Ang Makugi nga mga Cristiano sang Britanya

Kubos sa 10 porsiento sang 56 milyones ka tawo sang Britanya ang makugi nga mga Cristiano karon, suno sa The Economist. Sa isa ka kinaandan nga Domingo, wala pa sa apat ka milyon ka tawo ang nagasimba. Sa sini, 1.1 milyones lamang ang mga Anglikano. Apang, walay sapayan sang lapnag nga agnotisismo, ang Iglesia sang Inglaterra nagapadayon sang establisado nga papel sini subong ang relihion sang Estado. “Ang Britanya tinuig na nga indi isa ka Cristianong katilingban apang nagadumili sa pagbaton sang agnostisismo, sa kalabanan bangod sang sentimiento sa nagligad,” siling sang amo man nga magasin. Indi katingalahan nga ginapangayo sang modernong mga politiko kag mga pamantalaan ang pagkuha sang pribilehiyo sini subong establisado nga Iglesia, isa ka pagbungkag sang Iglesia-Estado nga kaangtanan.

“Ang kalibutan nga sekular gid, nga nagapangangkon nga Cristiano, amo ang pinakamalain sa mga kalibutan,” panalambiton ni Walter Bagehot, ika-19 nga siglo nga editor sang The Economist. Apang sang unang siglo C.E., si Jesucristo nagsiling nga ang iya mga disipulo ‘indi bahin sang kalibutan, subong nga sia indi bahin sang kalibutan.’ (Juan 17:16) Walay sapayan, ginpadala niya sila sa kalibutan agod ibantala ang Ginharian sang Dios. Amo man sa karon, ang mga Saksi ni Jehova sa bug-os nga kalibutan nakilal-an tungod sang makugi nga pagbantala sa “dayag kag sa pamalaybalay.”​—⁠Binuhatan 20:⁠20.

Ipaanggid sa mga Anglikano, ang 126,173 ka Saksi sa Britanya diutay sa kadamuon. Apang nagahinguyang sila sing mga 20 ka takna sa isa ka bulan sa pagtambong sa Cristianong mga miting. Dugang pa, sang 1992 ang kada Saksi nakahinguyang sing promedyo nga 16 ka dugang pa nga mga takna sa isa ka bulan nga nagabantala sa iban sang maayong balita sang Ginharian sang Dios, ang panguluhan nga magatukod sa ulihi sang isa ka matarong nga bag-ong kalibutan. (Mateo 24:14; 2 Pedro 3:13) Sa masunod nga tion nga magaduaw ang mga Saksi ni Jehova sa inyo puluy-an, mamati bala kamo sa ila maathag nga mensahe kag hibaluon kon ano ang nagapahulag sang ila kakugi?