Hupti Ang Imo Integridad Agod Mabuhi Ka!
“PAKAMALAUTA ang Dios kag manginmatay!” Ginalaragway sang aton panghapin sang magasin ang asawa ni Job, nga nagmulay sa iya paagi sa sadtong mga pulong. Mga 3,600 ka tuig na yadto nga nagligad. Apang ginapadaku sadtong mamulayon nga mga pulong sa matutom nga alagad sang Dios ang isa ka hulusayon nga nagaatubang sa katawhan tubtob karon. Daku nga kadulaan ang inagihan sang matutom nga si Job—ang iya kasapatan, ang iya puluy-an, ang iya napulo ka anak. Kag karon ang iya lawas ginpaantos sang isa ka madugay mag-ayo nga balatian, agod tilawan kon tubtob diin ang iya pagbatas. Ano ang rason? Luyag pamatud-an sang pangunang kaaway sang Dios kag sang tawo, nga si Satanas nga Yawa, ang iya panghangkat nga ang tawo indi makahupot sing integridad sa Dios sa idalom sang mabudlay gid nga pagtilaw.—Job 1:11, 12; 2:4, 5, 9, 10.
Sa karon, subong sang sa adlaw ni Job, “ang bug-os nga kalibutan yara sa gahom sang isa nga malauton,” si Satanas nga Yawa. (1 Juan 5:19) Sa pagkamatuod, labi pa gid nga matuod ini karon, kay karon “ang isa nga gintawag Yawa kag Satanas, nga nagapatalang sa bug-os napuy-an nga duta,” gintagbong gikan sa kalangitan paubos sa sini nga duta. (Bugna 12:9) Amo ini ang kabangdanan sang daku nga mga kasisit-an nga nagapaantos sa katawhan sa aton tion. Ang una nga inaway kalibutanon, nga nagdabdab sang 1914, nagtanda sang “isa ka pamuno sang mga kasakit” nga nagapadayon tubtob sa talipuspusan sining ika-20 nga siglo.—Mateo 24:7, 8.
Sa sining mapintas, malaut nga kalibutan, ginabatyag mo bala nga nalab-ot mo na ang limite sang imo pagbatas bilang tawo? Nagapalibog gid man bala ikaw, ‘May katuyuan bala ang kabuhi?’ Mahimo nga subong sina ang ginbatyag ni Job, apang wala gid sia madulai sing pagtuo sa Dios, bisan pa nakahimo sia sing mga sayop. Ginpabutyag niya ang iya determinasyon sa sining mga pulong: “Tubtob nga mapatay ako indi ko pag-isikway gikan sa akon ang akon integridad!” Nagsalig sia nga ‘mahibaluan sang Dios ang iya integridad.’—Job 27:5; 31:6.
Si Jesucristo, nga Anak mismo sang Dios, nagbatas man sing mga pagtilaw samtang yari sia sa duta. Ginsalakay ni Satanas si Jesus sa nanuhaytuhay nga mga paagi. Ginhimuslan niya ang pisikal nga mga kinahanglanon ni Jesus kag gintilawan ang Iya pagsalig sa Pulong sang Dios, subong sang natabo sa ibabaw sang bukid sang ginsulay ni Satanas si Jesus. (Mateo 4:1-11) Gingamo niya si Jesus paagi sa pagsutsot sa apostata nga mga escriba kag mga Fariseo kag sa ila mga sinakpan nga hingabuton sia, isumbong sing pasipala, kag maghimbon nga patyon sia. (Lucas 5:21; Juan 5:16-18; 10:36-39; 11:57) Mas malain pa ang ginhimo nila kay Jesus sangsa ginhimo sang tatlo ka dimatuod nga mga manuglugpay kay Job.—Job 16:2; 19:1, 2.
Sa hardin sang Getsemane, samtang nagahilapit si Jesus sa talipuspusan sining pagtilaw, ginsugiran niya ang iya mga disipulo: “Ang akon kalag masinulub-on sing tama, tubtob gid sa kamatayon.” Nian, “naghapa sia, nga nagapangamuyo kag nagasiling: ‘Amay ko, kon mahimo, paligara sa akon ining tagayan. Apang indi suno sa buot ko, kundi sa buot mo.’ ” Sang ulihi, sa usok sang pag-antos, bilang katumanan sang matagnaon nga mga pulong sang Salmo 22:1, si Jesus nagsinggit: “Dios ko, Dios ko, ngaa ginpatumbayaan mo ako?” Apang wala gid ginpatumbayaan sang Dios si Jesus bangod si Jesus naghupot sing himpit nga integridad sa Iya, nagahatag sing isa ka modelo nga pagasundon sang tanan nga matuod nga mga Cristiano. Ginpadyaan ni Jehova ang paghupot ni Jesus sing integridad paagi sa pagbanhaw sa iya kag pagbayaw sa iya sa pinakamataas nga kalangitan. (Mateo 26:38, 39; 27:46; Binuhatan 2:32-36; 5:30; 1 Pedro 2:21) Padyaan sang Dios ang tanan nga iban pa nga nagahupot man sing integridad sa iya.
Wala lamang maghatag ang integridad ni Jesus sing kompleto nga sabat sa panghangkat ni Satanas kundi ang iya paghalad sing himpit nga kabuhi bilang tawo nag-aman sing gawad, nga pasad sa sini ang nagahupot sing integridad nga mga tawo mahimo makatigayon sing kabuhi nga walay katapusan. (Mateo 20:28) Una, gintipon ni Jesus ang hinaplas nga “diutay nga panong” nga mangin kaupod niya nga mga manunubli sa Ginharian sang mga langit. (Lucas 12:32) Sa tapos sini, ginatipon ang “isa ka dakung kadam-an” agod makalampuwas sa “dakung kapipit-an,” kag makapanubli sing kabuhi nga walay katapusan sa bahin sang Ginharian sang Dios sa duta.—Bugna 7:9, 14-17.
Ang naghupot sing integridad nga si Job mangin isa sa binilyon nga minatay nga sa amo nga tion pagabanhawon agod mangin bahin sang malinong nga “bag-ong duta” nga katilingban. (2 Pedro 3:13; Juan 5:28, 29) Subong ginalaragway sa likod nga panghapin sang aton magasin, ang integridad ginpadyaan sang adlaw ni Job sang “ginpakamaayo [ni Jehova] ang kaulihian ni Job labi pa sang iya pamuno.” Nakatigayon sia sing espirituwal nga kusog subong isa nga “wala makasala sa iya mga bibig.” Gindugangan sang Dios ang iya kabuhi sing 140 pa ka tuig. Sa materyal, ginhatagan niya si Job sing doble sa iya anay ginapanag-iyahan, kag si Job “nakatigayon sing pito ka anak nga lalaki kag tatlo ka anak nga babayi,” ang iya mga anak nga babayi ginkabig nga amo ang pinakamatahom sa bug-os nga duta. (Job 2:10; 42:12-17) Apang ini tanan nga kabuganaan isa lamang ka halimbawa sang mga pagpakamaayo nga maagom sang mga nagahupot sing integridad sa Paraiso sang “bag-ong duta.” Ikaw man makaambit sa sina nga kalipay, subong ipaathag sang masunod nga mga pahina!
[Retrato sa pahina 4]
Nagpahamtang si Jesus sing himpit nga huwaran subong manughupot sing integridad