Ang Maaga Magbugtaw
SA MGA hamungang kahoy sa Mediteraneo, ang kahoy nga almendro amo ang isa sang pinakatumalagsahon. Sa talipuspusan sang Enero ukon Pebrero—mas nauna sa kalabanan nga iban pa nga mga kahoy—nagabugtaw ini gikan sa iya pagtulog sa tigtulugnaw. Kag daw ano nga pagbugtaw! Ang bug-os nga kahoy puno sang mahumot nga rosas ukon puti nga mga bulak, ang naulihi daw kaangay sang bukay nga buhok sang tigulang.—Ipaanggid ang Manugwali 12:5.
Ginatawag sang dumaan nga mga Hebreo ang kahoy nga almendro nga “isa nga makabulugtaw,” nagapatuhoy sa iya maaga nga pagpamulak. Ginhatag ni Jehova ini nga kinaiya sa paglaragway sang isa ka importante nga mensahe. Sa pamuno sang iya ministeryo, si Jeremias ginpakitaan sa palanan-awon sing isa ka sanga sang almendro. Ano ang kahulugan sini? Si Jehova nagpaathag: “Nagapabilin ako nga nagabugtaw sa akon mga pulong sa paghimo sini.”—Jeremias 1:12.
Subong nga ang kahoy nga almendro ‘nagabugtaw’ sing maaga, si Jehova malaragwayon man nga “nagabugtaw sing maaga” sa pagpadala sang iya mga manalagna sa pagpaandam sa iya katawhan nahanungod sa mga resulta sang paglapas. (Jeremias 7:25) Kag wala sia magpahuway—‘nagpabilin [sia nga] nagabugtaw’—tubtob ang iya matagnaon nga pulong natuman. Gani sadtong 607 B.C.E., sa gintangdo nga tion, ang paghukom ni Jehova natuman sa apostata nga pungsod sang Juda.
Ginatagna sang Pulong sang Dios nga ang kaanggid nga paghukom mahanabo batok sa malaut nga sistema nga ginapuy-an naton. (Salmo 37:9, 10; 2 Pedro 3:10-13) Nagapatuhoy sa sinang hudisyal nga buhat, si manalagna Habacuc nagapasalig sa aton: “Kay ang palanan-awon naigo pa sa pinat-ud nga tion . . . Padayon nga hulata ini; kay sa pagkamatuod magaabot ini. Indi ini magpalantang.” (Habacuc 2:3) Ang matahom nga bulak sang almendro nga ginlaragway sa ibabaw nagapahanumdom sa aton nga si Jehova padayon nga magabugtaw nahanungod sa iya pulong sa pagtuman sini.
[Credit Line]
Pictorial Archive (Near Eastern History) Est.