Pagpangita sing Natago nga Bahandi

SANG 1848 ang bulawan natukiban sa Sutter’s Mill sa California, E.U.A. Sang 1849 linibo ang nagdugok sa sini nga duog sa paglaum nga magmanggaranon sa madali, kag sa amo nagsugod ang labing daku nga pagpangita sang mga tawo sing bulawan sa maragtas sang Estados Unidos. Sa sulod sang isa ka tuig, ang pinakamalapit nga pantalan, ang San Francisco, nagdaku halin sa isa ka diutay nga banwa padulong sa isa ka siudad sang 25,000 ka pumuluyo. Ang paglaum nga magmanggaranon sa hinali nangin isa ka mabaskog nga ganyat.

Nahibaluan ni Haring Solomon sang dumaan nga Israel kon daw ano kapagsik nagakutkot ang mga lalaki sing tinago nga bahandi, kag ginpatuhuyan niya ini sang magsulat sia: “Kon, dugang pa, magtuaw ka tungod sa paghangop kag magbayaw ka sang imo tingog tungod sa paghantop, kon padayon nga pangitaon mo ini subong sang pilak, kag padayon nga usisaon mo ini subong sang bahandi nga natago, nian mahangpan mo ang kahadlok kay Jehova, kag makita mo ang ihibalo gid sa Dios.”​—⁠Hulubaton 2:​3-5.

Madamo ikaw sing mahimo sa bulawan kag pilak, apang kapin ang imo mahimo sa paghangop kag paghantop. Magabulig ini sa imo sa paghimo sing husto nga mga desisyon, sa paglubad sing mga problema, sa paghimo sang pag-asawahay nga madinalag-on, kag sa pagsapo sing kalipay. (Hulubaton 2:​11, 12) Sing kaanggid, ang matuod nga ihibalo kag kaalam magabulig sa imo sa pagkilala sa imo Manunuga, sa paghangop sang iya mga katuyuan, kag sa pagtuman kag sa pagpahamuot sa iya. Indi ini mahatag sang bulawan.

Ang mga pulong sang Biblia matuod: “Ang kaalam pangapin subong nga ang kuwarta pangapin, apang ang pagkalabaw sang ihibalo amo ini: nga ang kaalam nagatipig sa kabuhi sang may iya sini.” (Manugwali 7:​12, New International Version) Samtang madamo ang nagadamgo nga magmanggaranon sa hinali, daw ano ka mas maalamon nga buksan ang Biblia kag magkutkot sing paghantop, paghangop, ihibalo, kag kaalam nga amo ang matuod nga manggad.