Gikan sa Maragtason nga Ospital Pakadto sa Pinasahi nga Kingdom Hall

SANG 1770 ang bantog nga manuglagulad nga si Tenyente James Cook nagpalayag sang 369 toneladas nga barko nga Endeavor sa wala pa makadtuan nasidlangan nga baybayon sang Australia. Sang gab-i sang Hunyo 11, nakabunggo ang barko sa batuhon nga mga korales sa malayo nga bahin sa aminhan nayon sang kontinente. Naguba gid ang kasko nga kahoy. Kinahanglanon sa gilayon ang pagkaayo agod makalampuwas ang mga tripulante. Ang baba sang malapit nga suba maayo gid nga duog para sa pagkaayo, nga naglawig sing anum ka semana. Isa ka gatos kag tatlo ka tuig sang ulihi, natukiban ang bulawan sa sini nga rehiyon. Nagsugod ang pagdinaguso nga makakuha sing bulawan. Linibolibo ang nagkadto sa pagpangita sang ila maayo nga kapalaran. Nabun-ag ang Cooktown.

Sang 1879 ginhatag ang pahanugot sang gobierno nga magtukod sang isa ka permanente nga ospital sa pagtatap sang nagamasakit kag yadtong mga nasamaran sa mga aksidente sa minahan. Sadto man nga tuig, sa pihak nga bahin sang kalibutan, ginbalhag ang una nga edisyon sang Zion’s Watch Tower sang Hulyo 1. Kutob sadto, ining magasin nag-aman sing isa ka programa para sa espirituwal nga kapagros sang minilyon ka tawo nga mahinadlukon sa Dios. Wala sadto mahibaluan nga ang ospital sa Cooktown makaangkon gali sa ulihi sang suod nga kaangtanan sa sini nga magasin.

Pagligad sang kapin sa isa ka siglo, kinahanglan ilisan ang Cooktown Hospital. May pundo ang gobierno para sa isa ka bag-o nga tinukod, gani ginpanawag ang mga kontratista para sa pagkuha sang daan nga ospital. Ang National Trust of Queensland nagpakita sing daku nga interes sa sining maragtason nga tinukod. Apang, ang bili sa pagsaylo kag pagtukod liwat sang tinukod tuman kataas. Wala sing nag-ayu.

Sadto man nga tion, ang diutay nga kongregasyon sang mga Saksi ni Jehova sa Cooktown nagapangita sing permanente nga duog para hiwatan sang Cristianong mga pagtilipon. Wala sila sang duta nga ginapanag-iyahan kag may $A800 lamang sila. Paano sila makapatindog sing Kingdom Hall? Ang mga tiglawas sang lokal nga kongregasyon nagboluntaryo sa pagsaylo sang ospital kag wala nanukot. Paano tuytuyan ni Jehova ang mga butang? Makalilipay nga balita! Ginbaton ang ila tanyag!

Karon sa masunod nga butang—duta para sa tinukod. Huo, ginsilingan sila nga basi ipagamit sang gobierno ang duta nga wala sing bayad, lamang nga kaayuhon kag ipasag-uli ang tinukod. Apang, nagautwas sa sining tion ang pagpamatok sa ginaplano nga proyekto gikan sa dimaabyanon nga bahin sang komunidad. Ginhanda ang petisyon agod punggan ang mga plano sang mga Saksi ni Jehova. Ginpalapnag ang huringhuring nga agawon sang mga Saksi ni Jehova ang Cooktown, isara ang tanan nga mga otel kag mga sugalan, kag dilian ang pagbaligya sing tabako. Siempre, wala ini natabo, apang ang pagpasona liwat sang duta kag ang pagkuha sang kinahanglanon nga pahanugot para sa pagtukod nagbudlay. Ang gintalana nga tion para sa pagkuha sang tinukod nagahilapit na. Ginpangayo ang bulig sang State Government sang Queensland. (Ipaanggid ang Roma 13:2.) Ginhatag sa gilayon ang pahanugot sa paggamit sang duta sang gobierno, kag ginhatag ang permiso sa pagtukod. Bangod yara na sa ila ang tinukod kag ang duta, ano ang masunod?

Nag-abot ang grupo sang ginatos ka Saksi, eksperiensiado nga mga trabahador kag mga kabulig gikan sa lainlain nga bahin sang Estado sang Queensland, nga nagboluntaryo sang ila tion nga wala sing bayad kag batid sa madasig nga paghimo sang mga Kingdom Hall. May pinasahi nga mga hangkat ining proyekto: ang pagsaylo sang mga bahin sining duha ka panalgan nga ospital pakadto sa bag-o nga duog kag nian pagpasag-uli liwat sang tinukod. Ang panahon nga habagat nagahilapit, nagapasidaan sang mabaskog nga ulan. Matapos ayhan sa tion ang trabaho? Ang iban sa mga pumuluyo nagduhaduha. Apang, ang daw imposible para sa iban nahimo sing madali. Sang Abril 1986 ang tinukod ginsaylo kag ginpasag-uli sa iya orihinal nga katahom.

Ining tanan nga paghikot natalupangdan, subong ginapamatud-an sang mga komento sa Anglican Newsletter sa Cooktown. Nagasiling ini sing bahin: “Walay duhaduha nga mulayon ako, apang . . . tan-awa ang palibot sang mga simbahan kag talupangda kon daw ano ka diutay ang tawo kag tan-awa ang pihak nga grupo [mga Saksi ni Jehova] kag talupangda kon daw ano kadamo ang nagatambong sa ila mga pagtilipon . . . , nagakapuno sang mga Anglikano kag Romano Katoliko. . . . Nakahibalo bala kamo nga isa ka organisasyon . . . [ang] nagbakal sa daan nga Ospital kag gintukod ini liwat sa ginatawag nila nga simbahan bangod ang Eskwelahan tuman ka diutay para sa ila tanan? . . . Daw ano kita kahuyang, sa pagpahanugot nga matabo ini.”

Linibo ka mga turista ang nagakadto sa Cooktown kada tuig. Nagakawili sila sa matahom nga kagulangan kag sa Great Barrier Reef kag sa paghibalo sang maragtas sang lugar. Makagalanyat gid para sa mga bisita ang Captain Cook Museum. Kutob sang 1989 ang maragtason nga Cooktown Hospital sa iya bag-o nga papel bilang Kingdom Hall sang mga Saksi ni Jehova isa man sang panguna nga ganyat sa mga turista. Ang mga tindahan sang handumanan nagabaligya sang mga trapo sa pinggan kag mga T-shirt nga naimprintahan sang Cooktown Hospital-Kingdom Hall. Sa panahon nga madamo sing turista, mga anum ka gatos tubtob isa ka libo ka tawo ang nagabisita sa tinukod kada semana agod makita ang pinasahi nga 1879 nga arkitektura sini.

Ang magasin nga kilala karon nga Ang Lalantawan mahapos nga matigayon sang mga bisita. Nag-uswag ang sirkulasyon sining magasin kutob sang 1879 sa kapin sa 15 milyones ka kopya nga makaduha kada bulan sa 111 ka hambal. Nagatudlo ini sa mga indibiduwal sa saad sang Biblia nga mangin buhi ang pila sang kaliwatan sang 1914 sa pagsaksi sang pagpasag-uli sa katawhan sang maayo nga kahimtangan sa pisikal kag sa espirituwal. (Isaias 33:24) Ang bug-os nga duta pagahimuon nga paraiso sang minilyon ka kinabubut-on nga boluntaryo. (Salmo 37:29) Ngaa indi magduaw sa isa ka Kingdom Hall sa inyo lugar? Makasapo ka sang kapin pa ka bilidhon nga butang sang sa tanan nga bulawan nga ginmina sa rehiyon sang Cooktown.—Hulubaton 16:16.