga talaksan sang balay sang buyog nagahimo sini nga mas mabakod sang sa kon iban ang korte.”—The New York Times, Oktubre 6, 1991.

INDI makakilibot nga ang mga tawo makatuon gikan sa maayo nga pagtuon sa mga insekto. Si Job, isa anay ka tawo sang pagtuo, nagsiling: “Pamangkuta karon ang kasapatan, kag sila magatudlo sa imo; ang kapispisan sang kalangitan, kag ini magatudlo sa imo. . . . Sin-o bala ang wala makahibalo sini tanan nga ang kamot ni Jehova naghikot sini?” (Job 12:7-9) Huo, ang kaalam sang Manunuga makita sa kinaandan nga mga butang subong sang korte hexagonal nga mga selula nga imo makita sa balay sang buyog.

Bisan pa ang waks nga dingding sining mga selula mga ikatlo lamang nga bahin sang isa ka milimetro kadamol, mabakod gid ini. Sa katunayan, makadala ini sing mga 30 ka pilo sang ila bug-at.

Ining kusog sarang magamit sa praktikal nga mga aplikasyon, subong sang de-kutson nga kasangkapan batok sa mabaskog nga huyop sang hangin. Nagaamlig gani ini sang kasangkapan militar nga ginaparasyut sa duta. Ang The New York Times nagasiling tuhoy sini: “Ang mga butang nga subong kabug-at sang mga dyip ginahigot sa mga plataporma nga may mga bloke sang balay sang buyog sa idalom sa pagsuyop sang mabaskog nga hangin sa paghugpa.”

Ang hinimo sang tawo nga mga produkto nga may amo sini nga desinyo sarang mahuman gikan sa madamong materyal. Ang labing kinaandan amo ang papel. Ang naylon sing nahot nga papel kag tagok ginagamit sa paghimo sing balay sang buyog nga nagakadto sa lawas sang pila ka dalagku nga mga eroplano. Ang kusog may diutay lamang nga bug-at. Ngaa? Ang kalabanan nga espasyo sa ulot sang mga entrepanyo hangin, gani diutay ang bug-at. Ang hangin may maayong mga kinaiya man sa pag-insula.

Ang simple nga buyog wala gid “makahibalo” sini tanan, kay wala ini sing akademiko nga titulo sa pag-enhinyero. Apang, adlaw-adlaw ginahimo niya ini upod ang duna nga kaalam nga gin-aman sang Manunuga, nga si Jehova.