Kabuhi—Isa ka Dulot Gikan sa Dios

BEINTE-KUWATRO oras sa isa ka adlaw, ang aton tagipusuon nagabomba sing hamili nga dugo sa aton lawas. Nagatulog kita, kag ang aton mga baga padayon nga nagahabok kag nagakupos. Nagakaon kita, kag ang pagkaon awtomatiko nga ginatunaw. Ini tanan nagakatabo kada adlaw, upod ang diutay ukon wala sing hinalung-ong nga panikasog sa bahin naton. Ining makatalanhaga kag makatilingala nga mga proseso, nga madali pasapayanan, bahin sang dulot nga ginatawag naton kabuhi. Busa isa ini ka dulot nga matawag nga milagruso.

Binagbinaga ang proseso sang pagpanamkon kag pagbun-ag sang tawo. Bisan pa kinaandan nga ginasikway sang lawas ang dumuluong nga basad (tissue), ginahimo sang taguangkan nga eksepsion ang isa ka pertilisado nga itlog. Sa baylo nga sikwayon ang nagatubo nga sibudbod subong dumuluong nga basad, ginapakaon kag ginaamligan ini tubtob handa na ini sa pagguwa subong isa ka lapsag. Kon wala ining ikasarang sang taguangkan sa paghimo sining kinahanglan nga eksepsion sa pagsulundan sang pagsikway sa dumuluong nga basad, ang tawhanon nga pagbun-ag imposible.

Bisan pa amo sina, ang kabuhi para sa bag-o nabun-ag nga lapsag mahimo mangin malip-ot kon indi bangod sa hitabo nga nagakatabo sa taguangkan sang ang kiring mga apat ka bulan lamang. Sa sina nga tion nagasugod ini sa pagsupsop sang iya kamalagku, sa pag-ehersisyo sang mga kaunuran nga sa ulihi makasuso sia sa mga suso sang iloy. Kag isa lamang ini sang madamong kabuhi-kag-kamatayon nga butang nga nalubad sing madugay na sa wala pa mabun-ag ang lapsag.

Samtang ang kiring yara sa taguangkan, may buho sa dingding sang iya tagipusuon. Apang, ining buho awtomatiko nga nagasira pagkabun-ag. Dugang pa, ang daku nga iligan sang dugo (blood vessel) nga nagalikaw sa mga baga samtang ang kiring yara sa taguangkan awtomatiko nga nagahugot sa pagbun-ag; ang dugo nagakadto karon sa mga baga, diin nagakuha ini sing oksiheno samtang ang bata nagasugod sa pagginhawa.

Ini tanan pamuno lamang. Sa bug-os nga kabuhi, ang mga serye sang gindesinyo sing matahom nga mga sistema (subong sang sistema sa respiratoryo, sirkulatoryo, mga kaugatan, kag endocrine) magapanghikot kag magahituhog sang ila mga hilikuton upod ang ikasarang nga nagapagumon sa ighalangop sang tawo—ang tanan para sa pagpadayon sang kabuhi. Indi katingalahan nga ang manunulat anay nagsiling may kaangtanan sa Dios: “Magpasalamat ako sa imo kay ginhimo ako sing makahalangawa kag makatilingala. Makatilingala ang imo mga binuhatan, ang akon kalag nakakilala sing maayo sini.”—Salmo 139:14.

Sing maathag, ang manunulat sinang matahom nga mga pulong wala nagapati nga ang kabuhi patubas lamang sang bulag, ebolusyunaryo nga pagkanataboan lamang ukon aksidente. Kon amo sina ang natabo, kuntani wala kita sing matuod nga mga obligasyon kag mga responsabilidad sa kon paano naton dapat gamiton ang aton kabuhi. Apang, ang mga mekanismo sang kabuhi maathag nga nagapakita sing desinyo, kag ang desinyo nagakinahanglan sing desinyador. Ang Biblia nagahatag sini nga prinsipio: “Ang tagsa ka balay ginatukod sang isa, apang ang nagtukod sang tanan nga butang amo ang Dios.” (Hebreo 3:4) Busa importante ‘makilala nga si Jehova amo ang Dios. Sia ang naghimo sa aton, kag iya kita.’ (Salmo 100:3) Huo, ang kabuhi kapin pa sa maayo lamang nga aksidente; isa ini ka dulot gikan sa Dios mismo.—Salmo 36:9.

Bangod amo sina ang natabo, ano ang aton mga obligasyon sa Manughatag sang kabuhi? Ano ang ginapaabot niya nga paggamit naton sang aton kabuhi? Ini kag ang may kaangtanan nga mga pamangkot pagabinagbinagon sa masunod nga artikulo.