Sobra Bala ang Pagtamod sa mga Pagtughong sang Dugo?

Ang mga pagtughong sang dugo kinaandan na sa modernong medisina, apang takus gid bala ini sa ila reputasyon? Ano sa banta mo?

Sa The American Journal of Medicine (Pebrero 1993), si Dr. Craig S. Kitchens namangkot: “Sobra Bala ang Pagtamod sa mga Pagtughong sang Dugo?” Nagsiling sia nga ang mga manugbulong masami nga nagatulutimbang sing maayo kon bala ang benepisyo sang isa ka terapiya labi pa sa katalagman nga mahimo sini dalhon. Kamusta ang mga pagtughong?

Ginrepaso ni Kitchens ang ulihi nga mga ebidensia sang madamong mga katalagman nga gin-angot sa mga pagtughong, subong sang hepatitis, nahalitan nga sistema sa lawas batok sa balatian, napierde nga sistema sang organo, kag mga reaksion sang pagsaylo sing tisyu ukon organo. Ang isa ka pagtuon nga nagasumaryo sang “linaksa nga mga komplikasyon” halin sa mga pagtughong sang dugo “naghinakop nga ang tagsa ka pagtughong may 20% nga tsansa sa pila ka dimaayo nga reaksion, ang iban sini diutay apang ang iban makahalalalit,” makamamatay pa.

Apang, ang ginakunokuno nga mga benepisyo bala takus sa pag-atubang sinang mga katalagman?

Ginrepaso ni Dr. Kitchens ang 16 ka ginreport nga mga pagtuon nga nagadalahig sa 1,404 ka operasyon sa mga Saksi ni Jehova, nga wala magpatughong sang dugo bilang pagsunod sa sugo sang Biblia nga ‘maglihi sa dugo.’​—⁠Binuhatan 15:​28, 29.

Ang resulta? “Ang desisyon sang mga Saksi ni Jehova nga pasyente nga indi magpatughong sa dalagku nga operasyon daw nagadugang sing 0.5% tubtob 1.5% nga posibilidad sang kamatayon sa kabilugan nga katalagman sang pag-opera. Indi maathag kon daw ano kadamo nga balatian kag kamatayon ang nalikawan sini nga buhat, apang mahimo nga labaw ini sa katalagman sang indi magpatughong.” (Amon ang italiko.) Ang iya punto? Ang bisan anong medikal nga katalagman bangod sang pagdumili sa dugo mahimo nga kubos pa sangsa katalagman nga nadalahig sa pagpatughong sing dugo.

Busa, ang makatarunganon nga pamangkot ni ­Kitchens: “Kon ang indi pagtughong sa mga Saksi ni Jehova aktuwal nga nagaresulta sa malala diutay nga dugang pa nga balatian kag kamatayon kag malikawan ang daku nga gasto kag malubha nga mga komplikasyon, dapat bala magbaton ang mga pasyente sing diutay pa nga mga pagtughong?”

Yadtong nagadumili sing mga pagtughong pasad sa sinang ebidensia nagapanghikot man nahisuno sa mga panuytoy sang aton Manunuga.