“Asawa sang Imo Pagkapamatan-on”

“ANG panglahi halos daw pang-adlaw-adlaw nga hitabo.” Amo ang siling sang madamo nga mga eksperto, suno sa Los Angeles Times. Nagapakibot bala ina nga dinalan sa imo? Apang ang saykayatris nga si Frank Pittman nagabanabana nga mga 50 porsiento sang mga bana kag halin sa 30 porsiento tubtob 40 porsiento sang mga asawa ang nangin maluibon. Kon matuod ina, halos tunga sang tanan nga mga mag-asawa ang nagapanglahi!

Nagakahulugan bala ina nga ang imoralidad ginabaton? Indi! Ang pagbuad sang pagluib wala nagahimo sini nga husto—subong man nga ang pagbuad sang krimen sa kalye wala nagahimo sang pagkawat sa isa nga husto. Ang imoralidad nagahalit. Halimbawa, ang katawhan karon ginasalot sang nagabuad nga makatalagam nga mga balatian nga ginapalaton paagi sa paghulid nga mahapos tanan matapna kon ang mga tawo may matinlo nga pagkabuhi. Ang makamamatay nga balatian nga AIDS wala kuntani mag-abot kon ang mga tawo wala nangin tuman ka lugak sa ila seksuwal nga pagkinabuhi.

Isa pa, bisan ang labing batid kag “nasanagan” nagabatyag sing daku nga kasakit kon ang ila upod magluib. Ang isa lang ka buhat sang pagluib makadala sing pilas nga madugay mag-ayo.

Apang, ang labing importante nga punto amo nga ang dipagtamod sing serioso sa mga sinumpaan sa pag-asawahay isa ka daku nga dipagtahod sa Dios, bangod sia ang Awtor sang pag-asawahay. Ang Biblia nagasiling: “Pagahuptan sing dungganon sang tanan ang pag-asawahay.” Ginapaandaman man kita: “Hukman sang Dios ang mga makihilawason kag mga makilahion.”—Hebreo 13:4.

Gani, ang maalamon nga mga tawo nagapamati sa inspirado nga mga pulong: “Magkalipay sa asawa sang imo pagkapamatan-on.” (Hulubaton 5:18) Nagapangita sila sing kaayawan kag kalipay upod sa ila mga tiayon. Sa paghimo sini ginaamligan nila ang ila pisikal kag emosyonal nga kaayuhan, kag labi sa tanan, nagadala sila sing kadungganan sa daku nga Awtor sang pag-asawahay, si Jehova nga Dios.