Pagkamatugahon—isa ka Maalwan nga Dulot Halin sa Dios

SI Jehova nagakalipay sa iya mga buhat sang pagpanuga. (Salmo 104:31) Ginpahayag ang iya tudok nga kaayawan sa pagpanuga sa Genesis 1:31: “Kag nakita sang Dios ang tagsa ka butang nga nahimo niya kag, yari karon! tama gid kaayo.”

Wala ginhuptan ni Jehova ining kalipay sa iya lamang kaugalingon. Ginhatagan niya si Jesus sing pribilehiyo nga mangin ahente, ukon instrumento, nga paagi sa iya ang tanan iban pa nga butang gintuga. (Juan 1:3; Colosas 1:​16, 17) Subong “isa ka pangulo nga manugpangabudlay,” si Jesus ‘nagakasadya man sing dayon sa atubangan ni [Jehova].’​—⁠Hulubaton 8:​30, 31.

Apang ang ikasarang sa pagpanuga wala lamang nagaluntad sa langit. “Gindesinyo ini sa nasulod nga bahin sang katawhan,” sulat ni Eu­gene Raudsepp sa iya libro nga How Creative Are You? Indi ini natabuan lamang, kay ang tawo ginhimo sa larawan sang Dios. (Genesis 1:26) Busa ginhatagan ni Jehova ang katawhan sing makaalayaw nga ikasarang sa pagtuga.​—⁠Santiago 1:⁠17.

Indi katingalahan, nian, nga ginapadaku sang Biblia ang pag-amba, pagsaot, paglala, pagluto, pagpamanday, kag iban pa nga mga paninguha sa pagkamatugahon. (Exodo 35:​25, 26; 1 Samuel 8:13; 18:​6, 7; 2 Cronica 2:​13, 14) Si Bezalel, nga isa ka panday, naggamit sang iya kinaadman sa “pagpadugi sing sinampaton nga mga buluhaton” sa pagbulig tukod sing tabernakulo. (Exodo 31:​3, 4) Ang manugbantay sing hayop nga si Jabal mahimo nga amo ang imbentor sang layang-layang, isa ka mapuslanon nga imbento para sa mga nagapanlakatan. (Genesis 4:20) Si David indi lamang isa ka manuglanton ukon manugkomposo, kundi isa man ka manughimo sing bag-o nga mga instrumento sa musika. (2 Cronica 7:6; Salmo 7:17; Amos 6:⁠5) Mahimo nga si Miriam ang nagtudlo sing masadya nga sinaot sang ginsaulog sang mga Israelinhon ang ila kaluwasan sa Mapula nga Dagat.​—⁠Exodo 15:⁠20.

Ang pagkamatugahon masami nga mapuslanon sa pagsakdag sa matuod nga pagsimba. Si Jesus matugahon nga naggamit sing mga ilustrasyon kag mga leksion gikan sa mga butang ukon kahimtangan sa pagpaalinton sang iya mensahe. Ginapalig-on man ang iya mga sumulunod nga ‘magpangabudlay sing lakas sa pagwali kag pagpanudlo.’ (1 Timoteo 5:17) Huo, ang ila pagpanudlo indi lamang isa ka rutina. Isa ini ka arte nga nagakinahanglan sing matugahon nga mga pamaagi sa pagpanudlo. (Colosas 4:⁠6) Importante ini labi na kon ginatudluan ang mga kabataan.​—⁠Deuteronomio 6:​6, 7; Efeso 6:⁠4.

Sa amo, ginapaambit ni Jehova sa iban ang kalipay nga ginahatag sa iya sang pagpanuga. Isa gid ka maalwan nga dulot!