Subong sang mga Pating sa Ila mga Talambuan

ANG pating amo ayhan ang isa sa nahaunang pispis nga gin-anta sang tawo. Sang nagligad nga linibo ka tuig, ang mga Egiptohanon—mainandamon nga nagaplano para sa isa ka tuig nga suplay sang pagkaon—nagpatindog sing mga talambuan malapit sa ila mga balay. Ang karne sang pispis ginaapresyar gid sing daku, kag ang ila ipot ginagamit nga abono. Sang Tungatungang Dag-on, ang mga talambuan nangin hamili nga pagkabutang sa bagay nga sa iban nga mga pungsod mga dungganon ukon mga lider sang relihion lamang ang gintugutan nga magpanag-iya sini.

Bisan pa manok ang nagbulos karon sa mga pating subong ginhalinan sang karne sa kalabanan nga latok, makita gihapon ang pila ka dumaan nga mga talambuan. Ang mga talambuan nga ginlaragway diri makita sa Egipto.

Nagabalik sing ginuban-guban sa gab-i, ang matuod nga panganod sang mga pispis nagapanaug sa talambuan. Ginpatuhuyan ini sang Hebreong manalagna nga si Isaias sang namangkot sia: “Sin-o bala ini sila nga nagalupad subong sang panganod, kag subong sang mga pating sa mga buho sang ila balay?” Subong sang pagbadbad sang isa ka badbad: “Sin-o bala ini sila nga nagalayag subong sang panganod, nga nagalupad kaangay sang mga pating sa ila mga talambuan?”—Isaias 60:8; The New English Bible.

Ang sabat makita karon sa ginatos ka libo sang nagakahadlok sa Dios nga katawhan nga nagadugok sa organisasyon ni Jehova. Sa mga Kingdom Hall sang mga Saksi ni Jehova, nagatuon sila sa paglaum sa Dios. (Isaias 60:9) Sa tunga sang katawhan sang Dios, natukiban nila ang espirituwal nga kabilihanan, ang buhi nga pagtuo, kag ang makalilipay nga pag-inupdanay nga nagapaambit sang balatyagon sang paghidait kag kalig-unan kaanggid sa makita sang pating sa iya talambuan.

[Ginkuhaan sang Laragway sa pahina 32]

Pictorial Archive (Near Eastern History) Est.