Nagbuylog Sila sa Isa ka Nahiusa nga Paghiliutod

Agosto 7, 1993 sadto, sa Republican Stadium sa Kiev, Ukraine. Ang kapin sa 64,000 nga nagtambong nagtan-aw nga may kalangkag sang mag-abot ang tinion. Nian, bilang sabat sa duha ka makahulugan nga pamangkot, linibo ang nagsiling sing “Da!”, (“Huo!”) Sa sining paagi, ginpahayag nila sing dayag ang ila pagtuo kag dayon ginsimbuluhan ang ila dedikasyon kay Jehova nga Dios paagi sa pagpabawtismo sa isa sang anom ka pool sa istadyum.​—⁠Mateo 28:⁠19.

Sa amo, sa sining ikatlo nga adlaw sang internasyonal nga “Balaan nga Panudlo” nga Kombension sang mga Saksi ni Jehova, nagatan-aw ang tumalambong sing isa ka talalupangdon nga okasyon: 7,402 ang nabawtismuhan kag nangin bahin, indi sang isa ka nabahinbahin nga iglesia, kundi sang isa ka nahiusa nga bug-os kalibutan nga Cristianong kongregasyon.